UZOẸME UWUHRẸ 3
OLE AVỌ 35 “Vuhu Eware nọ E Mae Roja”
Jiroro nọ E rẹ Were Jihova
“Ozodhẹ Jihova họ emuhọ areghẹ, yọ eriariẹ Ọnọ Ọ Rrọ Ọrẹri Erẹri na họ otoriẹ.”—ITẸ 9:10.
OWARE NỌ A JARIẸ TA KPAHE
Epanọ ohwo ọ sae rọ jiroro nọ i dhesẹ nọ o wo areghẹ, yọ o roro oware na te.
1. Fikieme u je wuzou re ma rorote nọ ma tẹ be jiroro?
IRORO nọ ma be jẹ evaọ akpọ na i bi wo ere he. Kẹdẹ kẹdẹ ma rẹ jiroro oware nọ ma gwọlọ ru. O rẹ bẹ hẹ re ma riẹ oware nọ ma re ru nọ ma tẹ be jiroro kpahe eware jọ. Eware wọhọ oghẹrẹ emu nọ ma rẹ re, hayo oke nọ ma re ro kiẹzẹ. Rekọ u wo eware efa jọ, nọ ma te bi roro epanọ ma re ro ru ai, o rẹ dina bẹ re ma riẹ oware nọ ma re ru. Yọ ma tẹ jiroro na thọ, eva e rẹ gbẹ were omai hi. O sae wha uye se ahwo uviuwou mai, jẹ tubẹ raha usu mai kugbe Jihova. Yọ o sai ru omai mọ dede re. Ma gwọlọ nọ iroro kpobi nọ ma rẹ jẹ e rẹ jọ iroro nọ e rẹ wha erere se omai gbe ahwo uviuwou mai. Onọ o mae rro kpobi, kọ epanọ ma sae rọ jiroro nọ e rẹ were Jihova.—Rom 12:1, 2.
2. Eme u re fiobọhọ kẹ owhẹ nọ whọ sae rọ jẹ emamọ iroro?
2 Whọ sae jẹ emamọ iroro nọ who te ru eware nana: Orọ ọsosuọ, nọ who te roro kpahe oghẹrẹ nọ eware e ginẹ rrọ. Orọ avọ ivẹ, who te roro kpahe oghẹrẹ nọ Jihova o rri oware na. Orọ avọ esa, roro kpahe eware nọ e rrọ otọ kẹ owhẹ re whọ sae salọ onọ u woma. Ma te jọ uzoẹme nana ta ẹme te eware esa nana, gbe epanọ ma sai ro rorote nọ ma tẹ be jiroro.—Itẹ 2:11.
RIẸ EPANỌ EWARE E GINẸ RRỌ
3. Fikieme u ro fo re whọ riẹ oghẹrẹ nọ eware e ginẹ rrọ re whọ tẹ jiroro? Kẹ oriruo.
3 Re ohwo ọ sae jẹ emamọ iroro, oware ọsosuọ nọ o re ru họ, ọ rẹ riẹ oghẹrẹ nọ eware e ginẹ rrọ dẹẹ. Kọ fikieme? Dae rehọ iẹe nọ whọ nyabru edọktọ, whọ tẹ vuẹe nọ oware jọ o be kẹ owhẹ uye. Kọ edọktọ na ọ te nwane kẹ owhẹ imu nọ, ‘Oya mi whọ lọ’ ababọ nọ ọ nọ owhẹ oware nọ u bi ru owhẹ? Kakaka. Ere ọvona re, taure whọ tẹ te jiroro jọ, whọ rẹ kake riẹ epanọ eware e rrọ, whọ vẹ sae jẹ emamọ iroro. Kọ ẹvẹ whọ sai ro ru ei?
4. Wọhọ epanọ Itẹ 18:13 o ta, eme who re ru re whọ riẹ epanọ eware e ginẹ rrọ? (Rri uwoho na re.)
4 Re whọ sae riẹ epanọ eware e ginẹ rrọ whọ rẹ nọ enọ. Dae rehọ iẹe nọ a zizie owhẹ kpohọ epati jọ. Kinọ a nwani zizie owhẹ na, ẹnyavrẹ ye? Nọ whọ gbẹ riẹ ohwo nọ o wo epati na ha, whọ te nọ inọ: “Oria vẹ a ti jo ru epati na? Kọ epati na e te rro gaga? Kọ ono o wuzou epati na? Kọ amono a te ziọ epati na? Eme a ti ru? Kọ idi egaga e te jariẹ?” Uyo nọ ohwo na ọ kẹ owhẹ u ti ru nọ whọ te rọ riẹ sọ whọ te nya hayo whọ te nya ha.—Se Itẹ 18:13.
