1. Ẹvẹ u fo nọ ma re rri uvẹ nọ Jihova ọ kẹ omai nọ ma rọ lẹ sei na?

 RE MA lẹ se Ọghẹnẹ nọ ọ ma odhiwu gbe akpọ na yọ uvẹ ulogbo nọ u te omai obọ. Dai roro iei. Ma sae ta oware nọ o rrọ omai eva kẹ Jihova evaọ oria kpobi nọ ma rrọ, jẹ rehọ ẹvẹrẹ kpobi nọ u je omai rọ lẹ sei. U du gwọlọ nọ ma re mi uvẹ tao ho. Ma sae lẹ sei nọ a te fi omai họ ehwa evaọ ọspito hayo nọ ma tẹ rrọ uwou-odi. Oria kpobi nọ ma jọ lẹ se Ọsẹ obọ odhiwu mai na, ma riẹ nọ ọ rẹ gaviezọ kẹ omai. Ma rẹ rọ uvẹ nana zaro vievie he.

2. Ẹvẹ ma rọ riẹ nọ Devidi ọ rọ olẹ zaro ho?

² Devidi ovie na ọ rọ olẹ zaro ho. Ọ jọ ole riẹ jọ so nọ: “Jọ olẹ mẹ o jọ wọhọ insẹnse nọ a ruẹrẹ fihọ aro ra.” (Ol. 141:1, 2) Evaọ oke Devidi, insẹnse nọ izerẹ na a jẹ hae mahe, a jẹ hai ru ai wowoma gaga. (Ọny. 30:34, 35) Ẹme nọ Devidi ọ ta na u dhesẹ nọ taure ọ tẹ te lẹ se Ọsẹ obọ odhiwu riẹ, ọ rẹ romatotọ roro ẹme na ziezi. Epọvo na ma gwọlọ ru re. Ma gwọlọ nọ elẹ mai e rẹ were Jihova.

3. Oghẹrẹ vẹ u fo nọ ma rẹ rọ lẹ se Jihova, kọ fikieme?

³ Ma tẹ be lẹ se Jihova, ma re ru wọhọ ẹsenọ ma bi lele ọhwa mai ta ẹme he. Ma rẹ romakpotọ lẹ sei avọ adhẹẹ odidi. Eruẹaruẹ nọ Aizaya, Izikiẹl, Daniẹl gbe Jọn a ruẹ i dhesẹ nọ Ọghẹnẹ ọ rrọ ruaro. Dede nọ oware ovona aikpobi a ruẹ hẹ, u wo oware jọ nọ eruẹaruẹ rai na e jẹ rrọ oghẹrẹ ọvona. Eruẹaruẹ na kpobi i dhesẹ nọ Jihova yọ Ovie ologbo. Aizaya ọ “ruẹ Jihova nọ ọ keria agbara-uvie okpekpehru.” (Aiz. 6:1-3) Izikiẹl ọ ruẹ Jihova nọ ọ keria akẹkẹ ologbo owowoma jọ, yọ “elo ọnwranwra jọ ọ wariẹ  e riẹ họ wọhọ orọ usi-ame.” (Izik. 1:26-28) Daniẹl ọ ruẹ “Ọnọ Ọ Rrọ no Anwae Ze na” nọ o ku iwu efuafo họ yọ ebruerae i bi no agbara-uvie riẹ ze. (Dan. 7:9, 10) Jọn ọ ruẹ Jihova nọ ọ keria agbara-uvie, yọ oware jọ nọ o wọhọ usi-ame nọ u wo ekọlọ igrini wọhọ ẹmerald ọ wariẹ e riẹ họ. (Evia. 4:2-4) Ma te roro kpahe epanọ Jihova ọ rro te, ma rẹ riẹ nọ uvẹ ulogbo ọ kẹ omai na re ma lẹ sei yọ ma rẹ lẹ sei avọ adhẹẹ. Rekọ eme u fo nọ ma rẹ lẹ kpahe?

