UZOẸME UWUHRẸ 35
OLE AVỌ 123 Romakpotọ kẹ Ọruẹrẹfihotọ Ọghẹnẹ
Epanọ Ekpako na A Sai ro Fiobọhọ kẹ Ahwo nọ A Si No Ukoko
“A rẹ jọ obọ odhiwu ghọghọ fiki ọrahauzi ọvo nọ o kurẹriẹ viọ fiki ahwo ikiẹrẹe udhone gbe ikpegbizii nọ i du gwọlọ ekurẹriẹ hẹ.”—LUK 15:7.
OWARE NỌ A JARIẸ TA KPAHE
Oware nọ o rẹ whae ze nọ a je si ahwo jọ no ukoko gbe epanọ ekpako ukoko a sai ro fiobọhọ kẹ ae zihe bru Jihova ze re a wariẹ kẹle Jihova.
1-2. (a) Ẹvẹ Jihova o re rri ahwo nọ a bi keke aro fihọ raha izi riẹ epanọ u je rai? (b) Eme Jihova ọ gwọlọ nọ ahwo nọ a raha uzi a re ru?
JIHOVA ọ rẹ kuvẹ re ahwo nọ a be gọe a raha izi riẹ epanọ u je rai hi. Uzioraha o rẹ dhae eva. (Ol. 5:4-6) Ọ ta nọ ma koko izi riẹ keme i kiẹrẹe. Ma rẹ jọ Ebaibol na ruẹ izi nọ ọ kẹ omai. Orọnọ oyena u dhesẹ nọ Jihova ọ gwọlọ nọ ma ru eware kpobi gbagba ha keme ọ riẹ nọ ma gba ha. (Ol. 130:3, 4) O make rrọ ere na, “ahwo omuomu nọ a be rẹriẹ uwowou ulogbo Ọghẹnẹ mai fihọ uvẹ nọ a bi ro duomahọ uruemu nọ u fo ho nọ a re ru ababọ omovuọ,” Jihova ọ rẹ kẹ ae uvẹ re a ru epanọ u je rai hi. (Jud 4) Ebaibol ọ ta nọ oke o be tha nọ “a te rọ raha ahwo nọ a riẹ Ọghẹnẹ hẹ” evaọ ẹmo Amagidọn.—2 Pita 3:7; Evia. 16:16.
2 Jihova ọ gwọlọ nọ a raha ohwo ọvo ho. Wọhọ epanọ ma ruẹ evaọ izoẹme jọ nọ ma wuhrẹ vrẹ no na, Ebaibol ọ ta nọ Jihova “ọ gwọlọ nọ ahwo kpobi a wo uvẹ nọ a re ro kurẹriẹ.” (2 Pita 3:9) Ekpako ukoko a rẹ rọ aro kele Jihova wo odiri nọ a te bi fiobọhọ kẹ ohwo nọ ọ raha uzi re o kurẹriẹ jẹ wariẹ kẹle Jihova. Rekọ orọnọ ahwo kpobi nọ a raha uzi a re kurẹriẹ hẹ. (Aiz. 6:9) Epanọ ekpako na a daoma te kẹhẹ, ahwo jọ a rẹ gwọlọ nọ uzioraha na a re jo zue. Kọ ẹvẹ a re ru ahwo otiọye na?
“WHA SI OHWO OMUOMU NA NO UDEVIE RAI”
3. (a) Ẹvẹ Ebaibol ọ ta nọ a re ru ahwo nọ a raha uzi nọ a rọwo kurẹriẹ hẹ? (b) Fikieme ma sae rọ ta nọ ohwo nọ a si no ukoko, ọye ọvo o si omobọ riẹ no?
