Akothiho ‘Unwe Nọ O Rrọ Oma na’

“Aruoriwo mẹ o te kẹ owhẹ.”—2 AHWO KỌRINT 12:9.

1, 2. (a) Fikieme u gbe gb’omai unu hu nọ ma tẹ rẹriẹ ovao ku edawọ gbe ebẹbẹ? (b) Fikieme ma jẹ sai wo evaifihọ evaọ aro edawọ?

 “AHWO kpobi nọ a guọlọ uzuazọ Ọghẹnẹ uyero eva Kristi Jesu a re wo ukpokpoma.” (2 Timoti 3:12) Fikieme oyena o jẹ rrọ ere? Keme Setan o si ikẹ nnọ ahwo a be g’Ọghẹnẹ fiki ẹjiroro oriobọ ọvo, yọ ọ be daoma dhesẹ ẹme riẹ na fihọ uzẹme. Jesu ọ vẹvẹ ikọ ẹrọwọ riẹ unu okejọ nọ: “Setan ọ yare re ọ rehọ [owhai], re o voro [owhai] wọhọ eka.” (Luk 22:31) Jesu ọ riẹ ziezi nnọ Ọghẹnẹ ọ kẹ Setan uvẹ re ọ rehọ ebẹbẹ edada dawo omai. Dede na, orọnikọ oyena u dhesẹ nọ obọ Setan hayo idhivẹri dẹẹ ẹbẹbẹ kpobi nọ ma nyaku evaọ uzuazọ o no ze he. (Ọtausiwoma Na 9:11) Rekọ o rrọ Setan oja gaga re ọ rehọ edhere kpobi raha ẹgbakiete mai.

² Ebaibol na ọ ta k’omai nọ edawọ mai i re gb’omai unu hu. Oware nọ o via k’omai kpobi, o rrọ oware aghẹruẹ hayo onọ a rẹro riẹ hẹ hẹ. (1 Pita 4:12) Evaọ uzẹme, “uye utiona ovo na egbobọ te imoni [mai] nọ erọ akpọ na soso du.” (1 Pita 5:9) Nẹnẹ, Setan ọ be daoma viere họre idibo Ọghẹnẹ. O rẹ were Ẹdhọ re ọ rehọ nnọ ebẹbẹ buobu nọ e wọhọ inwe e be lahiẹ omai. Fikiere, ọ be rehọ uyerakpọ riẹ ruiruo re ọ ruẹ nọ o fiba hayo ru ‘inwe evaọ uwo mai’ ga viere. (2 Ahwo Kọrint 12:7) Ghele na, u du fo nọ ohọre Setan o raha ẹgbakiete mai hi. Wọhọ epanọ Jihova o re “ru epanọ” ma re ro thihakọ edawọ na, o ti ru epọvo na re okenọ ma tẹ rẹriẹ ovao ku ebẹbẹ nọ e wọhọ inwe evaọ oma mai.—1 Ahwo Kọrint 10:13.

Epanọ A re Ro Thihakọ Unwe

3. Didi uyo Jihova ọ kẹ okenọ Pọl ọ yare nọ o si unwe nọ o rrọ oma riẹ na no?

³ Pọl ukọ na ọ lẹ Ọghẹnẹ re o si unwe na no oma riẹ. “Isiasa gbagba mẹ lẹ Ọnowo na fiki onana, re o ruẹse kẹ omẹ uvẹ.” Didi uyo Jihova ọ kẹ kpahe ayare ọwhawha Pọl na? “Aruoriwo mẹ o te kẹ owhẹ, keme eva okuako ogaga mẹ o jẹ  gbunu.” (2 Ahwo Kọrint 12:8, 9) Joma kiẹ uyo nana riwi jẹ ruẹ epanọ o sai ro fiobọhọ k’omai thihakọ ebẹbẹ nọ e wọhọ inwe nọ e be d’omai.

4. Ẹvẹ Pọl o ro wo erere no aruoriwo Jihova ze?

