Ete Ziezi Wọhọ Iwuhrẹ Ẹme Ọghẹnẹ
Ete Ziezi Wọhọ Iwuhrẹ Ẹme Ọghẹnẹ
“Ọghẹnẹ . . . [o ru] omai te kẹ iruiruo.”—2 AHWO KỌRINT 3:5, 6.
1, 2. Didi omodawọ usiuwoma ota a bi ru ẹsejọ, rekọ fikieme i re ro kie?
ẸVẸ o rẹ j’owhẹ oma otẹrọnọ a k’owhẹ iruo nọ who te kẹ hẹ? Dai roro iei: Ekwakwa nọ whọ gwọlọ e rrọ owhẹ aro. Rekọ whọ riẹ obọ gb’owọ iruo na ha. Tubẹ mai yoma na, a gwọlọ iruo nana kpatakpata. Ahwo a rẹroso owhẹ. Ẹvẹ uzou u re dh’owhẹ te!
2 Ẹbẹbẹ otiọye na ọ rrọ oware osia gheghe he. Roro kpahe oriruo jọ. Ẹsejọ, ichọche Kristẹndọm jọ e daoma no re a koko ahwo họ re a ru iruo odibọgba n’uwou ruọ uwou. Omodawọ itieye na i kie no, oware wọhọ eka hayo emerae jọ ọvo i ve fu no. Fikieme? Kristẹndọm o ri fiobọhọ kẹ ahwo rai re a te kẹ iruo na ha. Makọ isu-egagọ na dede a te kẹ iruo usiuwoma ota na ha, ghelọ ikpe buobu nọ a raha evaọ isukulu akpọ gbe erọ egagọ. Fikieme ma sae rọ ta ere?
3. Eva 2 Ahwo Kọrint 3:5, 6, ibieme vẹ a rọ t’ẹme, kọ eme i dhesẹ?
3 Ẹme Ọghẹnẹ o dhesẹ oware nọ u re ru uvi ọtausiuwoma emamọ usi Ileleikristi na te. A kẹ Pọl ukọ na ẹgba kere nọ: “Orọnikọ oma obọ mai ute nọ oma re ro mi oware ọvo rehọ họ; ete mai obọ Ọghẹnẹ o nọze; ọnọ oru omai te kẹ iruiruo.” (2 Ahwo Kọrint 3:5, 6) Muẹrohọ eme nọ a jọ etenẹ fodẹ na—“ute,” “ete,” “te.” Eme i dhesẹ? Vine’s Expository Dictionary of Biblical Words o ta nọ: “A tẹ tae kpahe eware [ubiẹme Griki ọsosuọ na] u re dhesẹ ‘ebute‘ . . . ; a tẹ tae kpahe ahwo, u re dhesẹ ‘ewo ẹgba oware uruo,’ ‘ọnọ o fo kẹ.’ ” Fikiere, a tẹ ta nọ ohwo o “te” yọ o wo ẹgba je fo kẹ eruo iruo jọ. Ẹhẹ, uvi egbodibo emamọ usi na a te re a ru iruo nana. A wo ẹgba, fo, hayo te re a ta usiuwoma na.
4. (a) Ẹvẹ oriruo Pọl o ro dhesẹ nọ ete kẹ odibọgba Ileleikristi na o rrọ rọkẹ umutho ahwo jọ nọ e riobe ọvo ho? (b) Idhere esa vẹ Jihova o bi ro ru omai te wọhọ egbodibo?
