1. Ẹdhoguo vẹ u bi ti muhọ kẹle na?

 MA BE rria oke nọ ikpeware e te jọ via. Uviemenẹ, Jesu o ti bruoziẹ ohwo kpobi nọ ọ rrọ otọakpọ na. Jesu ọ fodẹ eware nọ e te via re oke yena o te ti te. Ọ vuẹ ilele riẹ eware nọ e te via nọ e te jọ “oka” nọ u ti dhesẹ nọ ọ ze no dede nọ a be ruẹ e riẹ hẹ, gbe oka “orọ oke urere uyero-akpọ na.” (Mat. 24:3) A kere eware nọ ọ ta nọ e te via na fihọ obe Matiu izou 24 gbe 25. A te je kere ae fihọ obe Mak izou 13 gbe Luk izou 21.

2. Eme ma te ta ẹme kpahe, kọ erere vẹ ma ti wo noi ze?

² Jesu ọ kẹ etadhesẹ esa jọ. Yọ ọ rehọ e rai vẹvẹ omai unu re ma ruẹrẹ oma kpahe kẹ odẹnotha. Etadhesẹ esa na họ ọrọ igodẹ gbe ewe na, ọrọ emetẹ-kọkọ isoi iwareghẹ gbe isoi nọ e rrọ gheghẹ, gbe ọtadhesẹ etalẹnte na. Etadhesẹ na ọvuọvo u ru nọ ma rọ riẹ nọ oware nọ ohwo o ru oye a ti rri ro bruoziẹ riẹ. Nọ ma be te ta kpahe ae na, ma ti wuhrẹ oware jọ no ai ze jẹ ruẹ epanọ ma sai ro ru eware nọ ma wuhrẹ. Ọtadhesẹ igodẹ gbe ewe na ma te kake ta kpahe.

IGODẸ GBE EWE NA

3. Oke vẹ Jesu o ti ro bruoziẹ ahwo?

³ Nọ Jesu ọ jẹ kẹ ọtadhesẹ igodẹ gbe ewe na, o dhesẹ oghẹrẹ nọ a ti ro bruoziẹ ahwo. Ahwo nọ a ti bruoziẹ rai na họ ahwo nọ a ta usi uwoma kẹ, nọ a wo uvẹ nọ a hae sai  ro lele enọ a rọ ẹzi wholo na ru iruo nọ Ọghẹnẹ ọ kẹ rai. (Mat. 25:31-46) A ti bruoziẹ nana evaọ oke “uye ulogbo” na omoke jọ taure ẹmo Amagidọn o te ti fi ze. (Mat. 24:21) Epanọ othuru-igodẹ ọ rẹ hẹriẹ igodẹ no ewe na, ere Jesu ọ te hẹriẹ ahwo nọ i fiobọhọ kẹ inievo riẹ nọ a rọ ẹzi wholo na no enọ i fiobọhọ kẹ ae he.

4. Ma te rri obe Aizaya 11:3, 4, eme o dhesẹ nọ Jesu ọ te riẹ oziẹ ahwo bru? (Rri uwoho nọ o rrọ Uwou-Eroro na re.)

⁴ Eruẹaruẹ Ebaibol i dhesẹ nọ Jesu nọ Jihova o ro mu re o bruoziẹ ahwo na, o ti bruoziẹ okiẹrẹe. (Se Aizaya 11:3, 4.) O bi muẹrohọ uruemu omomọvo, iroro riẹ gbe ẹmeunu riẹ. Yọ o bi muẹrohọ oghẹrẹ nọ a bi ru inievo riẹ nọ a rọ ẹzi wholo. (Mat. 12:36, 37; 25:40) Jesu ọ te riẹ ahwo nọ i fiobọhọ kẹ inievo riẹ nọ a rọ ẹzi wholo na ru iruo nọ Ọghẹnẹ ọ kẹ rai. a Edhere jọ nọ ohwo ọ sai ro fiobọhọ kẹ inievo Kristi họ, nọ o te bi lele ae ta usi uwoma na. A ti bruoziẹ kẹ ahwo otiọye nọ a wọhọ igodẹ na inọ a kiẹrẹe, yọ a ti wo uvẹ nọ a re ro wo “uzuazọ ebẹdẹ bẹdẹ” evaọ otọakpọ. (Mat. 25:46; Evia. 7:16, 17) Who rri oghale nọ u ti te ahwo nọ a gọ Ọghẹnẹ ziezi! A te kru ẹrọwọ rai evaọ oke uye ulogbo na je bi ru oware nọ o rẹ were Ọghẹnẹ vrẹ ọvo, edẹ rai e te jọ “obe uzuazọ na” bẹdẹ bẹdẹ.—Evia. 20:15.