⁴ Muẹrohọ nọ Ọghẹnẹ ọ tuduhọ Pọl awọ re o wo ovuhumuo aruoriwo nọ ọ rọ ẹkwoma Kristi dhesẹ kẹe no. Evaọ uzẹme, a ghale Pọl no evaọ idhere buobu. Jihova ọ rọ edhere oyoyou kẹe uvẹ-ọghọ ọkwa-olele, dede nọ o je kpokpo ilele Jesu gaga vẹre. (Iruẹru 7:58; 8:3; 9:1-4) Jihova ọ tẹ rọ ẹwo kẹ Pọl iruo gbe uvẹ-ọghọ igbunu buobu. Uwuhrẹ nọ o rrọ etenẹ k’omai u re vevẹ. Makọ okenọ eware i te yoma gaga, ma gbe wo eghale buobu nọ ma rẹ rọ fiki rai kẹ uyere. Ajọ edawọ mai e lẹliẹ ubu ewoma Jihova thọrọ omai ẹro vievie he.—Olezi 31:19.

5, 6. (a) Ẹvẹ Jihova o ro wuhrẹ Pọl inọ ogaga Ọghẹnẹ ‘o rẹ gbunu evaọ okuako’? (b) Ẹvẹ oriruo Pọl o ro dhesẹ Setan fihọ ọtọrue?

⁵ Aruoriwo Jihova o te k’omai evaọ edhere ọfa jọ. Ogaga Ọghẹnẹ u te re u fiobọhọ k’omai evaọ edawọ mai. (Ahwo Ẹfẹsọs 3:20) Jihova o wuhrẹ Pọl nnọ ogaga Ọghẹnẹ ‘o rẹ gbunu evaọ okuako.’ Evaọ oghẹrẹ vẹ? Ọ rọ uyoyou kẹ Pọl ẹgba kpobi nọ ọ gwọlọ re ọ sai thihakọ ẹdawọ riẹ. Ithihakọ Pọl gbe eva kpobi nọ o fihọ Jihova u re dhesẹ kẹ ahwo kpobi nnọ ogaga Ọghẹnẹ o be kparobọ evaọ oma ọzae ọnana nọ ọ rrọ kuako jẹ rrọ ọrahauzi na. Whaọ roro kpahe epanọ onana u duobọte Ẹdhọ te, ọnọ ọ ta nọ ahwo a rẹ gọ Ọghẹnẹ evaọ okenọ eware i te bi kiehọ kẹ ae evaọ uzuazọ ọvo. Ẹgbakiete Pọl o wọhọ ẹtehabọ rọ kẹ ohwo-ọtaraha ọyena!

⁶ Whaọ Pọl ọna, ọnọ ọ jọ ẹgba Setan vẹre evaọ ohọre riẹ mukpahe Ọghẹnẹ, ọnọ o je kpokpo Ileleikristi, ohwo ọwhọ Farisi nọ ọ jẹ riakpọ vẹre fikinọ a yẹ riẹ fihọ uviuwou okpohwo. Pọl o bi ruiruo kẹ Jihova gbe Kristi enẹna wọhọ “ọnọ ọ rọ uwhremu ikọ na kpobi.” (1 Ahwo Kọrint 15:9) Fikiere, ọ jẹ romakpotọ kẹ udu-esuo ugboma esuo Ileleikristi ikpe-udhusoi ọsosuọ na. Yọ o je thihakọ avọ ẹrọwọ ghelọ unwe nọ o rrọ oma riẹ na. Avọ edada kẹ Setan, edawọ uzuazọ i whrehe ọwhọ Pọl ho. Ẹruore nnọ o ti w’obọ evaọ Uvie obọ odhiwu Kristi o thọrọ Pọl ẹro ẹdọvo ho. (2 Timoti 2:12; 4:18) Fikiere makọ oghẹrẹ nọ unwe jọ o da te kpobi, o sae raha ọwhọ riẹ hẹ. Ajọ ọwhọ mai ọ jọ gaga epọvo na re! Ẹkwoma uketha nọ ọ rẹ kẹ omai evaọ edawọ mai, Jihova ọ k’omai uvẹ-ọghọ nọ ma re ro fiobọhọ dhesẹ Setan fihọ ọtọrue.—Itẹ 27:11.

Eruẹrẹfihotọ Jihova I w’Uzou

7, 8. (a) Idhere vẹ Jihova ọ be rọ kẹ idibo riẹ ẹgba nẹnẹ? (b) Fikieme isase gbe uwuhrẹ Ebaibol ekẹdẹ kẹdẹ i je wuzou tere re ma sai thihakọ unwe nọ o rrọ oma mai?