4 Rekọ diẹse ete yena o re no ze? Kọ rono ona omobọ ohwo ze? No eriariẹ ohwo ze? No isukulu ikpehru jọ ze? O wọhọ nọ Pọl ukọ na o wo eware eyena kpobi. (Iruẹru 22:3; Ahwo Filipai 3:4, 5) Ghele na, ọ rehọ omarokpotọ rọwo nnọ ete riẹ wọhọ ọgbodibo o no obọ Jihova Ọghẹnẹ ze, orọnikọ isukulu ikpehru hu. Kọ ete otiọye na ọ rrọ kẹ umutho ahwo jọ nọ e riobe ọvo? Pọl o kere se ukoko ahwo Kọrint na kpahe “ete mai.” (Ẹjẹlẹ ibiẹme na ọmai.) Oyena u ghine dhesẹ nọ Jihova ọ rẹ daoma re ọ ruẹ nọ idibo ẹrọwọ riẹ kpobi a te, re a sai ru iruo nọ ọ kẹ rai nọ a ru na. Ẹvẹ Jihova o re ro ru Ileleikristi uzẹme te nẹnẹ? Joma t’ẹme kpahe idhere esa nọ o bi ro ru onana: (1) Ẹme riẹ, (2) ẹzi ọfuafo riẹ, gbe (3) ukoko otọakpọ riẹ.
Ẹme Jihova O re Ru Omai Te
5, 6. Didi okpomahọ Ikereakere Efuafo na i wo evaọ oma Ileleikristi uzẹme?
5 Orọ ọsosuọ, ẹvẹ Ẹme Ọghẹnẹ o bi ro fiobọhọ ru omai te wọhọ egbodibo? Pọl o kere nọ: “Ọghẹnẹ o gie ẹwolo ku ikereakere na kpobi, re e jọ erere rọ kẹ ewuhrẹ gbe ozọ-usio, avọ ọkpọvio gbe odhesẹkẹ eva ẹrẹreokie. Re ohwo Ọghẹnẹ na ọ ruẹse gba kiete, ọ vẹ jẹ thomavẹre kẹ iruo iwoma i ruo kpobi.” (2 Timoti 3:16, 17) Fikiere Ikereakere Efuafo na i re fiobọhọ ru omai “gba kiete, . . . jẹ thomavẹre” re ma wha “iruo iwoma” erọ ahwo owuhrẹ kpahe Ẹme Ọghẹnẹ na haro. Rekọ ẹvẹ kpahe enọ i bi kpohọ ichọche Kristẹndọm na kpobi? A wo Ebaibol na. Ẹvẹ obe ovona o sai ro fiobọhọ kẹ ahwo jọ zihe ro egbodibo nọ i te nọ u gbe ro fiobọhọ kẹ amọfa ha? Ẹme na họ uruemu mai kpahe Ebaibol na.
6 Uyoma gaga, ibuobu nọ i bi kpohọ ichọche a be jẹ ovuẹ Ebaibol na rehọ họ “wọhọ epanọ o ghinẹ rọ, ẹme Ọghẹnẹ.” (1 Ahwo Tẹsalonika 2:13) Kristẹndọm o wo odẹ omovuọ no evaọ abọ nana. Nọ a raha ikpe buobu ro wuhrẹ evaọ isukulu egagọ no, kọ isu-egagọ na a te ziezi no wọhọ iwuhrẹ Ẹme Ọghẹnẹ? Vievie. Whaọ, emọ-iwuhrẹ rai jọ a re muọ isukulu egagọ na họ wọhọ enọ e rọwo Ebaibol na, a ve nwrotọ wọhọ egbavro! Kẹsena, ukpenọ a rẹ ta usiuwoma Ẹme Ọghẹnẹ—onọ ibuobu rai a gbẹ rọwo ho na—a vẹ kpọ odibọgba rai kpohọ ofẹ ofa, duomahọ esuo-ohrowo, ta usiuwoma ọriakugbe, hayo fiẹgba họ eriariẹ-ikpehru ahwo evaọ usiuwoma rai. (2 Timoti 4:3) Wo ohẹriẹ, uvi Ileleikristi a re lele oriruo Jesu Kristi.
7, 8. Ẹvẹ uruemu Jesu kpahe Ẹme Ọghẹnẹ u ro wo ohẹriẹ no orọ isu egagọ edẹ riẹ?
