AHWO a gwọlọ nọ a re wo evawere evaọ uzuazọ. Rekọ evaọ edẹ urere nana, ebẹbẹ i ru nọ akpọ ọ be rọ “bẹ eyeri.” (2 Tim. 3:1) Okienyẹ, ẹyao, iruo nọ e riẹ hẹ, uweri, hayo eware efa nọ e be wha awa-ọruọ gbe uweri ze e be rọ ẹmẹrera mi ahwo buobu oghọghọ rai no. Udu o rẹ sai tube whrehe idibo Jihova je ru nọ a gbe ro wo evawere he. Otẹrọnọ oware utiona o be via kẹ owhẹ, ẹvẹ whọ sae rọ wariẹ wo oghọghọ?

Re ma sae kuyo onọ yena, o gwọlọ nọ ma rẹ kake riẹ oware nọ uvi ọghọghọ o rrọ gbe epanọ ahwo jọ a ro wo oghọghọ no ghelọ edawọ sa-sa nọ a rẹriẹ ovao dhe. Kẹsena ma vẹ te ta kpahe oware nọ ma re ru nọ ma sai ro wo oghọghọ je tube fiba oghọghọ nọ ma wo no.

Ajọ ma roro vievie he inọ ohwo ọ tẹ rrọ jaka jaka hayo ọ tẹ be hae sa-akiehwẹ, koyehọ o wo oghọghọ. Wọhọ oriruo, ọgbidi ọ rẹ sae sa-akiehwẹ nọ ọ tẹ da bẹ no. Rekọ nọ idi na e tẹ yẹ noi aro no, ọ rẹ gbẹ hwẹ hẹ, ọ sae wariẹ mu uzuazọ nọ o vọ avọ ebẹbẹ gbe uweri họ eyeri. Akiehwẹ ubroke riẹ na yọ uvi oghọghọ họ.​—Itẹ 14:13.

Evaọ abọdekọ riẹ, obọ udu na oghọghọ u re no ze. A dhesẹ oghọghọ wọhọ “evawere nọ ohwo o re wo nọ o te wo oware uwoma jọ hayo nọ o te bi rẹro ewoma.” Oghọghọ yọ evawere nọ ohwo o re wo o tẹ make rọnọ eware i woma hayo i yoma. (1 Tẹs. 1:6) Uzẹme riẹ họ, oware ọ sae kẹ ohwo uye, rekiyọ oghọghọ o rrọ udu riẹ ghele. Wọhọ oriruo, a fa ikọ Jesu fiki usi uwoma nọ a jẹ ta. Ghele na, a “nyavrẹ no aro ogbẹgwae Sanhẹdrin na be ghọghọ fikinọ Ọghẹnẹ o rri rai te ahwo nọ a re kpomovuọ họ oma fiki odẹ Jesu.” (Iruẹru 5:41) Orọnikọ a jẹ ghọghọ fikinọ a fa rae he. Rekọ a ghọghọ keme a sai kru ẹgbakiete rai ghelọ ẹbẹbẹ nọ a rẹriẹ ovao dhe.

A re yẹ ohwo avọ oghọghọ họ, yọ orọnikọ asohẹrioke ohwo o re ro woi gbe he. Fikieme? Keme uvi oghọghọ yọ abọjọ ubi ẹzi ọfuafo Ọghẹnẹ. Avọ obufihọ ẹzi Ọghẹnẹ, ma rẹ sae “whẹ uruemu okpokpọ” na họ oma, onọ oghọghọ o rrọ abọjọ riẹ. (Ẹf. 4:24; Gal. 5:22) Yọ ma tẹ daoma wo oghọghọ, o rẹ mae lọhọ kẹ omai re ma yerikugbe ebẹbẹ uzuazọ.

Eware iwoma Jihova o wo họ iroro inọ ahwo a rẹ jọ akpọ na ru, orọnikọ eware iyoma nọ ma be ruẹ kẹdẹ kẹdẹ na ha. Rekọ Jihova ọ kuvẹ hẹ re eware iyoma nọ ahwo a bi ru i mi ei oghọghọ. Ebaibol na ọ ta nọ: “Ogaga avọ oghọghọ obọ riẹ e rọ.” (1 Irv. 16:27) Ofariẹ, eware iwoma nọ idibo riẹ a bi ru i bi “ru [Jihova] eva were.”​—Itẹ 27:11.