3 Nọ ohwo nọ ọ raha uzi ọ gbẹ rọwo kurẹriẹ hẹ, ekpako na a re ru oware nọ obe 1 Ahwo Kọrint 5:13 o ta. Etẹe ọ ta nọ: “Wha si ohwo omuomu na no udevie rai.” Ohwo nọ ọ rọwo kurẹriẹ hẹ, kiyọ ọye ọvo ọ be ta nọ ọ gwọlọ gbẹ jọ ukoko na ha. Yọ a te si ei no ukoko na, kiyọ oware nọ ọye ọvo ọ kọ o bi vu na. (Gal. 6:7) Ẹvẹ ma rọ ta ere? Keme ekpako na a daoma fiobọhọ kẹe bẹ no re o kurẹriẹ, rekọ ọ rọwo gaviezọ kẹ ae he. (2 Iv. 17:12-15) Oware nọ o ru na u dhesẹ nọ ọ gwọlọ koko izi Jihova ha.—Izie. 30:19, 20.
4. Nọ a te si ohwo no ukoko, fikieme a re ro woro iei kẹ ukoko na?
4 A te si ohwo nọ ọ raha uzi nọ ọ rọwo kurẹriẹ hẹ no ukoko na, a re woro kẹ ukoko na inọ ohwo na ọ gbẹ rrọ Osẹri Jihova ha. Orọnikọ a bi woro iei kẹ ukoko na re a ru oma vuọ ohwo nọ a si no ukoko na ha. Rekọ a bi woro iei kẹ ae re a “siọ usu ba ẹnya kugbe” ohwo na, a re gbe “tube lele ohwo otiọye na re emu hu” wọhọ epanọ Ebaibol ọ ta. (1 Kọr. 5:9-11) U wo obọdẹ ẹjiroro nọ Ebaibol ọ rọ ta ere. Pọl ukọ na o kere nọ: “Ẹvi ọsese o re ru ukulu soso fu.” (1 Kọr. 5:6) A tẹ kẹ ohwo nọ ọ rọwo kurẹriẹ hẹ uvẹ re ọ gbẹ jọ ukoko na, ọ sae whẹ ekpehre uruemu riẹ na họ ahwo nọ i kiọkọ, a gbe ti se izi Jihova gbe oware ovo ho.—Itẹ 13:20; 1 Kọr. 15:33.
5. Ẹvẹ u fo nọ ma re rri ohwo nọ a si no ukoko, kọ fikieme ma je rri rie ere?
5 Kọ a te si ohwo no ukoko, ẹvẹ ma re rri ohwo na? Dede nọ ma re gbe lele iei ru eware kugbe he, ma re roro nọ u re kẹe no ho. Rekọ ma re rri rie wọhọ ogodẹ nọ o vru. Ogodẹ jọ o te vru siọ enọ i kiọkọ ba, ọ sai zihe ze. Kareghẹhọ nọ ogodẹ yena nọ o vru na ọ rọ oma riẹ mudhe kẹ Jihova no inọ ọye ọ rẹ gọ. Rekọ ọ be sai ru eyaa nọ ọ ya kẹ Jihova na gba ha. Yọ oware nọ o fi omariẹ họ na u yoma gaga. (Izik. 18:31) Rekọ ma re rẹro nọ o ti zihe ze. Yọ nọ oke o gbẹ riẹ na, o te zihe ze, Jihova ọ te re ohrọ riẹ. Kọ eme ekpako na a re ru nọ u re dhesẹ nọ a bi rẹro nọ ohwo na o ti zihe ze ẹdẹ jọ?
EPANỌ EKPAKO NA A SAI RO FIOBỌHỌ KẸ OHWO NỌ A SI NO UKOKO
6. Nọ ekpako na a te bi si ohwo no ukoko, eme a re ru?
6 Kọ ekpako na a te si ohwo no ukoko no, a rẹ ta nọ, ‘Otẹrọnọ o bi zihe ze, o zihe ze. O bi zihe ze he, ọ vẹ jọ etẹe’? Ijo. Okenọ ogbẹgwae ekpako na a te rọ vuẹ ohwo nọ ọ rọwo kurẹriẹ hẹ inọ a bi si ei no ukoko na, a rẹ vuẹe eware nọ o re ru re ọ sai zihe ze. Rekọ o jọ etẹe kuhọ họ. Evaọ ẹsibuobu, a rẹ vuẹ ohwo na nọ a te wariẹ lele iei ta ẹme nọ emerae jọ e tẹ vrẹ no, re a riẹ sọ oghẹrẹ nọ o bi rri oware nọ o ru na u nwene no. Ọ tẹ rọwo nọ ekpako na a wariẹ lele iei ta ẹme, ẹdẹ nọ a te wariẹ lele iei ta ẹme na, a rẹ tuduhọ iẹe awọ re o kurẹriẹ je zihe ze. O tẹ make rọnọ o ri kurẹriẹ ghele he, nọ o te gbe bi rri eware oghẹrẹ nọ o je rri rai vẹre, nọ ekpako na a te gbe omoke họ oma, a rẹ hai lele iei ta ẹme.