7 Jesu ọ kuvẹ hẹ re isu egagọ edẹ riẹ a kpọ iroro riẹ. Makọ o bi wuhrẹ umutho ahwo, wọhọ ikọ riẹ, hayo ogbotu, Jesu ọ rehọ ikere efuafo na ruiruo ziezi. (Matiu 13:10-17; 15:1-11) Uruemu nana o hẹriẹ e riẹ no isu egagọ edẹ riẹ. A whaha iruori na oma re a kiẹ eware ididi Ọghẹnẹ. Evaọ uzẹme, o jọ uruemu iwuhrẹ edẹ eyena re a ta nọ eria jọ Ebaibol na i kodo gaga vrẹ epanọ a rẹ rọ rehọ ae t’ẹme kẹ ọmọ-uwuhrẹ kpobi ajokpa ọnọ ọ were riẹ—o tẹ make rrọ ere, ọ rẹ rọ urru kpotọ t’ẹme na avọ uzou riẹ nọ o ruru. Isu egagọ eyena a wo ogbẹrọwọ kpahe ẹta kpahe abọjọ Ebaibol na wọhọ epanọ a wo kpahe ese odẹ Ọghẹnẹ na!
8 Kristi ọ jọ ere he. Ọ rọwo nnọ orọnikọ umutho ahwo jọ ọvo ho rekọ u fo re ahwo kpobi a roro kpahe ‘kẹme kẹme nọ ọ via no unu Ọghẹnẹ ze.’ O jọ isiuru Jesu hu re ọ rehọ usiavẹ eriariẹ kẹ iwuhrẹ jọ nọ e riobe ọvo. Ọ ta kẹ ilele riẹ nọ: “Eme nọ mẹ ta kẹ owhai evaọ ebi, wha ta e evaọ evevẹ; eme nọ a sehọ owhai ozọ, wha jọ ehru ebọ woro iei.” (Matiu 4:4; 10:27) Jesu o wo isiuru re ọ ghale eriariẹ Ọghẹnẹ kugbe ahwo nọ ọ sae nyate oma kpobi.
9. Ẹvẹ Ileleikristi uzẹme e rẹ rọ Ebaibol na ruiruo?
9 Iwuhrẹ mai kpobi i re no Ẹme Ọghẹnẹ ze. Wọhọ oriruo, ma te bi ru ẹme evaọ Ọgwa Uvie ọrọ Isẹri Jihova, u te he re ma se awọ jọ no Ebaibol na ze ọvo. O sai fo re ma ru ikereakere jọ vẹ, kẹ oriruo jọ kpahe iẹe, je dhesẹ efihiruo riẹ lele eme nọ e wariẹ e riẹ họ. Ute mai họ re ma ru ovuẹ Ebaibol na vẹ evaọ idu enọ e be kezọ k’omai. (Nehemaya 8:8, 12) A rẹ jẹ rehọ Ebaibol na ruiruo evaọ okenọ o tẹ gwọlọ nọ a rẹ kẹ ohrẹ hayo kẹ ọwhọkuo nọ a rẹ rọ kpọ ohwo họ. Dede nọ ahwo Jihova a be jẹ evẹrẹ sa-sa yọ a no oghẹrẹ otohotọ-uyerakpọ sa-sa ze, aikpobi a wo adhẹẹ kẹ Obe nọ u vi ebe na—Ebaibol na.
10. Didi iruo ovuẹ Ọghẹnẹ nọ o rrọ Ebaibol na o rẹ sae jọ oma mai ru?
10 A tẹ rehọ iẹe ruiruo avọ adhẹẹ otiọye na, ovuẹ Ebaibol na u re wo ẹgba. (Ahwo Hibru 4:12) O rẹ wọ ahwo ru inwene evaọ izuazọ rai, ku ahwo rẹriẹ no iruemu iyoma rai wọhọ igberẹ-ibro, ẹdhọgọ, ọgba-idieda, gbe ujitho. U fiobọhọ kẹ ibuobu ba uruemu anwae na n’oma jẹ whẹ okpokpọ na h’oma no. (Ahwo Ẹfẹsọs 4:20-24) Ẹhẹ, ma tẹ rọ adhẹẹ kẹe vi iroro gbe uruemu anwae ohwo-akpọ jẹ rehọ iẹe ruiruo ziezi, Ebaibol na ọ sai fiobọhọ ru omai te, thomavẹre wọhọ iwuhrẹ Ẹme Ọghẹnẹ.
