Mai ahwo buobu ma rẹ kake kareghẹhọ oware nọ ma wuhrẹ hẹ. Rekọ whọ be hae kareghẹhọ iriruo nọ Jesu ọ jẹ hae kẹ? E rẹ kake thọrọ omai ẹro ho. Who te yo oriruo na, o rẹ jọ wọhọ nọ whọ be ruẹ oware nọ ọ be ta na. Yọ u ru nọ ma be rọ kareghẹhọ eware nọ o wuhrẹ omai. Epọvo na re, nọ whọ tẹ be jọ iroro ra roro kpahe epanọ oware nọ who bi wuhrẹ na o be rọ via, u re ru nọ whọ sae rọ kareghẹhọ eware buobu nọ who se hayo wuhrẹ. Rekọ ẹvẹ whọ sai ro ru ei dede? Whọ sae drọ iwoho eware nọ who bi wuhrẹ na fihotọ.

O rẹ mae lọhọ kẹ ahwo nọ a rẹ drọ iwoho eware ekpokpọ nọ a wuhrẹ re a kareghẹhọ oware nọ a wuhrẹ. Rekọ orọnọ eware nọ a se ọvo u re fiobọhọ kẹ ae kareghẹhọ họ. U re fiobọhọ kẹ ae kareghẹhọ uzedhe oware nọ a wuhrẹ no eme nọ a se na ze. Eware nọ ahwo nana a rẹ drọ na orọnikọ eware ibuobu hayo eware egaga jọ họ, rekọ emeware elọlọhọ a rẹ drọ. Eware nọ a rẹ drọ re na i re fiobọhọ kẹ ekpako soso kareghẹhọ eware nọ a wuhrẹ.

Evaọ okenọ who ti ru uwuhrẹ omobọ ra, whọ sae daoma drọ eware nọ who wuhrẹ. Nọ whọ tẹ dawo iẹe, eware nọ whọ te kareghẹhọ dede i ti gbe owhẹ unu.