Azẹ Jesu nọ o hwẹ nọ ọ rọ ta omai no igbo na ọvo họ oware nọ o wha riẹ ze nọ Ọghẹnẹ ọ be rọ rehọ izieraha mai vrẹ omai na. (Ẹf. 1:7) Rekọ rri ẹme nọ Ebaibol ọ ta. Anọ: “Ọghẹnẹ ọ jẹ rọ fiki ithihakọ riẹ rehọ izieraha ahwo rọvrẹ rai evaọ okenọ u kpemu.” (Rom 3:25, ẹme-obotọ) Koyehọ Ọghẹnẹ ọ jẹ rehọ izieraha ahwo vrẹ rai taure Jesu o te ti whu kẹ omai. Jihova o ru thọ họ nọ ọ jẹ rọ rehọ izieraha ahwo vrẹ rai dede nọ oke yena Jesu o ri whu kẹ omai hi. Fikieme ma rọ ta ere?

Jihova ọ ya eyaa inọ a ti yẹ “ọmọ” jọ nọ o ti siwi ahwo nọ a fi ẹrọwọ họ Ọghẹnẹ. Nọ Jihova ọ ya eyaa yena no, o rri rie wọhọ ẹsenọ Jesu ọ rehọ uzuazọ riẹ ta ahwo-akpọ no igbo no. (Emu. 3:15; 22:18) Jihova ọ riẹ nọ oke nọ o fihọ o te te, Ọmọ ọvo riẹ na ọ te rọwo nọ o re whu re ọ ta ahwo-akpọ no igbo. U mu rie ẹro nọ oware ovo o te whaha iẹe he. (Gal. 4:4; Hib. 10:7-10) Nọ Jesu ọ jọ otọakpọ, Jihova ọ kẹ riẹ udu nọ ọ rẹ rọ rehọ izieraha ahwo nọ a fi ẹrọwọ họ iẹe vrẹ rai dede nọ o ri whu kẹ ahwo-akpọ họ. U te ru nọ ahwo nana a jẹ rọ re erere idhe ẹtanigbo na taure o te ti whu.—Mat. 9:2-6.