5. Eme ọtadhesẹ igodẹ gbe ewe na u wuhrẹ omai, kọ amono u fo nọ a re muẹrohọ oware nọ ma wuhrẹ noi ze?

⁵ Kru ẹrọwọ ra re whọ hae gbẹ gọ Ọghẹnẹ vrẹ. Ahwo nọ ohare igodẹ gbe ewe na ọ mai kiekpahe họ, ahwo nọ i wo ẹruore inọ a te rria otọakpọ na bẹdẹ bẹdẹ. Edhere jọ nọ a bi ro dhesẹ nọ a wo ẹrọwọ họ, a bi lele inievo Kristi ta usi uwoma na. Yọ a bi ru oware nọ umutho inievo Kristi nọ a rọ ẹzi wholo nọ Jesu o ro mu evaọ ukoko na, a vuẹ rai. (Mat. 24:45) Rekọ u fo re Ileleikristi nọ i wo ẹruore inọ a ti kpobọ odhiwu a muẹrohọ unuovẹvẹ nọ o rrọ ọtadhesẹ yena. Fikieme? Keme Jesu o bi muẹrohọ uruemu rai, iroro rai, gbe eme nọ i bi no ai unu ze. U fo nọ a re kru ẹrọwọ rai re. Jesu ọ rọ etadhesẹ ivẹ jọ rọ vẹvẹ enọ a rọ ẹzi wholo na unu. Ma rẹ jẹ ruẹ etadhesẹ nana evaọ obe Matiu uzou avọ 25. Obọnana ma te ta ẹme kpahe ọtadhesẹ emetẹ-kọkọ iwareghẹ gbe igheghẹ na.

EMETẸ-KỌKỌ IWAREGHẸ GBE IGHEGHẸ NA

6. Eme emetẹ-kọkọ isoi jọ a ru nọ u dhesẹ nọ a wo areghẹ? (Matiu 25:6-10)

⁶ Evaọ ọtadhesẹ emetẹ-kọkọ na, Jesu ọ ta ẹme kpahe emetẹ-kọkọ ikpe nọ e nyai zere ọva. (Mat. 25:1-4) Aikpobi a wọ no uwou vrẹ inọ a re lele ọva na kpohọ ehaa orọo na. Jesu ọ ta nọ emetẹ isoi evaọ usu rai a “wo areghẹ” rekọ isoi nọ i kiọkọ a “jọ gheghẹ.” Emetẹ-kọkọ nọ i wo areghẹ na a ruẹrẹ oma kpahe yọ a je muẹrohotọ. A gwọlọ nọ epa kpobi nọ ọva na o re lehie te kẹhẹ, a rẹ hẹrẹ iẹe, o tẹ make rọnọ obọ udevie aso dede ọ rọ nyaze. Oyejabọ a rọ wha ikpẹ nọ a re ro tu re a sae ruẹ ude. A tubẹ wha ewhri ọfa nọ a re ku họ ikpẹ rai, ariẹse he inọ ọva na o lehie gaga, re ikpẹ rai i gbe fu no ho. (Se Matiu 25:6-10.) Nọ ọva na ọ nyaze, a te lele iei kpohọ ehaa orọo na. Ere ọvona re, Ileleikristi nọ a rọ ẹzi wholo nọ e ruẹrẹ oma kpahe jẹ jaja aro vi, nọ i kru ẹrọwọ rai bọo okenọ Kristi ọ te rọ nyaze, a ti bruoziẹ kẹ ae. A te rọwo kẹ ae nọ a te ahwo nọ a re kuomagbe Jesu nọ ọ rrọ Ọva na evaọ Uvie  riẹ evaọ obọ odhiwu. b (Evia. 7:1-3) Kọ emetẹ-kọkọ igheghẹ isoi na dede?

