Kọ who se hayo wuhrẹ oware jọ no ẹdẹ jọ, rekọ re whọ kareghẹhọ oware nọ who se na edadakrida? O rẹ via kẹ omai kpobi. Rekọ eme ma re ru re ma sae kareghẹhọ ae lọlọhọ? Wariẹ roro kpahe igogo eware nọ who wuhrẹ na.

Nọ who te bi ru uwuhrẹ omobọ ra, hai dhizu ẹmẹsejọ re who roro kpahe ugogo oware nọ who wuhrẹ no oria na ze. Pọl ukọ na ọ ta kẹ inievo na evaọ ileta riẹ nọ, “Whaọ ugogo ẹme nọ ma be ta na ọna.” (Hib. 8:1) Pọl ọ ta ẹme yena re inievo na a sae riẹ otọ eme nọ ọ be ta kẹ ae na gbe oware nọ o lẹliẹ e riẹ ta ẹme na.

Taure who te ti ku uwuhrẹ ra họ, whọ sae rọ iminiti ikpe roro kpahe igogo eware nọ who wuhrẹ no. Rekọ o tẹ via nọ whọ kareghẹhọ eware nọ who wuhrẹ na ziezi hi, wariẹ rri uzoẹme na. Who ve je se uhie-ẹme ọsosuọ evaọ edhe-ẹme ọvuọvo re whọ sae kareghẹhọ. Yọ otẹrọnọ who wuhrẹ oware okpokpọ no uwuhrẹ ra na ze, daoma rọ eme obọra rọ ta oware nọ who wuhrẹ na. Evaọ okenọ who ti ro roro kpahe eware nọ who wuhrẹ na, whọ te kareghẹhọ eware nọ who wuhrẹ na. Yọ eware na i ti vẹ owhẹ ẹro viere. Whọ vẹ te jẹ riẹ epanọ whọ sai ro ru lele eware nọ who se evaọ uzuazọ ra.