1. Eware jọ vẹ a ta ẹme te evaọ ẹgwae ẹgbukpe 2023?

 A JỌ ẹgwae ẹgbukpe 2023 a vuẹ omai eware jọ nọ ma jọ Ebaibol wuhrẹ nọ oghẹrẹ nọ ma riẹ otọ rai u nwene no. A tẹ jẹ vuẹ omai eware nọ a nwene no evaọ usi uwoma nọ ma be ta na. A jọ ẹgwae na ta nọ ẹsejọhọ nọ a tẹ raha Babilọn Ologbo na no, ahwo nọ a ruẹ oware nọ o via na a ti kuomagbe idibo Jihova. A ta re nọ, no umuo Akpegbọvo 2023 vrẹ, iwhowho-uvie a te gbẹ nẹ iyẹrẹ eware buobu nọ a jẹ nẹ iyẹrẹ rai vẹre he. Kọ eware nọ a nwene na u dhesẹ nọ ma rẹ gbẹ ta usi uwoma te epanọ ma jẹ ta vẹre he? Dazigbe!

2. Fikieme o jẹ roja re ma ta usi uwoma na vi epaọ ọsosuọ? (Mak 13:10)

² U fo re ma se usi uwoma ota gboja gaga. Keme nọ ma bi kiẹzẹ jẹ rọwo ze kẹdẹ kẹdẹ na, yọ edẹ urere na e be dhẹ vrẹ ọvo. Joma rri epanọ Jesu ọ ta nọ ilele riẹ a ti se usi uwoma ota gboja te evaọ edẹ urere na. (Se Mak 13:10.) Ma rẹ ruẹ ẹme nọ Jesu ọ ta na evaọ obe Matiu re. Jesu ọ ta nọ a te ta usi uwoma Uvie na evaọ akpọ na soso, kẹsena “urere na” o vẹ te ze. (Mat. 24:14) Urere nọ Jesu ọ ta ẹme te na họ uzedhe okenọ Ọghẹnẹ ọ te rọ raha akpọ nana nọ Ẹdhọ o bi su na. Jihova o fi “ẹdẹ gbe auwa” na họ no nọ eware nọ e te via evaọ oke yena e te rọ via. (Mat. 24:36; 25:13; Iruẹru 1:7) Kẹdẹ kẹdẹ nọ oke u bi kpo jẹ ke na, yọ ẹdẹ na ọ be kẹle. (Rom 13:11) Re ẹdẹ na o te ti te, joma ta usi uwoma na ziezi.

3. Fikieme ma be rọ ta usi uwoma na?

 ³ Oke kpobi nọ a tẹ ta ẹme te usi uwoma, u fo re ma nọ omamai nọ: Fikieme ma be rọ ta usi uwoma na? Uyoyou nọ ma wo họ oware nọ o be wọ omai ta usi uwoma. Ma be ta usi uwoma je wuhrẹ ahwo fikinọ eware nọ ma bi wuhrẹ ahwo na e were omai. Yọ ma you ahwo nọ ma be ta usi uwoma na kẹ re. Onọ o mae rro kpobi họ, ma you Jihova, yọ ma gwọlọ nọ ohwo ọvo ọ raha odẹ riẹ hẹ. Ma te ta ẹme te eware na ọvuọvo.

MA BE TA USI UWOMA FIKINỌ EWARE NỌ MA BE TA KẸ AHWO E WERE OMAI

4. Ẹvẹ oma u re ru omai nọ a tẹ vuẹ omai emamọ usi?

⁴ Kọ whọ kareghẹhọ okenọ a rọ vuẹ owhẹ emamọ usi jọ? Ẹsejọhọ nọ a vuẹ owhẹ nọ a yẹ ọmọ jọ evaọ uwou ra, hayo inọ iruo nọ whọ jẹ gwọlọ anwẹdẹ na i te owhẹ obọ no, eva nọ e were owhẹ okolo ho. O sae jọ nọ oma o jẹ kpakpa owhẹ re whọ vuẹ imoni gbe egbẹnyusu ra. Kinọ who yo usi nọ o mai woma kpaobọ, usi Uvie Ọghẹnẹ na, ẹvẹ oma u ru owhẹ?

