UZOẸME UWUHRẸ 37
OLE AVỌ 118 “Tua Ẹrọwọ Mai”
Ileta nọ I re Fiobọhọ kẹ Omai Thihakọ Te Urere
“Ma kru evaifihọ nọ ma wo evaọ emuhọ na gaga rite urere.”—HIB. 3:14.
OWARE NỌ A JARIẸ TA KPAHE
Eware jọ nọ ma rẹ sai wuhrẹ no ileta nọ Pọl o kere se ahwo Hibru na ze, nọ i ti fiobọhọ kẹ omai thihakọ te urere bẹsenọ Ọghẹnẹ ọ rẹ raha akpọ na.
1-2. (a) Ẹvẹ eware e jọ kẹ Ileleikristi Hibru okenọ Pọl o kere ileta se ai? (b) Fikieme ma rọ ta nọ u woma gaga inọ Pọl o kere ileta na oke yena?
EWARE e jọ gaga kẹ Ileleikristi Hibru nọ e jẹ rria Jerusalẹm gbe Judia nọ Jesu o whu no. Nọ a rọ ukoko Ileleikristi na mu no, u kri hi a tẹ jẹ wọso ukoko na gaga. (Iruẹru 8:1) Nọ oware wọhọ ikpe udhe e te vrẹ no, eware e tẹ jọ gaga kẹ Ileleikristi. O wọhọ nọ ohọo ogaga nọ u mu taure oke yena u te ti te, oye o wha riẹ ze nọ eware e rọ jọ gaga kẹ ai na. (Iruẹru 11:27-30) Rekọ oma o dina dhẹ Ileleikristi evaọ oware wọhọ 61 C.E. Ma ta ere keme ẹbẹbẹ ologbo jọ o te rai uwhremu na. Nọ ukpokpoma ọvo u ri te ai hi na, Ọghẹnẹ ọ tẹ rọ Pọl ukọ na kere ileta jọ se Ileleikristi Hibru. Yọ u woma inọ o kere ileta na evaọ oke yena.
2 Fikieme ma rọ ta nọ u woma gaga nọ Pọl o ro kere ileta na se Ileleikristi Hibru oke yena? Keme dede nọ oma u dhẹ rai oke yena ebẹbẹ jọ i ti te ae. Pọl ọ vuẹ rai oware nọ u re fiobọhọ kẹ ai thihakọ ẹbẹbẹ ologbo nọ u ti te ae na. Jesu ọ ta no vẹre inọ a te raha Jerusalẹm. Yọ oke nọ a te rọ raha iẹe o be kẹle no. (Luk 21:20) Rekọ Pọl hayo Ileleikristi nọ e jọ Judia, a riẹ uzedhe oke nọ a te rọ raha Jerusalẹm ho. Ghele na, nọ ọraha na ọ re nyaze he na, u fo nọ Ileleikristi yena a rẹ hae ruẹrẹ oma kpahe. A rẹ daoma wo ẹrọwọ je thihakọ, a ve je ru eware efa nọ i ti fiobọhọ kẹ ae evaọ oke yena.—Hib. 10:25; 12:1, 2.
3. Fikieme u je fo re ma rri eware nọ Pọl o kere se Ileleikristi obọ Hibru na nẹnẹ?
3 Uye ulogbo o rrọ obaro tha nọ o te rro vi onọ u te Ileleikristi obọ Hibru na. (Mat. 24:21; Evia. 16:14, 16) Oye u ro fo re ma rri ohrẹ nọ Jihova ọ rehọ Pọl kẹ Ileleikristi Hibru evaọ oke yena, keme u ti fiobọhọ kẹ omai gaga.
“NYAHARO TE ỌKPAKO”