4. Eme Jesu ọ kake fodẹ evaọ olẹ nọ ọ rrọ Matiu 6:9, 10 na, kọ eme u fo nọ ma rẹ hai ru?

⁴ Se Matiu 6:9, 10. Evaọ oke nọ Jesu ọ jẹ kẹ ovuẹ obọ ugbehru na, o wuhrẹ ilele riẹ epanọ a rẹ rọ lẹ, Ọghẹnẹ ọ vẹ sai yo olẹ rai. Nọ ọ ta nọ, “fikiere, enẹ wha rẹ lẹ” no, ọ tẹ fodẹ eware jọ nọ i wuzou gaga nọ i kiekpahe oreva Jihova. Eye họ, epanọ a ti ro ru odẹ Ọghẹnẹ fo, epanọ Uvie Ọghẹnẹ o te rọ ze, o vẹ te raha ewegrẹ Ọghẹnẹ kpobi no, gbe eware iwoma nọ Ọghẹnẹ o ti ru fihọ otọakpọ na je ru kẹ ahwo-akpọ. Oreva Ọghẹnẹ ọye. Ma tẹ be hae lẹ kpahe eware nana, yọ ma bi dhesẹ nọ o rrọ omai oja inọ oreva Ọghẹnẹ o re rugba.

5. Kọ o thọ re ma lẹ se Ọghẹnẹ kpahe eware nọ ma gwọlọ?

⁵ Nọ Jesu ọ fodẹ eware yena no, ọ tẹ fodẹ eware efa jọ nọ i dhesẹ nọ o thọ họ re ma lẹ kpahe eware nọ ma gwọlọ nọ Ọghẹnẹ o ru kẹ omai. Ma sae lẹ re Jihova ọ kẹ omai emu okpẹdoke mai, re ọ rọvrẹ omai, re o fiobọhọ kẹ omai re ma siọ edawọ ba ekie kẹ, gbe inọ ọ thọ omai no obọ oyoma na. (Mat. 6:11-13) Ma tẹ be hae lẹ se Jihova re o ru eware nana kẹ omai, yọ ma bi dhesẹ nọ ọye ma rẹroso, yọ ma gwọlọ ru eva were iẹe.

6. Kọ eware nọ a fodẹ evaọ olẹ Olori na ọvo ma rẹ lẹ kpahe? Ru ei vẹ.

⁶ Orọnọ Jesu ọ gwọlọ nọ ẹsikpobi nọ ma tẹ be lẹ, nwanọ eme nọ ọ ta evaọ olẹ riẹ na, kọ eye ma rẹ ta ha. U wo oke ofa nọ Jesu ọ jẹ rọ lẹ, yọ eware nọ ọ gwọlọ nọ Ọghẹnẹ o ru kẹe evaọ okioke yena, eye ọ lẹ kpahe. (Mat. 26:39, 42; Jọn 17:1-26) Onana u dhesẹ nọ ma sae lẹ se  Jihova kpahe eware kpobi nọ ma gwọlọ nọ o ru kẹ omai. Ma tẹ gwọlọ ru oware jọ, ma sae lẹ se Ọghẹnẹ re ọ kẹ omai areghẹ, re ma sai ru oware nọ u fo. (Ol. 119:33, 34) A tẹ kẹ omai iruo jọ nọ ma riẹ tere he, ma sae yare Jihova re o fiobọhọ kẹ omai wo orimuo, ma vẹ sae riẹ iruo na je ru ei ziezi. (Itẹ 2:6) Esẹgbini a rẹ lẹ roro emọ rai, emọ a vẹ jẹ lẹ roro esẹgbini rai. Yọ u fo nọ mai kpobi ma rẹ lẹ roro ahwo nọ ma bi wuhrẹ Ebaibol gbe enọ ma be ta usi uwoma kẹ. Rekọ orọnọ ma tẹ gwọlọ yare oware jọ mi Jihova ọvo ma rẹ rọ lẹ hẹ.

7. Fikieme u ro fo re ma hai jiri Jihova nọ ma tẹ be lẹ sei?

⁷ U fo nọ ma rẹ hai jiri Jihova nọ ma tẹ be lẹ sei keme o fo ejiro. Jihova o “woma” yọ ọ “ruẹrẹ oma kpahe re [ọ] rọvrẹ.” Ọ tẹ jẹ rrọ Ọghẹnẹ “ohrọ-oriọ avọ ọdawẹ, ọnọ ọ rẹ kaki mu ofu hu yọ ọ vọ avọ uyoyou nọ o rẹ hiẹ hẹ gbe ọtẹruo.” (Ol. 86:5, 15) U fo nọ ma rẹ hai jiri Jihova keme o woma hrọ yọ o bi ru eware iwoma buobu kẹ omai.

