1. Emamọ eware vẹ ma bi rẹro rai evaọ oke Esuo Odu-Ikpe na?

 EVA e te were omai kẹhẹ nọ a te mu ahwo họ ẹkpare ze no evaọ otọakpọ na nọ Esuo Odu-Ikpe Kristi na o te muhọ no. Ma te wariẹ ruẹ ahwo mai nọ i whu no nọ a te kpare ze. Ma riẹ nọ Jihova ọ ginẹ gwọlọ kpare ae ze. (Job 14:15) Dai roro epanọ eva e te were ahwo te evaọ akpọ na soso oke nọ a ti dede imoni rai gbe egbẹnyusu rai nọ a te kpare ze. Wọhọ epanọ ma ta evaọ uzoẹme nọ o vrẹ na, “enọ i kiẹrẹe” nọ a kere odẹ rai fihọ obe uzuazọ na a ti wo “ẹkparomatha uzuazọ.” (Iruẹru 24:15; Jọn 5:29) Ẹsejọhọ ma te ruẹ ahwo mai buobu nọ a te jọ usu ahwo nọ a te kake kpare ze evaọ otọakpọ na. * U te no ere no, a te kpare “enọ i kiẹrẹe he” na ze. Ejọ rai họ ahwo nọ uvẹ nọ a rẹ rọ riẹ Jihova jẹ gọe ziezi u rovie kẹ taure a te ti whu hu. Rekọ ẹkparomatha rai o te jọ orọ “ẹdhoguo.”

2-3. (a) Wọhọ epanọ o rrọ Aizaya 11:9, 10, obọdẹ ewuhrẹ vẹ nọ a re ruẹ ọkpọ riẹ hẹ o te jọ otọ? (b) Eme ma te ta kpahe evaọ uzoẹme nana?

 ² A ti wuhrẹ ahwo nana kpobi nọ a te kpare ze na. (Aiz. 26:9; 61:11) Ahwo nọ a ti wuhrẹ na a ti bu wo umuo ho. A ti wuhrẹ ae eware buobu, yọ a ri wuhrẹ ahwo tere ẹdẹvo ho. (Se Aizaya 11:9, 10.) Fikieme o te rọ jọ ere? Keme o gwọlọ nọ a re wuhrẹ ahwo nọ a kiẹrẹe he nọ a te kpare ze na kpahe Jesu Kristi, Uvie na, ẹtanigbo na, ohwo nọ u fo nọ o re su odhiwu gbe otọakpọ na gbe odẹ Jihova. Makọ enọ i kiẹrẹe nọ a te kpare ze na, a ti wuhrẹ ae re a riẹ eware nọ Jihova o wuhrẹ idibo riẹ kpahe ẹjiroro riẹ oke nọ a whu no. Ahwo nana buobu a whu no taure a te ti kere Ebaibol na re no. Fikiere te enọ i kiẹrẹe gbe enọ i kiẹrẹe he na, a ti wuhrẹ ae eware buobu.

³ Ma te jọ uzoẹme nana ta ẹme kpahe enọ nana: Ẹvẹ a ti ro wuhrẹ ahwo na kpobi? Kọ ẹvẹ ewuhrẹ na o ti ro fiobọhọ kẹ ae re a sae jọ ahwo nọ a re kere edẹ rai fihọ obe uzuazọ na bẹdẹ bẹdẹ? Enọ nana i wuzou gaga. Ma te jọ uzoẹme nana ta ẹme kpahe eruẹaruẹ jọ nọ e rrọ obe Daniẹl gbe obe Eviavia, nọ e lẹliẹ omai be rọ ubiẹro ọfa rri oghẹrẹ nọ ma je rri ẹkparomatha na vẹre. Joma kake ta kpahe eruẹaruẹ jọ nọ a kere fihọ obe Daniẹl 12:1, 2.

4-5. Eme Daniẹl 12:1 o ta nọ o te via evaọ oke urere na?

⁴ Se Daniẹl 12:1. A jọ obe Daniẹl ta kpahe ikpeware jọ nọ e te via evaọ edẹ urere na. Daniẹl 12:1 o ta nọ Maekẹl, koyehọ Jesu Kristi “o bi dikihẹ kẹ ahwo [Ọghẹnẹ].” Eruẹaruẹ nana i bi rugba anwọ 1914 nọ a rọ Jesu mu Ovie Uvie Ọghẹnẹ.

