Enọ Ahwo nọ A s’Ebe

Ẹvẹ aye Oleleikristi ọ sae rọ roma kpotọ kẹ Ọghẹnẹ yọ o bi yoẹme kẹ ọzae riẹ nọ ọ rọwo ho otẹrọnọ ọzae na o bi ru ehaa egagọ?

Ere oruo o rẹ gwọlọ areghẹ gbe ona. Rekọ oware ezi o bi ru nọ ọ be rọ daoma jọ owowa evaọ eria ivẹ na. Jesu ọ kẹ ohrẹ kpahe ọkpọ ẹme otiọye na: “Wha rehọ eware Siza kẹ Siza, re wha rehọ eware Ọghẹnẹ kẹ Ọghẹnẹ.” (Matiu 22:21) Uzẹme, ọ jẹ ta kpahe owha-iruo kẹ egọmeti, onọ a ta kẹ Ileleikristi uwhremu na nọ a rẹ roma kpotọ kẹ. (Ahwo Rom 13:1) Ghele na, ohrẹ riẹ u re w’iruo evaọ owowa nọ aye ọ rẹ jọ evaọ owha-iruo riẹ kẹ Ọghẹnẹ avọ omarokpotọ Ikereakere riẹ kẹ ọzae riẹ, ọ gbẹ make rọwo ho.

Ohwo kpobi nọ ọ riẹ Ebaibol na ọ rẹ vro ho inọ Ebaibol na o fiẹgba họ iẹe nnọ owha-iruo ọsosuọ Oleleikristi họ re o yoẹme kẹ Ọghẹnẹ Erumeru na, re ọ roma kpotọ kẹe ẹsikpobi. (Iruẹru 5:29) Ghele na, evaọ iyero buobu uvi ọgegagọ ọ rẹ sai kie kẹ ẹgwọlọ ohwo nọ ọ rọwo ho nọ ọ rrọ ọkwa ababọ ẹraha izi ikpehru Ọghẹnẹ.

Ma jọ oma emọ Hibru esa na ruẹ uvi oriruo, wọhọ epanọ a gbiku riẹ fihọ Daniẹl uzou avọ 3 na. Ọnọ o wuzou egọmeti rai, Nebukadneza, o j’uzi nnọ te ai te amọfa nọ a jọ etẹe a kpohọ ukiekpotọ Dura. Nọ a riẹ nọ egagọ erue e te jariẹ na, emọ Hibru esa na a hae jiroro nọ a be nya ha. Ẹsejọhọ Daniẹl ọ sai ku uzou no, rekọ onana o lọhọ kẹ imasa enana ha. * Fikiere a yoẹme kẹ use na, rekọ a ti w’obọ evaọ oware uyoma ovuovo  ho—yọ ere a ghine ru.—Daniẹl 3:1-18.

Epọvo na re, evaọ etoke ezi ehaa ọzae nọ ọ rọwo ho ọ sae ta kẹ aye Oleleikristi riẹ re o ru oware nọ aye na ọ hae gwọlọ whaha. Roro iriruo jọ: Ọ ta kẹ aye na nọ o there oghẹrẹ emu jọ evaọ ẹdẹ nọ tei te amọfa a ti ru ehaa jọ. Hayo ọ sae gwọlọ nọ uviuwou na (kugbe aye riẹ) a weze bru imoni riẹ evaọ ẹdẹ ọyena kẹ emuore hayo inọ a faki weze nya ọvo. Hayo taure ẹdẹ ehaa na o te ti te dede, ọ sae ta nọ okenọ aye na o te kpohọ eki, ọ dẹ eware jọ sei—oghẹrẹ emu jọ nọ a re ro ru ehaa na, eware nọ a rẹ rọ kẹ amọfa ekẹ, hayo ebe nọ a rẹ rọ ko ekẹ gbe ekade nọ o re kugbe ekẹ riẹ.