8. Eware jọ vẹ ma rẹ rọ fiki rai yere Jihova? (Olezi 104:12-15, 24)

⁸ U te no ejiri nọ ma re jiri Jihova no, ma re je yere iei rọkẹ emamọ eware nọ o ru kẹ omai. Wọhọ oriruo, ọ ma oghoghẹrẹ idodo buobu nọ i wo ọvuọ ekọlọ rai, oghoghẹrẹ emu e dafia nọ ma rẹ re, yọ aikpobi na ọvuọ awere riẹ. O te je ru nọ ma ro wo inievo buobu evaọ ukoko na nọ i you omai. U te no eware nana no, Jihova Ọsẹ oyoyou mai na o ru eware efa buobu kẹ omai re eva e hae were omai. U fo nọ ma rẹ hai yere iei kẹ eware nana kpobi. (Se Olezi 104:12-15, 24.) U te no ere no, Jihova ọ be rọ Ẹme riẹ wuhrẹ omai noke toke, o te je ru nọ ma ro wo obọdẹ ẹruore. Yọ enana họ eware nọ e mai wuzou. U fo nọ ma rẹ hai yere iei kẹ eware nana.

9. Eme o sai fiobọhọ kẹ omai hae kareghẹhọ yere Jihova? (1 Ahwo Tẹsalonika 5:17, 18)

⁹ Ẹsejọ eware nọ Jihova o ru kẹ omai no e rẹ thọrọ omai ẹro no. Kọ eme ọ rẹ sai fiobọhọ kẹ omai hae kareghẹhọ ae? Whọ sai kere eware jọ nọ whọ lẹ se Jihova  inọ o ru kẹ owhẹ fihọ obe. Whọ vẹ hai rri obe na je roro kpahe oghẹrẹ nọ Ọghẹnẹ o ro ru eware nọ whọ yare na kẹ owhẹ no. Whọ jẹ ruẹ nọ Ọghẹnẹ o yo olẹ ra no, whọ vẹ lẹ sei je yere iei. (Se 1 Ahwo Tẹsalonika 5:17, 18.) Dai roro iei. Nọ ma te ru oware kẹ ohwo, ohwo na o je yere omai, eva e rẹ were omai. Ere ọvona re, nọ ma tẹ be hai yere Jihova rọkẹ epanọ ọ be rọ kuyo elẹ mai, eva e rẹ were iẹe. (Kọl. 3:15) Rekọ obọdẹ oware ofa jọ o riẹ nọ ma rẹ rọ fiki riẹ yere Jihova. Eme ọye?

10. Wọhọ epanọ 1 Pita 2:21 o ta, oware jọ vẹ o rẹ lẹliẹ omai hai yere Jihova?

¹⁰ Se 1 Pita 2:21. U fo nọ ma rẹ hai yere Jihova nọ o ro vi Jesu ze ti wuhrẹ omai. Ma tẹ romatotọ se iku Jesu je wuhrẹ kpahe iẹe, ma rẹ riẹ eware buobu kpahe Jihova. Ma rẹ jẹ riẹ epanọ ma sai ro ru eva were iẹe ziezi. U te no ere no, ma te fi ẹrọwọ họ idhe ẹtanigbo Jesu, ma rẹ jọ egbẹnyusu ekpekpe Jihova.—Rom 5:1.

11. Fikieme ma rẹ rọ lẹ evaọ odẹ Jesu?

¹¹ Ma rẹ hai je yere Jihova nọ o ro ru re ma hae lẹ sei evaọ odẹ Jesu. Jesu họ ohwo nọ Jihova ọ rẹ rọ kuyo elẹ mai. Nọ ma tẹ lẹ se Jihova evaọ odẹ Jesu, Jihova ọ rẹ gaviezọ kẹ elẹ mai, o ve je ru oware nọ ma yare riẹ na kẹ omai. Jesu ọ ta nọ: “Oware kpobi nọ wha yare evaọ odẹ mẹ, me ti ru ei, re Ọsẹ na ọ sai wo oruaro ẹkwoma Ọmọ na.”—Jọn 14:13, 14.

