UZOẸME UWUHRẸ 43
OLE AVỌ 90 Ma rẹ Tuduhọ Ohwohwo Awọ
Oware nọ Who re Ru nọ Who te Wo Avro
“Wha vuhu eware kpobi mu.”—1 TẸS. 5:21.
OWARE NỌ A JARIẸ TA KPAHE
Oware nọ ma re ru nọ ma te wo avro nọ o sai ru nọ ẹrọwọ mai ọ gbẹ ga tere he.
1-2. (a) Avro vẹ o rẹ sae jọ idibo Jihova udu ẹsejọ? (b) Eme ma te ta kpahe evaọ uzoẹme nana?
OHWO kpobi o re wo avro a ẹsejọ, te ọmaha te ọkpako. Wọhọ oriruo, dae rehọ iẹe nọ u wo ọmọ Osẹri Jihova jọ nọ ọ be jọ udu riẹ roro sọ Jihova ọ be daezọ riẹ. Ẹsejọhọ oyena u ti ru nọ ọ te gbẹ rọ gwọlọ họ-ame he. Hayo ma rehọ iẹe nọ oniọvo-ọmọzae jọ ọ romakẹ iruo Jihova evaọ okenọ ọ gbẹ jọ uzoge, viukpenọ ọ rẹ gwọlọ epanọ o re ro fe. Whaọ enẹna ọ be kpako no, yọ u te no ugho nọ ọ sae rọ kuọ uviuwou riẹ no, o wo ugho ọfa fihọ oria ọfa ha. Ẹsejọhọ ọ sai roro sọ emamọ oware o ru nọ ọ rọ rehọ oke uzoge riẹ ru iruo kẹ Jihova na. Hayo ma dae rehọ iẹe nọ u wo oniọvo-ọmọtẹ jọ nọ ọ kpakọ no nọ o gbe wo ẹgba tere he. Ọ gbẹ be sai ru eware jọ nọ o je ru vẹre he. Yọ oyena o sae kẹe uye. Kọ owhẹ omara? Kọ whọ nọ omara no ẹdẹ jọ inọ: ‘Kọ Jihova ọ be ginẹ daezọ mẹ? Kọ eware nọ mẹ kpairoro vrẹ re mẹ sai ru iruo kẹ Jihova ziezi na uvrẹvru? Kọ me gbe tube wiruo jọ kẹ Jihova?’
2 Nọ ma te bi roro iroro itieye na evaọ udu mai, o rẹ sai ru oma lọhọ omai nọ ma be gọ Jihova na. Ma te jọ uzoẹme nana ruẹ epanọ Ebaibol ọ sai ro fiobọhọ kẹ omai nọ ma te bi roro nọ Jihova ọ be daezọ mai hi, hayo nọ ma te bi roro nọ ma ru thọ nọ ma rọ kpairoro vrẹ eware jọ re ma sae gọ Jihova ziezi. Ma te jẹ ruẹ epanọ Ebaibol ọ sai ro fiobọhọ kẹ omai nọ ma te bi roro nọ ma gbe wiruo kẹ Jihova ha fikinọ ma gbẹ be sai ru te epaọ ọsosuọ họ.
OWARE NỌ MA RE RU NỌ MA TE WO AVRO EVAỌ UDU MAI
3. Oware jọ vẹ ma re ru re ma si avro no udu?
3 Nọ ma te wo onọ jọ nọ o be lẹliẹ omai wo avro evaọ udu mai, u fo re ma jọ Ẹme Ọghẹnẹ gwọlọ uyo onọ na. Nọ ma te ru ere, o rẹ lẹliẹ usu mai kugbe Jihova ga vi epaọ ọsosuọ. Yọ u re ru nọ ma re ro fievahọ Jihova viere, u ve je ru nọ ma sai ro “dikihẹ ga evaọ ẹrọwọ na.”—1 Kọr. 16:13.
4. Ẹvẹ ma sai ro “vuhu eware kpobi mu”? (1 Ahwo Tẹsalonika 5:21)
4 Se 1 Ahwo Tẹsalonika 5:21. Ebaibol ọ vuẹ omai evaọ etẹe na nọ joma “vuhu eware kpobi mu.” Kọ ẹvẹ ma sai ro ru ei? Otẹrọnọ oware jọ nọ ma rọwo o nwani mu omai ẹro tere he, joma se Ebaibol re ma riẹ oware nọ ọ ta kpahe iẹe. Wọhọ oriruo, dae rehọ iẹe nọ uzoge jọ o bi roro nọ Jihova ọ be daezọ riẹ hẹ. Kọ who roro nọ u fo re ọ nwane kpairoro vrẹ oware yena nọ o bi roro na? Ijo, u fo re ọ daoma riẹ oghẹrẹ nọ Jihova o rri oware nọ ọyomariẹ o bi roro na. O te bi ru ere, kiyọ ọ be daoma “vuhu eware kpobi mu.”
