Fikieme ọzae nọ ọ rọwo nọ ọ rẹ rehọ Rut hu na ọ rọ ta nọ ọ tẹ rehọ iẹe, o te raha ukuoriọ riẹ? (Rut 4:1, 6)

Evaọ oke anwae evaọ orẹwho Izrẹl, ọzae o gbe yẹ ọmọ re o te ti whu hu, ahwo a rẹ nọ enọ jọ. Enọ wọhọ: Ẹvẹ a ti ru otọ ọzae nọ o whu na? Kọ ohwo ọvo o gbe ti yo odẹ ọzae nọ o whu na ha? Ọghẹnẹ o jie izi jọ kẹ ahwo Izrẹl nọ e rẹ lẹliẹ ae riẹ oware nọ a re ru.

Kọ ẹvẹ a re ru otọ ohwo nọ o whu no hayo ohwo nọ ọ zẹ otọ riẹ fiki akpọ nọ ọ be bẹe? Oniọvo ohwo na hayo omoni riẹ nọ ọ mae kẹle iẹe ọ sae fa otọ na, otọ na o vẹ gbẹ jọ orọ uviuwou na.—Izerẹ 25:23-28; Ik. 27:8-11.

Kọ eme a re ru re odẹ ohwo nọ o whu no na o gbe vru hu? Omoni ọzae na ọ sae rehọ aye riẹ nọ o whu seba na, o ve yẹ ọmọ kẹe. Ọmọ na o ve yo odẹ ọzae nọ o whu no na, kọ ọye o re wo eware riẹ nọ o whu seba. Nwanọ uzi nana a lele oke nọ ọzae Rut o whu no. Ọghẹnẹ o jie uzi na keme ọ gwọlọ nọ a rẹrote eyae-uku.—Izie. 25:5-7; Mat. 22:23-28.

Joma ta kpahe Naomi. Ọzae Naomi họ Ẹlimẹlẹk. Rekọ nọ Ẹlimẹlẹk avọ emezae ivẹ riẹ a whu no, u gbe wo ohwo ọvo nọ ọ te rẹrote Naomi hi. (Rut 1:1-5) Nọ Naomi o kpozi obọ Juda no, ọ tẹ ta kẹ Rut aye ọmọ riẹ inọ jọ ọ vuẹ Boaz nọ ọye họ ohwo nọ ọ rẹ sae dẹ otọ rai zihe ze. Boaz yọ omoni Ẹlimẹlẹk nọ ọ kẹle rai gaga. (Rut 2:1, 19, 20; 3:1-4) Rekọ Boaz ọ ta nọ u wo omoni rai jọ nọ ọ kẹle rai vi ọyomariẹ. Yọ ọye họ ọnọ o wo udu nọ ọ rẹ sae rọ dẹ eware ohwo nọ o whu no na zihe ze. A jọ Ebaibol se odẹ ọzae na ha.—Rut 3:9, 12, 13.

Nọ a nwani fi ẹme na họ otọ kẹ ọzae na, o were riẹ. (Rut 4:1-4) Dede nọ omoware jọ u ti noi obọ, ọ riẹ nọ Naomi ọ te sai gbe yẹ ọmọ họ. Fikiere ọye ọ be te rehọ otọ nọ Ẹlimẹlẹk o whu seba na. Ọ tẹ rọwo nọ ọ rẹ dẹ otọ na zihe ze, inọ ẹbẹbẹ ọ riẹ hẹ. O rri rie nọ o te tubẹ lẹliẹ eware riẹ bu.

Rekọ nọ a te vuẹe nọ re ọ sae dẹ otọ na, ọ rẹ rehọ Rut nọ ọ rrọ aye omoni riẹ nọ a whu seba na, o tẹ dina kẹe uye. Ọ tẹ ta nọ: “Mẹ te sae dẹe zihe ze he, keme mẹ sae rọ ere raha ukuoriọ obọmẹ.” (Rut 4:5, 6) Fikieme o ro nwene iroro riẹ?

Otẹrọnọ ọzae na hayo omoni riẹ ọfa jọ ọ rehọ Rut, nọ a je yẹ ọmọ, ọmọ na ọye ọ te rehọ otọ Ẹlimẹlẹk na. Kọ ẹvẹ onana o te rọ “raha ukuoriọ” ọzae na? Ebaibol ọ ta te obei he. Rekọ o sae jọ nọ fiki eware nana nọ ma be te fodẹ na.

• Orọ ọsosuọ, ugho nọ ọ rọ dẹ otọ Ẹlimẹlẹk na u ti vru keme otọ na ọ te jọ ọriẹ hẹ. Ọmọzae nọ Rut o yẹ ọye o ti wo otọ na.

• Orọ avọ ivẹ, ọye ọ te rẹrote Rut avọ Naomi, ọye ọ te kuọ ae.

• Orọ avọ esa, otẹrọnọ Rut o yẹ emọ efa, emọ na a ti lele emọ obọriẹ ghale uku riẹ ẹdẹfa.

• Oware avọ ene họ, otẹrọnọ ọzae na o yẹ emọ efa ha, ọmọ nọ Rut o yẹ na ọvo ọ te rehọ eware Ẹlimẹlẹk gbe erọ ọyomariẹ. Otọ riẹ kpobi o ve ti zihe ruọ orọ ọmọ nọ o bi yo odẹ Ẹlimẹlẹk. Ọzae na ọ gwọlọ nọ eware riẹ i zihe ruọ erọ omọfa ha. Oyejabọ nọ ọ gbẹ gwọlọ fiobọhọ kẹ Naomi hi na. Ọ tẹ ta nọ jọ omoni rai ọfa nọ ọ rọ kẹle iẹe, koyehọ Boaz ọ rehọ Rut re ọ dẹ otọ na zihe ze. U no Boaz eva ze inọ o re ru ere re “ukuoriọ ọzae nọ o whu no na o gbẹ jọ rọ kẹe, odẹ ọzae nọ o whu no na u gbe vru no udevie imoni riẹ gbe ahwo ẹwho riẹ hẹ.”—Rut 4:10.

Ọzae nọ ọ rọwo rehọ Rut hu na, ukuoriọ riẹ gbe epanọ odẹ riẹ o rẹ rọ jọ akpọ ọvo o je roro kpahe. O je roro epanọ o re ro fiobọhọ kẹ omọfa ha. Onana o wha riẹ ze nọ odẹ riẹ nọ o jariẹ oja na u ro vru, a jọ Ebaibol fodẹ iẹe he. Oware ọfa nọ u te ọzae na obọ họ họ, obọdẹ uvẹ nọ Boaz o wo uwhremu na. Uyẹ Boaz Mesaya na o no ze. A kele i rie oke nọ a je kele esẹ-esẹ Jesu Kristi. Oware nọ u vru ku ọzae na o rro kẹhẹ fikinọ ọ gwọlọ fiobọhọ kẹ omọfa ha, ukuoriọ riẹ ọvo o je roro kpahe!—Mat. 1:5; Luk 3:23, 32.