Ma jọ uzoẹme yena wuhrẹ nọ ẹme ọvo ọye ọ whaliẹ ikọ-odhiwu gbe ahwo-akpọ kpobi na orọnikọ eme ivẹ hẹ. Ẹme yena họ odẹ Jihova nọ a re ru fo. Avro nọ a vro kpahe isuẹsu Jihova na ọ rrọ eva ẹme yena. Yọ avro nọ a vro kpahe ahwo-akpọ sọ a sae gbẹ gọ Ọghẹnẹ nọ odawọ u te te ae na ọ rrọ eva ẹme yena re.

Fikieme ma be rọ ta nọ odẹ Jihova nọ a re ru fo na họ uzedhe ẹme nọ ọ rrọ otọ na dẹẹ, eware nọ i kiọkọ na kpobi e tẹ rrọ eva riẹ? Fiki eware esa.

Oware ọsosuọ họ, odẹ Jihova Setan ọ raha. Okenọ Setan ọ jẹ lẹliẹ Ivi họ evaọ ọgbọ Idẹn, ọ nọ riẹ onọ ẹghẹ jọ nọ o lẹliẹ e riẹ roro nọ Jihova ọ rẹ gbọ ogbọ gaga. Ọ rẹ kẹ ahwo uvẹ re a ru eware nọ e rẹ lẹliẹ eva were ae he. O jọ etẹe kuhọ họ, ọ tẹ jẹ ta nọ a gbe koko uzi nọ Ọghẹnẹ o jie na ha a ti whu hu, ẹsiẹe eware i ti woma kẹ ae dede. Ọ tẹ rọ ere raha odẹ Ọghẹnẹ, bi dhesẹ nọ ọrue Ọghẹnẹ o gu kẹ ae. Enẹ o ro zihe ruọ “Ẹdhọ,” nọ otofa riẹ o rrọ “ọnọ ọ rẹ ta ahwo raha.” (Jọn 8:44) Ivi ọ rọwo ẹme nọ Setan ọ ta na, ọ tẹ raha uzi Ọghẹnẹ, jẹ rọ ere dhesẹ nọ ọ gwọlọ nọ Ọghẹnẹ o su ei hi. (Emu. 3:1-6) Setan ọ gbẹ be raha odẹ Ọghẹnẹ rite inẹnẹ na. O gbe bi gu erue fihọ Jihova uzou. Nọ ohwo ọ tẹ rọwo erue nọ o bi gu, ọ sae raha uzi Ọghẹnẹ. Idibo Ọghẹnẹ a riẹ nọ odẹ Jihova nọ Setan ọ be raha na oye họ umuomu nọ o mae rro. A riẹ nọ Jihova ọ rrọ epanọ Ẹdhọ o bi dhesẹ iẹe na vievie he. Odẹ Jihova nọ ọ raha na oye o wha ọkamuka gbe umuomu nọ o rrọ akpọ na kpobi ze.

Oware avọ ivẹ họ, o rrọ Jihova oja gaga inọ ahwo-akpọ gbe ikọ-odhiwu kpobi a riẹ nọ erue a gu fihọ iẹe uzou na. Nọ a tẹ riẹ ere no, ẹsiẹe oma o ti ro dhẹ ahwo kpobi. Epanọ Jihova o re ro ru odẹ riẹ fo họ oware nọ o mae riẹe oja. Oyejabọ nọ ọ rọ ta nọ: “Mẹ te siọ odẹ ulogbo mẹ ba erufuọ họ.” (Izik. 36:23) Jesu ọ tubẹ ta nọ onana u fo oware nọ idibo Jihova a rẹ lẹ kpahe gaga. Oye họ oware ọsosuọ nọ ọ ta nọ a lẹ kpahe. Anọ okenọ a te lẹ, jọ a lẹ nọ: “Jọ odẹ ra o jọ fuafo.” (Mat. 6:9) A jọ eria buobu evaọ Ebaibol dhesẹ nọ u wuzou gaga re ma rọ orro kẹ odẹ Jihova. Oria jọ o ta nọ: “Wha kẹ Jihova oruaro nọ u fo odẹ riẹ.” (1 Irv. 16:29; Ol. 96:8) Oria ofa o ta nọ: “Wha so ile jiri odẹ oruaro riẹ.” (Ol. 66:2) Oria ofa o tẹ jẹ ta nọ: “Mẹ te kẹ odẹ ra orro bẹdẹ bẹdẹ.” (Ol. 86:12) Ẹdẹ jọ nọ Jesu ọ jọ etẹmpol evaọ obọ Jerusalẹm, ọ ta nọ: “Ọsẹ, kẹ odẹ ra oruaro.” Kẹsena Jihova ọvo ọ tẹ ta ẹme no obọ odhiwu ze inọ: “Mẹ kẹ riẹ oruaro no yọ mẹ te wariẹ kẹe oruaro.”—Jọn 12:28. a