4. Eme o jẹ bẹ Ileleikristi nọ e jọ ahwo Ju eru gaga? (Rri uwoho na re.)
4 Oware jọ o jẹ bẹ Ileleikristi nọ e rrọ ahwo Ju eru gaga. Evaọ oke jọ, orẹwho Ju na ọvo họ ahwo nọ Ọghẹnẹ ọ salọ re a jọ ahwo riẹ. Evaọ Jerusalẹm ivie Ju nọ i je su a jọ. Yọ ae a dikihẹ kẹ Uvie Ọghẹnẹ evaọ obọ otọakpọ obonẹ. Etẹmpol nọ ọ jọ Jerusalẹm na ahwo a je kpohọ jẹ gọ Ọghẹnẹ. Ahwo Ju nọ a gwọlọ gọ Ọghẹnẹ ziezi a jẹ hai lele Uzi Mosis na. Yọ a jẹ hai lele oghẹrẹ nọ isu egagọ Ju a fotọ uzi na kẹ ae. Eware nọ a je wuhrẹ ae oke yena a jẹ hai lele. Eware wọhọ oghẹrẹ emu nọ a rẹ re gbe onọ a rẹ re he. Yọ a jẹ hae yawo jẹ kẹnoma kẹ ahwo nọ a rrọ ahwo Ju hu. Rekọ nọ Jesu o ti whu no, Jihova ọ gbẹ rehọ iẹe nọ idhe oye a re dhe re a sae gọe he. Rekọ fikinọ Ileleikristi nọ e jọ ahwo Ju a lele Uzi Mosis na reria no, o lọhọ kẹ ae re a lele oghẹrẹ nọ Jihova o nwene eware fihọ họ. (Hib. 10:1, 4, 10) Yọ o lọhọ kẹ Pita ukọ na gbe Ileleikristi efa nọ i kruga ziezi evaọ ukoko na ha re a nwene. (Iruẹru 10:9-14; Gal. 2:11-14) Fikinọ Ileleikristi nọ e rrọ ahwo Ju a gbe je lele Uzi Mosis na ha, isu egagọ ahwo Ju a tẹ jẹ wọso ae.
O gwọlọ nọ Ileleikristi Hibru a wuhrẹ ẹme Ọghẹnẹ ziezi re a sae siọ iwuhrẹ erue nọ egagọ ahwo Ju a bi wuhrẹ (Rri edhe-ẹme avọ 4-5)
5. Eria ivẹ vẹ ebẹbẹ nọ i je te Ileleikristi nọ e jọ ahwo Ju i je no ze?
5 Eria ivẹ ebẹbẹ nọ i je te Ileleikristi nọ e jọ ahwo Ju na i je no ze. Ọjọ họ, isu egagọ ahwo Ju a je ru ai wọhọ ahwo nọ a gbẹ be gọ Ọghẹnẹ hẹ. Yọ ofa họ, ejọ evaọ usu ahwo Ju nọ e jọ Ileleikristi dede a jẹ ta nọ a re gbe ru eware nọ Uzi Mosis o ta. Ẹsejọhọ a je koko Uzi Mosis na re ahwo Ju a gbẹ wọso ae he. (Gal. 6:12) Kọ eme o ti fiobọhọ kẹ Ileleikristi yena ru oware nọ o rẹ were Jihova?
6. Eme Pọl ọ ta kẹ Ileleikristi obọ Hibru inọ a ru? (Ahwo Hibru 5:14–6:1)
6 Pọl ọ jọ ileta nọ o kere se Ileleikristi Hibru na vuẹ ae inọ a wuhrẹ eware buobu evaọ Ikereakere na. (Se Ahwo Hibru 5:14–6:1.) Pọl ọ ta ẹme te eware jọ evaọ Ikereakere Hibru na nọ u fiobọhọ kẹ Ileleikristi na riẹ nọ egagọ Ileleikristi i woma vi orọ ahwo Ju kpekufiẹ. a Pọl ọ vuẹ Ileleikristi na inọ a wuhrẹ eware efa evaọ Ikereakere na, jẹ riẹ otọ rai ziezi. Ọ vuẹ rai ere keme ọ riẹ nọ u ti ru nọ a te rọ riẹ, nọ ohwo jọ o te bi wuhrẹ ae oware nọ o rrọ Ikereakere na ha. Yọ u ti ru nọ a gbe ti su ai thọ họ. Yọ a te kuvẹ re ohwo jọ o ru ai kie no ukoko na ha.
7. Eme vẹ ahwo a rẹ ta nẹnẹ nọ o rẹ sai gele ohwo no ukoko na?
7 Nẹnẹ na, utiọ oware nọ o via kẹ Ileleikristi obọ Hibru na o be via kẹ omai re. Ahwo buobu a be ta ẹme wọso izi Jihova nọ ma bi koko, dede nọ izi Jihova e mai woma. Ẹsibuobu ahwo nọ a be wọso ukoko na a rẹ ta nọ ma be nwani kru uzi ọfariẹ-ogbe na keke ga hrọ. Anọ ma rẹ kẹ ahwo uvẹ ru oware nọ a gwọlọ họ, anọ ma rrọ eva gaga. Oghẹrẹ nọ ahwo a bi ru gbe eme nọ a be ta, whọ rẹ nwane riẹ nọ eware nọ Ọghẹnẹ ọ gwọlọ e rrọ e rai oja vievie he. (Itẹ 17:15) Fikiere u fo re ma rri otọ mu, re nọ a tẹ be ta eme nọ i fo ho, nọ o sae lẹliẹ omai wo avro kpahe izi Ọghẹnẹ hayo no ukoko na, ma vẹ tehe ezọ mai di.—Hib. 13:9.