5. Evaọ oke ọsosuọ nọ a ro mu owhẹ Ebaibol họ ewuhrẹ, ẹvẹ o jọ? (Rri iwoho na re.)

⁵ Kareghẹhọ oghẹrẹ nọ eva e were owhẹ te nọ a mu owhẹ Ebaibol họ ewuhrẹ. Oke yena whọ rọ riẹ nọ who wo Ọsẹ jọ evaọ obọ odhiwu nọ o you owhẹ. Yọ ọ gwọlọ nọ who kuomagbe idibo riẹ gọe. Who te je wuhrẹ nọ oke o be tha nọ uye gbe edada nọ e rrọ akpọ na kpobi u ti ro kuhọ. Ere ọvo ho, who wuhrẹ nọ a te kpare ahwo nọ a whu no ziọ uzuazọ. Yọ ẹsejọhọ whọ te ruẹ ahwo ra nọ a whu no, nọ a te kpare ze evaọ akpọ ọkpokpọ na. Who wuhrẹ eware efa re. (Mak 10:29, 30; Jọn 5:28, 29; Rom 8:38, 39; Evia. 21:3, 4) Eva e jẹ were owhẹ miọmiọmiọ fiki eware nọ who wuhrẹ na. (Luk 24:32) Eware nọ who wuhrẹ e were owhẹ te epanọ whọ rọ gwọlọ nọ whọ rẹ vuẹ ahwo emamọ eware nọ who wuhrẹ.—Je rri Jerimaya 20:9.

6. Eme whọ jọ iku Ernest avọ Rose na wuhrẹ?

 ⁶ Joma gbiku oware jọ nọ o via. U wo ọmọzae jọ nọ a re se Ernest. b Ọ jọ oware wọhọ ikpe ikpe nọ ọsẹ riẹ o whu. Ọ ta nọ: “Oke yena mẹ jẹ hai roro nọ ‘Kinọ ọsẹ mẹ o whu no na, obọ odhiwu ọ nya no na? Kọ mẹ te gbẹ ruẹ e riẹ hẹ? Kinọ o whu no na, u re no ye?’ O jẹ hae da omẹ ghegheghe nọ mẹ tẹ ruẹ emaha wọhọ omẹ nọ esẹ rai e gbẹ rrọ akpọ.” Ernest ọ jẹ hae nya kpohọ oria nọ a ki ọsẹ riẹ fihọ. O ve kigwẹ fihọ uki ọsẹ riẹ, ọ vẹ lẹ nọ: “Ọghẹnẹ, ivie mẹ gwọlọ riẹ oria nọ ọsẹ mẹ ọ rrọ.” Nọ oware wọhọ ikpe ikpegbihrẹ e vrẹ no, Isẹri Jihova a tẹ ta nọ a re wuhrẹ Ernest Ebaibol. Yọ ọ rọwo nọ a wuhrẹ iẹe. Kọ etẹe ọ rọ riẹ nọ ahwo nọ a whu no a riẹ oware ovo ho. A wọhọ ahwo nọ a wezẹ diwi no. O te je wuhrẹ nọ Ọghẹnẹ ọ te kpare ahwo nọ a whu no ze. Ọziọ eva e were riẹ hẹ. (Ọtausi. 9:5, 10; Iruẹru 24:15) Enọ nọ e jẹ kẹe uye anwẹdẹ na, eye ọ jọ Ebaibol ruẹ uyo rai no na. Eware nọ Ernest o wuhrẹ na e were riẹ gaga. Nọ u te oria jọ no, a te mu aye riẹ Rose Ebaibol họ ewuhrẹ. Eware nọ o je wuhrẹ na e tẹ jẹ were iẹe gaga. Aimava a tẹ họ-ame evaọ ukpe 1978. A jẹ rọ ajọwha vuẹ imoni gbe egbẹnyusu rai eware nọ a jọ Ebaibol wuhrẹ. Ahwo nọ Ernest avọ Rose a wuhrẹ nọ e họ-ame, a bu vi udhosa-gbikpe.