Ma be wariẹ ta nọ aye Oleleikristi ọ rẹ gbaemu inọ o re w’obọ evaọ iruẹru egagọ erue he, rekọ ẹvẹ kpahe ayare otiọye na? Ọzae na o wuzou uviuwou na, yọ Ẹme Ọghẹnẹ ọ ta nọ: “Whai eyae na, wha rọ oma kpotọ kẹ ezae rai, keme oye họ onọ u kiehọ eva aro Ọnowo na.” (Ahwo Kọlọsi 3:18) O tẹ via enẹ, kọ ọ sai dhesẹ omarokpotọ aye jẹ jọ evaọ oke ovona roma kpotọ kẹ Ọghẹnẹ? Ọ rẹ jiroro epanọ o re ro yoẹme kẹ ọzae riẹ ghele na yọ ọ be rọ ẹmeoyo kẹ Jihova karo.

Oke ofa o sae jariẹ nọ ọzae riẹ ọ rẹ ta kẹe re o there oghẹrẹ emu jọ evaọ ezi ehaa, ẹsejọhọ fikinọ emu nana ọ rẹ mae were iẹe hayo fikinọ emu ọyena ọ rẹ re evaọ uzedhe ezi ọyena. Ọ rẹ gwọlọ dhesẹ uyoyou kẹe je dhesẹ nọ o vuhu uzou-uwo riẹ mu. Kọ aye na ọ sai ru ere o tẹ make rrọ nọ evaọ oke ehaa ọ rọ yare emu na? Eyae Ileleikristi jọ e sai ru ere avọ emamọ iroro-oziẹbro, rri rie gheghe wọhọ iruo emu nọ a re there kẹdẹ kẹdẹ. Evaọ uzẹme, uvumọ Oleleikristi omarokpotọ o re rri ehaa jọ kugbe emu na ha o tẹ make rrọ nọ ọzae riẹ o rri rie ere. Epọvo na, ọ sae ta kẹe re ọ jọ kugbei okenọ o bi weze bru imoni riẹ evaọ oke sa-sa evaọ k’amara k’amara hayo k’ukpe k’ukpe. Kọ ọ sai ru ere o tẹ make rrọ oke ehaa? Hayo kọ ọ sae dẹ eware nọ ọzae na ọ gwọlọ sei epaọ anwẹdẹ, ababọ ẹkiẹ oware nọ ọzae na ọ gwọlọ rọ eware nọ ọ dẹ kẹe na ru evaọ okenọ o te kp’eki?

Dede na, aye Oleleikristi o re roro kpahe amọfa—epanọ u re kpomahọ ae. (Ahwo Filipai 2:4) Ọ rẹ daoma whaha edhesẹ nnọ o w’obọ kpahe ehaa na, epanọ o wọhọ nọ emọ Hibru esa na a jẹ gwọlọ dina ko oma rai dhere no amọfa nọ a je kpohọ ukiekpotọ Dura na. Fikiere ọ sae rọ areghẹ daoma jiroro kugbe ọzae riẹ re ọ ruẹ sọ, evaọ ọdawẹ kẹ iroro riẹ, ọzae na ọvo ọ sae gwọlọ ru eware ehaa jọ kẹ oma riẹ ro dhesẹ ororokẹ kẹ aye riẹ nọ o you rie jẹ be kẹe adhẹẹ. Ẹsejọhọ ọzae na ọ sae ruẹ areghẹ nọ ọ riẹ re ọ whaha uyero nọ o rẹ sae wha ẹwhọ ze ariẹsehe aye na ọ se nnọ o re w’obọ evaọ iruẹru egagọ erue. Ẹhẹ, udu nọ a re ro kpotọ ta ẹme na evaọ ẹruoke o sae wha udhedhẹ ze.—Itẹ 22:3.

Ekuhọ riẹ họ, Oleleikristi ẹrọwọ ọ rẹ wawo ẹme na ọ vẹ jiroro oware nọ o re ru. Ẹmeoyo kẹ Ọghẹnẹ ọ rẹ karo, wọhọ epanọ o jọ kẹ emọ Hibru esa na. (1 Ahwo Kọrint 10:31) Rekọ avọ iroro yena, Oleleikristi kpobi ọ rẹ jiroro oware nọ o rẹ raha uzi hi nọ ọ rẹ sai ru otẹrọnọ ohwo nọ ọ rrọ ọkwa evaọ uviuwou hayo ẹwho ọ yare oware jọ.

[Oruvẹ-obotọ]