8. Eme ma re ru re ẹrọwọ mai ọ sae ga?
8 U fo re ma roro kpahe ohrẹ nọ Pọl ọ kẹ Ileleikristi obọ Hibru gaga. Ọ hrẹ rai nọ a daoma nyaharo te ọkpako. Oware jọ nọ u re fiobọhọ kẹ omai nyaharo te ọkpako họ, ma rẹ daoma riẹ ẹme Ọghẹnẹ vi epaọ ọsosuọ. Ma vẹ jẹ daoma rri eware epanọ Jihova o bi rri rai. Nọ ma tẹ make rọ uzuazọ mai kẹ Jihova jẹ họ-ame no, ma rẹ gbẹ daoma wuhrẹ ẹme Ọghẹnẹ. Yọ o tẹ make rọnọ ma rrọ ukoko na kri no, ma rẹ daoma se Ebaibol jẹ romatotọ wuhrẹ iẹe. (Ol. 1:2) Pọl ọ jọ ileta nọ o kere se Ileleikristi obọ Hibru na ta ẹme te ẹrọwọ gaga. Fikiere nọ ma te bi se Ebaibol na, jẹ romatotọ wuhrẹ iẹe, ma ti wo ẹrọwọ nọ Pọl ọ ta ẹme te na. Yọ ẹrọwọ mai ọ te jọ gaga.—Hib. 11:1, 6.
MA RE “WO ẸRỌWỌ NỌ O RE SIWI UZUAZỌ MAI”
9. Fikieme o jẹ roja re Ileleikristi Hibru a wo ẹrọwọ ọgaga?
9 Nọ Ileleikristi nọ e jọ ahwo Hibru na a gbe wo ẹrọwọ ọgaga ha, a te sae zọ họ nọ a tẹ wọ ẹmo ziọ Judia. (Hib. 10:37-39) Jesu ọ vuẹ ilele riẹ no vẹre inọ a dhẹ kpobọ igbehru nọ a tẹ ruẹ egbaẹmo nọ e wariẹ Jerusalẹm họ. U fo nọ te Ileleikristi nọ e jẹ rria evaọ Jerusalẹm, te enọ e jẹ rria iwhre nọ e kẹle rai nọ a di ogba wariẹ họ họ, a rẹ dhẹ. (Luk 21:20-24) Whaọ nọ a tẹ wọ ẹmo ziọ ewho nọ a di ogba wariẹ họ họ evaọ oke yena, ewho nọ a di ogba wariẹ họ wọhọ Jerusalẹm a rẹ dhẹ nya. Rekọ Jesu ọ vuẹ rai nọ a dhẹ no ẹwho nọ a di ogba wariẹ họ na kpobọ ugbehru nọ a di ogba wariẹ họ họ. A sai rri rie nọ yọ oware areghẹ hẹ. O ginẹ gwọlọ nọ a re wo ẹrọwọ ọgaga re a sai ru oware nọ ọ ta na.
10. Nọ Ileleikristi a te wo ẹrọwọ ọgaga, eme a re ru? (Ahwo Hibru 13:17)
10 U fo nọ Ileleikristi nọ e jọ ahwo Hibru a re fievahọ ahwo nọ Jihova ọ jẹ rọ kpọ ukoko na. Ẹsejọhọ Ileleikristi nọ e jẹ rẹrote ukoko na oke yena, a vuẹ Ileleikristi nọ i kiọkọ oke nọ a rẹ rọ dhẹ gbe oghẹrẹ nọ odhẹ na o te jọ, re a gbẹ jọ vaha vaha ha. (Se Ahwo Hibru 13:17.) Ẹme Griki nọ a fa inọ “wha yoẹme” nọ ọ rrọ Ahwo Hibru 13:17 na, o dhesẹ epanọ ohwo o re yoẹme je ru oware nọ a vuẹ riẹ fikinọ o fievahọ ohwo nọ ọ be vuẹe nọ o ru oware na. Orọnọ fikinọ ọ riẹ nọ ohwo na o wo udu nọ ọ rẹ rọ vuẹe nọ o ru oware na ọvo, o re ro ru ei hi. Oyena u dhesẹ nọ Ileleikristi obọ Hibru na a re fievahọ ahwo nọ Ọghẹnẹ ọ jẹ rọ kpọ ukoko na oke yena no taure a tẹ te wọ ẹmo ziọ Jerusalẹm. Otẹrọnọ Ileleikristi obọ Hibru na a be hai ru oware nọ ahwo nọ e jẹ kpọ ukoko na oke yena a ta, o te gbẹ bẹ ae re a yoẹme he nọ a tẹ wọ ẹmo ze no.
