1. Eme ma re ru nọ o rẹ lẹliẹ eva were omai ziezi?

 JIHOVA ọ gwọlọ nọ ma wereva. Ma riẹ ere keme oghọghọ yọ abọjọ ubi ẹzi ọfuafo na. (Gal. 5:22) Nọ orọnọ ẹkẹ evawere e mae rrọ vi emio na, eva e rẹ were omai gaga nọ ma tẹ be hae rọ oke mai ta usi uwoma na ziezi, je fiobọhọ kẹ inievo mai evaọ idhere sa-sa.—Iruẹru 20:35.

2-3. (a) Wọhọ epanọ o rrọ Ahwo Galesha 6:4, eware ivẹ vẹ e rẹ sai fiobọhọ kẹ omai wereva ziezi evaọ egagọ Jihova? (b) Eme ma te ta kpahe evaọ uzoẹme nana?

² Pọl ukọ na ọ jọ obe Ahwo Galesha 6:4 fodẹ eware ivẹ jọ nọ i ti fiobọhọ kẹ omai wereva ẹsikpobi evaọ egagọ Ọghẹnẹ. (Sei.) Oware nọ o rẹ mae jọ omai oja họ epanọ ma rẹ rọ dawo utho ẹgba mai. Ma te bi ru utho nọ ma rẹ sai ru kpobi evaọ egagọ Jihova, jọ eva e were omai. (Mat. 22:36-38) U te no ere no, ma re kele omamai dhe amọfa ha. Te oma mai o ga te o ga ha, te ma wo obọdẹ onaa jọ hayo ma wo ho, joma hai yere Jihova kẹ utho nọ ma be sai ru evaọ egagọ riẹ. Ẹgba riẹ ma be sai ro ru oware kpobi nọ ma bi ru. U te no ere no, ma tẹ ruẹ nọ inievo jọ a wo obọdẹ onaa jọ nọ a be rọ ta usi uwoma nọ ma wo tere he, joma lele ai ghọghọ inọ a be rọ onaa yena jiri Jihova, orọnikọ a be rehọ iẹe du omorro hayo ru re a jiri ai hi. Fikiere, ukpenọ ma re lele ai hrowo oma, ma re wuhrẹ eware jọ mi ai.

³ Ma te jọ uzoẹme nana ta kpahe epanọ ma sai gbe ro wo evawere o tẹ make rọnọ ma bi ru te epanọ ma hae gwọlọ ru te he. Ma te jẹ ta kpahe epanọ ma sae rọ rehọ okẹ kpobi nọ ma wo gọ Jihova ziezi gbe eware nọ ma rẹ sai wuhrẹ mi amọfa.

4. Eme ọ rẹ sai ru nọ ma gbe ro wo evawere he? Kẹ oriruo jọ.

⁴ O rẹ kẹ idibo Jihova jọ uye nọ a gbe bi ru te epanọ a gwọlọ ru te he fiki owho hayo ẹyao. Ere o jọ kẹ oniọvo-ọmọtẹ nọ a re se Carol. Evaọ oke nọ u kpemu ọ kwa kpohọ oria nọ iwhowho-uvie e rrọ tere he nyae ta usi uwoma. Evaọ oke yena, o je wuhrẹ Ebaibol kugbe ahwo nọ a bu te ọgbagbisoi soso. Yọ o wuhrẹ ibuobu te epanọ a rọ roma mudhe kẹ Jihova jẹ họ-ame. Usi uwoma na o jẹ ginẹ were Sista Carol oma gaga. Kẹsena o te kie ẹyao. Udugaga ọ rẹ sai ro no uwou ze. Sista Carol ọ ta nọ: “Mẹ riẹ nọ fiki ẹyao mẹ na, mẹ rẹ sai ru te epanọ amọfa a bi ru te he. Rekọ me bi rri omamẹ nọ me gbe wo ẹrọwọ te ahwo ho. Mẹ gbẹ be sai ru te epanọ mẹ hae gwọlọ ru te he. Yọ onana o be kẹ omẹ uye gaga.” Sista Carol ọ gwọlọ daoma te epanọ ọ rẹ sae daoma te kpobi evaọ egagọ Jihova. Emamọ oware gaga ọ gwọlọ ru na. Ma riẹ nọ o bi ru eva were Jihova Ọghẹnẹ mai nọ ọ vọ avọ ohrọ-oriọ na.