Nọ enọ nọ i re fiobọhọ kẹ owhẹ riẹ epanọ eware e rrọ (Rri edhe-ẹme avọ 4) a
5. Nọ whọ tẹ riẹ epanọ eware e rrọ no, eme who re ru?
5 Nọ whọ tẹ nọ enọ no re whọ riẹ oghẹrẹ nọ eware e te jọ no, whọ vẹ romatotọ roro epanọ eware na e te jọ. Wọhọ oriruo, kọ nọ whọ tẹ riẹ nọ ahwo nọ a zizie kpohọ ehaa na a re koko uzi Ọghẹnẹ hẹ, hayo inọ a ti mu ghale idi nọ i re mu evaọ ehaa na fikinọ a riẹ izi Ọghẹnẹ hẹ, oyena u gbe dhesẹ kẹ owhẹ nọ a te da idi vrẹta evaọ epati na? (1 Pita 4:3) Oware ofa ona, otẹrọnọ oke nọ a ti ro ru epati na u kiefihọ oke nọ who ti ro kpohọ ewuhrẹ hayo usi uwoma, eme who re ru? Obọnana nọ whọ riẹ epanọ eware e rrọ no na, whọ te sae jẹ emamọ iroro. Rekọ oware ofa jọ o riẹ nọ u fo nọ who re ru. Whọ riẹ oghẹrẹ nọ whẹ omara who bi rri oware na. Kọ onọ na họ, ẹvẹ Jihova o rri oware na?—Itẹ 2:6.
RORO KPAHE OGHẸRẸ NỌ JIHOVA O RRI OWARE NA
6. Wọhọ epanọ Jemis 1:5 o ta, eme Jihova ọ rẹ kẹ omai nọ ma tẹ lẹ sei?
6 Lẹ se Jihova re o fiobọhọ kẹ owhẹ riẹ oghẹrẹ nọ o rri oware nọ who bi roro kpahe na. Jihova ọ ya eyaa inọ ọ te kẹ omai areghẹ nọ ma rẹ rọ riẹ oware nọ ma re ru nọ o te were iẹe. Ọ rẹ kẹ ohwo kpobi areghẹ “no eva ze buobu, yọ ọ rẹ poviẹ ohwo ho.”—Se Jemis 1:5.
7. Ẹvẹ whọ sae rọ riẹ oghẹrẹ nọ Jihova o rri oware nọ whọ gwọlọ ru? Kẹ oriruo.
7 Nọ whọ tẹ lẹ se Jihova no re o fiobọhọ kẹ owhẹ riẹ oware nọ who re ru no, muẹrohọ oghẹrẹ nọ o ti ro yo olẹ na. Ẹme nọ ma be ta na ọna, fake rehọ iẹe nọ who bi kpohọ erẹ, rekọ edhere na ọ tẹ bada owhẹ aro no. Eme who ti ru? Whọ te gbẹ nọ ohwo jọ re o dhesẹ edhere na kẹ owhẹ? Kinọ ohwo na o bi dhesẹ iẹe kẹ owhẹ na, whọ te nwane tọlọ oma ra who ve muhọ ẹnyavrẹ? Ma riẹ nọ who ti ru ere he. Whọ te gaviezọ kẹ ohwo na. Ere ọvona re, nọ whọ tẹ lẹ se Jihova re ọ kẹ owhẹ areghẹ no, muẹrohọ oghẹrẹ nọ ọ te rọ kẹ uyo olẹ na. Whọ vẹ jẹ daoma jọ Ebaibol gwọlọ izi gbe ehrẹ nọ e sai fiobọhọ kẹ owhẹ evaọ oware nọ o rrọ otọ na. Wọhọ oriruo, nọ whọ tẹ gwọlọ riẹ sọ who re kpọhọ epati nọ ma ta ẹme riẹ ẹsiẹ na hayo whọ rẹ nya ha, whọ sae kiẹ Ebaibol na re whọ riẹ oware nọ o ta kpahe ehaa nọ e rẹ jọ zighi zighi, ekpehre usu, gbe Uvie Ọghẹnẹ nọ ma rẹ rọ karo evaọ uzuazọ mai.—Mat. 6:33; Rom 13:13; 1 Kọr. 15:33.