Nọ eware e gbẹ nya epanọ ma rẹro rai hi, u re dhesẹ nọ ma be rọ aro kele Jihova nọ ma gbẹ be ruawa gahrọ họ. Ukpenọ ma rẹ  siọ eva ba ẹwere, ma rẹ sae tẹrovi emamọ eware nọ ma wo enẹna jẹ rọ odiri hẹrẹ emamọ eware nọ e rrọ obaro tha. *

Ma rẹ sae jẹ ruẹ oriruo amọfa nọ a gbiku rai fihọ Ebaibol na, enọ eva e jẹ were ghelọ ebẹbẹ nọ a rẹriẹ ovao dhe. Abraham yọ ohwo jọ nọ ọ rẹriẹ ovao dhe ebẹbẹ nọ e hai ti si uwhu sei gbe ebẹbẹ efa nọ amọfa a wha sei. (Emu. 12:​10-20; 14:​8-16; 16:​4, 5; 20:​1-18; 21:​8, 9) Ghelọ onana, Abraham ọ gbẹ jẹ wereva ghele. Ẹvẹ ọ sai ro ru onana? Ọ jẹ hai roro kpahe ẹruore nọ o wo ẹsikpobi, koyehọ okenọ ọ te rọ rria otọ esuo Mesaya na. (Emu. 22:​15-18; Hib. 11:10) Jesu ọ ta nọ: “Abraham ọsẹ rai ọ ghọghọ gaga fiki ẹdẹ mẹ nọ o je rẹro nọ ọ te ruẹ.” (Jọn 8:56) Ma rẹ sae rọ aro kele Abraham nọ ma tẹ be hai roro kpahe eware iwoma nọ e rrọ obaro tha.​—Rom 8:21.

Wọhọ Abraham, Pọl avọ Saelas nọ a gbẹ jọ iruo imishọnare a tẹrovi eyaa Ọghẹnẹ. Ẹrọwọ rai ọ jọ gaga yọ eva e jẹ hae were ae ghelọ ebẹbẹ nọ a rẹriẹ ovao dhe. Wọhọ oriruo, ẹdẹjọ a kpe rai jẹ fa ae gaga, kẹsena a te fi ae họ uwou-odi, “evaọ ubrobọ udevie aso, . . . a tẹ jẹ lẹ jẹ be so ile ro jiri Ọghẹnẹ.” (Iruẹru 16:​23-25) U te no ẹruore rai no, oware ofa nọ o jẹ lẹliẹ Pọl avọ Saelas ghọghọ họ, a jẹ ruẹ uye fiki odẹ Kristi. Ma rẹ sae rọ aro kele Pọl avọ Saelas nọ ma tẹ be hai roro kpahe ewoma nọ o re noi ze nọ ma tẹ be rọ udu kpobi gọ Jihova.​—Fil. 1:​12-14.

U wo inievo mai buobu nẹnẹ nọ a be wereva ghelọ ebẹbẹ nọ a rẹriẹ ovao dhe no, inievo nana a rrọ emamọ oriruo kẹ omai. Wọhọ oriruo, evaọ Akpegbọvo 2013 nọ ofou-owhre ọgaga o fou evaọ Philippines, iwou inievo mai nọ i bu te odu ọvo (1,000) e raha. George nọ uwou riẹ o raha muotọ evaọ ẹwho Tacloban ọ ta nọ: “Ghelọ oware nọ o via na, eva e be were inievo na. Mẹ sae tubẹ ruẹ unu gbiku oghọghọ nọ o rrọ omai udu hu.” Oke kpobi nọ ma rẹriẹ ovao dhe ebẹbẹ ilogbo, eva e rẹ sae were omai ghele nọ ma te roro didi kpahe eware nọ Jihova o ru kẹ omai no. Eme ọfa Jihova ọ kẹ omai no, nọ o be lẹliẹ omai wo oghọghọ nẹnẹ?

Oware nọ o be mae kẹ omai oghọghọ họ, emamọ usu nọ ma wo kugbe Ọghẹnẹ. Roro kpahe onana: Ma riẹ Osu Ehrugbakpọ na. Ọsẹ mai, Ọghẹnẹ mai, gbe Ogbẹnyusu mai ọ rrọ!​—Ol. 71:17, 18.

Eva e be jẹ were omai nọ Ọghẹnẹ ọ kẹ omai uzuazọ je ru nọ ma be sae rọ reawere riẹ. (Ọtausi. 3:​12, 13) Jihova o si omai kẹle oma, fikiere ma wo otoriẹ ẹjiroro nọ o wo kẹ omai. (Kọl. 1:​9, 10) Onana u ru nọ ma bi ro yeri uzuazọ nọ u wo uvi ẹjiroro. Evaọ abọdekọ riẹ, ahwo buobu evaọ akpọ na a riẹ ẹjiroro nọ a rọ rrọ uzuazọ họ. Pọl ọ ta kpahe ohẹriẹ nọ o rrọ omai avọ ahwo otiọye inọ: “’Ibiaro e re ruẹ hẹ yọ ezọ i ri yo ho, yọ ohwo ọvo ọ re jọ udu riẹ roro eware nọ Ọghẹnẹ ọ ruẹrẹhọ no kẹ enọ i you rie he.’ Keme mai Ọghẹnẹ ọ rọ ẹkwoma ẹzi riẹ rovie ai via kẹ no.” (1 Kọr. 2:9, 10) Kọ oreva Jihova gbe ẹjiroro riẹ nọ ma wo otoriẹ rai na o gbẹ be kẹ omai evawere?