5. (a) Otẹrọnọ ma bi roro nọ ma bi ru te he, eme u fo nọ ma rẹ kareghẹhọ? (b) Wọhọ epanọ ma be ruẹ evaọ uwoho na, eme o dhesẹ nọ oniọvo-ọmọzae na ọ be dawo utho ẹgba riẹ kpobi evaọ egagọ Jihova?

⁵ Otẹrọnọ o rẹ kẹ owhẹ uye ẹsejọ inọ who bi ru te epanọ whọ gwọlọ ru te he, nọ omara nọ, ‘Ẹvẹ Jihova ọ gwọlọ nọ me ru te?’ Ọ gwọlọ nọ who ru epa kpobi nọ whọ rẹ sai ru te obọnana. Joma kẹ oriruo jọ. Dae rehọ iẹe nọ oniọvo-ọmọtẹ nọ ọ rrọ ikpe udhone, eva e be were iẹe he, keme ọ be sai ru te epanọ o je ru oke nọ ọ jọ ikpe udhuvẹ hẹ. Ọ be jọ udu riẹ ta nọ, dede nọ ọ be dawo utho ẹgba riẹ, o bi ru te ẹgwọlọ Jihova ha. Kọ ere o ginẹ rrọ? Uzẹme riẹ họ, nọ oniọvo-ọmọtẹ nana ọ jọ ikpe udhuvẹ, ọ jẹ rọ ẹgba riẹ kpobi gọ Jihova, yọ ri te obọnana nọ ọ rrọ ikpe udhone na o gbe bi ru utho ẹgba riẹ kpobi. Fikiere ma sae ta nọ ọ be moyẹlẹ hẹ. Ma te bi roro nọ onọ ma bi ru evaọ egagọ Jihova u te he, joma kareghẹhọ nọ Jihova họ ọnọ ọ rẹ vuẹ omai sọ ma bi ru te hayo ma bi ru te he, orọnikọ omai hi. Ma te bi ru onọ ẹgba mai o te kpobi, Jihova ọ te vuẹ omai nọ: “Whẹ kobiruo.”—Je rri Matiu 25:20-23.

6. Eme ma rẹ sai wuhrẹ no iku Maria na ze?

⁶ Ma tẹ be hai muẹrohọ oware nọ ma rẹ sai ru re ma ru ei ukpenọ ma rẹ hai roro kpahe onọ ma rẹ sai ru hu, ẹsiẹe eva e te mae were omai. Joma kẹ oriruo oniọvo-ọmọtẹ jọ nọ a re se Maria. Sista Maria o wo ẹyao jọ nọ ọ be jọ e ta usi uwoma tere he. Evaọ oke ọsosuọ oware na o jẹ kẹe uye gaga. O je rri omariẹ nọ o bi ru te he. Kẹsena o te roro te oniọvo-ọmọtẹ jọ nọ ọ rrọ ukoko rai nọ ọ be sai no ehwa ha fiki ẹyao. Ọ tẹ ta nọ o re fiobọhọ kẹe. Maria ọ ta nọ: “Me re kpohọ oria oniọvo nana, mẹ avọ iẹe ma vẹ rehọ ifonu gbe ileta ta usi uwoma. Ẹsikpobi nọ mẹ avọ iẹe ma tẹ ta usi uwoma no, me te te obọ uwou, eva ọvo e rẹ were omẹ inọ me fiobọhọ kẹ oniọvo mẹ.” Eva e te were omai ziezi re otẹrọnọ ma be daoma ru utho nọ ma rẹ sai ru viukpenọ ma rẹ hai roro kpahe onọ ma rẹ sai ru hu. Kọ otẹrọnọ ma rẹ sai ru vi epanọ ma bi ru obọnana hayo u wo eware jọ nọ ma riẹ eru ziezi evaọ egagọ Jihova, eme ma re ru?