Ẹzi Jihova O re Ru Omai Te
11. Fikieme u je fo inọ a se ẹzi ọfuafo Jihova “ọthuke”?
11 Orọ avivẹ, joma t’ẹme kpahe ẹkẹ iruo ẹzi ọfuafo Jihova, hayo ogaga iruo riẹ, nọ o bi ro ru omai te ziezi. O rẹ thọrọ omai ẹro vievie he inọ ẹzi Jihova họ ẹgba nọ ọ mae ga kpobi. Jihova ọ kẹ Ọmọ oyoyou riẹ ẹgba no re ọ rehọ ẹgba ologbo ọyena fiobọhọ kẹ Ileleikristi uzẹme kpobi. Nwani fo, Jesu o se ẹzi ọfuafo na “ọthuke.” (Jọn 16:7) Ọ tuduhọ ilele riẹ awọ re a yare Jihova kẹ ẹzi na, kẹ ae imuẹro inọ Jihova ọ te rehọ iẹe kẹ ai n’obọ ze.—Luk 11:10-13; Jemis 1:17.
12, 13. (a) Fikieme u je wuzou inọ ma rẹ lẹ kẹ ẹzi ọfuafo re o fiobọhọ k’omai evaọ odibọgba mai? (b) Ẹvẹ otu Farisi na a ro dhesẹ nọ ẹzi ọfuafo na ọ rọ ae oma ruiruo ho?
12 U fo re ma lẹ kẹ ẹzi ọfuafo kẹdẹ kẹdẹ, maero re u fiobọhọ k’omai evaọ odibọgba mai. Ẹvẹ ogaga iruo oyena u re ro fiobọhọ k’omai? O rẹ sai dhobọte iroro gbe udu mai, fiobọhọ k’omai nwene, rro, jẹ rọ uruemu okpokpọ na nwene orọ anwae na. (Ahwo Kọlọsi 3:9, 10) O sai fiobọhọ k’omai wo ekwakwa eghaghae nọ e wọhọ erọ Kristi. Ibuobu mai a sai se Ahwo Galesha 5:22, 23 uzuzou. Awọ yena e fodẹ ibi ẹzi Ọghẹnẹ. Orọ ọsosuọ họ uyoyou. Okwakwa oyena u wuzou kẹ odibọgba mai. Fikieme?
13 Uyoyou yọ ọwhọ ologbo. Uyoyou kẹ Jihova gbe erivẹ o rẹ wọ Ileleikristi uzẹme ghale emamọ usi na. (Mak 12:28-31) Ababọ uyoyou utioye na, ma rẹ sai ghine te he wọhọ iwuhrẹ Ẹme Ọghẹnẹ. Muẹrohọ ohẹriẹ nọ o jọ udevie Jesu gbe otu Farisi na. Matiu 9:36 o ta kpahe Jesu nọ: “Rekọ nọ ọ ruẹ otu obuobu na, ohrọ rai o tẹ riẹ e, epanọ a rọ oyoya, a tẹ jẹ vaha wọhọ igodẹ nọ i wo othuru hu.” Didi ẹro otu Farisi na a je ro rri iwhrori na? A ta nọ: “Otu ọnana nọ e riẹ uzi ha na, a bọwo rai ehao.” (Jọn 7:49, ẹjẹlẹ ibieme na ọmai.) Otu Farisi eyena a wo uvumọ uyoyou kẹ ahwo na ha rekọ ọjẹfiẹ ọvo. O rrọ vevẹ inọ, ẹzi Jihova ọ rae oma ruiruo ho.
