Jihova ọ ta kẹ ahwo Izrẹl nọ a rẹ jọ ọrẹri. Kẹsena ọ tẹ ta ẹme ọfa nọ o re fiobọhọ kẹ ae jọ ọrẹri. Ọ vuẹ rai nọ: “Whọ rẹ jọ udevie ahwo ra nya be vaha eme-ọtaraha vievie he. Who re dikihẹ rọsuọ uzuazọ ọrivẹ ra vievie he. Mẹ họ Jihova.”​—Izerẹ 19:2, 16.

Ẹme Hibru nọ a fa “dikihẹ rọsuọ” na, a fa riẹ gbagba. Rekọ, eme họ otọ riẹ? Obe ahwo Ju jọ nọ o fotọ eme obe Iruo-Izerẹ o ta nọ: “O rrọ bẹbẹ re a fotọ ẹme nana, keme o lọhọ tere he re a riẹ otọ ohare Hibru nọ a fa ẹme yena no ze na. A tẹ fa ohare Hibru na lele epanọ eme riẹ e rrọ, o rẹ jọ, ‘who dikihẹ ehru, akotọ, hayo kẹle he.’”

Ahwo jọ nọ a wuhrẹ gaga kpahe eme Ebaibol a ta nọ ẹme yena o wobọ kugbe ẹme nọ ọ rrọ owọ avọ 15, nọ o ta nọ: “Who re bruoziẹ okienyẹ vievie he. Who re dhesẹ ọriẹwẹ kẹ oyogbe vievie he hayo rri ọdafe ovao vievie he. Who re bruoziẹ okiẹrẹe evaọ ẹme ọrivẹ ra.” (Izerẹ 19:15) O tẹ rrọ ere, kiyọ ẹme nọ ọ rrọ owọ avọ 16 na inọ “who re dikihẹ rọsuọ uzuazọ ọrivẹ ra” ha na, o sai dhesẹ nọ idibo Ọghẹnẹ a re ru epanọ u re ro kiekpe erivẹ rai hi evaọ ẹdhọ ekọto, ekiọthuọ gbe eware uviuwou. Yọ a re ru oware ovo nọ a rẹ rọ wha ọrivẹ rai re he. Uzẹme riẹ họ, u fo ho re ma ru oghẹrẹ eware itieye. Rekọ edhere ọfa ọ riẹ nọ ọ mai woma nọ ma rẹ rọ riẹ otọ ẹme nana nọ ọ rrọ owọ avọ 16 na.

Kareghẹhọ nọ Jihova ọ jọ obọ emuhọ owọ Ebaibol yena ta kẹ ahwo riẹ nọ, a du nya kpenẹ avọ enẹ vaha eme-ọtaraha ha. Ma riẹ nọ iguẹgu i woma ha keme o rẹ wha ẹwhọ ze, rekọ ọtaraha ọ mai yoma. (Itẹ 10:19; Ọtausi. 10:12-14; 1 Tim. 5:11-15; Jem. 3:6) Ẹsibuobu, ohwo ọtaraha ọ rẹ ta erue re ọ ruẹse raha ohwo. Ọ sai gu ọrue fihọ ohwo uzou, o tẹ make rrọ nọ u re si uwhu kpe ohwo na dede. Kareghẹhọ nọ ere ahwo ọtaraha jọ a gu ọrue fihọ Nebọt uzou, a tẹ rọ itho fi ei kpe ekueku. (1 Iv. 21:8-13) Fikiere, wọhọ epanọ abọ avivẹ obe Iruo-Izerẹ 19:16 u dhesẹ na, ohwo ọtaraha ọ sai dikihẹ rọsuọ uzuazọ ọrivẹ riẹ keme ọ sai ru oware nọ u re si uwhu kpei.

U te no ere no, ohwo ọ sae ta omọfa raha fikinọ o mukpahe ohwo na. Obe 1 Jọn 3:15 o ta nọ: “Ohwo kpobi nọ o bi mukpahe oniọvo riẹ yọ ojihẹ, yọ wha riẹ nọ ojihẹ ọvuọvo o re wo uzuazọ ebẹdẹ bẹdẹ hẹ.” U kiehọ gaga inọ oke nọ Jihova ọ ta ẹme nọ ọ rrọ Iruo-Izerẹ 19:16 na no, ẹme nọ ọ ta lele iei họ: “Whọ rẹ jọ udu ra mukpahe oniọvo ra vievie he.”​—Izerẹ 19:17.

Wọhọ epanọ ma ruẹ no na, a be rọ ẹme nọ ọ rrọ Iruo-Izerẹ 19:16 nọ ma be ta kpahe anwẹsiẹ na vẹvẹ omai Ileleikristi kpobi unu nọ, ma du wo ekpehre eva kpahe ohwo ho, yọ ma du ta ohwo ọvo raha gbe he. O rrọ vevẹ nọ, ohwo jọ ọ gbẹ were omai hi, hayo nọ ma tẹ be re ohwo jọ ihri, u je ru nọ ma be rọ tae raha, kiyọ ma bi dikihẹ rọsuọ ẹe. Oware nana o sae wha omukpahọ ze, hayo dhesẹ nọ ma mukpahe ohwo na. Oleleikristi kpobi ọ rẹ kẹnoma kẹ oghẹrẹ uruemu utioye na lelele.​—Mat. 12:36, 37.