⁷ Nẹnẹ, Jihova ọ be kẹ Ileleikristi ẹrọwọ ogaga ẹkwoma ẹzi ọfuafo riẹ, Ẹme riẹ, gbe okugbe-inievo Ileleikristi na. Wọhọ Pọl ukọ na, ma rẹ sai gbolo uye mai kẹ Jihova evaọ olẹ. (Olezi 55:22) Dede nọ Ọghẹnẹ ọ te nwani si edawọ mai no ho, ọ sae k’omai areghẹ nọ ma re ro thihakọ rai, makọ enọ e ga thesiwa dede. Jihova ọ sae jẹ k’omai ẹgba—k’omai “ogaga ulogbo nọ othesiwa”—nọ u re fiobọhọ k’omai thihakọ.—2 Ahwo Kọrint 4:7.

⁸ Ẹvẹ ma sai ro wo obufihọ utioye na? Ma re wuhrẹ Ẹme Ọghẹnẹ ziezi, keme etẹ ma jẹ ruẹ ọbọga riẹ. (Olezi 94:19) Evaọ Ebaibol na, ma re se ku eme urirẹ idibo Ọghẹnẹ nọ a jẹ rọ lẹ kẹ obufihọ riẹ. Uyo Jihova, onọ eme omosasọ i re lele ẹsikpobi, yọ eme nọ ma re roro kpahe. Uwuhrẹ o te k’omai ẹgba re “ogaga ulogbo nọ othesiwa . . . [o jọ] orọ Ọghẹnẹ, orọnikọ obọ mai u  nọ ze he.” Wọhọ epanọ u fo re ma re emu kẹdẹ kẹdẹ kẹ omokpokpọ gbe ẹgba na, ere u fo nọ ma rẹ rọ eme Ọghẹnẹ kuo oma ẹsikpobi. Kọ ma bi ru onana? Ma te ru ere, ma te ruẹ nọ ewo “ogaga ulogbo nọ othesiwa” u ti fiobọhọ k’omai thihakọ inwe kpobi nọ e rẹ sae lahiẹ omai enẹna.

9. Ẹvẹ ekpako a sai ro fiobọhọ kẹ enọ i bi thihakọ ebẹbẹ?

⁹ Ekpako Ileleikristi nọ e be dhozọ Ọghẹnẹ a sae “jọ wọhọ oria nọ u sioma no ofou” uye, “oria nọ [u dhere] no ẹkporo” ebẹbẹ. Ekpako nọ e gwọlọ fo kẹ udhesẹ oyena nọ a rọ ẹgba ẹzi kere na a rẹ rọ omarokpotọ gbe oruọzewọ yare Jihova re ọ kẹ ae “ẹrọwo-unu otu nọ a wuhrẹ” re a riẹ epanọ a rẹ rọ eme nọ i fo rọ kẹ enọ e be ruẹ-uye uyo. Eme ọ ekpako na e sae jọ wọhọ oso nọ o bi yoyo nọ ọ rẹ lẹliẹ oma dhẹẹ jẹ sasa izi mai oma evaọ oke ebẹbẹ evaọ uzuazọ. Nọ a tẹ be “ta udu họ enọ udu u re bro awọ,” yọ ekpako a bi ghine fiobọhọ kẹ inievo abọ-ẹzi rai nọ oma o be lọhọ no fiki inwe jọ evaọ oma na.—Aizaya 32:2; 50:4; 1 Ahwo Tẹsalonika 5:14.

10, 11. Ẹvẹ idibo Ọghẹnẹ a sae rọ tuduhọ amọfa nọ uye o be bẹ gaga awọ?

¹⁰ Idibo Jihova kpobi a rrọ abọ uviuwou okugbe Ileleikristi riẹ. Ẹhẹ, “mai oma ovo na,” yọ “ufore mai ohwo o you ohwo.” (Ahwo Rom 12:5; 1 Jọn 4:11) Ẹvẹ ma re ro ru owha-iruo nana gba? Wọhọ epanọ 1 Pita 3:8 o dhesẹ, ma re ru ere ẹkwoma ‘ẹwo odhesẹ kẹ ohwohwo, you inievo na je wo ohrọ’ kẹ enọ ma gbẹ rrọ ẹgba ẹrọwọ na kpobi. Rọ kẹ enọ i bi thihakọ unwe odada jọ evaọ oma, make emaha hayo ekpako a rrọ, mai kpobi ma rẹ sai dhesẹ ororokẹ obọdẹ kẹ ae. Evaọ oghẹrẹ vẹ?