11. Fikieme o jẹ roja re mai Ileleikristi nẹnẹ ma wo ẹrọwọ ọgaga?
11 Epanọ u fo nọ Ileleikristi obọ Hibru nọ Pọl o kere ileta se na a re wo ẹrọwọ na, ere o gwọlọ nọ ma re wo ẹrọwọ re. Nẹnẹ na nọ ma tẹ be vuẹ ahwo nọ Ọghẹnẹ ọ te raha akpọ na kẹle a rẹ rọwo ho. Ejọ i re tube se omai ẹkoko. (2 Pita 3:3, 4) U te no ere no, ma riẹ nọ Ebaibol ọ vuẹ omai epanọ uye ulogbo na o te jọ, rekọ eware buobu e riẹ nọ ma riẹ kpahe iẹe he. Fikiere ma re wo ẹrọwọ ọgaga re ma rọwo nọ Jihova ọ te raha akpọ na evaọ oke nọ u fo, yọ ọ te rẹrote omai oke yena.—Hab. 2:3.
12. Eme ma re ru re ma sae zọ nọ uye ulogbo na u te muhọ no?
12 Ma rẹ daoma fievahọ ahwo nọ Jihova ọ be rọ kpọ ukoko na nẹnẹ. Ae họ “ọrigbo nọ a re fievahọ nọ o wo areghẹ na.” (Mat. 24:45) Ẹsejọhọ a vuẹ Ileleikristi obọ Hibru oware nọ a re ru nọ isoja Rom a wariẹ Jerusalẹm họ. Ere ọvona re, ẹsejọhọ nọ uye ulogbo na u te muhọ no, a te vuẹ omai oware nọ ma re ru re ma sae zọ. Fikiere enẹna u fo nọ ma re fievahọ ahwo nọ Jihova ọ be rọ kpọ ukoko na. Ma du vro ẹme nọ a ta ze he. Otẹrọnọ ẹgbẹgba ma bi ro ru oware nọ ukoko o ta enẹna, ma du roro nọ okenọ uye ulogbo na o tẹ ze no ma ti ro ru oware nọ ukoko o ta ha.
13. Fikieme ohrẹ nọ o rrọ Ahwo Hibru 13:5 na u ro wuzou?
13 Taure oke nọ Ileleikristi obọ Hibru a te rọ dhẹ na u te ti te, u fo nọ a rẹ daoma re a gbẹ gwọlọ ikpeware he. A rẹ kẹnoma kẹ “uyoyou ugho.” (Se Ahwo Hibru 13:5.) U wo oke jọ nọ uye o jẹ rọ bẹ ae, yọ ejọ rai a jọ iyogbe. (Hib. 10:32-34) O make rọnọ eware e jọ gaga kẹ ae ghele na, a thihakọ fikinọ a be gọ Ọghẹnẹ. Rekọ ẹsejọhọ nọ oke o be nya na, ejọ i te je roro nọ a gbe wo ugho ho, a te sae thọ omarai hi re uye o se ae ba ẹbẹ. Rekọ ghelọ epanọ a wo ugho te kẹhẹ, ugho na o sae te thọ ae he nọ a te raha Jerusalẹm. (Jem. 5:3) Nọ ohwo o te wo eware buobu, o te jọ bẹbẹ kẹe re ọ dhẹ oke yena. Ẹsejọhọ ọ te rọwo dhẹ siọ uwou gbe eware nọ o wo ba ha.
