UZOẸME UWUHRẸ 19
OLE AVỌ 22 A rọ Uvie na Mu No —Jọ Uvie na O Ze!
Ẹvẹ Jihova O ti ro Bruoziẹ Ahwo Evaọ Obaro?
“Jihova . . . ọ gwọlọ nọ a raha ohwo ọvo ho.”—2 PITA 3:9.
OWARE NỌ A JARIẸ TA KPAHE
U mu omai ẹro gaga inọ okenọ Jihova o ti bruoziẹ ahwo, o ti kienyẹ ohwo ọvo ho.
1. Eware jọ vẹ e be via nẹnẹ?
OKE nana nọ ma rrọ na, eware nọ Ebaibol ọ ta e be via nọ ma be ruẹ vevẹ. Ma be ruẹ epanọ “ovie ẹkpẹlobọ ovatha-ọre” na avọ “ovie obọze ovatha-ọre” na, a bi ro dhe owọ họ inika re a riẹ ohwo nọ ọ mae ga nọ o re su akpọ na. (Dan. 11:40, ẹme-obotọ) Ere ọvo ho, a be jọ akpọ na soso ta usi uwoma Uvie na vi epaọ anwẹdẹ. Yọ ahwo buobu a bi gine kurẹriẹ ze. (Aiz. 60:22; Mat. 24:14) U te no ere no, ọrigbo nọ a re fievahọ na ọ be rọ ẹme Ọghẹnẹ wuhrẹ omai “evaọ ẹruoke.”—Mat. 24:45-47.
2. Eme ma riẹ, kọ eme u fo nọ ma rẹ kareghẹhọ?
2 Jihova o ru nọ eruẹaruẹ nọ a jọ Ebaibol ruẹ kpahe ikpeware nọ e te via evaọ obaro, i bi ro vẹ omai ẹro vi epaọ ọsosuọ. (Itẹ 4:18; Dan. 2:28) Ma riẹ nọ, nọ uye ulogbo na u ti muhọ, ma te riẹ oware kpobi nọ u fo nọ ma rẹ riẹ, nọ u ti fiobọhọ kẹ omai thihakọ je kru ẹrọwọ mai. Eware e te jọ gaga oke yena. Dede nọ ma riẹ eware jọ nọ e te via, ma rẹ kareghẹhọ nọ ma riẹ eware jọ nọ e te via evaọ obaro ho. Ma te ta ẹme te oware nọ o lẹliẹ omai nwene oghẹrẹ nọ ma je rri eware jọ nọ e te via evaọ obaro. Ma te jẹ ta ẹme kpahe eware jọ nọ ma riẹ nọ e te via evaọ obaro. Yọ ma te ta kpahe oware nọ Ọsẹ obọ odhiwu mai na o ti ru oke yena.
EME MA RIẸ HẸ?
3. Eme ma ta vẹre nọ o te via nọ uye ulogbo na u te muhọ no, kọ fikieme ma rọ ta ere?
3 Vẹre vẹre ma jẹ ta nọ, nọ uye ulogbo na u te muhọ no, ohwo ọvo ọ te gbẹ sai kurẹriẹ bru Jihova ze he re ọ zọ evaọ ẹmo Amagidọn. Ma jẹ ta ere keme ma je roro nọ oware nọ o via evaọ oke Noa na u dikihẹ kẹ oware nọ o te via evaọ oke mai na. Ma je roro nọ epanọ Jihova ọvo ọ kare ẹthẹ okọ Noa taure owhe na o te ti ku ze na, ere o te jọ re evaọ obaro. Ma jẹ ta nọ, nọ uye ulogbo na u te muhọ no, Jihova ọ te gbẹ kẹ ahwo uvẹ hẹ re a nyaze ti kuomagbe omai re a zọ. O te wọhọ ẹsenọ Jihova ọ kare ẹthẹ ekurẹriẹ no.—Mat. 24:37-39.
4. Kọ enẹna ma gbe bi rri eware kpobi nọ e via evaọ oke Noa inọ i dikihẹ kẹ eware nọ e te via evaọ obaro? Ru ei vẹ.
4 Kọ onọ na họ, u fo re ma roro nọ oware nọ o via evaọ oke Noa na u dikihẹ kẹ oware nọ o te via evaọ oke nana? Ijo. Eme ma rọ ta ere? Keme oria Ebaibol ọvuọvo nọ o ta ere gbiae o riẹ hẹ. a Ginọ uzẹme inọ Jesu ọ ta nọ oke mai na o te jọ wọhọ “edẹ Noa.” Rekọ Jesu ọ ta ha inọ ohwo kpobi nọ ọ jariẹ oke yena hayo oware kpobi nọ o via oke yena u ti dikihẹ kẹ oware jọ evaọ oke nana. Yọ ọ ta gbe he inọ ẹthẹ okọ Noa nọ Ọghẹnẹ ọ kare na u dikihẹ kẹ oware jọ nọ o te via evaọ oke mai na. Orọnikọ ma be nwane ta nọ ma sai wuhrẹ oware ovo no oware nọ o via oke yena ze he he.