7. Eme o via kẹ emetẹ-kọkọ igheghẹ isoi na, kọ fikieme?

⁷ Emetẹ-kọkọ igheghẹ isoi na a wọhọ iwareghẹ na ha. A ruẹrẹ oma kpahe he re a sae jariẹ nọ ọva na ọ tẹ nyaze. Nọ u te oria jọ, ikpẹ rai e tẹ be gwọlọ fu no, yọ a wha ewhri ọfa lele oma ha. Nọ a ruẹ nọ ọva na ọ be te nyaze, kọ oke yena a rọ nyae dẹ ewhri. Taure a te ti zihe ze, ọva na ọ nyaze no. Oke yena, “emetẹ-kọkọ nọ e ruẹrẹ oma kpahe na i te lele iei ruọ eva oria ehaa orọo na, a tẹ kare ẹthẹ na.” (Mat. 25:10) Nọ emetẹ-kọkọ igheghẹ isoi na a zihe no obọ ewhri nọ a nyae dẹ ze, a tẹ be gwọlọ nọ a rovie ẹthẹ kẹ ae re a ruọ eva. Rekọ ọva na ọ tẹ ta kẹ ae nọ: “Mẹ riẹ owhai hi.” (Mat. 25:11, 12) Emetẹ-kọkọ igheghẹ na a ruẹrẹ oma kpahe re a hẹrẹ ọva na te epa kpobi nọ o re lehie te he. Kọ eme Ileleikristi nọ a rọ ẹzi wholo a rẹ sai wuhrẹ noi ze?

8-9. Eme Ileleikristi nọ a rọ ẹzi wholo a sai wuhrẹ no ọtadhesẹ emetẹ-kọkọ na ze? (Rri uwoho na re.)

⁸ Ruẹrẹ oma kpahe ziezi jẹ jaja aro vi. Ọtadhesẹ yena nọ Jesu ọ kẹ na, orọnọ ọ be rehọ iẹe ta nọ Ileleikristi nọ a rọ ẹzi wholo, eko ivẹ e te jariẹ hẹ. Orọnikọ ẹko jọ yọ enọ e te sae hẹrẹ Jesu rite ekuhọ akpọ na, ẹko ọfa kọ enọ e te sae hẹrẹ hẹ hẹ. Rekọ Jesu ọ be rehọ iẹe dhesẹ oware nọ o te via nọ Ileleikristi nọ a rọ ẹzi wholo a gbẹ ruẹrẹ oma kpahe re a thihakọ te urere he. Enọ i thihakọ te urere he, a ti wo osa na ha. (Jọn 14:3, 4) Ẹme yena okpẹme gaga. Te ma wo ẹruore inọ ma ti kpobọ odhiwu hayo ma te jọ otọakpọ na, joma muẹrohọ unuovẹvẹ nọ Jesu ọ be rọ ọtadhesẹ emetẹ-kọkọ na vẹvẹ omai na. Jọ mai omomọvo ọ jaja aro vi, jẹ ruẹrẹ oma kpahe, je thihakọ te urere.—Mat. 24:13.

⁹ Jesu ọ rọ ọtadhesẹ emetẹ-kọkọ na wuhrẹ  omai nọ joma jaja aro vi jẹ ruẹrẹ oma kpahe. Nọ ọ kẹ ọtadhesẹ yena no, ọ tẹ kẹ ọtadhesẹ etalẹnte na. Ọ rọ ọtadhesẹ yena wuhrẹ omai nọ ma re kru oma ga evaọ iruo nọ Ọghẹnẹ ọ kẹ omai.