7. Ẹvẹ ekpako na a sai ro dhesẹ nọ a be re ohrọ ohwo nọ a si no ukoko epanọ Jihova ọ rẹ re ohrọ ohwo na? (Jerimaya 3:12)
7 Nọ ekpako na a te si ohwo no ukoko, a re ru oware nọ u dhesẹ nọ a be re ohrọ ohwo na epanọ Jihova ọ rẹ re ohrọ na. Okenọ ahwo Izrẹl a jẹ jọ ehru izi Ọghẹnẹ zue, Jihova ọ rọ abọ muoma jẹ hẹrẹ okenọ a ti ro kurẹriẹ hẹ. Ọye họ ohwo nọ o tube vi ahwo nyae ta kẹ ae nọ jọ a zihe bru ei ze dede nọ oke yena a ri kurẹriẹ hẹ. Ma jọ uzoẹme avọ ivẹ evaọ Uwou-Eroro nana wuhrẹ nọ Jihova ọ ta kẹ Hosia ọruẹaro na nọ jọ ọ nyae ruẹrẹhọ kugbe aye riẹ dede nọ oke yena aye riẹ o gbe je gbe-ọfariẹ. Jihova ọ rọ ere dhesẹ nọ o wo ohrọ-oriọ gaga. (Hos. 3:1; Mal. 3:7) Ekpako na a rẹ rọ aro kele Jihova. O rẹ ginẹ jarae oja inọ ohwo nọ a si no ukoko na o re zihe ze. A re ru oware nọ o rẹ lẹliẹ eziheze na bẹ ohwo na ha.—Se Jerimaya 3:12.
8. Eme ọtadhesẹ ọmọ nọ ọ dhẹ siọ ọsẹ riẹ ba na u wuhrẹ omai kpahe Jihova? (Luk 15:7)
8 Kareghẹhọ ọtadhesẹ ọmọ nọ ọ dhẹ siọ ọsẹ riẹ ba nọ ma ta ẹme te evaọ uzoẹme avọ ivẹ Uwou-Eroro nana. Nọ ọsẹ na ọ kparo ruẹ ọmọ riẹ na evaọ ugbo, “ọ tẹ dhẹ nya, ọ tẹ gbalọ iẹe, ọ tẹ nabe viọlọ iẹe.” (Luk 15:20) Ọsẹ na ọ keria hẹrẹ nọ jọ ọmọ na ọ nya tei oma re ọ lẹe taure ọ tẹ te rọvrẹ riẹ hẹ. Ọye ọ dhẹ bru ọmọ na, yọ ere ọsẹ nọ o you ọmọ riẹ o re ru. Oware ovona u fo nọ ekpako ukoko a re ru nọ oniọvo jọ ọ tẹ raha uzi. A gwọlọ nọ ogodẹ nọ o vru na o re zihe bru Jihova ze. (Luk 15:22-24, 32) Odhiwu soso o rẹ ghọghọ nọ ọrahauzi o te kurẹriẹ, yọ oghọghọ o rẹ jọ obọ otọakpọ obonẹ re.—Se Luk 15:7.