5. (a) Eme Noa o ru taure owhe na o te ti ku ze? (Ahwo Hibru 11:7; 1 Pita 3:20) (b) Eme o sae jọ nọ Noa ọ sai ru hu, nọ ma te sai ru gbe he nọ ma be ta usi uwoma na?
5 Nọ Jihova ọ vuẹ Noa inọ ọ be te raha akpọ na, Noa o dhesẹ nọ o wo ẹrọwọ keme o ku okọ. (Se Ahwo Hibru 11:7; 1 Pita 3:20.) Nẹnẹ na re, ohwo kpobi nọ o yo usi uwoma Uvie Ọghẹnẹ ọ rẹ daoma ru oware nọ o yo na, orọnikọ o re yo fihọ ezọ ọvo ho. (Iruẹru 3:17-20) Pita o se Noa “ọtausiuwoma ẹrẹreokie.” (2 Pita 2:5) Rekọ wọhọ epanọ ma ta evaọ uzoẹme nọ ọ vrẹ na, ma riẹ hẹ sọ Noa ọ ginẹ sae vuẹ ohwo kpobi nọ ọ jọ akpọ na oke yena inọ ọraha ọ be te ze. Nẹnẹ na, ma be ta usi uwoma re. Yọ ma be daoma tae evaọ akpọ na soso. Rekọ epa kpobi nọ ma daoma ta usi uwoma te kẹhẹ, ma te sae tae kẹ ohwo kpobi nọ ọ rrọ akpọ na ha re akpọ na o te ti re. Fikieme ma rọ ta ere?
6-7. Fikieme ma rọ ta nọ ma sae te ta usi uwoma kẹ ohwo kpobi evaọ akpọ na taure ekuhọ akpọ na o te ti te he?
6 Joma rri ẹme jọ nọ Jesu ọ ta kpahe usi uwoma nọ ma be ta na. Jesu ọ ta nọ a te ta usi uwoma na evaọ “akpọ na soso re o jọ isẹri kẹ erẹwho na kpobi.” (Mat. 24:14) Nẹnẹ na eruẹaruẹ yena e be mai rugba. Evẹrẹ nọ ma be rọ ta usi uwoma nẹnẹ i bu vi odu ọvo (1,000). Yọ ahwo buobu evaọ akpọ na a be ruẹ eware nọ ma bi wuhrẹ ahwo evaọ oria itanẹte mai jw.org.
7 O make rrọ ere na, Jesu ọ vuẹ ilele riẹ nọ a te sae ta usi uwoma te “okogho ikpewho” Izrẹl kpobi hi re ọ tẹ te nyaze. Koyehọ a te sae ta usi uwoma kẹ ohwo kpobi hi bọo oke nọ ọ te rọ nyaze. (Mat. 10:23; 25:31-33) Oware nọ Jesu ọ ta na o te via re nẹnẹ. Eria nọ ahwo buobu a be rria, egọmeti hayo ahwo nọ a wuzou eria yena, a be kuvẹ nọ a jọ etẹe ta usi uwoma ha. U je no etẹe no, emọ nọ a bi yẹ evaọ iminiti ọvuọvo dede, i bu wo umuo ho. Ma be daoma ta usi uwoma kẹ ahwo “orẹwho, orua, ẹrọunu gbe utu ahwo kpobi.” (Evia. 14:6) Rekọ uzẹme riẹ họ, ma sae te ta usi uwoma na kẹ ohwo kpobi evaọ akpọ na ha taure ekuhọ akpọ na o te ti te.