8. Eme who re ru nọ u re fiobọhọ kẹ owhẹ riẹ oware nọ o rẹ were Jihova? (Rri uwoho na re.)
8 Whọ sae vuẹ amọfa ẹsejọ re a fiobọhọ kẹ owhẹ riẹ oware nọ who re ru. Whọ sae ta kẹ oniọvo jọ nọ o kruga ziezi evaọ ukoko na re ọ kẹ owhẹ ohrẹ. Yọ whọ sae jọ ebe ukoko na kiẹ kẹ omara. Whọ rẹ jọ ebe nọ ukoko na u ru nọ a re ro ru ekiakiẹ ruẹ oware nọ whọ be gwọlọ. Ejọ họ Obe Ekiakiẹ Rọkẹ Isẹri Jihova, gbe obe na Eria Ebaibol nọ I re Fiobọhọ kẹ Omai Gọ Jihova. Kareghẹhọ nọ who bi ru eware yena kpobi fikinọ whọ gwọlọ ru oware nọ o rẹ were Jihova.
Roro kpahe oghẹrẹ nọ Jihova o rri oware na (Rri edhe-ẹme avọ 8) b
9. Eme ma re ru re iroro nọ ma be te jẹ e ginẹ were Jihova? (Ahwo Ẹfisọs 5:17)
9 Eme ma re ru re ma sae jiroro nọ e rẹ were Jihova? Ọrọ ọsosuọ họ, ma rẹ daoma re ma riẹ Jihova ziezi. Keme Ebaibol ọ ta nọ “eriariẹ Ọnọ Ọ Rrọ Ọrẹri Erẹri na họ otoriẹ.” (Itẹ 9:10) Re a ta nọ ohwo o wo otoriẹ ọ rẹ riẹ uruemu Jihova, oware nọ ọ gwọlọ, gbe oware nọ o rẹ were iẹe gbe onọ o mukpahe. Nọ omara nọ, ‘Kọ nọ mẹ riẹ epanọ Jihova ọ rrọ no na, eme me ti ru nọ o rẹ were iẹe?’—Se Ahwo Ẹfisọs 5:17.
10. Fikieme oware nọ Ebaibol ọ ta u ro woma vi onọ ahwo uviuwou mai gbe ahwo ẹwho mai a gwọlọ?
10 Uzẹme riẹ họ, ẹsejọ re ma sai ru oware nọ o rẹ were Jihova, ma re ru eva dha ahwo nọ a kẹle omai. Dae rehọ iẹe nọ ọsẹgboni jọ a gwọlọ nọ ọmọtẹ rai ọ rẹ rehọ ọmọzae nọ obọ riẹ u te uke wuhu, hayo ọmọzae nọ ọ rẹ wọ igho buobu kẹ ae nọ ọ tẹ be rehọ ọmọtẹ rai. A rẹ daezọ họ sọ ọmọzae na o kruga evaọ ukoko na hayo o kruga ha, oyena u te rai hi. Uzẹme, a ginẹ gwọlọ ohwo nọ ọ rẹ sae rẹrote ọmọ rai. Rekọ onọ na họ, ọmọzae na ọ te sai fiobọhọ kẹ ọmọ rai kruga evaọ ukoko na? Kọ ẹvẹ Jihova o rri oware na? Ẹme nọ ọ rrọ Matiu 6:33 ọ sai fiobọhọ kẹ omai. Etẹe ọ ta kẹ Ileleikristi nọ a “gbẹ hae kake gwọlọ Uvie na.” Ma riẹ nọ u fo re ma kẹ ọsẹgboni mai adhẹẹ. Yọ ma gwọlọ ru oware nọ o rẹ kẹ ahwo ẹwho mai uye he. Rekọ epanọ ma re ro ru oware nọ o rẹ were Jihova họ oware nọ o rẹ mae jọ omai oja.