9. Eme Jihova o re ru re ọ sai fiobọhọ kẹ ahwo nọ a raha uzi zihe bru ei ze?
9 Ma wuhrẹ no nọ Jihova ọ rẹ kẹ ahwo nọ a raha uzi, nọ a gwọlọ kurẹriẹ hẹ uvẹ re a gbẹ jọ ukoko na ha. Rekọ ọ rẹ nwani no ere kpairoro vrẹ rai hi. Ọ gwọlọ nọ a zihe ze. Obe Hosia 14:4 u dhesẹ oware nọ Jihova ọ gwọlọ ru kẹ erahaizi nọ i kurẹriẹ. Ọ ta nọ: “Me ti siwi ai no uzioraha rai. Mẹ te rọ iroro obọmẹ you rai, keme me gbe bi mu ofu kẹe he.” Nọ orọnọ enẹ Jihova o re ru erahaizi na, u fo re ekpako na a daoma muẹrohọ ohwo nọ ọ raha uzi sọ o bi ru eware jọ nọ i dhesẹ nọ o muhọ ekurẹriẹ no. Yọ u fo re ohrọ-oriọ Jihova u duobọte ahwo nọ a nyase iẹe ba no re a zihe ze ababọ oke oraha.
10-11. Ẹvẹ ekpako na a sai ro fiobọhọ kẹ ahwo nọ a si no ukoko kri no?
10 Kọ ẹvẹ a re ru ahwo nọ a si no ukoko kri no? Ẹsejọhọ u te ikpe buobu no anwẹnọ a ro si ai no ukoko na. Ẹsejọhọ ahwo otiọye na a siọ oware nọ a rọ fiki riẹ si ai no ukoko ba no. O sae jọ nọ a gbẹ tubẹ kareghẹhọ oware nọ a rọ fiki riẹ si ai no ukoko ho. Oghẹrẹ kpobi nọ o rrọ kẹhẹ, ekpako na a rẹ daoma gwọlọ oria nọ a be rria, a vẹ nyate ae oma. Nọ a te bi lele ae ta ẹme, a sai lele ae lẹ jẹ tuduhọ ae awọ re a zihe ziọ ukoko na. Ma riẹ nọ a te si ohwo no ukoko te ikpe buobu no, ẹrọwọ riẹ ọ rẹ gbẹ ga ha. Fikiere o te ru omoware jọ nọ u dhesẹ nọ ọ gwọlọ zihe ziọ ukoko na, ekpako na a sae ta kẹ ohwo jọ re o wuhrẹ iẹe Ebaibol dede nọ a re rehọ iẹe zihe ze he. Ekpako ukoko na ọvo họ ahwo nọ a rẹ ta kẹ oniọvo jọ inọ ọ nyai wuhrẹ ohwo otiọye na.
11 Ekpako na a rẹ rọ aro kele Jihova. A rẹ daoma gwọlọ ahwo nọ a nyase Jihova ba no, a ve fiobọhọ kẹ ahwo kpobi nọ a rẹ sai fiobọhọ kẹ re a zihe ze. Nọ ohwo otiọye na o te ru oware nọ u dhesẹ nọ o kurẹriẹ, ọ jẹ siọ oware uyoma nọ o ru na ba, a re zihe iei ziọ ukoko na, a rẹ raha oke fihọ iẹe he.—2 Kọr. 2:6-8.
12. (a) Oghẹrẹ ahwo vẹ ekpako na a rẹ yọroma gaga evaọ ẹme rai nọ a tẹ gwọlọ rehọ ae zihe ze? (b) Fikieme ma gbe roro nọ oghẹrẹ izi nọ ahwo jọ a raha, Jihova ọ sae re ohrọ rai hi? (Je rri ẹme-obotọ na re.)