8. Nọ ma te roro te uye ulogbo na, onọ vẹ o sae jọ omai udu? (Rri iwoho na re.)
8 Kọ onọ jọ o tẹ rrọ otọ. Kọ ahwo nọ a sae ta usi uwoma kẹ hẹ taure uye ulogbo na u te ti muhọ, ẹvẹ Jihova avọ Ọmọ riẹ nọ o ro mu re o bruoziẹ na, a ti ru ai? (Jọn 5:19, 22, 27; Iruẹru 17:31) Oria Ebaibol nọ a rehọ uzoẹme nana no ze o ta nọ Jihova “ọ gwọlọ nọ a raha ohwo ọvo ho.” Rekọ “ọ gwọlọ nọ ahwo kpobi a wo uvẹ nọ a re ro kurẹriẹ.” (2 Pita 3:9; 1 Tim. 2:4) Dede nọ ma riẹ nọ ere Jihova ọ rrọ na, ọ jọ Ebaibol vuẹ omai epanọ o ti ru ahwo nọ a sae ta usi uwoma kẹ hẹ hẹ. O gba Jihova họ nọ ọ rẹ vuẹ omai oware nọ o bi ti ru hayo enọ o ru no ho.
Ẹvẹ Jihova o ti ru ahwo nọ a sae ta usi uwoma kẹ hẹ taure uye ulogbo na u te ti muhọ? (Rri edhe-ẹme avọ 8) c
9. Eme Jihova ọ jọ Ebaibol vuẹ omai?
9 Jihova ọ jọ Ebaibol vuẹ omai eware jọ nọ o ti ru. Ọ vuẹ omai nọ ọ te kpare “enọ i kiẹrẹe he” ze. Ahwo nọ a sai yo usi uwoma na ha re a te ti whu, a rrọ usu ahwo yena. Uvẹ nọ a sai ro kurẹriẹ u rovie kẹ ae he. (Iruẹru 24:15; Luk 23:42, 43) Oyena o tẹ wha enọ efa ze.
10. Enọ efa vẹ e sae jọ omai udu?
10 Kọ ahwo kpobi nọ a ti whu nọ uye ulogbo na u te muhọ no, orai u re no ye, a te gbẹ kpare ae ze he? Ebaibol ọ vuẹ omai vevẹ nọ ahwo kpobi nọ a bi keke aro fihọ wọso Ọghẹnẹ, nọ a ti kpe evaọ ẹmo Amagidọn, Ọghẹnẹ ọ te kpare ae ze he. (2 Tẹs. 1:6-10) Rekọ evaọ oke uye ulogbo na, ẹsejọhọ ahwo jọ a ti whu fikinọ a who no, hayo fikinọ a jẹ mọ. O sae jẹ jọ nọ asidẹnte o ti kpe ejọ, yọ ahwo-akpọ a ti kpe ejọ re. (Ọtausi. 9:11; Zẹk. 14:13) Kọ ahwo yena jọ a te jọ usu “enọ i kiẹrẹe he,” nọ a te kpare ze evaọ akpọ ọkpokpọ na? Ma riẹ hẹ.
OWARE NỌ MA RIẸ
11. Eme Ọghẹnẹ o ti rri ro bruoziẹ ahwo okenọ ẹmo Amagidọn o te fi ze?
11 Ma riẹ eware buobu nọ e te via evaọ obaro. Ojọ họ, ma riẹ nọ oghẹrẹ nọ ahwo a ru inievo Kristi oye Ọghẹnẹ o ti rri ro bruoziẹ rai nọ ẹmo Amagidọn o te fi ze. (Mat. 25:40) Ahwo nọ a fiobọhọ kẹ inievo Kristi na, koyehọ enọ a rọ ẹzi wholo na, je lele ai ru iruo nọ Ọghẹnẹ ọ kẹ rai, a ti bruoziẹ kẹ ae nọ igodẹ a rrọ. Oware ofa nọ ma riẹ họ, inievo jọ nọ a rọ ẹzi wholo a te gbẹ jọ otọakpọ na nọ uye ulogbo na u te muhọ no. Omoke jọ taure Amagidọn o te ti fi ze, a ve ti kpobọ odhiwu no. Nọ orọnọ ejọ nọ a rọ ẹzi wholo na a te gbẹ jọ otọakpọ na omoke jọ na, ẹsejọhọ uvẹ u ti rovie nọ ahwo nọ a gwọlọ gọ Ọghẹnẹ a ti ro kurẹriẹ ze ti lele ai ru iruo nọ Ọghẹnẹ ọ kẹ rai. (Mat. 25:31, 32; Evia. 12:17) Eware yena nọ ma riẹ na i wuzou gaga. Fikieme?
12-13. Eme o sae jọ nọ ahwo jọ a ti ru nọ a te ruẹ nọ a raha “Babilọn Ologbo na” no? (Rri iwoho na re.)