ROMATOTỌ RRI EWARE NỌ E RRỌ OTỌ KẸ OWHẸ NA
11. Eme a jọ obe Ahwo Filipai 1:9, 10 ta ẹme te nọ o sai fiobọhọ kẹ omai riẹ oware nọ ma rẹ sai ru?
11 Nọ whọ tẹ ruẹ nọ oware nọ whọ gwọlọ ru na o rọwokugbe ẹme nọ Ebaibol ọ ta, whọ vẹ romatotọ roro onọ who ti ru evaọ usu eware nọ e rrọ otọ kẹ owhẹ na. (Se Ahwo Filipai 1:9, 10.) Nọ who te rri otọ mu evaọ iroro nọ whọ gwọlọ jẹ u re ru nọ whọ sae rọ riẹ oware nọ o sae via nọ who te ru oware na. Evaọ ẹsejọ whọ rẹ nwane riẹ oware nọ who re ru. Rekọ ẹsejọ o rẹ nwane vẹrẹ re whọ riẹ onọ who re ru hu. Rekọ nọ who te roro oware na didi, whọ rẹ riẹ nọ u fo re me ru enẹ hẹ, enẹ u fo nọ me re ru.
12-13. Nọ ma te roro te, ẹvẹ o sai ro fiobọhọ kẹ omai nọ ma sae rọ jiroro iruo nọ ma re ru?
12 Ma rehọ iẹe nọ whọ be gwọlọ iruo re whọ sai wo ugho nọ whọ rẹ rọ rẹrote uviuwou ra. Whọ tẹ te ruẹ iruo ivẹ nọ whọ rẹ sai ru. Nọ who rri epanọ iruo ivẹ na e rrọ, whọ tẹ ruẹ nọ te oke nọ who ti ro ru iruo na, gbe epanọ oria nọ whọ te hai ro kpohọ iruo na u thabọ te, i woma. Nọ who je rri ẹme nọ Ebaibol ọ ta, whọ tẹ ruẹ nọ iruo na i woma. Nọ o make rọnọ iruo ivẹ na i woma na, ẹsejọhọ ọjọ ọ te were owhẹ vi ọjọ, O sae jọ nọ ọnọ ọ mae were owhẹ na ugho riẹ o mai bu hayo iruo yena e rẹ mae were owhẹ. Rekọ eware efa e riẹ nọ who ti rri nọ u re fiobọhọ kẹ owhẹ riẹ iruo nọ whọ gwọlọ ru.
13 Wọhọ oriruo, whọ sae nọ omara inọ: ‘Kọ iruo na e te kẹ omẹ uvẹ kpohọ ewuhrẹ? Kọ iruo na e te kẹ omẹ uvẹ nọ mẹ sai ro lele aye gbe emọ mẹ jọ uwou ru emeware jọ kugbe? Kọ e te kẹ omẹ uvẹ re me fiobọhọ kẹ ae kru egagọ Jihova ga?’ Enọ itienana nọ whọ rẹ nọ omara i re fiobọhọ kẹ owhẹ “vuhu eware nọ e mae roja,” koyehọ egagọ Jihova gbe uviuwou ra. Eware yena i wuzou vi iruo nọ whọ gwọlọ ru na. Nọ who te roro te oyena u ti ru nọ who ti ro ru oware nọ o rẹ were Jihova. Yọ Jihova o ti ku eghale riẹ ku owhẹ.
14. Ẹvẹ orimuo o sai ro fiobọhọ kẹ omai nọ ma re ro dhesẹ nọ ma you amọfa, yọ ma gwọlọ ru ai zoruẹ hẹ?