ETALẸNTE NA

10. Eme erigbo ivẹ jọ a ru nọ o were olori rai? (Matiu 25:19-23)

¹⁰ Jesu ọ jọ ọtadhesẹ etalẹnte na ta ẹme kpahe erigbo ivẹ nọ i ru oware nọ olori rai ọ gwọlọ, gbe ọrigbo ọvo nọ o ru oware nọ olori riẹ ọ gwọlọ họ. (Mat. 25:14-18) Erigbo ivẹ ọsosuọ na a ru oware nọ olori rai ọ gwọlọ. A ru iruo kẹ olori rai ziezi, u te ru nọ efe olori rai o ro bu. Taure olori rai o te ti kpohọ erẹ, ọ kẹ rai etalẹnte. Etalẹnte na yọ igho buobu gaga. Erigbo ivẹ na a tẹ rọ etalẹnte na thueki ziezi. Kọ eme o no rie ze? Nọ olori rai o kpozi, ọ tẹ ruẹ nọ a wo ugho nọ ọ kẹ rai na akuava no. O te jiri ai gaga jẹ ta kẹ ae nọ jọ a “nyaze te reawere oghọghọ olori [rai].” (Se Matiu 25:19-23.) Kọ eme ọrigbo avọ esa na o ru igho nọ olori riẹ ọ kẹ riẹ?

11. Eme a ru ọrigbo nọ ọ jọ “ọyẹlẹ” na, kọ fikieme?

¹¹ Ọrigbo avọ esa nọ a kẹ etalẹnte na yọ “ọyẹlẹ.” Olori riẹ o je roro nọ ọ te rehọ etalẹnte na ru iruo ziezi re ugho jọ o ruọ ehru riẹ. Rekọ o ru ere he, ọ tẹ tọ igho na fihọ otọ. Nọ olori riẹ o kpozi, ọ ruẹ nọ oware ovo o kpahe ehru etalẹnte nọ ọ kẹ ọrigbo na ha. Ọrigbo na o wo ekpehre uruemu. Ukpenọ o tube wounu kẹ olori riẹ inọ ọ sae rọ ugho na thueki re ugho ọfa o ruọ ehru riẹ hẹ, ọ tẹ ta nọ olori riẹ yọ “ohwo nọ oware nọ omọfa o ru o rẹ kake da ẹro ho.” Olori riẹ o jiri rie vievie he. O mi rie etalẹnte na. Ọ tẹ ta nọ jọ a wọ ọrigbo na no uwou na no re a gbolo iei fihọ obọ otafe.—Mat. 25:24, 26-30.

12. Amono a rehọ erigbo ivẹ nọ i kru obọ ga na dhesẹ?

¹² Ahwo nọ a be rehọ erigbo nọ i ru eva were olori rai na dhesẹ họ, Ileleikristi nọ a rọ ẹzi wholo nọ i ru oware nọ Olori rai ọ gwọlọ. Olori rai Jesu Kristi, o ti zizie ai nọ jọ a “nyaze te reawere oghọghọ olori [rai].” A ti wo osa rai evaọ obọ odhiwu  evaọ ẹkparomatha ọsosuọ na. (Mat. 25:21, 23; Evia. 20:5b) Ọrigbo nọ ọ moyẹlẹ na, unuovẹvẹ ọ rrọ rọkẹ enọ a rọ ẹzi wholo na. Ẹvẹ ma rọ ta ere?

13-14. Eme Ileleikristi nọ a rọ ẹzi wholo a sai wuhrẹ no ọtadhesẹ etalẹnte na ze? (Rri uwoho na re.)

¹³ Kru obọ ga ziezi evaọ iruo nọ Ọghẹnẹ ọ kẹ owhẹ. Te ọtadhesẹ etalẹnte na gbe ọrọ emetẹ-kọkọ na, orọnikọ Jesu ọ be rehọ ae ta nọ Ileleikristi nọ a rọ ẹzi wholo na a te moyẹlẹ hẹ. Rekọ ọ be rehọ iẹe wuhrẹ ae oware nọ o te via nọ a gbe wo ajọwha ha. Nọ a gbe wo ajọwha ha, a te gbẹ sai “ru use gbe ẹsalọ rai muẹro kẹ omarai” hi. Yọ a te kẹ ae uvẹ re a ruọ Uvie obọ odhiwu na ha.—2 Pita 1:10.