¹¹ Ma rẹ daoma wo ọdawẹ kpahe uye-oruẹ rai. Ma tẹ kare ohrọ, rrọ kpikpimẹ, ma sae rọ oghẹrẹ jọ ru uye-oruẹ rai ga viere. Fikinọ ma riẹ kpahe edawọ rai no, oma o rẹ wọ omai re ma yọroma kpahe oghẹrẹ ẹme nọ ma rẹ ta, epanọ ma rẹ rọ tae, gbe uruemu mai. Uruemu irẹro ewoma gbe uduotahawọ mai o sai fiobọhọ kpe edada jọ nọ unwe na o be wha se ai na. Ma vẹ rọ ere jọ obufihọ ọbọga kẹ ae.—Ahwo Kọlọsi 4:11.

Epanọ Ejọ I Ro Thihakọ no Ziezi

12-14. (a) Eme Oleleikristi jọ o ru ro thihakọ ẹyao ọta? (b) Ẹvẹ inievo abọ-ẹzi oniọvo na a ro fiobọhọ jẹ bọe ga?

¹² Nọ ma be kẹle ekuhọ edẹ urere na,  “uye” u bi vihọ kẹdẹ kẹdẹ. (Matiu 24:8) Fikiere, o wọhọ nọ edawọ i ti te ahwo kpobi evaọ otọakpọ oma, maero kọ idibo ẹrọwọ Jihova, enọ e be gwọlọ ru oreva riẹ. Wọhọ oriruo, roro Oleleikristi jọ nọ ọ jọ iruo odibọgba oke-kpobi na. A kiẹe oma riwi a tẹ ruẹ nọ o wo ẹyao ọta, a te bru oria nọ eya i re no ze no. Nọ ọye avọ ọzae riẹ a riẹ nọ o wo ẹyao nana, a tẹ lẹ se Jihova oke krẹkri. Ọ tẹ ta uwhremu na nọ uvi udhedhẹ o ro rae oma. Ghele na, o thihakọ oghoghẹrẹ ebẹbẹ buobu, maero kọ ebẹbẹ nọ usiwo riẹ na o wha ze.

¹³ Re ọ sai yeri kugbe ẹbẹbẹ riẹ na, oniọvo nana ọ daoma wuhrẹ eware buobu kpahe ẹyao ọta. Ọ jẹ hae nyabru edọkita riẹ. Evaọ Uwou-Eroro Na, Awake!, gbe ebe Ileleikristi efa, o se iku epanọ ahwo jọ a ro thihakọ ẹyao ọnana no. O te je se eria Ebaibol nọ i dhesẹ ẹgba Jihova nọ ọ rẹ rọ thọ ahwo riẹ evaọ oke idabolo, gbe evuẹ obufihọ itieye efa.

¹⁴ Uzoẹme jọ nọ o ta kpahe akothiho ọkora o wariẹ eme areghẹ nana: “Ọnọ ọ hẹriẹ oma ọ gwọlọ nọ ọye ọvo ọ rẹ jo.” (Itẹ 18:1) Fikiere uzoẹme na o tẹ kẹ ohrẹ nana: “Whọ kuoma dhere no ahwo ho.” * Oniọvo na ọ ta nọ: “Ibuobu e jẹ ta k’omẹ nọ a bi fi omẹ họ olẹ; efa i re fonu mẹ. Ekpako ivẹ e jẹ hai weze bru omẹ ze ẹsikpobi. Ahwo a jẹ hai vi ekẹ gbe ekade uyere s’omẹ. Ejọ i je tube there emu k’omẹ. Ofariẹ, ibuobu e fialoma nọ a rẹ wọ omẹ kpohọ ẹsipito.”

15-17. (a) Ẹvẹ Oleleikristi jọ o ro thihakọ ebẹbẹ nọ i no asidẹnte ze? (b) Didi obọ ahwo ukoko na a fihọ?

¹⁵ Odibo Jihova jọ nọ ọ gọ kri gaga no evaọ New Mexico, U.S.A. o wo asidẹnte omoto isiava. Ọ nwoma evaọ uriohọ gbe ikoko, onọ u ru ọnyokpa-enwa nọ o bi thihakọ riẹ bu vi ikpe 25 no ga viere. Ọ ta nọ: “O jọ bẹbẹ re mẹ kpare uzou mẹ kpọvi jẹ tubẹ wọ oware nọ o gbẹdẹ vi uwhere dede. Rekọ uvi olẹ se Jihova u fiobọhọ k’omẹ gaga no. Yọ izoẹme Uwou-Eroro Na nọ ma wuhrẹ no i fiobọhọ k’omẹ no re. Ọjọ ọ ta kpahe Maeka 6:8, nọ o ta nọ re a rọ owowa nya kugbe Ọghẹnẹ u dhesẹ ẹriẹ ọnyaba ohwo. Onana u fiobọhọ k’omẹ vuhumu nnọ ghelọ uyero mẹ, udu u re n’omẹ awọ họ, dede nọ oke nọ mẹ be jọ odibọgba na raha u kpotọ gaga vi epanọ mẹ hae gwọlọ. Re a rọ eva efuafo gọe họ oware nọ u muẹme.”