12. Eme ọfa o rẹ lẹliẹ omai yere Jihova rọkẹ Ọmọ riẹ nọ o vi ze na?

¹² Jihova ọ be rọvrẹ omai kẹhẹ na, fiki idhe ẹtanigbo Jesu Kristi. Ebaibol ọ ta nọ Jesu yọ “ozerẹ okpehru . . . yọ ọ keria obọze agbara-uvie Erumeru na evaọ obọ idhiwu na.” (Hib. 8:1) Jesu ọ tẹ jẹ rrọ “ofiobọhọ nọ ọ rrọ kugbe Ọsẹ na.” (1 Jọn 2:1) U te no ere no, Jesu Ozerẹ Okpehru mai na, o re roro kẹ omai evaọ oria nọ ma jọ ga ha, yọ ọ rẹ “yare Ọghẹnẹ kẹ omai.” (Rom 8:34; Hib. 4:15) Eva e were omai gaga nọ Ọghẹnẹ ọ rọ rehọ Jesu mu Ozerẹ Okpehru mai. Mai erahaizi, fikiere Jesu o gbe whu kẹ omai hi, Jihova ọ hai ti yo elẹ mai hi. Ma sae ruẹ unu yere Jihova ha rọkẹ obọdẹ okẹ nana nọ ọ kẹ omai na, koyehọ Ọmọ oyoyou riẹ nọ o vi ze na.

13. Evaọ aso urere taure Jesu o te ti whu, eme o ru nọ u dhesẹ nọ o you ilele riẹ gaga?

¹³ Evaọ aso urere taure Jesu o te ti whu, ọ lẹ kẹ ilele riẹ gaga. Ọ lẹ nọ jọ Jihova ọ “sẹro rai fiki omuomu na.” (Jọn 17:15) Evaọ oke yena, dede nọ Jesu ọ riẹ nọ ebẹbẹ buobu i bi ti tei, ọ jẹ ruawa kpahe ilele riẹ ghele. O gine you ilele na gaga!

14. Eme ma re ru nọ u re dhesẹ nọ ma you inievo ukoko na gaga?

¹⁴ Nọ ma tẹ be lẹ, u fo nọ ma rẹ rọ aro kele Jesu. Orọnikọ eware nọ ma gwọlọ nọ Ọghẹnẹ o ru kẹ omai ọvo ma rẹ lẹ kpahe he. Ma rẹ hae jẹ lẹ roro inievo ukoko na. Ma te bi ru ere, kiyọ ma bi dhesẹ nọ ma you inievo mai wọhọ epanọ Jesu ọ ta nọ ma ru. Ma rẹ jẹ rọ ere dhesẹ kẹ Jihova nọ ma you inievo ukoko na gaga. (Jọn 13:34) Ma tẹ be hae lẹ roro inievo ukoko na, u re fiobọhọ gaga. Ebaibol ọ ta nọ “olẹ ayare-ọgaga ohwo okiẹrẹe u re ru iruo gaga.”—Jem. 5:16.

15. Fikieme u ro fo re ma hae lẹ roro inievo ukoko na?

 ¹⁵ U fo nọ ma rẹ hae lẹ roro inievo na keme oghoghẹrẹ ebẹbẹ buobu i bi te ai. Ejọ e be mọ, eware okpẹtu e via kẹ ejọ, a bi fi ẹmo evaọ ewho nọ inievo jọ a rrọ, a bi kpokpo inievo jọ, yọ oghoghẹrẹ ebẹbẹ efa i bi te inievo efa jọ. Ma rẹ hae lẹ roro inievo nana re Jihova o fiobọhọ kẹ ae thihakọ. Ma sae jẹ lẹ roro inievo nọ e be hae dhogbo bru inievo nọ eware okpẹtu e via kẹ. Ẹsejọhọ whọ riẹ oniọvo jọ nọ oghẹrẹ ẹbẹbẹ jọ evaọ usu enọ ma fodẹ na ọ rrọ oma. Whọ sai se odẹ oniọvo otiọye na nọ whọ tẹ be lẹ. Ma tẹ be hae lẹ re Jihova o fiobọhọ kẹ inievo na thihakọ, yọ ma bi dhesẹ nọ ma you rai no eva ze.

