Oware utioye na o tẹ via, u fo nọ ukoko na u re rri orọo ọsosuọ na inọ o fa no, nọ oniọvo-ọmọzae nọ ọ fa orọo na ọ tẹ rehọ omọfa no. A re je rri orọo nọ ọ rrọ enẹna inọ yọ orọo nọ u lele uzi. Re ma riẹ oware nọ ma rọ ta ere, joma rri oware nọ Jesu ọ ta kpahe orọo nọ a rẹ fa gbe omọfa nọ a rẹ wariẹ rehọ.

Jesu ọ jọ obe Matiu 19:9 fodẹ oware ọvuọvo nọ a rẹ sae rọ fiki riẹ fa orọo. Ọ ta nọ: “Ohwo kpobi nọ ọ se aye riẹ o gbẹ rrọ fiki ọfariẹ-ogbe he, ọ jẹ rehọ ọfa o bruẹnwae.” Ma rẹ jọ ẹme Jesu na ruẹ eware ivẹ jọ, (1) ọfariẹ-ogbe ọvo họ oware nọ Ebaibol ọ ta nọ a sae rọ fiki riẹ fa orọo, (2) nọ ọzae ọ tẹ siọ aye riẹ, o gbẹ rrọ fiki ọfariẹ-ogbe he nọ ọ jẹ nyae rehọ aye ọfa yọ o bruẹnwae. *

Kọ ẹme nọ Jesu ọ ta na u dhesẹ nọ ọzae o te gbe-ọfariẹ, nọ ọ jẹ siọ aye riẹ, o wo udu nọ o re ro wo aye ọfa? Nwanọ ere he. Nọ ọzae o te gbe-ọfariẹ, aye na ọ sae ta nọ ọ be rọvrẹ riẹ hayo ọ be se iẹe. Nọ aye na ọ tẹ siọ ọzae na, nọ a je kpobọ ẹwho hayo egọmeti nyae fa orọo na no, ẹsiẹe aimava na a sai ro wo udu nọ a rẹ rọ rehọ omọfa.

Evaọ ẹsejọ, aye na ọ sae ta nọ ọ be rọvrẹ ọzae riẹ dede nọ ọzae na o gbe-ọfariẹ, inọ aimava a gbẹ jọ orọo na ghele. Kọ ọzae na ọ gbẹ rọwo ho, nọ ọye ọvo ọ jẹ nyabru isu ẹwho hayo kpobọ egọmeti nyae fa orọo na? Nọ orọnọ aye na ọ rọvrẹ riẹ no na, o wo udu nọ ọ rẹ rọ nyae rehọ aye ọfa ha. Otẹrọnọ ọ tẹ nyae rehọ aye ọfa ghele, kpakiyọ Ebaibol ọ ta nọ o re ru oware utioye na ha, kiyọ ọ jẹ wariẹ gbe-ọfariẹ no. A rẹ rehọ iẹe wariẹ gu ẹdhọ evaọ ukoko na.—1 Kọr. 5:1, 2; 6:9, 10.

Nọ ọzae o te gbe-ọfariẹ, nọ ọ jẹ nyae rehọ aye ọfa, oghẹrẹ vẹ u fo nọ inievo ukoko na a re rri orọo ọsosuọ riẹ na gbe orọo nọ ọ rrọ enẹna? Kọ a re rri nọ Ebaibol ọ ta nọ orọo ọsosuọ na o re fa ha? Kinọ ọzae na o wo aye ọfa no na, aye ọsosuọ riẹ na ọ rẹ gbẹ sae ta nọ ọ be rọvrẹ ọzae na hayo ọ be se iẹe? Kọ a re rri orọo avọ ivẹ nọ ọzae na ọ rrọ na fihọ orọo ẹnwae-obro?

Vẹre vẹre, ukoko na o jẹ hai rri orọo avọ ivẹ nọ ọzae na ọ rrọ na fihọ orọo ẹnwae-obro. A jẹ hai rri rie ere otẹrọnọ aye ọsosuọ riẹ na ọ gbẹ rrọ uzuazọ, o ri wo ọzae ọfa no ho, yọ o ri lele ohwo ọvo gbe-ọfariẹ hẹ. Rekọ ma rẹ kareghẹhọ nọ, nọ Jesu ọ jẹ ta ẹme orọo-ofa gbe omọfa nọ a rẹ nyae rehọ na, ọ ta ẹme ọvo kpahe ọzae hayo aye ohwo nọ o gbe-ọfariẹ na ha. Ukpoye ẹme nọ ọ ta họ, ọzae ọ tẹ siọ aye riẹ, yọ orọnikọ aye na o gbe-ọfariẹ hẹ, ọ jẹ nyae rehọ aye ọfa, yọ ọzae na o bruẹnwae. O tẹ via ere, kiyọ ẹse nọ ọzae na ọ se aye na jẹ nyae rehọ ọfa na o lẹliẹ orọo ọsosuọ na fa no, yọ Jesu o se oware nọ ọzae na o ru na ẹnwae-obro.