7. Didi ohrẹ Pita ukọ na ọ kẹ Ileleikristi?

⁷ Pita ukọ na ọ jọ ileta ọsosuọ riẹ nọ o kere se inievo na tuduhọ ae awọ nọ, jọ a  rehọ okẹ kpobi nọ a wo hayo onaa kpobi nọ a wo ro fiobọhọ kẹ inievo na. Pita o kere nọ: “Jọ whai omomọvo ọ rehọ okẹ nọ a kẹ riẹ rọ gbodibo kẹ ohwohwo wọhọ emamọ idibo nọ Ọghẹnẹ o dhesẹ uwowou ulogbo riẹ kẹ.” (1 Pita 4:10) Joma rehọ okẹ kpobi nọ ma wo rọ gọ Jihova ziezi. Joma roro ho inọ ma te ru ere ahwo jọ a te re omai ihri hayo o te kẹ ahwo jọ uye. Otẹrọnọ ma be daoma ziezi hi fiki oghẹrẹ nọ amọfa a ti rri omai, kiyọ ma bi ru utho ẹgba mai kpobi hi evaọ egagọ Jihova.

8. Wọhọ epanọ o rrọ 1 Ahwo Kọrint 4:6, 7, fikieme ma gbẹ rọ rehọ okẹ nọ ma wo seha ha?

⁸ U fo re ma rehọ okẹ kpobi nọ ma wo rọ gọ Jihova ziezi, rekọ ma rẹ rehọ iẹe seha vievie he. (Se 1 Ahwo Kọrint 4:6, 7.) Wọhọ oriruo, ma rehọ iẹe nọ whọ riẹ epanọ a re mu uwuhrẹ Ebaibol họ kugbe ahwo ziezi. Emamọ okẹ who wo na. Rehọ iẹe ruiruo ziezi. Rekọ ma rẹ kareghẹhọ nọ ma rẹ rehọ okẹ nọ ma wo fu uke he. Dae rehọ iẹe nọ kẹle na whọ ta usi uwoma ruọ ohwo jọ oma, who te mu uwuhrẹ Ebaibol họ kugbei. Yọ whọ gwọlọ nọ whọ rẹ vuẹ inievo nọ wha gbẹ rrọ utu usi uwoma ota. Nọ who kuomagbe inievo nọ wha gbẹ rrọ utu na, who te di oniọvo-ọmọtẹ jọ họ nọ o bi gbiku epanọ ọ rọ rehọ emagazini kẹ ohwo jọ. Emagazini ọ rọ kẹ ohwo, rekọ whẹ omara, uwuhrẹ Ebaibol who muhọ. Kọ eme who ti ru? Whọ riẹ nọ iku nọ whọ gwọlọ gbe kẹ inievo na e te were ae gaga. Rekọ whọ sae hẹrẹ bọo oke ofa re o gbẹ kẹ oniọvo nọ o bi gbiku riẹ na uye he. Who te ru ere, yọ emamọ oware who ru na. Rekọ whọ siọ Ebaibol ba ewuhrẹ kugbe ahwo ho. Obọdẹ okẹ who wo na, rehọ iẹe ruiruo ziezi.

9. Eme ma rẹ rehọ okẹ nọ Jihova ọ kẹ omai ru?

⁹ Joma hae kareghẹhọ nọ oware kpobi nọ ma riẹ eru ziezi yọ okẹ nọ u no obọ Jihova ze. U fo re ma rehọ okẹ yena fiobọhọ kẹ inievo ukoko na orọnikọ ma rẹ rehọ iẹe ya-oma ha. (Fil. 2:3) Ma tẹ be rọ onaa kpobi nọ ma wo gbe ẹgba mai ro ru oware nọ o rẹ were Ọghẹnẹ, ma ti wo oghọghọ. Orọnọ ma rẹ rehọ okẹ nọ ma wo ro dhesẹ oma ha, rekọ ma rẹ rehọ iẹe wha orro se Jihova.