7. Eme ma re ru nọ ẹme Ọghẹnẹ ọ tẹ were omai gaga? (Luk 6:45)

⁷ Eware nọ ma ta ẹme te na i dhesẹ nọ eware nọ ma jọ Ebaibol wuhrẹ e tẹ ginẹ were omai, ma te gwọlọ oghẹrẹ kpobi nọ ma rẹ rọ ta ae kẹ ahwo. (Se Luk 6:45.) Nwanọ ere ilele Jesu a jẹ rọ ajọwha vuẹ ahwo eware nọ a wuhrẹ. A ta nọ: “Ma rẹ sae siọ ẹme ba ẹta kpahe eware nọ ma ruẹ je yo ho.” (Iruẹru 4:20) Eware nọ ma wuhrẹ evaọ ẹme Ọghẹnẹ na e were omai wo umuo ho. Fikiere ma gwọlọ vuẹ ahwo kpobi.

MA BE TA USI UWOMA KẸ AHWO KPOBI FIKINỌ MA YOU RAI

8. Fikieme ma be rọ ta usi uwoma kẹ ahwo? (Rri ẹkpẹti na “ You Ahwo—Fiobọhọ kẹ Ae Jọ Ilele.”) (Rri uwoho na re.)

⁸ Ma you ahwo kpobi epanọ Jihova avọ Ọmọ riẹ a you rai na. (Itẹ 8:31; Jọn 3:16) Nọ ma tẹ ruẹ ahwo nọ “a riẹ Ọghẹnẹ he,” yọ “a wo ẹruore” gbe he, ohrọ rai o rẹ re omai. (Ẹf. 2:12) A wọhọ ahwo nọ a kie fihọ ọgọdọ, nọ a riẹ oghẹrẹ nọ a sai ro no eva riẹ ze he. Rekọ ma wo ufi nọ ma sai ro si ai no eva riẹ ze. Ufi na họ usi uwoma Uvie Ọghẹnẹ na. Ma be ta usi uwoma kẹ ahwo nana fikinọ ma you rai. Yọ ohrọ rai o be re omai re. Usi uwoma nọ ma be ta kẹ ahwo na, u re ru nọ a rẹ rọ riẹ nọ eware i ti woma. Yọ nọ  a te ru oware nọ ma wuhrẹ i rai, o rẹ lẹliẹ ai yeri emamọ uzuazọ enẹna. A ve je wo “uvi uzuazọ” na, evaọ akpọ ọkpokpọ Ọghẹnẹ bẹdẹ bẹdẹ.—1 Tim. 6: 19.

9. Okpoware jọ vẹ o te via kẹle na nọ ma be vuẹ ahwo? (Izikiẹl 33:7, 8)

⁹ Oware ofa jọ nọ ma be vuẹ ahwo fikinọ ma you rai họ, Ọghẹnẹ ọ te raha akpọ omuomu nana kẹle na. (Se Izikiẹl 33:7, 8.) Ohrọ imoni mai gbe amọfa nọ a rrọ ukoko na ha o be re omai. Keme nọ oke o tẹ nwane ke no ọvo, a vẹ tọlọ oma rai, a ve kpohọ oria nọ a be nya. A riẹ hẹ sọ oware ulogbo jọ o te via kẹle na. Ebaibol ọ ta nọ “uye ulogbo o te jọ, utionọ o re via no emuhọ akpọ na ze he, ijo, o gbẹ te via ofa ha.” (Mat. 24:21) Fikiere ma gwọlọ nọ ma rẹ ta usi uwoma kẹ ae, re a riẹ oware nọ o te via evaọ oke uye ologbo na. Ma gwọlọ nọ a riẹ nọ oke yena Ọghẹnẹ ọ te raha egagọ erue kpobi no. Ukuhọ riẹ ọ vẹ te rọ ẹmo Amagidọn raha ahwo omuomu nọ a rrọ akpọ na no. (Evia. 16:14, 16; 17:16, 17; 19:11, 19, 20) Ma gwọlọ nọ ahwo buobu a jọ oke nana kurẹriẹ re a lele omai gọ Jihova. Rekọ epanọ ma ta usi uwoma te ghele na, imoni mai jọ gbe amọfa buobu a ri mu Jihova họ ẹgọ họ. Kọ eme ọ te via kẹ ae?