Oware avọ esa họ, oware nọ o rrọ Jihova eva inọ o re ru anwẹdẹ na, o ti ru ei fiki odẹ riẹ. Nọ Esuo Odu-Ikpe Kristi o tẹ vrẹ no, a vẹ te wariẹ dawo ahwo-akpọ. Onana o te jọ odawọ urere. Kọ odawọ urere na u te kuhọ no, ahwo jọ hayo ikọ-odhiwu jọ a te gbẹ raha odẹ Jihova? Re ma sae riẹ uyo onọ yena, roro kpahe eware ivẹ nọ ma ta  nọ e rrọ eva ẹme odẹ Jihova nọ a re ru fo na. Eye họ avro nọ a vro inọ ohwo-akpọ ọ sai yoẹme kẹ Ọghẹnẹ hẹ nọ odawọ u te tei, gbe avro nọ a vro inọ u fo nọ Jihova o re su omai hi. Kọ ohwo jọ o ti roro nọ ahwo nọ a kie kẹ odawọ urere na ha a sai ti yoẹme kẹ Ọghẹnẹ hẹ? Ijo. A zihe ruọ ahwo ọgbagba no, yọ a dawo e rai ziezi no. Nọ a kie he na u dhesẹ nọ a ti yoẹme kẹ Ọghẹnẹ. Fikiere a ti wo uzuazọ ebẹdẹ bẹdẹ. Kọ ikọ-odhiwu gbe ahwo-akpọ jọ a te gbẹ vro inọ Jihova o re su omai hi? Ijo, keme u vẹ ohwo kpobi ẹro no oke yena inọ Jihova họ ọnọ ọ rẹ sai su omai. Kọ ẹvẹ kpahe odẹ Jihova?

Nọ odu-ikpe na o te re no, yọ a ru odẹ Jihova fo no. Oke yena yọ a ruẹ otọ ẹme na no inọ erue a gu fihọ Jihova uzou na. Rekọ ikọ-odhiwu gbe ahwo-akpọ a te gbẹ hai roro kpahe odẹ Jihova. Fikieme? Keme a te gbẹ ruẹ emamọ eware buobu nọ Jihova o ti ru kẹ omai. Oke yena yọ Jesu o siobọno isuẹsu na kẹ Jihova no. Ọghẹnẹ ọ vẹ te “jọ eware kpobi kẹ ohwo kpobi.” (1 Kọr. 15:28) Eva e te were ahwo-akpọ gaga inọ a “wo ufuoma oruaro ọrọ emọ Ọghẹnẹ” no. (Rom 8:21) Jihova o ve ti ru oware nọ o riẹe eva anwẹdẹ na, koyehọ re ahwo-akpọ gbe ikọ-odhiwu kpobi a jọ uviuwou ọvo nọ o wo.—Ẹf. 1:10.

Kọ ẹvẹ ahwo-akpọ gbe ikọ-odhiwu a ti rri eware nana nọ Jihova o ti ru na? Aikpobi a te gwọlọ nọ a re jiri Jihova jẹ rehọ orro kẹ odẹ riẹ. Ẹzi Ọghẹnẹ o ru nọ Devidi ọso-ilezi na o ro kere nọ: “Jọ a jiri Jihova Ọghẹnẹ . . . Jọ a jiri odẹ oruaro riẹ bẹdẹ bẹdẹ.” (Ol. 72:18, 19) Kẹse kẹse ma te ruẹ eware ekpokpọ nọ i ti gbe omai unu nọ e te lẹliẹ omai jiri odẹ Jihova.

Nọ a tẹ ta ẹme te odẹ Jihova yọ a be ta ẹme kpahe oghẹrẹ ohwo nọ ọ rrọ gbe eware kpobi nọ o bi ru. Nọ a tẹ fodẹ Jihova, oware nọ ma rẹ mae kareghẹhọ họ, ọ rrọ yoyou. (1 Jọn 4:8) Evaọ akpọ ọkpokpọ na, ẹsikpobi ma te hae kareghẹhọ nọ fiki uyoyou riẹ jabọ ọ rọ ma omai. Uyoyou ovona o soriẹ nọ o ro vi Ọmọ riẹ ze te ta omai no igbo. Yọ oghẹrẹ nọ o bi ro su omai, isuẹsu i re gbe woma viere he. Uyoyou ọvo o be lẹliẹe ru eware kpobi nọ o bi ru. Oke yena, ma te ruẹ epanọ Jihova o ti tete ohwo-akpọ wọhọ ọmọboba nọ ọ be rẹrote. O vẹ te so ẹe ze nọ ma te rọ gwọlọ hai go kẹle Ọsẹ mai na jẹ so ile jiri ei, jẹ rọ orro kẹ odẹ riẹ bẹdẹ bẹdẹ.—Ol. 73:28.