14. Nọ ẹrọwọ mai ọ tẹ rrọ gaga, ẹvẹ ma ti rri ugho gbe eware ibuobu nọ a re wo?
14 Nọ ma te gine wo ẹrọwọ ọgaga inọ oke nọ Ọghẹnẹ ọ te rọ raha akpọ na o te otọ no, ma te dhogbo epanọ ma re ro fe he. Evaọ oke nọ Ọghẹnẹ ọ te rọ raha akpọ na, Ebaibol ọ ta nọ ahwo a ti “gbolo isiliva rai fihọ iko-ore.” A ti ru ere keme a riẹ nọ “isiliva rai hayo igoru rai e te sai siwi ai hi evaọ ẹdẹ ofu ọgaga Jihova.” (Izik. 7:19) Ukpenọ ma re le ugho kiti kiti, ma re ru eware nọ i dhesẹ nọ ma gwọlọ ikpeware he. Rekọ umutho eware nọ ma rẹ rọ rẹrote omamai jẹ gọ Ọghẹnẹ mai vrẹ ma rẹ gwọlọ. Nọ ma te ru ere ma ti mu re esa vọ uzou ho. Yọ ma gbe wo eware bu ga hrọ họ, ma te dhogbo epanọ ma rẹ rọ rẹrote eware buobu hu. Eware ibuobu nọ ma wo o rẹ whae ze nọ ma gbe wo uvẹ tere he. U te no ere no, ma rẹ yọroma re eware nọ ma wo e gbẹ jọ omai oja ga hrọ họ. (Mat. 6:19, 24) Nọ oke nọ Ọghẹnẹ ọ te rọ raha akpọ na ọ be kẹle na, ẹsejọhọ eware jọ e te via nọ a te rọ riẹ sọ eware nọ ma wo eye e mae rọ omai oja, hayo epanọ ma re ro ru oware nọ o rẹ were Jihova.
“O GWỌLỌ NỌ WHA RE THIHAKỌ”
15. Fikieme o rọ gwọlọ nọ Ileleikristi Hibru a re thihakọ?
15 O gwọlọ nọ Ileleikristi Hibru na a re thihakọ keme oke yena yọ ukpokpoma o rrọ obaro hẹrẹ ae evaọ Judia. (Hib. 10:36) A je kpokpo Ileleikristi Hibru jọ gaga. Rekọ ejọ e riẹ nọ a kpokpo ho okenọ a kurẹriẹ. Pọl ọ ta nọ o tẹ make rọnọ a thihakọ ikpokpoma jọ no, a ri thihakọ enọ e rro te erọ Jesu hu. Jesu o thihakọ bẹsenọ o ro whu. (Hib. 12:4) Nọ ahwo Ju a ruẹ nọ ahwo a bi kurẹriẹ ruọ egagọ Ileleikristi gaga, a tẹ jẹ wọso ae gaga. Taure Pọl o te ti kere ileta se Ileleikristi Hibru na, o kpobọ Jerusalẹm. Nọ o je te obei, a tẹ gwọlọ nọ a re kpei no. Ezae Ju nọ i bu vrẹ udhuvẹ a “duwu omarai iyei nọ a rẹ re emu hayo da oware ovo ho bẹsenọ a re kpe Pọl no.” (Iruẹru 22:22; 23:12-14) A mukpahe Ileleikristi nọ e jọ ahwo Ju gaga. Rekọ o rẹ whaha ae ewuhrẹ hẹ. Yọ a rẹ gbẹ ta usi uwoma Uvie na, jẹ gọ Ọghẹnẹ vrẹ.
16. Eme Pọl ọ ta evaọ ileta nọ o kere se ahwo Hibru na nọ o rẹ lẹliẹ omai rri edawọ epanọ u fo? (Ahwo Hibru 12:7)
16 Kọ ẹvẹ Ileleikristi nọ e jọ ahwo Hibru na a sai ro thihakọ ọwọsuọ na? Pọl ọ riẹ nọ u fo re a rri edawọ nọ i bi te ai na epanọ Ọghẹnẹ ọ gwọlọ nọ a rri rai. Ọ vuẹ rai nọ Ọghẹnẹ ọ sae kuvẹ re edawọ jọ i te Oleleikristi. Nọ o je thihakọ edawọ itieye na, u ve ru ẹrọwọ riẹ jọ gaga. (Se Ahwo Hibru 12:7.) Edawọ nọ i re te Oleleikristi na, o rẹ lẹliẹe wo emamọ uruemu jọ nọ u fo nọ Oleleikristi o re wo nọ u re fiobọhọ kẹe ẹdẹfa. Nọ Ileleikristi obọ Hibru na a tẹ kareghẹhọ nọ erere o re no edawọ nọ i re te ohwo ze, u re ru nọ a sai ro thihakọ.—Hib. 12:11.