10. Fikieme o rọ gbẹ roja re ma vuẹ ahwo inọ Ọghẹnẹ ọ te raha akpọ na?

¹⁰ Ma jọ uzoẹme nọ ọ vrẹ na wuhrẹ nọ, ẹsejọhọ ahwo jọ a ti kurẹriẹ okenọ Jihova ọ te raha Babilọn Ologbo na. Yọ o sae jọ nọ Jihova o ti siwi ahwo nọ a kurẹriẹ. Nọ o rrọ ere na, o roja gaga re ma ta usi uwoma kẹ ae enẹna. Keme nọ ma tẹ vuẹ ae enẹna, nọ a gbẹ maki kurẹriẹ hẹ, a te kareghẹhọ oware nọ ma jẹ vuẹ ae oke yena. (Je rri Izikiẹl 33:33.) Ẹsejọhọ nọ a tẹ kareghẹhọ eme nọ ma jẹ ta kẹ ae, a ve ti kuomagbe omai gọ Jihova taure a tẹ te raha akpọ na. Oware utioye na o via kẹ ohwo jọ nọ o re rou ahwo nọ a fihọ uwou-odi evaọ obọ Filipai. Okenọ ‘otọ u nuhu gaga,’ o ro kurẹriẹ. Fikiere, ẹsejọhọ ahwo nọ a be rọwo kurẹriẹ nẹnẹ ha na, a ti kurẹriẹ nọ a tẹ ruẹ oghẹrẹ nọ Jihova ọ te rọ raha Babilọn Ologbo na.—Iruẹru 16:25-34.

MA BE TA USI UWOMA FIKINỌ MA YOU JIHOVA YỌ MA GWỌLỌ RU ODẸ RIẸ FO

11. Eme ma re ru nọ u re dhesẹ nọ ma be kẹ Ọghẹnẹ oruaro gbe ogaga? (Eviavia 4:11) (Rri iwoho na re.)

¹¹ Ma be ta usi uwoma na kẹhẹ na, fikinọ ma you Jihova. Yọ ma gwọlọ nọ a ru odẹ riẹ fo. Usi uwoma na yọ edhere jọ nọ ma bi ro jiri Ọghẹnẹ oyoyou mai na. (Se Eviavia 4:11.) Jihova o gine te Ọghẹnẹ nọ mai kpobi ma rẹ kẹ oruaro, ọghọ gbe ogaga na. Nọ ma te bi wuhrẹ ahwo inọ Ọghẹnẹ ọye “ọ ma eware kpobi” gbe nọ ọye o ru nọ ma rọ  rrọ uzuazọ, u dhesẹ nọ ma be kẹe oruaro gbe ọghọ. Yọ, nọ ma tẹ be rọ oke mai, eware nọ ma wo, gbe ẹgba mai ta usi uwoma na, yọ ogaga nọ ma wo ma be kẹ Jihova na. (Mat. 6:33; Luk 13:24; Kọl. 3:23) O rẹ were omai re ma vuẹ ahwo kpahe Ọghẹnẹ keme ma you rie. Yọ ma gwọlọ wuhrẹ ahwo kpahe odẹ Ọghẹnẹ gbe oghẹrẹ ohwo nọ ọ rrọ. Fikieme?

12. Nọ ma tẹ rrọ usi uwoma, eme ma re ru nọ u re dhesẹ nọ ma bi ru odẹ Ọghẹnẹ fo?

¹² Ma gwọlọ nọ ma re ru odẹ Jihova fo fikinọ ma you rie. (Mat. 6:9) Ọmọziọ erue Setan o gu fihọ Ọghẹnẹ uzou no ho. Fikiere ma gwọlọ fiobọhọ kẹ ahwo riẹ nọ erue gheghe Setan o bi gu fihọ Ọghẹnẹ uzou na. (Emu. 3:1-5; Job 2:4; Jọn 8:44) Joma wuhrẹ ohwo kpobi nọ ọ rọwo nọ ọ rẹ gaviezọ re ọ riẹ oghẹrẹ ohwo nọ Ọghẹnẹ ọ ginẹ rrọ. Ma gwọlọ nọ ahwo a riẹ nọ Jihova o wo uyoyou wo umuo ho. Isuẹsu riẹ e mai woma, o re kienyẹ ohwo ho. Ma gwọlọ jẹ ae riẹ nọ, Uvie Ọghẹnẹ ọvo u ti si uye nọ o rrọ akpọ na no. Kọ udhedhẹ ọvo o te da oria kpobi fia. (Ol. 37:10, 11, 29; 1 Jọn 4:8) Nọ ma te bi dhesẹ oghẹrẹ nọ Ọghẹnẹ ọ rrọ dẹẹ kẹ ahwo gbe epanọ o woma te, yọ ma bi ru odẹ riẹ fo. Yọ eva e rẹ were omai wo umuo ho keme Isẹri Jihova nọ a se omai na ma bi rugba na. Fikieme ma rọ ta ere?