¹⁴ Ọtadhesẹ etalẹnte gbe ọrọ emetẹ-kọkọ na i dhesẹ nọ u fo re Ileleikristi nọ a rọ ẹzi wholo kpobi a ruẹrẹ oma kpahe, jaja aro vi je kru obọ ga evaọ iruo Ọghẹnẹ. Kọ Jesu ọ ta ẹme ọfa nọ ọ rọ vẹvẹ Ileleikristi nọ a rọ ẹzi wholo na unu? Ee. U wo ẹme ọfa jọ nọ ọ ta. Ma rẹ ruẹ e riẹ evaọ obe Matiu 24:40, 41. Ẹme yena o kiekpahe epanọ a ti ro bruoziẹ enọ a rọ ẹzi wholo na sọ a te ahwo nọ a rẹ ruọ Uvie na hayo a te he.

AMONO “A TE REHỌ” VRẸ?

15-16. Eme Matiu 24:40, 41 o ta, nọ u dhesẹ nọ o roja re enọ a rọ ẹzi wholo na a jaja aro vi?

¹⁵ Taure Jesu ọ tẹ te kẹ etadhesẹ esa na, ọ ta ẹme te oziẹobro urere nọ a te rọ riẹ Ileleikristi nọ a rọ ẹzi wholo nọ e riẹ ru. Ọ ta ẹme te ezae ivẹ nọ i bi ru iruo evaọ udhu gbe eyae ivẹ nọ i bi wuhu eka evaọ oria ọvo. Ezae ivẹ na gbe eyae ivẹ na, o wọhọ nọ oware ovona a bi ru. Rekọ Jesu ọ ta nọ “a te rehọ ọvo vrẹ a vẹ nyasiọ ọdekọ ba.” (Se Matiu 24:40, 41.) Nọ ọ ta ere no, ọ tẹ ta kẹ ilele riẹ nọ: “Fikiere, wha ruabọhọ erou, keme wha riẹ ẹdẹ nọ Olori rai ọ be nyaze he.” (Mat. 24:42) Jesu ọ ta oghẹrẹ ẹme otiọye na nọ o je ku ọtadhesẹ emetẹ-kọkọ na họ. (Mat. 25:13) Nọ o rrọ ere na, kọ u dhesẹ nọ oware ovona Jesu ọ be ta kpahe evaọ eria ivẹ na? O wọhọ ere. Ileleikristi nọ a rọ ẹzi wholo nọ e gọ Ọghẹnẹ ziezi ọvo, Jesu ọ “te rehọ” vrẹ kpohọ Uvie odhiwu na.—Jọn 14:3.

¹⁶ Hai rou ẹsikpobi. Oleleikristi nọ a rọ ẹzi wholo nọ ọ jaja aro vi ẹsikpobi hi, o re ru oware nọ Ọghẹnẹ ọ gwọlọ họ. Fikiere a te rehọ iẹe vrẹ kugbe enọ “a salọ na” ha. (Mat. 24:31) Ere o rrọ kẹ idibo Ọghẹnẹ efa nọ i wo ẹruore inọ a te rria otọakpọ na. A re lele unuovẹvẹ Jesu na. A re rou ẹsikpobi jẹ hai ru oware nọ Ọghẹnẹ ọ gwọlọ.

17. Fikieme ma gbe du ruawa ha nọ Jihova ọ tẹ rọ ẹzi wholo idibo riẹ jọ evaọ oke mai na?

¹⁷ Ma riẹ oghẹrẹ ohwo nọ Jihova ọ rrọ. Fikiere ma riẹ nọ ọ te riẹ oziẹ ohwo kpobi bru. Ma re du ruawa ha inọ Jihova ọ be rọ ẹzi riẹ wholo idibo riẹ jọ anwọ ikpe jọ ze na. c Ma kareghẹhọ nọ okenọ Jesu ọ jẹ kẹ ọtadhesẹ ahwo nọ a se nyai ru iruo evaọ ọgbọ evaene na, ọ ta nọ auwa avọ ikpegbọvo a ro se ahwo jọ nya. (Mat. 20:1-16) Osa nọ a kẹ ahwo nọ a rrọ udhu na ru iruo anwẹsiẹ na, oye ọvona a kẹ enọ a se nyai ru iruo uwhremu na. Ere ọvona re, osa nọ a te kẹ Ileleikristi nọ a kake rọ ẹzi wholo no anwẹdẹ, oye ọvona a te kẹ enọ a rọ ẹzi wholo uwhremu na otẹrọnọ a kru ẹrọwọ rai te urere. A te rehọ ae kpobi kpobọ odhiwu.

