KỌ U re fou owhẹ ehoo re who ru uwuhrẹ omobọ ra oke kpobi? Kinọ who te bi ru uwuhrẹ na, o be hae were owhẹ oma, binikọ o re kri owhẹ ẹbẹ hẹ? O rẹ via ere kẹ omai na kpobi ẹsejọ re, orọnọ whẹ ovo ho. Rekọ dai roro kpahe eware jọ nọ ma re ru kẹdẹ kẹdẹ na. Kẹdẹ kẹdẹ ma rẹ họ. Yọ re ma sae họ fo, o rẹ rehọ oke orọnikọ oware emaharo ho. Rekọ nọ ma tẹ họ no, omamai o rẹ jọ ziezi. Nwanọ ere o rẹ jọ re nọ ma te bi wuhrẹ Ebaibol na kẹ omobọ mai. O rẹ wọhọ ẹsenọ ma be rọ ame họ oma mai fihọ fuafo. Ame na họ ẹme Ọghẹnẹ. (Ẹf. 5:26) Joma ta ẹme te eware jọ nọ e sai fiobọhọ kẹ omai ru uwuhrẹ omobọ mai oke kpobi, o vẹ jẹ were omai oma.

• Kere oke nọ who ti ro ru uwuhrẹ ra gbe eware nọ who ti ru fihotọ. Uwuhrẹ omobọ mai nọ ma re ru na o rrọ usu “eware nọ e mae roja.” Fikiere o rrọ oware nọ Oleleikristi o re rri vo vievie he. (Fil. 1:10) Re whọ sai ru oware nọ who kere fihotọ inọ who ti ru na, ta obe na mu oria nọ whọ sae jọ ruẹ e riẹ lọlọhọ. Whọ sae tae mu ẹthẹ ifriji ra hayo whọ sae tae mu ebọdo jọ evaọ uwou ra. Nọ o tẹ lọhọ dede whọ sae fi ifonu ra họ oghẹrẹ nọ o rẹ rọ vuẹ owhẹ nọ oke u te no.

• Riẹ oware nọ o te mae lọhọ kẹ owhẹ. Kọ o rẹ kake bẹ owhẹ nọ who te bi se obe? Binikọ whẹ yọ ohwo nọ o re se obe ibribro re o sae ruowhẹ oma? Re whọ sai ru uwuhrẹ ra na, whẹ ọvo whọ rẹ riẹ onọ u ti kiehọ owhẹ oma. Nọ whọ tẹ riẹ onọ u kiehọ owhẹ oma no, ruẹrẹ oke ewuhrẹ ra họ re whọ sai ru ei. Kọ eme who ti ru nọ oke nọ who ti ro ru uwuhrẹ na u te bi te no, rekọ o be ruẹ owhẹ oma ha? Re whọ sai ru ei, whọ sae jiroro nọ who re ru uwuhrẹ ra evaọ iminiti ikpe ọvo. Nọ o tẹ make rọnọ oke nọ who bi ro ru uwuhrẹ na o kpẹre, u woma vi ẹsenọ who ru kakaka ha. Ẹmẹrera na o vẹ te rieria owhẹ oma no.—Fil. 2:13.

• Roro kpahe uzoẹme nọ who ti wuhrẹ ẹdẹfa. Otẹrọnọ okenọ whọ gwọlọ ru uwuhrẹ omobọ ra who re ro roro oware nọ who ti wuhrẹ, o rẹ sae lẹliẹ owhẹ raha oke kufiẹ. Yọ u re dhesẹ nọ whọ be “rehọ oke [ra] ruiruo evaọ edhere nọ ọ mai woma” ha. (Ẹf. 5:16) Kọ u ti gbe woma re who kere izoẹme jọ fihotọ nọ who ti wuhrẹ ẹdẹfa? Otẹrọnọ oke ofa jọ kpobi nọ ẹme jọ ọ tẹ ziọ owhẹ iroro, kere iei fihotọ re whọ sae kiẹ kpahe iẹe. Yọ otẹrọnọ who ku uwuhrẹ ra họ no, yọ whọ ruẹ nọ oware ofa o riẹ nọ whọ gwọlọ kiẹ kpahe, whọ sai kere iei fihotọ re.

• Hai nwene eware jọ. Nọ eware e tẹ nya oghẹrẹ jọ, whọ sai ru oke uwuhrẹ ra na theri hayo kpẹre. Yọ otẹrọnọ who roro ku uzoẹme ofa jọ nọ whọ gwọlọ wuhrẹ kpahe, whọ sae jẹ rehọ iẹe nwene onọ whọ kake salọ. Orọnikọ epanọ who bi ru uwuhrẹ na theri te gbe oke nọ who bi ro ru ei họ ẹme na ha. Yọ orọnọ uzoẹme nọ whọ salọ họ oware nọ o mai wuzou ho. Rekọ oware nọ o mai wuzou họ, whọ be hai wuhrẹ oware jọ ẹsikpobi.

Nọ uwuhrẹ mai u gbe bi vo omai hi, irere i re te omai. Keme u re ru nọ usu mai avọ Jihova o rẹ rọ kpekpe. Yọ u re ru nọ ma re ro ru eware nọ u dhesẹ nọ ma wo areghẹ. Yọ o rẹ lẹliẹ ẹrọwọ mai jọ gaga koi.—Jos. 1:8.