12 Ekpako na a tẹ gwọlọ zihe ahwo jọ ze ukoko na, a rẹ yọroma gaga. Ma rehọ iẹe nọ oware nọ a rọ fiki riẹ si ohwo na no ukoko họ, ọ gba ọmaha du, hayo o ru oware nọ ohwo nọ o zihe ruọ ukọ-ọrue no o re ru, hayo ọ rọ ẹghẹ fa orọo riẹ. Ekpako na a re rri otọ mu gaga re a riẹ sọ ohwo otiọye na o gine kurẹriẹ no. (Mal. 2:14; 2 Tim. 3:6) Ekpako na a rẹ thọ inievo ukoko na, a re ru oware nọ o rẹ jẹ wha uye se inievo na ha. Rekọ a rẹ kareghẹhọ nọ ohwo o te kurẹriẹ no eva ze, jẹ be kẹnoma kẹ oware uyoma, Jihova o re dede iei rehọ. Fikiere, ekpako na a re rri otọ mu gaga nọ a te bi roro sọ a rẹ rehọ ahwo nọ a ru amọfa oghẹrẹ eware nọ ma ta ẹme te na zihe ze. Rekọ jọ a du nwani ru ei vrẹta ha re a roro nọ ohwo ọ tẹ raha oghẹrẹ izi jọ, Jihova ọ rẹ re ohrọ riẹ vievie he. a—1 Pita 2:10.
OWARE NỌ INIEVO UKOKO NA A SAI RU
13. Ohẹriẹ vẹ o rrọ oghẹrẹ nọ ma re ru ohwo nọ a whọku gbe ohwo nọ a si no ukoko?
13 Ma jọ uzoẹme nọ ọ vrẹ na wuhrẹ nọ a tẹ whọku oniọvo jọ, ẹsejọ a re woro kẹ ukoko na inọ a whọku oniọvo otiọna. Ma rẹ sai gbe lele iei ru eware kugbe, keme ma riẹ nọ, nọ orọnọ ẹwhọku ọvo a whọku ei na, u dhesẹ nọ o kurẹriẹ yọ o siobọno oware uyoma nọ o ru na no. (1 Tim. 5:20) Ọ gbẹ rrọ ukoko na, yọ u fo nọ ma rẹ tuduhọ iẹe awọ. (Hib. 10:24, 25) Rekọ a te si ohwo no ukoko, u wo ohẹriẹ no ẹwhọku nọ a whọku ohwo. Ma rẹ “siọ usu ba ẹnya kugbe” ohwo otiọye na, ma re “tube lele ohwo otiọye na re emu hu.”—1 Kọr. 5:11.
14. Nọ a te si ohwo no ukoko, eme oniọvo kpobi ọ rẹ sae rọ udu obọriẹ nọ o wuhrẹ no ru? (Rri uwoho na re.)
14 Kọ oware nọ ma be ta na họ, a te si ohwo no ukoko no, ma rẹ nwane kpairoro vrẹ riẹ tẹtẹtẹ, ma rẹ gbẹ nwani rri rie ovao ha? Nwanọ ere he. Ma riẹ nọ ma re ru eware kugbe ohwo na ha. Rekọ Oleleikristi ọ sai zizie ohwo nọ a si no ukoko no ziọ ewuhrẹ. O sae jọ nọ ohwo na omoni riẹ hayo ọ kẹle riẹ gaga vẹre taure a te ti si ei no ukoko na. Udu ra nọ whọ rehọ Ebaibol wuhrẹ no u re fiobọhọ kẹ owhẹ riẹ sọ who re zizie iei hayo who re zizie iei hi. Kinọ ọ tẹ ziọ ewuhrẹ, eme ma re ru? Vẹre vẹre, ma re yere ohwo otiọye na ha. Rekọ enẹna, oniọvo kpobi ọ rẹ rọ udu obọriẹ nọ ọ rọ Ebaibol wuhrẹ no roro oware nọ o re ru evaọ ẹme nana. Inievo jọ a te gwọlọ nọ a re yere ohwo otiọye na. Yọ a te ru ere, ma rẹ sae ta nọ a ru thọ họ. Rekọ ma rẹ nwani lele iei gbiku hayo lele iei ru eware he.
Oleleikristi kpobi ọ rẹ rọ udu obọriẹ nọ ọ rọ Ẹme Ọghẹnẹ wuhrẹ no roro sọ o re zizie ohwo nọ a si no ukoko ziọ ewuhrẹ, hayo sọ ọ rẹ rọ omoke kpẹkpẹe yere iei nọ ọ tẹ ziọ ewuhrẹ (Rri edhe-ẹme avọ 14)
15. Oghẹrẹ ahwo vẹ a ta ẹme kpahe evaọ obe 2 Jọn 9-11? (Rri ẹkpẹti na re, “ Kọ Oghẹrẹ Uzioraha Ọvona Jọn avọ Pọl A Ta Ẹme Kpahe Na?”)