5. Ẹvẹ ma sai ro “yo” ẹme nọ Jihova ọ be ta kẹ omai nọ ma te wo avro?
5 Re ma sai “yo” ẹme nọ Jihova ọ be ta kẹ omai, ma re se Ẹme Ọghẹnẹ, koyehọ Ebaibol na. Rekọ re ma sae riẹ oghẹrẹ nọ Jihova o rri onọ jọ nọ o be lẹliẹ omai wo avro, orọnikọ thakpinọ ma se Ebaibol ọvo ho. U fo re ma se kpahe oware nọ o be kẹ omai uye na dẹẹ. Ma sae jọ ebe ukoko na kiẹ kpahe oware nọ o be kẹ omai uye na. (Itẹ 2:3-6) Ma rẹ lẹ se Jihova re o fiobọhọ kẹ omai nọ ma be kiẹ na, re ma sae riẹ oware nọ ọ ta kpahe ẹme na. U je no oyena no, ma vẹ gwọlọ eria Ebaibol nọ e sai fiobọhọ kẹ omai nọ e ta kpahe oware nọ o be kẹ omai uye na. Oware ofa jọ nọ o sai fiobọhọ kẹ omai họ, nọ ma te se iku ahwo jọ evaọ Ebaibol nọ oware utioye na o via kẹ no.
6. Ẹvẹ ewuhrẹ nọ ma rẹ nya o sai ro fiobọhọ kẹ omai si avro no udu?
6 Ma re “yo” ẹme nọ Jihova ọ be ta kẹ omai re nọ ma te kpohọ ewuhrẹ. Nọ ewuhrẹ o gbe bi vo omai hi, ma sae jọ evuẹ nọ inievo na a be kẹ, hayo iyo nọ a be kẹ yo ẹme jọ nọ o sai fiobọhọ kẹ omai si avro no udu. (Itẹ 27:17) Joma ta kpahe eware jọ nọ e sae lẹliẹ avro jọ omai udu. Ma vẹ te jẹ ruẹ epanọ ma sai ro si avro no udu mai.
NỌ WHO TE WO AVRO INỌ JIHOVA Ọ BE DAEZỌ RA HA
7. Onọ vẹ ahwo jọ a sae nọ?
7 Kọ ẹsejọ who re roro nọ Jihova ọ be daezọ ra ha? Nọ who te bi roro nọ Jihova o rri owhẹ fihọ ohwo ọvo ho, o sae lẹliẹ owhẹ roro nọ whọ sae jọ ogbẹnyusu Ọghẹnẹ nọ ọ ma eware kpobi na ha. O sae jọ nọ Devidi ovie na o je roro ere oke jọ. U gbe rie unu nọ ọ ruẹ nọ Jihova ọ be daezọ ohwo-akpọ. Devidi ọ nọ inọ: “O Jihova, ono họ ohwo-akpọ nọ who bi ro muẹrohọ iẹe, ono họ ọmọ ohwo-akpọ nọ whọ be rọ daezọ riẹ?” (Ol. 144:3) Kọ oria vẹ whọ sae jọ ruẹ uyo onọ na, inọ Ọghẹnẹ ọ be daezọ mai?
8. Ma te rri ẹme nọ ọ rrọ obe 1 Samuẹle 16:6, 7, 10-12, eme Jihova o re muẹrohọ evaọ oma ahwo?
8 Ebaibol ọ vuẹ omai nọ Jihova o re muẹrohọ ahwo nọ amọfa a bi muẹrohọ họ. Oke jọ, Jihova o vi Samuẹle kpobọ uwou Jẹsi re ọ rọ ọmọ riẹ jọ mu ovie Izrẹl. Jẹsi o te se emezae ihrẹ riẹ lahwe. Rekọ Devidi nọ ọ jọ ọrọ ọmaha kpobi ọ jariẹ hẹ. b Ghele na, Devidi họ ohwo nọ Jihova ọ salọ re ọ jọ ovie. (Se 1 Samuẹle 16:6, 7, 10-12.) Dede nọ Devidi ọ jọ ọmaha gheghe, Jihova ọ riẹ riẹ te otọ. Ọ riẹ nọ Devidi o you rie.