17. Fikieme Pọl ọ jẹ rọ ta ẹme ithihakọ kẹ Ileleikristi na ududu?
17 Pọl ọ tuduhọ Ileleikristi obọ Hibru na awọ inọ a kru udu ga re a thihakọ ọwọsuọ nọ o bi te ai. Pọl ọ sae ginẹ ta ẹme yena keme ọyomariẹ ọ jẹ wọso Ileleikristi oke jọ. Fikiere ọ riẹ oghẹrẹ nọ o rẹ jọ nọ a tẹ be wọso ohwo. Yọ o thihakọ ebẹbẹ buobu no. A kpokpo i rie gaga okenọ o kurẹriẹ obọ. (2 Kọr. 11:23-25) Fikiere Pọl ọ sae ginẹ ta ẹme ithihakọ ududu keme o thihakọ gaga no re. Ọ kareghẹhọ ae inọ jọ a rẹroso Jihova nọ odawọ u te te ai, orọnọ omobọ rai hi. Pọl o kere nọ a te ru ere a sae te ta ududu nọ: “Jihova họ ọnọ o bi fiobọhọ kẹ omẹ; ozọ u re mu omẹ hẹ.”—Hib. 13:6.
18. Eme u fo nọ mai kpobi ma rẹ kareghẹhọ nọ u re fiobọhọ kẹ omai thihakọ ebẹbẹ?
18 Nọ ma be ta ẹme na, a bi kpokpo inievo mai jọ. Yọ a bi thihakọ. Ma sae lẹ roro inievo yena, yọ ma sai ru eware efa ro fiobọhọ kẹ ae. (Hib. 10:33) Ebaibol ọ vuẹ omai vevẹ nọ “ahwo kpobi nọ a gwọlọ yeri uzuazọ omarọkẹ Ọghẹnẹ evaọ usu kugbe Kristi Jesu a ti kpokpo ai re.” (2 Tim. 3:12) Fikiere, u fo re mai kpobi ma ruẹrẹ oma kpahe re ukpokpoma u te ti te omai oma. Joma gbẹ rẹroso Jihova no eva mai kpobi ze. Joma riẹ nọ o ti fiobọhọ kẹ omai thihakọ ebẹbẹ kpobi nọ i ti te omai. Nọ oke u te te, uye nọ o be bẹ idibo Jihova nọ e gọ riẹ te urere, Jihova o ti ku uye na họ.—2 Tẹs. 1:7, 8.
19. Eme ma re ru enẹna nọ u ti fiobọhọ kẹ omai nọ uye ulogbo na u te muhọ no? (Rri uwoho na re.)
19 Ma riẹ nọ ileta nọ Pọl o kere se Ileleikristi obọ Hibru na i gine fiobọhọ kẹ ae ruẹrẹ oma kpahe kẹ ebẹbẹ nọ i te rai. Pọl ọ vuẹ rai nọ a daoma riẹ eware efa evaọ ikereakere na, jẹ riẹ otọ rai ziezi. Ọ ta nọ a te ru ere, u ti ru nọ a te rọ kake riẹ, nọ ohwo jọ o te bi wuhrẹ ai thọ. A vẹ te kẹnoma kẹ ohwo otiọye na re o gbe gele ai no ukoko na no ho. Ọ vuẹ rai re nọ a ru eware nọ i re ru ẹrọwọ rai ga. A ve ru oware nọ Jesu gbe ahwo nọ ọ be rọ kpọ ukoko na a ta kẹ ae nọ a ru. Ere ọvo ho, ọ vuẹ Ileleikristi na inọ Jihova ọ sai fiobọhọ kẹ ai wuhrẹ emamọ oware jọ no ukpokpoma nọ u bi te ae ze. Joma daoma ru eware nọ ma wuhrẹ no ileta nọ Ọghẹnẹ ọ rehọ Pọl kere na ze. Ma te ru ere, ma ti thihakọ te urere.—Hib. 3:14.
Eware e riẹ nya kẹ Ileleikristi Hibru nọ i thihakọ. Nọ a make dhẹ no Judia no, a gbe je kpohọ ewuhrẹ ghele. Kọ eme ma wuhrẹ noi ze? (Rri edhe-ẹme avọ 19)
OLE AVỌ 126 Jaja Aro Vi, Dikihẹ Ga, Jọ Ọgba
a Evaọ uzou ọsosuọ obe Ahwo Hibru na ọvo, Pọl ọ ta ẹme kpahe eria ihrẹ evaọ Ikereakere Hibru na. Ọ rọ ẹme nọ ọ ta dhesẹ nọ egagọ Ileleikristi i woma vi erọ ahwo Ju.—Hib. 1:5-13.