14. Ẹvẹ oriruo Jesu ọrọ edhesẹ uyoyou evaọ odibọgba riẹ o rẹ rọ k’omai ọwhọ?
14 Jesu o wo ọdawẹ kẹ ahwo. Ọ riẹ kpahe edada rai. Ọ riẹ nọ a lahiẹ e rai no, a tẹ jẹ rrọ oyoya, vaha abọ wọhọ igodẹ nọ i wo othuru hu. Jọn 2:25 o ta k’omai nọ Jesu “ọ riẹ epanọ o rọ evaọ ohwo.” Nọ ọ jọ Osu Iruo Jihova evaọ oke emama na, Jesu ọ riẹ epanọ ohwo ọ rrọ lafi. (Itẹ 8:30, 31) Otoriẹ oyena u ru uyoyou riẹ diwi viere. Ajọ uyoyou utioye na o jọ ọwhọ nọ o rẹ wọ omai evaọ iruo usiuwoma ota mai na! Ma te roro nọ ma sae nyaharo evaọ ofẹ nana, joma lẹ kẹ ẹzi ọfuafo Jihova, ma ve ruiruo lele elẹ mai. Jihova ọ te k’omai uyo. O ti vi ẹgba ologbo nana re o fiobọhọ k’omai jọ wọhọ Kristi viere, ọnọ o te ziezi re o whowho emamọ usi na.
15. Ẹvẹ eme nọ e rrọ Aizaya 61:1-3 i ro kie kpahe Jesu jẹ fere ikere-ebe gbe otu Farisi na via?
15 Diẹse ete Jesu o no ze? Ọ ta nọ: “Ẹzi Ọnowo na ọ rọ omẹ oma.” (Luk 4:17-21) Ẹhẹ, Jihova omariẹ ọ rehọ Jesu mu ẹkwoma ẹzi ọfuafo. Jesu ọ gwọlọ eromuo ọfa ha. Kọ ẹzi ọfuafo ọ rehọ isu egagọ edẹ riẹ na mu? Ijo. Yọ a te kẹ epanọ a re ro ru Aizaya 61:1-3 gba, onọ Jesu o se do via je dhesẹ nọ o jọ oma riẹ rugba. Iviena se awọ Ebaibol eyena kẹ oma ra re whọ ghinẹ ruẹ nọ ikere-ebe gbe otu Farisi eviẹwẹ na a te he. A wo emamọ usi nọ a re whowho kẹ iwhrori na ha. Kọ ẹvẹ a sae rọ ta usiuwoma obufihọ kẹ enọ e rrọ igbo gbe ude-oruẹ kẹ enọ i tuaro? Evaọ abọ-ẹzi, ae omarai a tuaro jẹ rọ igbo kẹ iruemu anwae ahwo! Wo ohẹriẹ no ahwo yena, kọ ma te re ma wuhrẹ ahwo?
16. Didi udu ahwo Jihova inẹnẹ a re wo kpahe ete rai wọhọ egbodibo?
16 Uzẹme, ma kpohọ isukulu ikpehru Kristẹndọm ho. A rehọ omai mu wọhọ iwuhrẹ isukulu egagọ họ. Kọ a sae ta nọ ma te he? Vievie! Eromuo mai wọhọ Isẹri riẹ o no obọ Jihova ze. (Aizaya 43:10-12) Ma tẹ lẹ kẹ ẹzi riẹ je bi ruiruo lele elẹ mai, u re ru omai te kiọkọ dede. Uzẹme o rrọ inọ ma gba ha yọ ma sai lele oriruo nọ Owuhrẹ Ologbo na, Jesu, o fihọ gbagba ha. Ghele na, kọ ma gbẹ kẹ uyere inọ Jihova ọ rehọ ẹzi riẹ ru omai te no wọhọ iwuhrẹ Ẹme riẹ?