12 Nọ uye ulogbo na u te muhọ no, a vẹ te raha “Babilọn Ologbo na” koyehọ egagọ erue nọ e rrọ akpọ na. Nọ a te raha iẹe na, ẹsejọhọ ahwo jọ nọ a te ruẹ e riẹ a te kareghẹhọ nọ Isẹri Jihova a jẹ ta nọ oware yena o te via. Kọ o te lẹliẹ ahwo otiọye na kurẹriẹ ze?—Evia. 17:5; Izik. 33:33.
13 Otẹrọnọ ahwo jọ a kurẹriẹ oke yena fiki oware nọ a te ruẹ na, kiyọ o te wọhọ oware nọ o via evaọ obọ Ijipti oke ẹdẹ. Okenọ ahwo Izrẹl a je no obọ Ijipti, “ogbotu ahwo sa-sa” a lele i rai. Ẹsejọhọ ahwo yena jọ a lele ahwo Izrẹl fikinọ a ruẹ nọ Iye Ikpe nọ Mosis ọ ta nọ e te ze na e ginẹ ze. O tẹ lẹliẹ ae fi ẹrọwọ họ Ọghẹnẹ. (Ọny. 12:38) Kọ oware utioye na o tẹ via evaọ oke uye ulogbo na, eme ma ti roro? Ma rehọ iẹe nọ, nọ ahwo jọ a ruẹ nọ a raha Babilọn Ologbo na no, a te bi kurẹriẹ ze. Kọ eva e te dha omai inọ okenọ a riẹ nọ ẹmo Ọghẹnẹ ọ kẹle efi no, a bi ro kurẹriẹ ze? Ijo. Eva e te dha omai hi keme ma gwọlọ nọ ma re wo ohrọ-oriọ wọhọ Ọsẹ obọ odhiwu mai. Jihova yọ “Ọghẹnẹ nọ o wo ohrọ-oriọ gbe ọdawẹ, nọ ọ rẹ kaki mu ofu hu yọ ọ vọ avọ uyoyou nọ o rẹ hiẹ hẹ gbe uzẹme.” b—Ọny. 34:6.
Nọ ahwo jọ a tẹ ruẹ nọ a be raha “Babilọn Ologbo na,” a te kareghẹhọ nọ u kri no nọ Isẹri Jihova a be rọ ta nọ oware yena o te via (Rri edhe-ẹme avọ 12-13) d
14-15. Kọ Ọghẹnẹ o re bruoziẹ kpe ohwo fiki oria nọ ọ be rria hayo fiki oke nọ o ro whu? Ru ei vẹ. (Olezi 33:4, 5)
14 Ẹsejọ inievo jọ a rẹ ta nọ otẹrọnọ omoni rai jọ nọ ọ rrọ ukoko na ha o whu re uye ulogbo na o tẹ te ze oye o mai woma. A be ta ere keme a roro nọ ẹsejọhọ a te kpare ahwo otiọye na ze. Ma riẹ nọ fikinọ inievo na a you imoni rai yena a be rọ ta ere na. Rekọ joma riẹ nọ oke nọ ohwo o ro whu oye a rẹ rọ riẹ sọ a te kpare iẹe ze he. Jihova nọ o ti bruoziẹ na o re bruoziẹ nọ o kiẹrẹe ẹsikpobi, o re bruoziẹ thọ họ. (Se Olezi 33:4, 5.) Ma riẹ nọ “Obruoziẹ otọakpọ na soso” o ti ru oware nọ u kiehọ.—Emu. 18:25.
15 Ma sae jẹ ta nọ orọnikọ oria nọ ohwo ọ be rria oye a te rọ riẹ hẹ sọ o ti wo uzuazọ ebẹdẹ bẹdẹ. Ahwo buobu a be rria eria nọ a sae ta usi uwoma Uvie na te he. Fikiere uvẹ nọ a re ro kurẹriẹ u ri rovie kẹ ahwo yena ha. Ma riẹ nọ Jihova Ọghẹnẹ mai na ọ sae rọ fiki oyena bruoziẹ kpe ahwo yena ha inọ “ewe” a rrọ. (Mat. 25:46) Jihova o you ahwo nọ a be rria eria itieye na vi epanọ ma you rai dede. Ma nwane riẹ oghẹrẹ nọ Jihova o ti ru ahwo yena ha evaọ oke uye ulogbo na. Rekọ ẹsejọhọ, nọ ejọ rai a tẹ ruẹ ikpeware nọ Jihova o ti ru evaọ oke uye ulogbo na, a ti fi ẹrọwọ họ Jihova, a vẹ te jọ abọ riẹ.—Izik. 38:16.
Nọ uye ulogbo na u te muhọ no, . . . kọ o sae jọ nọ ahwo jọ a ti kurẹriẹ ze?