9. Eme o dhesẹ nọ Jihova ọ riẹ owhẹ lafi yọ ọ be daezọ ra? (Rri uwoho na re.)
9 Obọnana, roro kpahe eware nọ Jihova o ru kẹ owhẹ no nọ u dhesẹ nọ o muẹrohọ owhẹ. Ọghẹnẹ ọ be kẹ owhẹ ehrẹ nọ i re fiobọhọ kẹ owhẹ, ghelọ oghẹrẹ kpobi nọ eware e rrọ kẹ owhẹ kẹhẹ. (Ol. 32:8) Kọ ogbẹrọnọ Jihova ọ riẹ owhẹ te otọ họ, ọ hae te kẹ owhẹ ehrẹ itieye na? (Ol. 139:1) Nọ who te bi lele ohrẹ nọ Jihova ọ be kẹ owhẹ, ẹsiẹe u ti mu owhẹ ẹro nọ ọ riẹ owhẹ lafi. (1 Irv. 28:9; Iruẹru 17:26, 27) Jihova ọ riẹ epanọ whọ be daoma te. Ọ riẹ udu ra gbe emamọ uruemu nọ who wo, yọ ọ gwọlọ jọ ogbẹnyusu ra. (Jeri. 17:10) Ọ tẹ jẹ gwọlọ nọ whọ jọ ogbẹnyusu riẹ re.—1 Jọn 4:19.
“Otẹrọnọ whọ kiẹ gwọlọ [Jihova], o ti ru re whọ ruẹ e riẹ.”—1 Irv. 28:9 (Rri edhe-ẹme avọ 9) c
NỌ WHO TE BI RORO NỌ IRORO JỌ NỌ WHỌ JẸ NO E THỌ
10. Enọ vẹ ma rẹ nọ omamai ẹsejọ nọ ma te roro te iroro jọ nọ ma jẹ oke jọ?
10 Ẹsejọ nọ ahwo jọ a te roro te iroro jọ nọ a jẹ no evaọ oke jọ, a rẹ nọ omarai nọ, ‘Kọ ginọ emamọ iroro mẹ jẹ oke ẹdẹ na?’ Ẹsejọhọ a kpairoro vrẹ iruo jọ nọ a hae te jọ hwa ae okposa, a tẹ ta nọ iruo Jihova a rẹ rọ karo evaọ uzuazọ rai. Ẹsejọhọ ikpe buobu e vrẹ no anwẹnọ a rọ jiroro yena. Enẹna, ẹsejọ a rẹ ruẹ ahwo nọ a riẹ, nọ a ta nọ ugho a re le, yọ o wọhọ nọ akpọ ọ rrọ lọlọhọ kẹ ae. A vẹ be nọ omobọ rai nọ: ‘Kọ eware yena kpobi nọ mẹ kpairoro vrẹ inọ iruo Jihova ọvo me re ru na, kọ me rri oware na mu ere na? Binikọ mẹ hai dhugbe le ugho omojọ?’
11. Eme ohwo nọ o kere Olezi 73 na ọ jẹ ruẹ nọ o jẹ kẹe uye?
11 Otẹrọnọ whọ be hai wo avro otiọye na evaọ udu ra ẹsejọ, kareghẹhọ ohwo nọ o kere Olezi 73 na. Ọ ruẹ nọ eware i bi woma kẹ ahwo jọ vrẹ ọvo, a rẹ kake mọ họ, yọ o wọhọ nọ a wo ẹbẹbẹ ọvo ho. (Ol. 73:3-5, 12) Eware nọ ọ ruẹ na e tẹ jẹ lẹliẹe roro nọ ẹgọ nọ ọ be gọ Jihova na dede, yọ uye-oruẹ kufiẹ. O je roro oware na gaga. ‘Ẹsikpobi o jẹ kẹe uye.’ (Ol. 73:13, 14) Kọ eme o ru?