⁵ Rekọ a jọ eruẹaruẹ yena vuẹ Daniẹl re inọ “oke idhọvẹ o te jariẹ, utionọ o re romavia ẹdẹvo ho anwẹnọ orẹwho u ro muhọ rite oke yena.” Yọ evaọ “oke idhọvẹ” yena, Jesu “ọ te kpama.” Oke idhọvẹ yena họ “uye ulogbo” nọ a ta kpahe evaọ Matiu 24:21 na. Ẹkpama nọ a ta nọ Jesu ọ te kpama na u dhesẹ nọ ọ te thọ ahwo Ọghẹnẹ evaọ obọ urere oke idhọvẹ na, koyehọ evaọ ẹmo Amagidọn. A jọ obe Eviavia se ahwo nọ Jesu ọ te thọ na “ogbotu obuobu, enọ i no uye ulogbo na ze.”—Evia. 7:9, 14.

6. Eme ọ te via nọ ogbotu obuobu na a tẹ zọ no, kọ ẹvẹ ma rọ riẹ ere? (Je rri uzoẹme “Enọ Ahwo nọ A s’Ebe” nọ o ta kpahe ahwo nọ a te kpare ziọ otọakpọ na.)

⁶ Se Daniẹl 12:2. Eme ọ te via nọ ogbotu obuobu na a tẹ zọ no? Anwẹdẹ ma je roro nọ ẹkparomatha nọ a jọ eruẹaruẹ nana ta kpahe na o dikihẹ kẹ oghẹrẹ nọ idibo Ọghẹnẹ a rọ wariẹ kru iruo Uvie na ga ziezi evaọ edẹ urere na. Rekọ ere o rrọ họ. * Ẹkparomatha dẹẹ nọ a te kpare ahwo nọ a whu no ze evaọ akpọ ọkpokpọ na a be jọ etenẹ ta kpahe na. Eme o lẹliẹ omai ta ere? Keme a jọ eruẹaruẹ na fodẹ ahwo nọ e rrọ “ẹkpẹ,” yọ a jọ Job 17:16 ta kpahe ahwo nọ a rrọ “Uki” inọ a rrọ evaọ ẹkpẹ. Onana u dhesẹ nọ Daniẹl 12:2 o  be ta kpahe ahwo nọ a te kpare ze nọ edẹ urere na gbe ẹmo Amagidọn e tẹ vrẹ no.

7. (a) Fikieme Ebaibol o rọ ta nọ a te kpare ejọ kpohọ “uzuazọ ebẹdẹ bẹdẹ”? (b) Fikieme ẹkparomatha rai o rọ rrọ ọnọ “ọ mai woma”?

⁷ Eme họ otọ ẹme nọ o rrọ Daniẹl 12:2 na inọ ahwo jọ nọ a te kpare ze a ti wo “uzuazọ ebẹdẹ bẹdẹ”? Ẹme na o dhesẹ nọ otẹrọnọ ahwo nọ a te kpare ze na a daoma riẹ Jihova avọ Jesu ziezi evaọ oke Esuo Odu-Ikpe na je ru oware nọ a ta, a ti wo uzuazọ ebẹdẹ bẹdẹ. (Jọn 17:3) Ọnana họ “ẹkparomatha nọ ọ mai woma na” keme u woma vi orọ ahwo nọ a kpare ze evaọ oke nọ u kpemu. (Hib. 11:35) Fikieme? Keme ahwo nọ a kpare ze evaọ oke nọ u kpemu na a wariẹ whu.

8. Ẹvẹ a te rọ kpare ejọ kpohọ “ẹpoviẹ gbe ọjẹfiẹ ebẹdẹ bẹdẹ”?

⁸ Orọnikọ ahwo kpobi nọ a kpare ze a ti ru oware nọ a gine wuhrẹ ai hi. A jọ eruẹaruẹ vuẹ Daniẹl nọ a te kpare ejọ ze “rọkẹ ẹpoviẹ gbe ọjẹfiẹ ebẹdẹ bẹdẹ.” Fikinọ a te rọwo ru oware nọ Ọghẹnẹ ọ ta ha, a ti kere edẹ rai fihọ obe uzuazọ na ha. A ti wo uzuazọ ebẹdẹ bẹdẹ hẹ. Ukpoye kọ “ọjẹfiẹ ebẹdẹ bẹdẹ,” koyehọ a te raha ai no riẹriẹriẹ. Fikiere, Daniẹl 12:2 o be ta kpahe oware nọ o te via kẹ ahwo nọ a kpare ze na fiki oware nọ a ru nọ a kpare ae ze no. * (Evia. 20:12) Ejọ a ti wo uzuazọ ebẹdẹ bẹdẹ, efa a ti wo uzuazọ ebẹdẹ bẹdẹ hẹ.

9-10. Eme ọfa o te via nọ uye ulogbo na o tẹ vrẹ no, kọ amono a “ti lo nwranwranwra wọhọ idadeghe odhiwu na”?

⁹ Se Daniẹl 12:3. Nọ “oke idhọvẹ” na o tẹ vrẹ no, eme ọ te via? U te no oware nọ Daniẹl 12:2 o ta na no, owọ avọ 3 o fodẹ oware jọ nọ o te via nọ uye ulogbo na o tẹ vrẹ no.