14 Orimuo o re ru nọ ma gbe ro roro kpahe omamai ọvo ho nọ ma tẹ be jiroro jọ. Ma re roro kpahe oghẹrẹ nọ amọfa a ti rri oware nọ ma gwọlọ ru na. Oyena u re ru nọ ma gbe ru ‘amọfa zoruẹ hẹ.’ (Fil. 1:10) U wuzou gaga inọ ma re roro kpahe amọfa nọ ma te bi roro kpahe iwu nọ ma re kuhọ gbe oghẹrẹ nọ ma re ru eto mai. Ma rehọ iẹe nọ u wo oghẹrẹ ewu jọ nọ ọ were omai nọ ma rẹ wha fiki oghẹrẹ nọ a ko rie. Hayo o sae jọ nọ oghẹrẹ eto jọ e riẹ nọ e were omai nọ ma re me hayo nware. Onọ na họ, ‘Nọ ma te ku ewu na họ hayo nọ ma te ru eto mai oghẹrẹ utioye na, ẹvẹ inievo ukoko na gbe amọfa nọ a rrọ ukoko na ha a ti rri rie?’ Nọ ma te rri otọ mu, u re fiobọhọ kẹ omai nọ ma gbe roro ho inọ, ‘Mẹ me wo oma mẹ.’ Ukpoye ma ti roro kpahe amọfa. Nọ ma te you amọfa u re ru nọ ma re ro roro kpahe “omọfa,” je ru nọ ma gbe ru vrẹ oma ha. (1 Kọr. 10:23, 24, 32; 1 Tim. 2:9, 10) Nọ ma gbe bi roro kpahe omamai ọvo ho, u dhesẹ nọ ma you amọfa, yọ ma gwọlọ ru oware nọ o rẹ kẹ ae uye he.
15. Re oware nọ ma jiroro riẹ o sai woma ziezi eme u fo nọ ma re ru?
15 Nọ whọ tẹ be jiroro, roro kpahe oghẹrẹ nọ who ti ro ru oware nọ whọ jiroro riẹ na. Jesu o wuhrẹ omai nọ ma “roro araha” mai. (Luk 14:28) Fikiere roro kpahe ugho gbe eware efa nọ who ti ro ru oware nọ whọ be jiroro riẹ na, oke nọ oware nọ whọ gwọlọ ru na o te rehọ owhẹ, gbe epanọ whọ te daoma te re oware nọ who bi ti ru na u woma. Ẹsejọ dede whọ sae ta kẹ ahwo uwou ra re wha gbẹ jiroro na, re wha jẹ riẹ oware nọ omomọvo o ti ru ro fiobọhọ. U woma re who ru ere keme u re ru nọ a sae rọ ta oware jọ nọ who roro te vẹre he ze, who ve nwene orọ ọsosuọ na hayo riẹ oware ofa nọ who re ru. Nọ whọ tẹ vuẹ ahwo uviuwou ra, jẹ gaviezọ kẹ ae, u re ru nọ a ti ro mu ọwhọ epanọ wha sai ro ru oware nọ wha jiroro riẹ na.—Itẹ 15:22.
JẸ EMAMỌ IRORO
16. Eme o re fiobọhọ kẹ owhẹ jẹ emamọ iroro? (Rri ẹkpẹti na “ Epanọ Whọ Sae rọ Jiroro nọ I Woma.”)
16 Nọ who te ru eware nọ ma ta ẹme te evaọ uzoẹme nana, u ti fiobọhọ kẹ owhẹ nọ whọ sae rọ jẹ emamọ iroro. Nọ whọ tẹ riẹ epanọ eware e ginẹ rrọ, jẹ riẹ oware nọ Ebaibol ọ ta kpahe oware nọ whọ gwọlọ ru na, u ti fiobọhọ kẹ owhẹ nọ whọ sai ro ru oware nọ o rẹ were Jihova. Nọ who te ru ere no, lẹ se Jihova re o fiobọhọ kẹ owhẹ re whọ sai ru oware nọ whọ jiroro riẹ na.
17. Eme who re ru re whọ sae jẹ emamọ iroro?
17 Ẹsejọ who ti roro nọ “nẹnẹ akpọ me mu iroro họ ẹjẹ hẹ. Yọ oware kpobi nọ mẹ jiroro riẹ o be riẹ nya.” Rekọ, kareghẹhọ nọ oware nọ o sai fiobọhọ kẹ owhẹ jẹ emamọ iroro họ, nọ who te fievahọ Jihova, orọnọ omobọ ra ha. Jihova họ ohwo nọ ọ sai fiobọhọ kẹ owhẹ riẹ oware nọ o mai woma. Ọ rẹ sae kẹ owhẹ otoriẹ gbe orimuo nọ u vi orọ omọfa kpobi. Nọ who te ru eware nana kpobi, u dhesẹ nọ who wo areghẹ. (Itẹ 2:1-5) Jihova ọ sai fiobọhọ kẹ owhẹ nọ whọ sae rọ jiroro nọ i woma nọ e te were iẹe.—Ol. 23:2, 3.
OLE AVỌ 28 Ogbẹnyusu Ọghẹnẹ