12. Ma te rri Olezi 73:16-18, eme ohwo nọ o kere olezi na o ru re o si avro no udu?
12 Se Olezi 73:16-18. Ohwo nọ o kere olezi yena o kpohọ oria nọ oma o sae jọ dhẹe. O kpobọ aruẹri Jihova. Ọ tẹ romatotọ roro eware na ziezi. Nọ o ti roro eware na ziezi no, ọ tẹ ruẹ nọ o make rọnọ eware i bi woma kẹ ahwo yena na, obaro akpọ rai u wo ovao ha. Nọ o ti rri oware na mu no, udu u te dhẹe keme ọ ruẹ no nọ iruo Ọghẹnẹ nọ ọ rọ karo na họ oware nọ o mai woma nọ ohwo o re ru. Fikiere ọ tẹ gbaemu nọ ọ rẹ gbẹ gọ Jihova Ọghẹnẹ riẹ vrẹ.—Ol. 73:23-28.
13. Eme who re ru nọ whọ tẹ be vro sọ iroro jọ nọ whọ jẹ oke jọ ginọ emamọ iroro? (Rri uwoho na re.)
13 Whẹ omara whọ tẹ romatotọ roro kpahe Ẹme Ọghẹnẹ, who ti gbe wo avro evaọ udu ra ha. Eme ma rọ ta ere? Romatotọ roro kpahe eware iwoma nọ Jihova o bi ru kẹ owhẹ jẹ kareghẹhọ nọ eva ra e be were iẹe. Rekọ rri ahwo nọ who bi roro nọ akpọ o woma kẹ na. Akpọ nana ọvo orai o nyaba. Ibuobu rai, okọ rai hayo efe rai ọvo họ oria nọ a rẹroso keme a wo ẹruore inọ emamọ akpọ ọ rrọ obaro tha ha. Rekọ eware nọ Jihova ọ ya eyaa inọ o ti ru kẹ owhẹ evaọ obaro, a sae ruẹ unu gbiku rai dede he. (Ol. 145:16) Whaọ oware ofa ona: Kọ whọ ginẹ riẹ epanọ akpọ ra ọ hae te jọ o hae jọ nọ whọ ta nọ eware akpọ na who re le? Oware jọ nọ ma rẹ kareghẹhọ na di: Ohwo nọ ọ jiroro jọ kpobi fikinọ o you Jihova gbe amọfa, o re wo eware nọ e ginẹ roja evaọ uzuazọ nọ e rẹ lẹliẹ eva were iẹe.
Hai roro kpahe eware iwoma nọ Jihova ọ ya eyaa nọ o ti ru kẹ owhẹ ẹdẹfa (Rri edhe-ẹme avọ 13) d
NỌ WHO TE BI RORO NỌ WHO GBE WIRUO ỌVO KẸ JIHOVA HA
14. Ẹvẹ eware e rrọ kẹ idibo Jihova jọ, kọ onọ vẹ a sae nọ omarai ẹsejọ?
14 Idibo Jihova jọ a who no, ẹyao ọ be kẹ ejọ uvẹ hẹ, yọ ejọ, oware jọ o thọ kugbe oria jọ omarai. Onana o tẹ whae ze nọ a re ro roro ẹsejọ nọ, ‘Kọ mẹ nana me gbe tube wiruo kẹ Jihova dede?’
15. Eme ohwo nọ o kere Olezi 71 na ọ riẹ?
15 Ohwo nọ o kere Olezi 71 na o je roro oghẹrẹ iroro itieye na. Ọ lẹ se Jihova nọ: “Whọ nyasiọ omẹ ba ha evaọ okenọ ẹgba mẹ o te re no.” (Ol. 71:9, 18) Ọso-ilezi na ọ make ta ere na, ọ riẹ nọ ọ tẹ gbẹ be gọ Jihova vrẹ, Jihova ọ te sẹro riẹ je fiobọhọ kẹe. Ọso-ilezi na ọ ruẹ vevẹ nọ odibo Jihova kpobi nọ ọ gbẹ be gọe, dede nọ eware e lọhọ kẹe he, eva riẹ e rẹ were Jihova.—Ol. 37:23-25.