¹⁰ Amono a “ti lo nwranwranwra wọhọ idadeghe odhiwu na”? Ẹme jọ nọ Jesu ọ ta evaọ Matiu 13:43 o sai fiobọhọ kẹ omai riẹ ahwo na. Ọ ta nọ: “Evaọ oke yena ikiẹrẹe na i ti lo nwranwranwra wọhọ ọre evaọ Uvie Ọsẹ rai.” Ahwo nọ Jesu ọ jẹ ta kpahe evaọ etẹe na họ, “emọ Uvie na,” enọ o se inievo riẹ nọ a rọ ẹzi wholo na. Yọ a ti lele iei su evaọ obọ odhiwu. (Mat. 13:38) Fikiere, enọ a rọ ẹzi wholo na họ ahwo nọ Daniẹl 12:3 o ta kpahe na. Yọ iruo nọ a ti ru evaọ oke Esuo Odu-Ikpe na a jọ etẹe ta ẹme te na.

11-12. Iruo vẹ ahwo idu udhuhrẹ-gbene na a ti ru evaọ oke Esuo Odu-Ikpe na?

¹¹ Ẹvẹ enọ a rọ ẹzi wholo na a ti ro fiobọhọ kẹ “ibuobu lele edhere ẹrẹreokie”? A ti lele Jesu ru epanọ a ti ro wuhrẹ ahwo evaọ oke Esuo Odu-Ikpe na. Orọnikọ ivie ọvo ahwo idu udhuhrẹ-gbene (144,000) na a te jọ họ. A te jọ izerẹ re. (Evia. 1:6; 5:10; 20:6) Fikiere a ti wobọ evaọ “usiwo erẹwho na” koyehọ a te rọ ẹmẹrera fiobọhọ kẹ ahwo-akpọ no igbo uzioraha re a sae jọ ahwo ọgbagba. (Evia. 22:1, 2; Izik. 47:12) Iruo nana e te were enọ a rọ ẹzi wholo na gaga.

¹² Amono jọ a te jọ usu “ibuobu” nọ a ti fiobọhọ kẹ lele edhere ẹrẹreokie na? Ahwo nọ a kpare ze, enọ a zọ evaọ  ẹmo Amagidọn, gbe emọ nọ o sae jọnọ a ti yẹ evaọ akpọ ọkpokpọ na. Evaọ obọ ekuhọ odu-ikpe na, ahwo nọ a te jọ otọakpọ na kpobi a vẹ te jọ ahwo ọgbagba. Kọ oke vẹ a ti ro kere edẹ rai fihọ obe uzuazọ na bẹdẹ bẹdẹ wọhọ oware nọ a rọ ebairo kere orọnọ epẹnso ho?

13-14. Eme ahwo kpobi nọ a te jọ otọakpọ na a re ru re a sae rria bẹdẹ bẹdẹ dede nọ a te jọ gbagba?

¹³ Nọ ma te zihe ruọ ahwo ọgbagba no, o nwani dhesẹ nọ uzuazọ ebẹdẹ bẹdẹ u te omai obọ no ho. Kareghẹhọ Adamu avọ Ivi. A jọ gbagba, rekọ re a sae rria bẹdẹ bẹdẹ, a re yoẹme kẹ Jihova. Rekọ a yoẹme he.—Rom 5:12.

¹⁴ Kọ ẹvẹ ahwo nọ a te jọ akpọ na evaọ oke nọ Esuo Odu-Ikpe na o te kuhọ no a te jọ? A te jọ gbagba. Kọ a ti yoẹme kẹ Jihova jẹ rọwo nọ o su ai bẹdẹ bẹdẹ? Manikọ ejọ i ti ru wọhọ Adamu avọ Ivi nọ a kiukeku Ọghẹnẹ dede nọ a jọ gbagba? U fo nọ a rẹ riẹ uyo enọ nana. Kọ ẹvẹ a te rọ riẹ uyo rai?

15-16. (a) Ẹvẹ a te rọ riẹ ahwo nọ a rrọ abọ Jihova nọ Esuo Odu-Ikpe na o te kuhọ no? (b) Kọ eme o te via kẹ ahwo nọ a yoẹme gbe enọ i yoẹme he?

¹⁵ A ti fi Setan họ uwou-odi evaọ oke  Esuo Odu-Ikpe na. Oke yena ọ te sae gbẹ viẹ ohwo ọvo họ họ. Rekọ nọ odu-ikpe na o te kuhọ no, a ve ti siobọno Setan. Ọ vẹ te daoma su ahwo-akpọ nọ a gba no na thọ. Onana họ odawọ urere na nọ a te rọ riẹ ahwo nọ a ginẹ rrọ abọ Ọghẹnẹ, nọ a gwọlọ nọ Ọghẹnẹ o su ai. (Evia. 20:7-10) Oware nọ ohwo o ru evaọ oke yena a te rọ riẹ sọ a re kere odẹ riẹ fihọ obe uzuazọ na bẹdẹ bẹdẹ.