16. Fikieme u ro fo re ma hae lẹ roro inievo nọ i wo iruo buobu evaọ ukoko na?

¹⁶ Ma tẹ be hae lẹ roro inievo nọ i wo iruo buobu evaọ ukoko na, o rẹ were ae, yọ onana u re fiobọhọ kẹ ae. Nwanọ ere Pọl ukọ na ọ ta. O kere nọ: “Wha lẹ roro omẹ re, re a ruẹse kẹ omẹ eme nọ mẹ rẹ ta okenọ me te rovie unu mẹ, mẹ vẹ sae ta ẹme ududu kpahe oware udidi ọrẹri usi uwoma na.” (Ẹf. 6:19) Nẹnẹ na, ma wo inievo buobu nọ i bi ru iruo gaga re eware e sae riẹ nya evaọ ukoko na. Ma tẹ be hae lẹ inọ jọ Jihova o fiobọhọ kẹ ae, yọ ma bi dhesẹ nọ ma you rai.

17-18. Oke vẹ a sae rọ vuẹ omai nọ ma lẹ, kọ eme u fo nọ ma rẹ kareghẹhọ?

¹⁷ Ẹsejọ nọ ma te lele oniọvo jọ nyai wuhrẹ ohwo Ebaibol hayo nọ ma tẹ rrọ ewuhrẹ, a rẹ vuẹ omai nọ ma lẹ. Wọhọ oriruo, nọ inievo-emetẹ ivẹ a tẹ nyai wuhrẹ ohwo Ebaibol, ọnọ o bi wuhrẹ ohwo na ọ sae vuẹ oniọvo nọ o kiọkọ na nọ jọ ọ lẹ. Ẹsejọhọ oniọvo nọ avọ iẹe a gbẹ nya na ọ riẹ ohwo nọ a nyai wuhrẹ na tere he. Fikiere o te mai woma re ọ lẹ olẹ ekuhọ keme ẹsiẹe ọ te mae rọ riẹ oware nọ ọ rẹ lẹ kpahe.

¹⁸ Nọ a tẹ rrọ obọ ewuhrẹ hayo nọ a te kokohọ kẹ usi uwoma ota, nọ a jẹ vuẹ owhẹ nọ whọ lẹ, u fo nọ whọ rẹ kareghẹhọ oware nọ whọ be rọ fiki riẹ lẹ na. A rẹ rọ olẹ whọku inievo ukoko na hayo rọ  uvẹ yena woro eware jọ kẹ ukoko na ha. Evaọ ẹsibuobu, iminiti isoi a re fihọ nọ a rẹ rọ so ole jẹ lẹ. Fikiere u fo re oniọvo nọ ọ te lẹ ọ daoma re ọ siọ eme ibuobu ba ẹta evaọ olẹ na, maero nọ o tẹ rrọ olẹ emuhọ ewuhrẹ na.—Mat. 6:7.

19. Eme ma re ru re ma sai kru ẹrọwọ mai evaọ oke uye ulogbo na?

¹⁹ U fo re ma se olẹ gboja vi epaọ anwẹdẹ nọ ekuhọ akpọ na ọ be kẹle gaga no na. Jesu ọ ta nọ: “Wha jaja aro vi, wha hae lẹ olẹ ayare-ọgaga ẹsikpobi re wha sae va eware nana kpobi nọ e te seba ẹvia ha na abọ.” (Luk 21:36) Ma tẹ be hae lẹ ẹsikpobi, u re ru nọ ẹrọwọ mai ọ rẹ rọ jọ gaga. Nọ uye ulogbo na u je ti muhọ, ma vẹ sai kru ẹrọwọ mai.

20. Eme ma re ru re elẹ mai e wọhọ insẹnse nọ i bi gbo ore awere?

²⁰ Eme ma wuhrẹ no na? Ma wuhrẹ nọ ma rẹ rọ olẹ zaro vievie he. U fo nọ ma rẹ hae lẹ kẹ oware nọ o mai wuzou koyehọ epanọ oreva Jihova u re ro rugba. Ma rẹ hai je yere Jihova rọkẹ epanọ o ro vi Ọmọvo riẹ ze gbe eghale nọ Uvie riẹ o te wha ze. Ma rẹ hae jẹ lẹ roro inievo ukoko na. U te no ere no, ma rẹ lẹ re Jihova ọ kẹ omai eware nọ ma rẹ rọ rẹrote omamai je fiobọhọ kẹ omai re ẹrọwọ mai ọ ga ziezi. Ma tẹ be hae romatotọ roro kpahe ẹme nọ ma te ta taure ma tẹ te lẹ, yọ ma bi dhesẹ nọ ma rri olẹ vo vievie he. Ma te bi ru ere, elẹ mai e te “were” Jihova, wọhọ insẹnse nọ i bi gbo ore awere su ei.—Itẹ 15:8.