16. Eme ma riẹ kpahe Jihova? (Rri uwoho na re.)
16 Eware nọ ma jọ Ebaibol wuhrẹ e lẹliẹ omai riẹ nọ Jihova ọ rọ uzuazọ ohwo-akpọ zaro vievie he. Uzuazọ mai o ghare riẹ obọ te epanọ o ro siobọno Ọmọ riẹ nọ o you gaga na re o whu fiki mai, ma vẹ sai wo ẹruore uzuazọ ebẹdẹ bẹdẹ. (Jọn 3:16) Jihova o bi ru eware buobu kẹ omai kpobi nọ e lẹliẹ omai riẹ nọ o you omai gaga. (Aiz. 49:15) Ọ riẹ odẹ mai kpobi na omomọvo. Jihova ọ riẹ ohwo kpobi totọ. Fikiere nọ ọ tẹ be kpare ohwo ze, ọ rẹ kpare iẹe ze evaọ oghẹrẹ nọ ọ jọ vẹre dẹẹ, te iroro nọ o wo taure o te ti whu. (Mat. 10:29-31) Eware nana kpobi e lẹliẹ omai riẹ nọ Ọsẹ obọ odhiwu mai na o ti bruoziẹ ohwo kpobi gbagba, o ti kienyẹ ohwo ọvo ho. Ọ te re ohrọ ohwo nọ u fo nọ a rẹ re ohrọ riẹ. Joma brudu hu.—Jem. 2:13.
Ma riẹ nọ Jihova o ti bruoziẹ ohwo kpobi gbagba, o ti kienyẹ ohwo ọvo ho, yọ ọ te re ohrọ ohwo nọ u fo nọ a rẹ re ohrọ riẹ (Rri edhe-ẹme avọ 16)
17. Eme ma ti wuhrẹ evaọ uzoẹme notha na?
17 Oghẹrẹ nọ ma riẹ otọ eware na obọnana o lẹliẹ omai ruẹ nọ u fo re ma rọ ajọwha ta usi uwoma na gaga enẹna. Eme ma rọ ta ere? Kọ eme o be lẹliẹ omai gbẹ rọ ajọwha ta usi uwoma na? Ma te jọ uzoẹme notha na romatotọ kẹ iyo enọ yena.
OLE AVỌ 76 O rẹ Were Kẹhẹ
a Whọ tẹ gwọlọ riẹ oware nọ o lẹliẹ omai nwene oghẹrẹ nọ ma bi rri iku eware nọ e via nọ e rrọ Ebaibol na, rri Uwou-Eroro Asa 15, 2015, re who rri uzoẹme nọ o ta nọ “Onana Họ Oreva Ra” nọ ọ rrọ ẹwẹ-obe avọ 7-11.
b Nọ a tẹ raha Babilọn Ologbo na no, odawọ jọ u ti te idibo Jihova kpobi gbe ahwo kpobi nọ a nyaze ti kuomagbe idibo Jihova evaọ oke yena. Gọg obọ Magọg ọ te wọ ohọre bru ai ze.
c IWOHO NA Ẹwẹ-obe avọ 9: Iwoho esa nọ a bi jo dhesẹ eware jọ nọ e wha riẹ ze nọ ahwo jọ a gbe ri yo usi uwoma na ha: (1) Aye na ọ be rria oria nọ ahwo egagọ jọ a rẹ jọ nwa ohwo oma hayo kpe ohwo nọ o kpohọ etẹe nyae ta usi uwoma. Egagọ na ọye ahwo a mae rrọ evaọ oria na, (2) ọzae-avọ-aye nọ a be rria oria nọ ahwo nọ a bi su a rẹ jọ kru ohwo nọ ọ be ta usi uwoma inọ ọ raha uzi egọmeti, yọ a sai ru ei oware uyoma, (3) ọzae nọ ọ be rria obọ iwhre jọ nọ u siomano gaga nọ a sae kaki te he.
d UWOHO NA: Ọmọtẹ jọ nọ ọ dhẹ no ukoko na no vẹre, ọ kareghẹhọ eware nọ o wuhrẹ kpahe epanọ a te rọ raha “Babilọn Ologbo na.” O te ti bruoma kpiroro. O te kuomagbe ọsẹgboni riẹ nọ a rrọ ukoko na. Nọ oware utioye na o tẹ via evaọ oke uye ulogbo na, ma rẹ daoma re ohrọ ohwo otiọye na, wọhọ epanọ Ọsẹ obọ odhiwu mai ọ rẹ re ohrọ na. Eva e rẹ were omai inọ ohwo jọ o zihe bru Jihova ze.
