Fikinọ ilele udhosa-gbikpe na a jọ kugbe Jesu hu okenọ o je ru Emu Owọwọ Olori na, ma rẹ nwani roro nọ ọ se rai no, hayo a dhẹ se iẹe ba ha. Jesu ọ gwọlọ nọ ikọ riẹ ọ rẹ jọ kugbe ẹdẹ yena.

Te ikọ ikpegbivẹ gbe ilele udhosa-gbikpe na kpobi a gbẹ jọ ilele Jesu. Jesu o wo ilele buobu, rekọ ọ kake salọ ezae ikpegbivẹ, o te se ai ikọ. (Luk 6:12-16) Okenọ ọ jọ obọ Galili o ro “se Ikpegbivẹ na” je “vi ai vrẹ re a nyai whowho Uvie Ọghẹnẹ, re a je siwi ahwo.” (Luk 9:1-6) Nọ oke jọ o vrẹ no, nọ ọ jọ obọ Judia, “ọ tẹ salọ ilele udhosa-gbikpe efa, o te vi ae imimava.” (Luk 9:51; 10:1) Oyena u dhesẹ nọ Jesu ọ jọ eria buobu nọ ọ jọ ta usi uwoma wo ilele.

O wọhọ nọ ilele Jesu nọ e jọ ahwo Ju a jẹ hai lele ahwo uwou rai ru ehaa Ọnyavrẹ nọ a jẹ hai ru kukpe kukpe na. (Ọny. 12:6-11, 17-20) Nọ okenọ Jesu o ti ro whu o muhọ ẹkẹle no, Jesu avọ ikọ riẹ a te kpobọ Jerusalẹm. Rekọ ọ vuẹ se ilele riẹ nọ e rrọ obọ Judia, Galili, gbe Pẹria kpobi inọ a nyaze re a gbe ru ehaa Ọnyavrẹ na ha. O wọhọ nọ ikọ riẹ ọvo ọ gwọlọ lele ru ehaa na. Ọ ta kẹ ikọ riẹ nọ: “O rrọ omẹ oja gaga inọ mẹ rẹ re emu Ọnyavrẹ nana kugbe owhai taure mẹ tẹ ruẹ uye.”—Luk 22:15.

Jesu ọ riẹ oware nọ o lẹliẹ e riẹ se ikọ na ọvo. Oke yena, yọ ọ riẹ nọ oke nọ o ti ro whu o bi te no, keme ọye họ “Omogodẹ Ọghẹnẹ ọnọ ọ be wha uzioraha akpọ na vrẹ.” (Jọn 1:29) Nọ orọnọ Jerusalẹm a jẹ hai jo dhe idhe kẹ Ọghẹnẹ na, etẹe u fo nọ o re jo whu. Yọ uwhu Jesu u ti si ahwo no igbo nọ e ga vi igbo obọ Ijipti nọ Ọghẹnẹ o si ahwo Izrẹl no okenọ a re omogodẹ Ọnyavrẹ na evaọ obei. (1 Kọr. 5:7, 8) Oware nọ Jesu o ru na, u rovie uvẹ kẹ Ikpegbivẹ na nọ a rẹ rọ jọ otọhotọ ukoko Ileleikristi na. (Ẹf. 2:20-22) O nwani kiehọ kẹhẹ inọ okpẹwho ọrẹri nọ a se Jerusalẹm na o wo “itho otọhotọ ikpegbivẹ, yọ a kere edẹ ikpegbivẹ erọ ikọ ikpegbivẹ Omogodẹ na fihọ ae.” (Evia. 21:10-14) Oware nana u dhesẹ nọ ikọ Jesu nọ e gọ Ọghẹnẹ ziezi na a wo obọdẹ iruo nọ Ọghẹnẹ ọ te rehọ ae ru re ọ sai ru ẹjiroro riẹ gba. Agbẹta nọ Jesu o ro se ai gboma okenọ o je ru ehaa Ọnyavrẹ urere riẹ gbe Emu Owọwọ Olori na nọ o ru okenọ a ru ehaa na no.

Ilele udhosa-gbikpe na a jọ kugbe Jesu hu evaọ okenọ o ru ehaa Ọnyavrẹ gbe Emu Owọwọ na. Rekọ ilele Jesu kpobi nọ e gọ Ọghẹnẹ ziezi a ti wo erere no Emu Owọwọ Olori na ze. Evaọ aso ẹdẹ nọ Jesu o ro ru Emu Owọwọ na, ọ vuẹ ikọ riẹ kpahe ọvọ Uvie nọ a ti ro lele iei su evaọ obọ odhiwu. Ilele Jesu kpobi nọ a rọ ẹzi wholo uwhremu na, a re ọvọ yena kugbe ae re.—Luk 22:29, 30.