Ukoko Jihova U re Ru Omai Te
17-19. Ẹvẹ iwuhrẹ ẹkpoka isoi nọ ukoko Jihova o ruẹrẹ họ na i bi ro fiobọhọ ru omai te wọhọ egbodibo?
17 Whaọ joma t’ẹme kpahe oware avesa nọ Jihova o re ro ru omai te wọhọ iwuhrẹ Ẹme riẹ—ukoko otọakpọ riẹ nọ u bi wuhrẹ omai re ma jọ egbodibo. Oghẹrẹ vẹ? Dai roro kpahe omaa uwuhrẹ nọ ma be reawere riẹ! Evaọ oka ovo, ma re kpohọ iwuhrẹ Ileleikristi isoi. (Ahwo Hibru 10:24, 25) Ma re kokohọ evaọ ẹkuẹko eva Uwuhrẹ Obe Ukoko re ma reawere uwuhrẹ udidi Ebaibol ẹkwoma obe nọ ukoko Jihova u kporo. Ẹkwoma ezọgaviẹ gbe ẹme-ọkpahe, ma re wuhrẹ mi jẹ tuduhọ ohwohwo awọ. Ọsẹro obe-ukoko na o re je fiobọhọ k’omai. Eva Ewuhrẹ Ovuẹ Ogbotu gbe Uwuhrẹ Uwou-Eroro na, ma rẹ jẹ re emu abọ-ẹzi ọfa.
18 A ruẹrẹ Isukulu Odibọgba Esuo-Ọghẹnẹ mai na họ re o k’omai uwuhrẹ kpahe epanọ ma re ro wuhrẹ amọfa. Ẹkwoma oma oruẹrẹhọ kẹ eme ọmọ-uwuhrẹ, ma re wuhrẹ epanọ ma rẹ rọ rehọ Ẹme Ọghẹnẹ wuhrẹ izoeme sa-sa. (1 Pita 3:15) Kọ a k’owhẹ ẹme no ẹdẹjọ re whọ ta kpahe uzoẹme jọ nọ whọ riẹ gaga, whọ tẹ ruẹ nọ who wuhrẹ oware okpokpọ jọ kpahe iẹe? Oyena o rẹ via ẹsikpobi. Eriariẹ mai i re diwi viere otẹrọnọ ma rehọ e riẹ wuhrẹ amọfa. A gbẹ make k’omai ẹme he, ma rẹ sai gbe wuhrẹ re ma jọ emamọ iwuhrẹ. Evaọ oma ọmọ-uwuhrẹ kpobi, ma rẹ ruẹ ekwakwa iwoma, yọ ma sai roro epanọ ma rẹ rọ raro kele ekwakwa eyena.
19 A ruẹrẹ Ewuhrẹ Odibọgba na omariẹ họ re o thọ omai vẹrẹ wọhọ iwuhrẹ Ẹme Ọghẹnẹ. Oka kpobi, ma rẹ reawere eme ejaja, evuẹ, gbe idhesẹvia enọ a rẹ kpọ riwi odibọgba mai. Edhere ẹmeọta vẹ ma ti ro ruiruo? Ẹvẹ ma sai ro yeri kugbe use-abọ obọdẹ evaọ odibọgba ẹgbede mai? Ofẹ usiuwoma ota na vẹ u rovie fihọ k’omai nọ u fo nọ ma re duomahọ viere? Eme o re fiobọhọ k’omai re ma jọ iwuhrẹ nọ i wo ona viere okenọ ma te bi ru izihebro hayo bi ru iwuhrẹ Ebaibol? (1 Ahwo Kọrint 9:19-22) A rẹ ta kpahe enọ itieye na jẹ k’iyo rai totọ evaọ Ewuhrẹ Odibọgba na. A rẹ rehọ abọ iwuhrẹ na buobu no izoeme evaọ Odibọgba Uvie Mai ze, okwakwa ofa nọ a k’omai re u ru omai te kẹ iruo mai nọ i wuzou na.
20. Ẹvẹ ma sai ro wo erere vọvọ no iwuhrẹ gbe ikokohọ ze?