¹⁶ Ahwo jọ a ti ru wọhọ Adamu avọ Ivi. A te rọwo nọ Jihova o su ai hi. Ma riẹ epanọ a ti bu te he. Kọ eme o te via kẹ ae? Eviavia 20:15 o ta nọ: “Ohwo kpobi nọ a ruẹ odẹ riẹ evaọ obe uzuazọ na ha, a te gbolo iei fihọ ẹtẹre erae na.” Onana u dhesẹ nọ a te raha ahwo nana nọ a rọwo yoẹme kẹ Ọghẹnẹ hẹ na no bẹdẹ bẹdẹ. Rekọ ibuobu ahwo nọ a te jọ akpọ na oke yena a ti yoẹme kẹ Ọghẹnẹ. A ve ti kere odẹ rai fihọ obe uzuazọ na bẹdẹ bẹdẹ.

17. Eme a vuẹ Daniẹl nọ o te via evaọ oke mai na? (Daniẹl 12:4, 8-10)

¹⁷ Eware nọ e te via evaọ obaro i gbunu kẹhẹ! Rekọ ukọ-odhiwu nọ o je dhesẹ  eruẹaruẹ na kẹ Daniẹl na ọ vuẹ riẹ oware jọ nọ u wuzou gaga nọ o te via evaọ “oke urere na,” koyehọ oke mai na. (Se Daniẹl 12:4, 8-10; 2 Tim. 3:1-5) Ukọ-odhiwu na ọ ta kẹ Daniẹl nọ: “Eriariẹ uzẹme na e te dafia.” Ẹme riẹ na o dhesẹ nọ idibo Ọghẹnẹ a te riẹ otọ eware nọ a kere fihọ obe Daniẹl na ziezi. Ukọ-odhiwu na ọ tẹ jẹ ta nọ: “Ahwo omuomu na a ti ru eware imuomu, yọ ohwo omuomu ọvuọvo o ti wo otoriẹ eme na ha.”

18. Eme o te via kẹ ahwo omuomu na kẹle?

¹⁸ Ma te rri akpọ na nẹnẹ na, ma rẹ ruẹ nọ ahwo a bi ru eware iyoma gaga, yọ obọ u bi te ai hi. (Mal. 3:14, 15) Rekọ kẹle na, Jesu o ti bruoziẹ ahwo. O ti bruoziẹ kpe ejọ inọ ewe, koyehọ ahwo omuomu na. Enọ i kiọkọ kọ igodẹ, koyehọ enọ i ru eware iwoma. (Mat. 25:31-33) Ahwo omuomu nana a te zọ evaọ uye ulogbo na ha, yọ a te kpare ae ze evaọ akpọ ọkpokpọ na ha. A ti kere edẹ rai fihọ “obe ekareghẹhọ” nọ a fodẹ evaọ obe Malakae 3:16 na ha.

19. Eme u fo nọ ma re ru enẹna, kọ fikieme? (Malakae 3:16-18)

¹⁹ O roja gaga enẹna re ma ru oware nọ u dhesẹ nọ ma rrọ usu ahwo omuomu hu. (Se Malakae 3:16-18.) Ma be ta ẹme na, Jihova o bi koko ahwo riẹ họ, yọ o rri rai inọ “okwakwa obọdẹ” a rrọ. Ọ rẹ rehọ ae zaro vievie he. Ma gwọlọ jọ usu ahwo yena.

20. Eyaa vẹ a ya kẹ Daniẹl, kọ eme who bi rẹro riẹ inọ whọ te ruẹ evaọ oke yena?

²⁰ Eruẹaruẹ buobu i bi rugba evaọ okpẹdoke inẹnẹ na. Rekọ ikpeware e gbẹ rrọ obaro tha. Kẹle na, a te raha ahwo omuomu kpobi no. Kẹsena eyaa nọ Ọghẹnẹ ọ ya kẹ Daniẹl na i ve ti rugba. Ọghẹnẹ ọ ta nọ: “Whọ te kparoma re who wo ẹkẹ ra evaọ urere edẹ na.” (Dan. 12:13) Kọ whọ gwọlọ ruẹ Daniẹl gbe ahwo ra nọ i whu no nọ a te “kparoma” ze? O tẹ rrọ ere, hae daoma ru oware nọ o rẹ were Ọghẹnẹ. Who te ru ere, odẹ ra o te jọ obe uzuazọ na bẹdẹ bẹdẹ.