¹⁶ Ọ tẹ jẹ niyẹrẹ nọ: “Ekpako na a je jiri omẹ ẹsikpobi kẹ omodawọ mẹ nọ me bi ro kpohọ iwuhrẹ je kpohọ iruo odibọgba na. Emoha na a rẹ gbalọ omẹ. Egbodibo ekobaro na i dhesẹ odiri k’omẹ gaga, yọ okenọ oma o ga omẹ tehe, a ve nwene omaa iruo rai. Okenọ ovao ehru na u woma ha, a vẹ rọ ẹwo zizie omẹ kpohọ izihebro hayo a ve ru re mẹ keria evaọ okenọ a te bi ru iwuhrẹ Ebaibol. Yọ nọ mẹ rẹ sae wọ ẹkpa ebe he na, iwhowho-uvie edekọ a re fi ebe mẹ họ ẹkpa rai okenọ ma tẹ rrọ usiuwoma.”

¹⁷ Muẹrohọ epanọ ekpako ukoko gbe ibe enọ e rọwo i ro fiobọhọ kẹ inievo-emetẹ ivẹ nana thihakọ ẹyao rai nọ ọ wọhọ inwe na. A kẹ rae obufihọ nọ o rẹ nyate ugogo ẹgwọlọ abọ-ẹzi, ugboma gbe ọrọ iroro. Kọ oyena o gbẹ tuduhọ owhẹ awọ re who fiobọhọ kẹ inievo nọ e rrọ ẹbẹbẹ? Whai emaha na re, wha sae jọ obufihọ kẹ ahwo ukoko rai enọ i bi lele inwe evaọ oma rai muabọ.—Itẹ 20:29.

18. Didi uduotahawọ ma rẹ sai wo no ikuigbe aruakpọ nọ a kporo fihọ emagazini Uwou-Eroro gbe Awake! na ze?

¹⁸ Emagazini Uwou-Eroro gbe Awake! na  e ta kpahe ikuigbe aruakpọ gbe iriruo buobu no erọ Isẹri nọ i thihakọ, je gbe bi thihakọ ebẹbẹ uzuazọ. Nọ who bi se izoeme itieye na ẹsikpobi na, whọ te ruẹ nọ inievo abọ-ẹzi ra buobu evaọ akpọ na soso a thihakọ ọbẹwẹ uvuhu no, uwhu enọ a you evaọ oke ọraha, jegbe iyero imuozọ etoke ẹmo. Efa i wo eyao nọ i kru rai fihọ otọ. Ibuobu e rẹ sai ru eware esese uzuazọ nọ ibuobu nọ oma rai o ga a bi rri vo na ha. Eyao nana e rrọ odawọ kẹ ae, maero otẹrọnọ a be sai w’obọ evaọ iruẹru Ileleikristi wọhọ epanọ a hae gwọlọ họ. Dai roro epanọ a wo ovuhumuo te kẹ obufihọ nọ inievo rai, t’emaha t’ekpako, a be kẹ ae!

