ILE nọ a rẹ so e jẹ hae were ahwo Izrẹl. Ebaibol o dhunu te ahwo jọ nọ a jẹ hae so ile je kporo ile. Abọ jọ Ebaibol na soso dede ile ọvo. Ejọ họ obe Ilezi, Ole nọ O Vi Ile, gbe Enuobro. Obe jọ nọ a re se Music in Biblical Life o ta nọ, “ahwo Izrẹl a jẹ hae so ile gaga evaọ eware nọ a bi ru.”

A jẹ so ile kẹdẹ kẹdẹ. Ahwo Izrẹl a jẹ hai so ile uweri yọ a jẹ hae so ile ro dhesẹ oghẹrẹ nọ eva e be were ae te. (Aiz. 30:29) Eyae e jẹ hai kporo ojẹjẹ. Yọ a jẹ hai gbile jẹ so ile ziezi nọ a tẹ be rọ ovie mu, nọ a te bi ru ehaa gbe okenọ a te fi kparobọ evaọ ẹmo. (Ibr. 11:34; 1 Sam. 18:6, 7; 1 Iv. 1:39, 40) Nọ ohwo o te whu, ahwo Izrẹl a rẹ so ile ro dhesẹ epanọ o da rai te. (2 Irv. 35:25) Obe na McClintock and Strong’s Cyclopedia o ta nọ, “ahwo Hibru na a jẹ hae so ile gaga.”

Ile nọ a jẹ hai kporo evaọ ighẹ ovie. Eva e jẹ hae were ivie Izrẹl nọ a tẹ be gaviezọ kẹ ile nọ a bi kporo. Sọl ovie na o zizie Devidi ziọ uwou riẹ re ọ hai kporo ile kẹe. (1 Sam. 16:18, 23) Yọ nọ a rọ Devidi mu ovie no, o te ku eware nọ a re ro kporo ile. O te je kere eme ile nọ i woma ziezi fihotọ. Yọ o koko ahwo jọ họ re nọ a jẹ hae so ile evaọ etẹmpol Jihova. (2 Irv. 7:6; Emọs 6:5) Solomọn ovie na omariẹ o wo ezae gbe eyae nọ e jẹ hae so ile evaọ ighẹ ovie na.—Ọtausi. 2:8.

A jẹ so ile nọ a tẹ be gọ Jihova. Ahwo Izrẹl a rọ ile nọ a rẹ so rọ zaharo ho nọ a tẹ be gọ Jihova. A wo ahwo nọ a bu te idu ene (4,000) nọ a jẹ hai kporo ile evaọ etẹmpol nọ ọ jọ Jerusalẹm. (1 Irv. 23:5) A jẹ hai kporo igogo, ekpata-ifi, gbe ekpata. (2 Irv. 5:12) Rekọ orọnọ ahwo nana ọvo a jẹ hai kporo ile nọ a tẹ be gọ Jihova ha. Nọ ahwo Izrẹl buobu a tẹ rrọ edhere bi kpohọ ehaa evaọ obọ Jerusalẹm a jẹ hae so ile. Yọ kukpe kukpe a jẹ hai kpohọ ehaa evaọ obei. U wo ile jọ nọ a jẹ hae so nọ a re se ile Ẹgadiẹ-Kpehru. (Ol. 120-134) Ebe ahwo Ju e ta nọ ahwo Izrẹl a jẹ hae so Ilezi Hale a nọ a te bi ru ehaa Ọnyavrẹ.

Ile nọ a rẹ so i wuzou kẹ ahwo nọ a be gọ Ọghẹnẹ nẹnẹ re. (Jem. 5:13) Ma rẹ so ile jiri Jihova evaọ iwuhrẹ mai. (Ẹf. 5:19) Ile nọ ma rẹ so na i re ru omai kẹle ohwohwo. (Kọl. 3:16) Yọ ile nọ ma rẹ so je kporo na, o rẹ lẹliẹ oma sasa omai nọ eware e tẹ rrọ oghẹrẹ jọ kẹ omai. (Iruẹru 16:25) Ma rẹ rọ ile nọ ma rẹ so na dhesẹ kẹ Jihova nọ ma you rie gbe nọ ma fievahọ iẹe.