10. Fikieme u gbe ro fo vievie he re ma kele omamai dhe amọfa?

¹⁰ Ma gbẹ yọroma ha, ma sae tẹrovi oware jọ nọ ma riẹ eru ziezi nọ ohwo jọ ọ be riẹ ru te omai hi. Dae rehọ iẹe nọ oniọvo-ọmọzae jọ ọ riẹ epanọ a rẹ kẹ  ovuẹ ogbotu ziezi. Ma sae ta nọ onana yọ okẹ nọ Ọghẹnẹ ọ kẹ riẹ. Rekọ ọ sai rri oniọvo ọfa vo fikinọ ọ riẹ epanọ a rẹ kẹ ovuẹ ogbotu tere he. O sae jọ nọ oniọvo nana nọ ọ riẹ ovuẹ ogbotu ẹkẹ tere he na, o re ru ọghọ gaga, ọ be rọ ẹme Ọghẹnẹ wuhrẹ emọ riẹ ziezi, yọ o wo ajọwha usi uwoma. Eva e be were omai inọ ma wo inievo buobu nọ i wo ekẹ sa-sa nọ a be rọ gọ Jihova ziezi je fiobọhọ kẹ amọfa.

11. Fikieme ma rẹ rọ daoma lele oriruo Jesu?

¹¹ Dede nọ u fo re ma kele omamai dhe amọfa ha, ma sai wuhrẹ eware buobu mi idibo Jihova efa. Joma ta kpahe oriruo Jesu. Dede nọ ọ jọ ohwo ọgbagba, yọ ma gba ha, ma sae rọ aro kele iei nọ ma te rri emamọ iruemu riẹ gbe eware nọ o ru. (1 Pita 2:21) Ma te ru ere, u re fiobọhọ kẹ omai gọ Jihova ziezi je wo ajọwha usi uwoma.

12-13. Eme ma rẹ sai wuhrẹ mi Devidi ovie na?

¹² Ma rẹ jọ Ebaibol na ruẹ iku ezae avọ eyae sa-sa nọ i wo ẹrọwọ. Dede nọ ahwo nana a gba ha, a wo emamọ iruemu nọ ma rẹ sae rọ aro kele. (Hib. 6:12) Ohwo otiọye jọ họ, Devidi ovie na. Jihova ọ ta nọ Devidi yọ “ọzae nọ o kiehọ udu mẹ.” Hayo wọhọ epanọ Ebaibol ọfa jọ ọ ta, “ohwo nọ ọ dhẹ ruọ omẹ ẹro.” (Iruẹru 13:22) Rekọ Devidi ọ jọ ohwo ọgbagba ha. Ọ tubẹ raha izi ilogbo jọ dede. O make jọ ere na, ma sae rọ aro kele emamọ iruemu riẹ. Ẹvẹ ma rọ ta ere? Keme oke nọ a whọku ei, o gu unoma ha. Ukpoye, ọ rọwo nọ o ru thọ. Jihova ọ tẹ rọvrẹ riẹ.—Ol. 51:3, 4, 10-12.

¹³ Ma te se iku Devidi na no, u fo re ma nọ omamai nọ: ‘A tẹ vuẹ omẹ nọ me ru oware jọ thọ, eme me re ru? Kọ mẹ rẹ rọwo okioke yena inọ me ru thọ, manikọ me re gu unoma? Kọ mẹ rẹ wọ ẹme na fihọ omọfa uzou? Manikọ mẹ be hae daoma re mẹ siọ oware utioye ba eru ẹdẹfa?’ Whọ sae nọ omara oghẹrẹ enọ itieye na nọ whọ tẹ jọ Ebaibol se iku idibo Jihova efa. Kọ ọkpọ ebẹbẹ nọ i bi te owhẹ obọnana i te rai re? Emamọ iruemu vẹ a wo nọ e were owhẹ? Who te se iku ahwo yena ọvuọvo no, nọ omara nọ: ‘Ẹvẹ mẹ sae rọ rehọ aro kele odibo Jihova nana ziezi?’