LELE UNUOVẸVẸ NA

18-19. Eme ma jọ etadhesẹ na wuhrẹ, kọ unuovẹvẹ vẹ o rrọ etadhesẹ na?

¹⁸ Eme ma wuhrẹ no na? Ọtadhesẹ igodẹ  gbe ewe na u dhesẹ nọ ahwo nọ i wo ẹruore inọ a te rria otọakpọ na bẹdẹ bẹdẹ, a re kru ẹrọwọ rai jẹ gọ Jihova te urere. A re ru ere enẹna je rite oke uye ulogbo na. Oke yena, Jesu o ti bruoziẹ kẹ ahwo nọ i kru ẹrọwọ rai inọ a te ahwo nọ a re “wo uzuazọ ebẹdẹ bẹdẹ.”—Mat. 25:46.

¹⁹ Ma ta ẹme kpahe etadhesẹ ivẹ jọ nọ a rọ vẹvẹ enọ a rọ ẹzi wholo na unu. Ma jọ ọtadhesẹ emetẹ-kọkọ na ruẹ nọ isoi e jọ gheghẹ, isoi nọ i kiọkọ a wo areghẹ. Iwareghẹ na a ruẹrẹ oma kpahe yọ a jaja aro vi. A hẹrẹ ọva na bẹsenọ ọ rọ nyaze. Rekọ igheghẹ na a ruẹrẹ oma kpahe he. Fikiere ọva na ọ kẹ rai uvẹ re a ruọ oria nọ a bi jo ru ehaa orọo riẹ na ha. Ere ọvona re, ma rẹ jọ udu mai gbaemu inọ ma rẹ hẹrẹ oke nọ Jesu ọ te rọ raha akpọ nana, o maki kri kẹhẹ. Ma tẹ jẹ jọ ọtadhesẹ etalẹnte na ruẹ nọ erigbo ivẹ a ru oware nọ olori rai ọ gwọlọ. A kru oma ga jẹ romatotọ ru iruo nọ a kẹ rai. Fikiere eva rai e were olori rai gaga. Rekọ a le ọrigbo nọ ọ moyẹlẹ na no uwou na. Kọ eme ma wuhrẹ no ọtadhesẹ nana ze? Ma re kru obọ ga evaọ iruo Jihova bẹsenọ ọ rẹ raha akpọ na. Ma te je wuhrẹ nọ enọ a rọ ẹzi wholo na a rẹ jaja aro vi ẹsikpobi re Jesu ọ sae “rehọ” ae vrẹ kpobọ odhiwu. Ileleikristi nọ a rọ ẹzi wholo na a bi rẹro okenọ Jesu o ti ro ‘koko ae họ’ kpobọ odhiwu. Nọ a te fi ẹmo Amagidọn no, a vẹ te wọhọ ọmọtibobo kẹ Jesu. Oye Ebaibol o se orọo Omogodẹ na.—2 Tẹs. 2:1; Evia. 19:9.

20. Eme Jihova o ti ru kẹ ahwo nọ a lele unuovẹvẹ nọ o rrọ etadhesẹ na?

²⁰ Dede nọ oke ẹdhoguo na o te otọ gaga no, ozọ u re mu omai hi. Ma tẹ gọ Jihova Ọsẹ obọ odhiwu mai nọ o you omai na te urere, ọ te kẹ omai “ogaga nọ u vi ogaga” re ma “sai dikihẹ aro Ọmọ ohwo.” (2 Kọr. 4:7; Luk 21:36) Te ma wo ẹruore inọ ma ti kpobọ odhiwu, hayo otọakpọ na ma te rria, joma lele unuovẹvẹ nọ Jesu ọ rọ etadhesẹ na vẹvẹ omai na. Ma te ru ere, eva mai e te were Ọsẹ mai na. Jihova o wou gaga, fikiere o ti rri omai aro, o ve ti “kere odẹ [mai] fihọ obe” uzuazọ na.—Dan. 12:1; Evia. 3:5.