Re ma ru eva were Jihova o gwọlọ nọ ma re wo ẹrọwọ. Rekọ Ebaibol ọ ta nọ “ẹrọwọ yọ oware nọ ahwo kpobi a wo ho.” (2 Tẹs. 3:2) Pọl ukọ na ọ ta ẹme yena kpahe “ahwo omuomu nọ a rẹ wha enwoma” ze nọ a je kpokpo iei. Rekọ ẹme yena nọ ọ ta kpahe ẹrọwọ na o kiekpahe amọfa re. Ahwo jọ a rẹ gbẹ vro avro ghele nọ a tẹ make ruẹ eware nọ i dhesẹ nọ Ọghẹnẹ ọ rrọ, yọ ọye ọ ma eware. (Rom 1:20) Ahwo ọfa jọ a re dhesẹ nọ a rọwo nọ ohwo jọ ọ rrọ nọ o wo ogaga vi ohwo-akpọ. Rekọ ẹrọwọ yena ọvo ọ sae lẹliẹ ohwo ru eva were Jihova ha.

U fo re u mu omai ẹro nọ Ọghẹnẹ ọ rrọ. Ma vẹ jẹ rọwo nọ ọ te hwosa kẹ enọ i wo ẹrọwọ ọgaga. (Hib. 11:6) Ẹrọwọ nọ ma be ta ẹme riẹ na ọ rrọ usu ubi-ẹzi na. Yọ re Jihova ọ sae kẹ ohwo ẹzi ọfuafo na, o gwọlọ nọ ọ rẹ lẹ sei re ọ rehọ iẹe kẹe. (Luk 11:9, 10, 13) Yọ oware jọ nọ o mai wuzou nọ ma re ru re ẹzi na ọ sai te omai obọ họ, ma re se Ebaibol na nọ a rọ ẹkwoma ẹzi Ọghẹnẹ kere na. Ma ve roro didi kpahe eware nọ ma se jẹ daoma ru eware nọ ma wuhrẹ. Nọ ma te bi ru ere, Jihova ọ te rọ ẹzi riẹ fiobọhọ kẹ omai re ma sai wo ẹrọwọ. Yọ ẹrọwọ yena ọ te lẹliẹ omai ru eware nọ e rẹ were iẹe.