14. Ma tẹ be hai muẹrohọ emamọ iruemu inievo ukoko na, erere vẹ o re te omai?

¹⁴ Oware ofa nọ u re fiobọhọ kẹ omai gọ Jihova avọ evawere họ, nọ ma tẹ be hai  muẹrohọ emamọ iruemu inievo ukoko na te emaha te ekpako. Kọ oniọvo jọ ọ rrọ ukoko ra nọ ọ be daoma gọ Jihova dede nọ ehwa riẹ a be gwọlọ gele iei fihọ uzioraha, ahwo uviuwou riẹ a be wọso ẹe, hayo oma o ga riẹ tere he? Kọ whọ jọ oma oniọvo nana ruẹ emamọ iruemu jọ nọ whọ rẹ sae rọ aro kele? Whọ tẹ be hai roro kpahe emamọ iruemu oniọvo nana, whọ sai wuhrẹ eware jọ nọ i re fiobọhọ kẹ owhẹ thihakọ ebẹbẹ ra. Eva e be were omai kẹhẹ inọ ma wo inievo itieye evaọ ukoko mai.—Hib. 13:7; Jem. 1:2, 3.

15. Ohrẹ vẹ Pọl ukọ na ọ kẹ nọ o rẹ sai fiobọhọ kẹ omai wereva ziezi evaọ egagọ Jihova?

¹⁵ Re ma sai wo udhedhẹ gbe okugbe evaọ ukoko na, u fo nọ mai omomọvo ma rẹ dawo ẹgba mai kpobi evaọ egagọ Ọghẹnẹ. Joma ta kpahe oriruo Ileleikristi ọsosuọ na. A wo ọvuọ okẹ riẹ gbe ọvuọ iruo riẹ nọ a je ru evaọ egagọ Ọghẹnẹ. (1 Kọr. 12:4, 7-11) Rekọ a je hrowo oma ha, yọ a jẹ wọso ohwohwo ho. Ukpoye, Pọl ọ ta kẹ ae nọ jọ omomọvo o ru oware nọ o rẹ “bọ ugboma Kristi na ga.” Pọl o kere se inievo obọ Ẹfisọs nọ: “Nọ okwakwa kpobi evaọ oma na u te bi ruiruo ziezi, o rẹ lẹliẹ ugboma na rro nọ o be rọ uyoyou bọ omobọ riẹ ga na.” (Ẹf. 4:1-3, 11, 12, 16) Inievo nọ i lele ohrẹ yena a ru nọ udhedhẹ gbe okugbe o rọ jọ ukoko na. Epọvo na ma be ruẹ evaọ ikoko mai nẹnẹ re.

16. Eme ma rẹ gbaemu nọ ma re ru? (Ahwo Hibru 6:10)

¹⁶ Gbaemu nọ who re kele omara dhe amọfa vievie he. Ukpoye, wuhrẹ mi Jesu, re whọ jẹ daoma wo oghẹrẹ iruemu nọ o wo. Lele emamọ oriruo ahwo nọ a gbiku rai fihọ Ebaibol na gbe inievo ukoko ra nọ i wo ẹrọwọ ziezi. Nọ who bi ru utho ẹgba ra kẹ Jihova na, riẹ nọ Jihova “ọ rrọ ohwo nọ o kiẹrẹe he he nọ iruo [ra] e rẹ rọ thọrọ iẹe ẹro.” (Se Ahwo Hibru 6:10.) Jọ eva e hae were owhẹ ẹsikpobi nọ whọ be gọ Jihova na, keme eva e be were Jihova gaga nọ ọ be ruẹ nọ whọ be dawo utho ẹgba ra evaọ egagọ riẹ na.