EVAỌ oke nọ eware nọ a gbiku rai fihọ Ebaibol na e rọ via, ohwo ọ tẹ gwọlọ wo aye, o re ru igho kẹ ahwo uviuwou ọmọtẹ na. Eware nọ a jẹ hai ro ru igho fihọ ọmọtẹ e sae jọ ugho, erao, hayo eware eghaghae efa. Ẹsejọ, iruo eye ọmọzae na o re ru kẹ ahwo uviuwou ọmọtẹ na, wọhọ epanọ Jekọp o ru. Ọ rọwo nọ o re ru iruo kẹ ọsẹ Reshẹl ikpe ihrẹ re ọ sae rehọ Reshẹl. (Emu. 29:17, 18, 20) Fikieme a jẹ hai ro ru igho fihọ ọmọtẹ?

Aye jọ nọ a re se Carol Meyers nọ o wuhrẹ gaga kpahe eme Ebaibol ọ ta nọ: “Nọ orọnọ iruo ẹwọ ọmọtẹ ọ jẹ hai ru nọ ahwo uviuwou riẹ a tẹ rrọ ewhẹrẹ na, o wọhọ nọ a jẹ hae rehọ iẹe nọ igho nọ a ru fihọ ọmọtẹ yọ osa nọ a hwa fihọ iruo nọ ọmọtẹ na ọ hai ti gbe ru evaọ uviuwou na.” O sae jẹ jọ nọ igho ọmọtẹ nọ a re ru na o jẹ hae whae ze nọ uviuwou ọmọtẹ gbe ọrọ ọmọzae na e rẹ rọ riẹ ohwohwo jẹ kpekpe ziezi. Nọ iviuwou ivẹ nana e kpekpe ziezi no na, a sai fiobọhọ kẹ ohwohwo nọ eware e tẹ rrọ gaga. Ere ọvo ho, igho ọmọtẹ nọ a jẹ hai ru na o jẹ hae whae ze nọ ohwo kpobi ọ rẹ rọ riẹ nọ ọmọtẹ na o wo ọzae no, yọ umuo oke yena vrẹ, ọzae riẹ họ ọnọ ọ te hae rẹrotei orọnikọ ọsẹ riẹ hẹ.

Igho nọ a je ru fihọ ọmọtẹ na, orọnikọ u dhesẹ nọ a be dẹ ọmọtẹ na hayo a be zẹe he. Obe na Ancient Israel​—Its Life and Institutions o ta nọ: “Ugho nọ ahwo Izrẹl a jẹ hae hwa hayo eware nọ i te ugho na nọ a jẹ hae hwa kẹ uviuwou ọmọtẹ na, o rẹ lẹliẹ ahwo buobu roro nọ ẹdẹ a dẹ ọmọtẹ na. Rekọ orọnọ ere o rrọ họ, igho ọmọtẹ e jọ wọhọ osa nọ a be hwa kẹ uviuwou riẹ fikinọ ọmọtẹ na ọ te gbẹ sai ru ẹkẹ iruo riẹ evaọ uwou na ha.”

Ahwo a gbe bi ru igho fihọ ọmọtẹ nẹnẹ evaọ erẹwho jọ. Nọ ọsẹgboni nọ a rrọ ukoko na a tẹ gwọlọ rọ ọmọtẹ rai kpohọ orọo, a re mi ugho bu hrọ họ. A te ru enẹ, yọ a bi “ru re ahwo kpobi a ruẹ nọ [a] wo iroro.” (Fil. 4:5; 1 Kọr. 10:32, 33) U re je dhesẹ nọ a “you ugho” ho yọ a wo uvou-uthethei hi. (2 Tim. 3:2) U te no ere no, nọ ọsẹgboni ọmọtẹ na a te bi si ikẹ nọ jọ a hwa igho buobu kẹ ae, o sae lẹliẹ ọmọzae na siọ ẹme orọo na ba tao bẹsenọ o re wo ugho na no. O rẹ sai je ru nọ oniọvo-ọmọzae nọ ọ rrọ ọkobaro ọ rẹ rọ gwọlọ siọ iruo ọkobaro na ba re ọ kọ okọ ziezi, ọ vẹ sae hwa igho buobu nọ a se kẹe na. Ahwo uviuwou ọmọtẹ a gbe se igho buobu hu, eware nana kpobi e rẹ via ha.

Evaọ erẹwho jọ, egọmeti o fi uzi họ kpahe igho nọ a re ru fihọ ọmọtẹ. Esẹgbini nọ e rrọ ukoko na a rẹ daoma lele izi na. Fikieme? Keme Ebaibol ọ ta nọ Ileleikristi a rẹ “romakpotọ kẹ enọ i wo udu-esuo okpehru,” yọ a re koko izi egọmeti nọ e wọso izi Ọghẹnẹ hẹ.​—Rom 13:1; Iruẹru 5:29.