Roro kpahe oware ofa nọ Jihova o ru kẹ idibo riẹ no. Kọ eva e gbẹ be were omai nọ ọ be rọ izieraha mai rọvrẹ omai? (1 Jọn 2:12) Fiki ohrọ-oriọ Ọghẹnẹ, ma wo ẹruore inọ akpọ ọkpokpọ ọ be tha. (Rom 12:12) Makọ enẹna dede, Jihova o ru omai wo ibe Ileleikristi nọ ma gbẹ rrọ okugbe ọvo. (Ol. 133:1) Ebaibol na o te je ru omai riẹ nọ Jihova ọ be thọ idibo riẹ no obọ Setan avọ idhivẹri riẹ. (Ol. 91:11) Ma tẹ be hai roro didi kpahe eware nana kpobi nọ Jihova ọ kẹ omai no na, ma te ruẹ nọ ma ti wo oghọghọ vi epaọ anwẹdẹ.​—Fil. 4:4.

Kọ Oleleikristi nọ o wo oghọghọ no ọ sai gbe wo oghọghọ vi epanọ o rrọ na? Jesu ọ ta nọ: “Mẹ be ta eme nana kẹ owhai re wha sai wo oghọghọ mẹ, re oghọghọ rai o sae jọ vọvọ.” (Jọn 15:11) Kọ onana u gbe dhesẹ nọ oghọghọ mai o rẹ sai vihọ? Ma sae rọ omodawọ mai re oghọghọ mai u vihọ dhesẹ ire nọ a bi fihọ erae nọ a kokohọ. Re erae e sae ware ga, o gwọlọ nọ a re fi ire họ iẹe. Epọvo na re, re oghọghọ ra o sai vihọ, o gwọlọ nọ who re ru eware nọ i re ru usu ra kugbe Ọghẹnẹ ga. Kareghẹhọ nọ oghọghọ yọ abọjọ ubi ẹzi ọfuafo Ọghẹnẹ. Fikiere, whọ tẹ be hae lẹ se Jihova kẹ obufihọ ẹzi riẹ je bi roro didi kpahe Ẹme riẹ nọ a rọ ẹzi riẹ kere na, oghọghọ ra u ti vihọ.​—Ol. 1:​1, 2; Luk 11:13.

Oghọghọ ra u re je vihọ nọ whọ tẹ be hai wobọ ziezi evaọ iruo nọ e rẹ were Jihova. (Ol. 35:27; 112:1) Fikieme? Keme Ọghẹnẹ ọ ma omai re ma ‘dhozọ riẹ je koko izi riẹ; keme onana họ iruo kpobi nọ i te ohwo eruo.’ (Ọtausi. 12:13) Otọ ẹme na họ, Ọghẹnẹ ọ ma omai re ma ru oreva riẹ. Fikiere, ma tẹ be gọ Jihova, ẹsiẹe ma re wo uvi evawere evaọ uzuazọ. *

Nọ ma be daoma re ma wo oghọghọ na, u wo irere efa nọ ma ti wo re orọnikọ evawere ọvo ho. Wọhọ oriruo, eva mai e te were Ọsẹ obọ odhiwu mai inọ ma be rọ evawere gọe ghelọ ebẹbẹ nọ ma rẹriẹ ovao dhe. (Izie. 16:15; 1 Tẹs. 5:​16-18) Ofariẹ, fikinọ ma wo uvi evawere, ma te roma kẹ ilale ekwakwa akpọ họ, ukpoye ma te rọ evawere siobọno eware buobu fiki iruo Uvie na. (Mat. 13:44) Nọ ma tẹ ruẹ irere nọ i bi no onana ze, u ti ru nọ oghọghọ mai u ti ro vihọ, ma ti wo evevọwẹ, yọ onana u ti ru eva were amọfa re.​—Iruẹru 20:35; Fil. 1:3-5.

Ọgba-ekiakiẹ jọ evaọ iyunivasiti Nebraska obọ America nọ o ru otokiẹ kpahe omokpokpọ o kere nọ: “Nọ ohwo o te wo evevọwẹ jẹ be wereva evaọ uzuazọ enẹna, u re ru nọ o re ro wo omokpokpọ evaọ obaro.” Onana o rọwokugbe ẹme nọ Ebaibol na ọ ta inọ: “Eva-ewerọ yọ emamọ umu.” (Itẹ 17:22) Avro ọ riẹ hẹ, nọ whọ be daoma re who fiba oghọghọ ra na, o rẹ sai ru owhẹ wo omokpokpọ.

Fikiere dede nọ ma be rria oke obẹbẹ, ma rẹ sai wo uvi oghọghọ nọ o rẹ tọ nọ ma tẹ be hae lẹ, wuhrẹ Ebaibol na, je roro didi kpahe eware nọ ma wuhrẹ, onọ u re ru omai wo ẹzi Ọghẹnẹ. Oghọghọ mai u re je vihọ nọ ma tẹ be hai roro kpahe eghale nọ ma wo enẹna, rọ aro kele oriruo amọfa nọ a wo ẹrọwọ, jẹ daoma ru oreva Ọghẹnẹ. Ma te bi ru ere, ẹme nọ ọ rrọ Olezi 64:10 ọ rẹ sai rugba evaọ omamai, onọ o ta nọ: “I kiẹrẹe e [rẹ] ghọghọ eva ỌNOWO, [jẹ] jọ obọ riẹ gwọlọ omofọwẹ!”