16. Eware jọ vẹ inievo nọ e kpako no a rẹ gbẹ sai ru kẹ Jihova gbe amọfa? (Olezi 92:12-15)
16 Whai inievo nọ e kpako no, wha rri omarai epanọ Jihova o bi rri owhai. Jihova ọ sai fiobọhọ kẹ owhai re wha gbẹ gọe vrẹ dede nọ wha kpako no. (Se Olezi 92:12-15.) Who du roro kpahe eware nọ whọ gbẹ be sai ru hu hu. Rekọ roro kpahe eware nọ whọ rẹ sai ru enẹna. Whọ sai fi emamọ oriruo hotọ kẹ inievo efa je se ae gboma. Who te bi ru ere, yọ whọ be tuduhọ ae awọ. Whọ sae jẹ vuẹ amọfa epanọ Jihova o ro fiobọhọ kẹ owhẹ no evaọ uzuazọ ra. Whọ vẹ jẹ vuẹ ae epanọ u mu owhẹ ẹro te inọ eyaa Jihova e te seba erugba ha. Jọ olẹ nọ whọ rẹ lẹ roro amọfa o thọrọ owhẹ ẹro gbe he keme u re fiobọhọ gaga. (1 Pita 3:12) Oghẹrẹ kpobi nọ eware e rrọ kẹ omai kẹhẹ, mai kpobi ma sai ru oware jọ kẹ Jihova gbe amọfa.
17. Fikieme ma gbẹ rọ omamai kele amọfa ha?
17 O tẹ be kẹ owhẹ uye inọ whọ gbẹ be sai ru iruo Jihova te epaọ ẹdẹ hẹ, kareghẹhọ nọ onọ whọ be sai ru kẹe enẹna o da riẹ ẹro fia. Ẹsejọ whọ te gwọlọ rọ omara kele amọfa. Rekọ who ru ere he. Fikieme? Keme Jihova ọ rẹ rọ ohwo jọ kele omọfa ha. (Gal. 6:4) Kọ whọ kareghẹhọ Meri? O ku udẹ oghaghae jọ fihọ Jesu uzou. (Jọn 12:3-5) Kọ aye-uku nọ ọ jọ oyogbe na? Ibiugho esese ivẹ nọ i re te emamọ oware ovo dẹ hẹ eye o ro ru unevaze. (Luk 21:1-4) Jesu o kele aye-uku na dhe Meri hi. O rri rai aimava nọ a wo ẹrọwọ. Oyejabọ a ro ru oware nọ a ru na. Ere ọvona re, whọ tẹ be maki roro nọ oware nọ who bi ru kẹ Jihova u te oware ovo ho, o da Jihova ẹro fia keme who bi ru ei fikinọ who wo ẹrọwọ yọ who you rie.
18. Eme ma re ru re ma si avro no udu? (Rri ẹkpẹti na re “ Ẹme Jihova Ọ Sai Fiobọhọ kẹ Owhẹ Si Avro No Udu.”)
18 Ẹsejọ mai kpobi na ma re wo avro evaọ udu mai. Rekọ ma wuhrẹ no nọ Ẹme Ọghẹnẹ ọ sai fiobọhọ kẹ omai si avro no udu. Uzẹme ọvo o rrọ eva riẹ. Fikiere daoma si avro no udu re who fievahọ Jihova. Riẹ nọ Jihova ọ riẹ owhẹ yọ ọ be daezọ ra. Eva ra e be were iẹe inọ whọ kpairoro vrẹ eware jọ re whọ rọ iruo riẹ karo. Yọ o riẹe oja gaga inọ ọ rẹ hwosa kẹ owhẹ. Riẹ nọ Jihova o you idibo riẹ kpobi nọ e talamu ei, yọ ọ be daezọ rai. Whọ vro vievie he.
OLE AVỌ 111 Eware nọ E be Kẹ Omai Evawere
a ẸME NỌ A RU VẸ: Avro nọ ma jọ uzoẹme nana ta ẹme te na yọ ọnọ ohwo ọ rẹ vro sọ o gbe wiruo kẹ Jihova hayo sọ ọ be daezọ riẹ. Ma tẹ jẹ ta ẹme te avro nọ ohwo ọ rẹ vro sọ iroro jọ nọ ọ jẹ oke jọ ginọ emamọ iroro. Orọnikọ avro otiọye na oye a jọ Ebaibol ta nọ ohwo nọ o wo ẹrọwọ họ ọ rẹ vro na ha. Yọ orọnọ avro otiọye na oye Ebaibol ọ ta nọ ohwo nọ ọ rọwo nọ eyaa Jihova i ti rugba ha ọ rẹ vro na ha.
b Ebaibol ọ nwane fodẹ uzedhe unuikpe nọ Devidi ọ jọ họ nọ Jihova ọ salọ iẹe inọ ọ jọ ovie. Rekọ o wọhọ nọ oke yena yọ ọ vrẹ ikpe ikpegbivẹ no.—Rri Uwou-Eroro Azie 1, 2011, ẹwẹ. 29, edhe. 2, ọrọ Oyibo.