20 Ẹkwoma oma oruẹrẹhọ kẹ gbe ekpohọ iwuhrẹ mai gbe eroruiruo eme nọ ma wuhrẹ na evaọ iruo mai wọhọ iwuhrẹ, ma re wo ewuhrẹ ologbo. Rekọ etenẹ o jọ kuhọ họ. Ma wo iwuhrẹ ilogbo re—ikokohọ esese gbe ilogbo—enọ a ruẹrẹhọ re i ru omai te wọhọ iwuhrẹ Ẹme Ọghẹnẹ. Ẹvẹ ma re rẹro eyo gbe efihiruo ehrẹ eyena te!—Luk 8:18.
21. Didi imuẹro i dhesẹ nọ a riẹ omai wuhrẹ no, kọ ono o wo orro na?
21 Kọ ewuhrẹ nọ Jihova ọ k’omai no u w’iruo no? Joma kiẹ iriruo na riwi. K’ukpe k’ukpe a bi fiobọhọ kẹ idu ahwo buobu wuhrẹ igogo iwuhrẹ Ebaibol re a jẹ rria lele oware nọ Ọghẹnẹ ọ gwọlọ mi ai. Unu mai u bi bu, rekọ orọnikọ ohwo jọ evaọ usu mai o bi ru ei hi. Ma re rri ẹme na liọliọ, wọhọ epanọ Jesu o ru. Ọ ta nọ: “Ohwo ọvo ọ sai bru omẹ tha ha ajokpa nọ Ọsẹ nọ o vi omẹ ze o si rie.” Wọhọ ikọ anwae na, ibuobu mai a riobe he jẹ rrọ ahwo gheghe. (Jọn 6:44; Iruẹru 4:13) Obokparọ mai o roma hwa Jihova, ọnọ o re si ahwo udu oruọzewọ ziọ uzẹme na. Pọl ọ ta riẹ ziezi: “Ẹkọ mẹ kọe, Apọlọs o te ku ame họ, rekọ Ọghẹnẹ o ru rie i ro.”—1 Ahwo Kọrint 3:6.
22. Fikieme udu u gbe n’omai awọ họ kpahe abọ nọ ma re wo vọvọ evaọ odibọgba Oleleikristi na?
22 Ẹhẹ, Jihova Ọghẹnẹ o w’obọ gaga evaọ iruo mai wọhọ iwuhrẹ Ẹme riẹ. Ẹsejọ ma re roro nnọ ma te he wọhọ iwuhrẹ. Rekọ kareghẹhọ, Jihova họ ọnọ o re si ahwo bru omariẹ gbe Ọmọ riẹ. Jihova họ ọnọ o ru omai te ẹkwoma Ẹme riẹ, ẹzi ọfuafo riẹ, gbe ukoko otọakpọ riẹ re ma gbodibo kẹ ahwo ekpokpọ eyena. Joma j’owọ kẹ ewuhrẹ Jihova ẹkwoma efihiruo emamọ eware nọ ọ be kẹ enẹna re o ro ru omai te ziezi wọhọ iwuhrẹ Ẹme Ọghẹnẹ!
Ẹvẹ Whọ te k’Uyo?
• Ẹvẹ Ebaibol na ọ rẹ rọ thọ omai kpahe kẹ iruo usiuwoma ota na?
• Didi abọ ẹzi ọfuafo na o wo nọ o re ro ru omai te wọhọ egbodibo?
• Idhere vẹ ukoko otọakpọ Jihova o ro fiobọhọ k’omai te no wọhọ iwhowho emamọ usi na?
• Fikieme ma je w’udu ma tẹ rrọ iruo odibọgba na?
[Enọ Uwuhrẹ]
[Uwoho nọ o rrọ ẹwẹ-obe avọ 15]
Wọhọ owuhrẹ Ẹme Ọghẹnẹ, Jesu o dhesẹ uyoyou kẹ ahwo