Nọ ọzae ọ tẹ siọ aye riẹ, ọ jẹ nyae rehọ ọfa, kiyọ oke nọ aye ọsosuọ riẹ na ọ rẹ rọ ta nọ ọ be rọvrẹ ọzae na hayo ọ be rọvrẹ riẹ hẹ, o vrẹ no.  Fikiere o gbẹ jọ oware nọ u re kpokpo iei udu hu sọ ọ rẹ rọvrẹ ọzae na hayo ọ rẹ rọvrẹ riẹ hẹ. U te no ere no, u fo ho re inievo ukoko na a roro nọ orọo nọ ọzae na ọ rrọ enẹna yọ orọo ẹnwae-obro fikinọ aye ọsosuọ na ọ gbẹ rrọ uzuazọ, o ri wo ọzae ọfa ha, hayo o bruẹnwae he. *

Evaọ ọnọ ma ta kpahe evaọ obehru na, ọzae na o bruẹnwae, o tẹ whae ze nọ avọ aye riẹ a rọ fa orọo. Kọ otẹrọnọ ọzae na o bruẹnwae he, rekọ ọ tẹ fa orọo riẹ, o te wo aye ọfa? Hayo kọ o jẹ rọnọ ọzae na o bruẹnwae re ọ tẹ te fa orọo na ha, rekọ ọ fa orọo na no, o te bruẹnwae jẹ nyai wo aye ọfa dede nọ aye ọsosuọ riẹ na ọ gwọlọ rọvrẹ riẹ? Evaọ enana kpobi, orọo na nọ ọzae na ọ fa jẹ nyae rehọ aye ọfa na yọ ẹnwae-obro. A rẹ rehọ iẹe nọ orọo ọsosuọ na o fa no. Evaọ ofẹ uzi egọmeti, orọo nọ ọzae na ọ rrọ enẹna u lele uzi. Uwou-Eroro Akpegbọvo 15, 1979, ẹwẹ-obe avọ 32, ọrọ Oyibo o ta nọ: “Nọ ọzae na ọ ruọ orọo ọfa no na, ọ sae fa orọo nana ha re o zihe bru aye ọsosuọ riẹ. A rẹ rehọ iẹe nọ, nọ ọ fa orọo ọsosuọ na, bruẹnwae je wo aye ọfa no na, kiyọ orọo ọsosuọ na o fa no riẹriẹriẹ.”

Orọnikọ otoriẹ okpokpọ nana nọ ma wo na u dhesẹ nọ orọo yọ oware nọ a re rri vo vievie he keme Ọghẹnẹ o rri orọo ghaghae. Yọ u dhesẹ gbe he inọ ẹnwae-obro yọ uzi osese nọ ohwo ọ rẹ raha epa kpobi nọ u je rie. Ọzae nọ ọ se aye riẹ, yọ orọnikọ aye na o bruẹnwae he, ọ tẹ nyae rehọ aye ọfa, a rẹ rọ uzi ẹnwae-obro kru rie evaọ ukoko na, yọ ekpako na a rẹ rehọ iẹe gu ẹdhọ. (Otẹrọnọ aye nọ ọ wariẹ rehọ na ọ rrọ ukoko na, a rẹ rehọ iẹe gu ẹdhọ re keme ọ thọ uzi ẹnwae-obro re.) Dede nọ a re rri orọo nọ ọzae na ọ wariẹ ro na wọhọ orọo ẹnwae-obro ho, a rẹ rehọ iẹe mu ọkpako hayo kẹe iruo efa evaọ ukoko na ha evaọ ikpe buobu, bẹsenọ oware uyoma nọ o ru na u re gbo fọ no. A re je rri oghẹrẹ nọ eware e rrọ kẹ aye nọ ọ dhẹ seba na, yọ otẹrọnọ a wo emọ nọ e gbẹ maha, a re je rri oghẹrẹ nọ eware e rrọ kẹ emọ na taure a tẹ te kẹ ọzae na iruo jọ evaọ ukoko na.—Mal. 2:14-16.

Who te rri eware nọ ma ta ẹme te no na, whọ rẹ ruẹ nọ a tẹ fa orọo jẹ nyae rehọ omọfa, o gbẹ rrọ fiki ẹnwae-obro ho, ebẹbẹ buobu i re noi ze. Fikiere u fo re Oleleikristi o rri orọo riẹ ghaghae wọhọ epanọ Jihova o rri rie na.—Ọtausi. 5:4, 5; Hib. 13:4.