Evaọ obe 1 Ahwo Kọrint 15:8, Pọl ọ ta nọ: “Ukuhọ riẹ, ọ tẹ romavia kẹ omẹ re wọhọ ọmọ nọ a yẹ nọ emerae riẹ e gba ha.” Anwẹdẹ ma jẹ hae ta nọ o wọhọ nọ Pọl ọ be jọ etẹe ta kpahe oke nọ Jesu ọ rọ romavia kẹe nọ a kpare iẹe kpobọ odhiwu no. Yọ o wọhọ ẹsenọ ọ be ta nọ a kẹ riẹ oma ẹzi nọ o ti ro kpobọ odhiwu no kpakiyọ oke nọ Ọghẹnẹ ọ te rọ kpare ahwo kpobọ odhiwu o gbẹ rrọ obaro thethabọ. Nọ ma wariẹ rri ẹme na ziezi, ma tẹ ruẹ nọ ere o rrọ họ.

Oware nọ o via oke nọ Pọl o ro kurẹriẹ ọ jẹ ta kpahe na. Rekọ eme họ otọ ẹme riẹ na inọ ọyomariẹ yọ “ọmọ nọ a yẹ nọ emerae riẹ e gba ha”? O sai dhesẹ eware sa-sa.

Idudhe o ro kurẹriẹ yọ oware nọ o via o wha idudu họ iẹe oma. Nọ a te yẹ ọmọ nọ emerae riẹ e gba ha, u re gbe ahwo unu. Oware jọ nọ Sọl koyehọ Pọl o rẹro riẹ hẹ o via. Oke nọ o je kpobọ Damaskọs re ọ nyai kpokpo Ileleikristi evaọ obei, ọ tẹ ruẹ Jesu nọ a kpare kpobọ odhiwu no. O te kurẹriẹ. Pọl o rẹro nọ o ti kurẹriẹ ziọ egagọ Ileleikristi ẹdẹvo ho, yọ u gbe Ileleikristi nọ ọ jẹ nyai kpokpo evaọ obọ Damaskọs na unu re. U te no ere no, elo nọ o lo mu ei oke nọ Jesu ọ romavia kẹe o tu rie aro.—Iruẹru 9:1-9, 17-19.

Pọl o kurẹriẹ evaọ oke nọ o rọ wọhọ nọ uvẹ na o vrẹ riẹ no. Ẹme Griki nọ a fa “ọmọ nọ a yẹ nọ emerae riẹ e gba ha” na, a rẹ sae jẹ fae “ọmọ nọ a yẹ evaọ oke nọ u kiehọ họ.” A jọ Ebaibol nọ a re se The Jerusalem Bible fae inọ: “O wọhọ ẹsenọ a yẹ omẹ evaọ oke nọ ohwo ọvo o rẹro riẹ hẹ.” Oke nọ Pọl o ro kurẹriẹ yọ Jesu o kpobọ odhiwu no. Ahwo nọ ọ kake fodẹ evaọ owọ avọ isoi rite owọ avọ ihrẹ na a ruẹ Jesu nọ a kpare iẹe ze no taure o te ti zihe kpobọ odhiwu. Rekọ Jesu o zihe kpobọ odhiwu no re Pọl ọ tẹ te ruẹ e riẹ. (1 Kọr. 15:4-8) Oyejabọ nọ o rọ wọhọ nọ Jesu ọ romavia kẹe nọ uvẹ na o vrẹ riẹ no.

Ẹme riẹ na o dhesẹ nọ o wo omaurokpotọ. Ahwo jọ nọ a wuhrẹ kpahe otofa eme Ebaibol a ta nọ ẹme yena nọ Pọl ọ ta na o sai je dhesẹ epanọ ohwo o re rri omariẹ nọ o te oware ovo ho. Otẹrọnọ oware nọ o lẹliẹ Pọl ta ẹme na ọye, kiyọ ẹme nọ ọ be ta na họ o te ohwo nọ ọ rẹ jọ ukọ Jesu hu. Ọye ọvo ọ tubẹ ta nọ: “Mẹ họ ọnọ ọ mae kawo evaọ usu ikọ na, yọ me te ọnọ a re se ukọ họ, keme me je kpokpo ukoko Ọghẹnẹ. Rekọ fiki uwowou ulogbo Ọghẹnẹ mẹ rọ rrọ ohwo nọ mẹ rrọ na.”—1 Kọr. 15:9, 10.

Ma te rri ẹme nọ ma ta no na, o sae jọ nọ Pọl ọ jẹ ta ẹme kpahe oghẹrẹ nọ o ro kurẹriẹ idudhe. Hayo o sai dhesẹ nọ o kurẹriẹ evaọ oke nọ o rọ wọhọ ẹsenọ uvẹ na o vrẹ riẹ no, hayo inọ o te ohwo nọ Jesu ọ rẹ romavia kẹ hẹ. Makọ oware kpobi nọ o lẹliẹ e riẹ ta ẹme na kẹhẹ, ma riẹ nọ eva e were riẹ gaga inọ Jesu ọ romavia kẹe. O lẹliẹ e riẹ riẹ nọ Jesu ọ kparoma no. Oyejabọ nọ ọ jẹ hae rọ ta ẹme fodẹ oware nana oke nọ ọ jẹ ta usi uwoma kpahe ẹkparomatha Jesu.—Iruẹru 22:6-11; 26:13-18.