15 Ẹsejọhọ ahwo jọ a sai roro nọ, ‘Binọ Ebaibol ọ ta nọ Oleleikristi o re yere ohwo otiọye na ha, inọ ohwo nọ o yere i rie, o bi wobọ kugbe oware uyoma nọ o ru na.’ (Se 2 Jọn 9-11.) Ma te rri oria Ebaibol yena ziezi, ma rẹ ruẹ nọ ahwo nọ a be jọ etẹe ta kpahe na họ, ahwo nọ a be wọso uzẹme na gbe amọfa nọ a bi ru re ahwo a lele ai ru oware uyoma. (Evia. 2:20) Fikiere ohwo jọ o te bi wuhrẹ ahwo eware nọ e rrọ Ebaibol ho hayo nọ o te bi ru re amọfa a lele iei ru oware uyoma, ekpako na a rẹ nyai fiobọhọ kẹe re o zihe ziọ ukoko na ha. Ohwo otiọye na ọ sai kurẹriẹ ẹdẹ jọ. Rekọ o gbe ri kurẹriẹ no ho, ma re yere iei hi, yọ ma re zizie iei ziọ ewuhrẹ hẹ.
HAE RỌ ARO KELE JIHOVA RE AHWO OHRỌ
16-17. (a) Eme Jihova ọ gwọlọ nọ ahwo nọ a raha uzi a ru? (Izikiẹl 18:32) (b) Ẹvẹ ekpako a sai ro dhesẹ nọ a bi kuobọgbe Jihova fiobọhọ kẹ erahaizi?
16 Eme ma jọ izoẹme isoi nọ e rrọ Uwou-Eroro nana wuhrẹ no na? Ma wuhrẹ no inọ Jihova ọ gwọlọ nọ a raha ohwo ọvo ho. (Se Izikiẹl 18:32.) Ọ gwọlọ nọ erahaizi a kurẹriẹ re a zihe bru ei ze. (2 Kọr. 5:20) Oyejabọ nọ Jihova o je ro dhe ahwo riẹ ẹtẹta kẹ inọ jọ a kurẹriẹ no eware iyoma nọ a bi ru re a zihe bru ei ze. Jihova ọ gwọlọ nọ ekpako ukoko a kuomagbei fiobọhọ kẹ ahwo nọ a raha uzi re a kurẹriẹ. Ọghọ riẹ ọ rro kẹhẹ nọ Jihova ọ rọ vuẹ ekpako na nọ jọ a kuobọgbei ru iruo nana.—Rom 2:4; 1 Kọr. 3:9.
17 Dai roro epanọ oghọghọ o te jọ obọ odhiwu te nọ ọrahauzi o te kurẹriẹ. Eva e rẹ were Jihova Ọsẹ obọ odhiwu mai na gaga oke kpobi nọ ogodẹ riẹ jọ nọ o vru o te zihe ziọ ukoko na. Ma te gine roro kpahe epanọ Jihova o wo ohrọ-oriọ te, ma re you rie gaga.—Luk 1:78.
OLE AVỌ 111 Eware nọ E be Kẹ Omai Evawere
a A tẹ jọ Ebaibol ta nọ ohwo ọ raha uzi nọ u wo erọvrẹ hẹ, orọnikọ u dhesẹ nọ u wo uzedhe uzi jọ dẹẹ nọ ohwo ọ rẹ raha nọ u wo erọvrẹ hẹ hẹ. Rekọ u dhesẹ nọ ohwo na o keke aro fihọ raha uzi yọ o bi ru oware nọ u dhesẹ nọ ọ be wọso Ọghẹnẹ. Orọnikọ ohwo-akpọ ọye o re bruoziẹ na ha inọ ohwo jọ ọ raha uzi nọ u wo erọvrẹ hẹ no.—Mak 3:29; Hib. 10:26, 27.