Ithihakọ E Rẹ Wha Evawere Ze

19. Fikieme Pọl ọ sae rọ ghọghọ ghelọ edawọ gbe ewhrehe nọ e wọhọ inwe?

¹⁹ Pọl ọ ghọghọ nọ ọ ruẹ epanọ Ọghẹnẹ ọ rọ kẹe ẹgba. Ọ ta nọ: “Mẹ rẹ dhigbẹ yoma okuako mẹ viere, re ogaga Kristi o jọ omẹ oma. Koyejabọ, mẹ jẹ rẹ ghọghọ fiki Kristi eva okuako mẹ, ẹpoviẹ, ẹbẹbẹ, ukpokpoma, jegbe eware-[ọzadhe]; keme nọ omẹ rẹ kuako, kpakiyọ ẹsiẹe mẹ gae.” (2 Ahwo Kọrint 12:9, 10) Fiki eware nọ ọ rọ ẹro ruẹ, Pọl ọ jẹ sae gbaudu ta nọ: “Orọnikọ mẹ be nekpẹ eware nọ ekare omẹ hẹ; keme me wuhrẹ nọ eva oghẹrẹ kpobi nọ mẹ rọ o rẹ domẹro. Mẹ riẹ epanọ a rẹ rọ omakpotọ, mẹ tẹ jẹ riẹ epanọ a rẹ rua, mẹ jọ evaọ koware koware gbe eghẹrẹ kpobi wuhrẹ edidi epanọ a rẹ rọ ovao wha ọruẹriọ hayo ọbẹwẹ, eva ẹvi hayo ẹsenọ okare, mẹ rẹ sai ru eware kpobi eva ọnọ ọbe kẹ omẹ eri.”—Ahwo Filipai 4:11-13.

20, 21. (a) Fikieme ma jẹ ruẹ oghọghọ evaọ eroro kpahe “eware nọ a rẹ ruẹ hẹ”? (b) Eme họ “eware nọ a rẹ ruẹ hẹ” na jọ nọ who rẹro nọ whọ te jọ Aparadase otọakpọ na ruẹ?

²⁰ Fikiere, ẹkwoma akothiho unwe nọ o rrọ oma mai kpobi, ma rẹ sae ruẹ evawere ilogbo evaọ edhesẹ kẹ ahwo kpobi inọ a bi ru ogaga Jihova gbunu evaọ ewhrehe mai. Pọl o kere nọ: “Oma o gbẹ rọ omai hi . . . Izi mai e be kpokpọ [kẹdẹ] kẹdẹ. Keme umuye nọ u bi te omai, nọ orọ omoke krẹ, u bi ru omai gahọ wo oruaro nọ ojaetaha; ma bi riwẹ eware nọ a rẹ ruẹ hẹ . . . keme eware nọ a . . . rẹ ruẹ hẹ na e rẹ jọ bẹdẹ.”—2 Ahwo Kọrint 4:16-18.

²¹ Ahwo Jihova buobu nẹnẹ a rẹro nọ a te rria Aparadase otọakpọ riẹ jẹ reawere eghale nọ ọ yeyaa rai. Nẹnẹ na eghale eyena yọ eware nọ “a rẹ ruẹ hẹ” rọ k’omai. Ghele na, oke o be tha vẹrẹ vẹrẹ nọ ma te rọ rehọ ibiaro mai ruẹ eghale eyena, ẹhẹ, jẹ reawere rai bẹdẹ bẹdẹ. Oghale utioye na jọ họ ufuoma nọ ma te gbẹ rọ rria kugbe ẹbẹbẹ ọvuọvo nọ ọ wọhọ unwe he! Ọmọ Ọghẹnẹ ọ “te raha iruo ukumuomu na” no jẹ “raha ọ nọ o wo ogaga uwhu” na no.—1 Jọn 3:8; Ahwo Hibru 2:14.

22. Didi evaifihọ gbe ọtamuo ma re wo?

²² Fikiere, makọ oghẹrẹ unwe kpobi nọ o rrọ oma mai be d’omai nẹnẹ, joma gbe thihakọ riẹ. Wọhọ Pọl, ma ti wo ogaga nọ ma re ro ru ere fiki Jihova, ọnọ ọ be k’omai ogaga n’obọ ze na. Okenọ ma tẹ rria Aparadase otọakpọ na, ma ti jiri Jihova Ọghẹnẹ mai kẹdẹ kẹdẹ fiki iruo igbunu riẹ kpobi nọ o ru k’omai.—Olezi 103:2.

[Oruvẹ-obotọ]

Ẹvẹ Whọ te k’Uyo?

• Fikieme gbe ẹvẹ Ẹdhọ ọ be rọ daoma raha ẹgbakiete Ileleikristi uzẹme?

• Ẹvẹ a re ro ru ogaga Jihova ‘gbunu evaọ okuako’?

• Ẹvẹ ekpako gbe amọfa a sae rọ tuduhọ enọ i wo edada ẹbẹbẹ?

[Enọ Uwuhrẹ]

[Uwoho nọ o rrọ ẹwẹ-obe avọ 8]

Isiasa Pọl ọ lẹ inọ Ọghẹnẹ o si unwe nọ o rrọ oma riẹ na no