13. Fikieme eva e be rọ were omai inọ a se omai Isẹri Jihova? (Aizaya 43:10-12)

¹³ Jihova o se omai “isẹri” riẹ. (Se Aizaya 43:10-12.) Utu Ẹruorote na o kere ileta jọ ze evaọ imikpe jọ nọ e vrẹ na inọ: “Re a se ohwo Osẹri Jihova, a rẹ ruẹ oware nọ o rro tei hi.” c Fikieme? Ma kẹ oriruo jọ. Whọ tẹ gwọlọ ohwo nọ o re se isẹri kẹ owhẹ evaọ obọ okọto, oghẹrẹ ohwo vẹ whọ te gwọlọ? Whọ te gwọlọ ohwo nọ whọ riẹ ziezi, nọ a re fievahọ, nọ a rẹ sae rọwo ẹme nọ ọ ta ze.  Nwanọ ere re, nọ Jihova o se omai Isẹri riẹ na u dhesẹ nọ ọ riẹ omai lafi. Yọ o fievahọ omai re. Ọ riẹ nọ ma te sai wuhrẹ ahwo re a riẹ nọ ọye ọvo họ Ọghẹnẹ uzẹme na. Eva e be were omai gaga inọ mai yọ Isẹri Jihova. Ma be daoma rọ uvẹ kpobi nọ u rovie ta usi uwoma kẹ ahwo re a riẹ odẹ Ọghẹnẹ. A vẹ jẹ riẹ nọ erue koikoi Ẹdhọ o gu fihọ Ọghẹnẹ uzou na. Nọ ma tẹ be ta usi uwoma na, kiyọ odẹ nọ a se omai na ma bi gine rugba na.—Ol. 83:18; Rom 10:13-15.

MA TE TA USI UWOMA NA BẸSENỌ AKPỌ NA O TI KUHỌ

14. Eme o sae jọ nọ u ti ru eva were omai evaọ obaro?

¹⁴ Ma bi rẹro emamọ eware nọ e te via evaọ obaro nọ ma bi yeri kpohọ na. Ma riẹ nọ taure uye ulogbo na o tẹ te ze, Jihova o ti fiobọhọ kẹ ahwo buobu nọ i wo emamọ eva re a yo usi uwoma na je kurẹriẹ. Oye ovo gbe he, ma bi rẹro nọ makọ okenọ akpọ na kpobi o ti duwuku na, amọfa a te gbẹ nyaze ti kuomagbe omai jiri Jihova. A vẹ te zọ okenọ a te raha akpọ Ẹdhọ no.—Iruẹru 13:48.

15-16. Iruo vẹ ma rẹ gbẹ daoma ru, kọ oke vẹ i ti ro kuhọ?

¹⁵ Taure oke yena u te ti te, iruo e rrọ otọ kẹ omai nọ ma re ru. Iruo yena họ usi uwoma Uvie na nọ ma rẹ ta. A te gbẹ wariẹ ta usi uwoma Uvie na ẹdẹfa ha. U te no usi uwoma Uvie na nọ ma rẹ ta no, ma rẹ jẹ vuẹ ahwo inọ oke nọ Ọghẹnẹ ọ te rọ raha akpọ oyoma nana o kẹle gaga no. Nọ ọraha na ọ jẹ ze, a vẹ riẹ nọ Jihova Ọghẹnẹ ọye ọ vuẹ omai nọ ma whowho ovuẹ na.—Izik. 38:23.

¹⁶ Kinọ ma riẹ eware nana kpobi no na, eme o rrọ omai oja inọ ma re ru? Ma rẹ gbẹ ta usi uwoma na, keme usi uwoma na o be were omai oma, ma you ahwo na, onọ o mae rro kọ, ma you Jihova. Ma gwọlọ nọ ohwo ọvo ọ rẹ raha odẹ riẹ hẹ. Fikiere ma te gbẹ ta usi uwoma na avọ ajọwha bẹsenọ Jihova ọ rẹ ta nọ, “Onọ wha ta, u te no!”