“Onana O rẹ Da”

KỌ WHO yo eme eyena no ẹdẹjọ? Ẹsejọhọ edọkita hayo enọso ọ ta eme eyena taure ọ tẹ te k’owhẹ oghẹrẹ umu jọ.

Ẹsejọhọ, whọ se umu na ha re whọ whaha edada nọ who rẹro riẹ na. Ukpoye, who thihakọ edada na re oma ra o sae ga. Ẹyao ọ tẹ rrọ gaga, ẹrehọ hayo ẹsiọ usiwo nọ o rẹ da o sae jọ ẹme uwhu gbe azọ.

Dede nọ orọnikọ ẹsikpobi ma rẹ gwọlọ ẹruorote edọkita ha, mai kpobi wọhọ ahwo-akpọ sebaẹgba ma sae whaha ọwhọkuo hayo ọkpọvio ho, makọ onọ o rẹ sae da ẹsejọ dede. (Jerimaya 10:23) Bi dhesẹ ẹgwọlọ nana evaọ oma emọ, Ebaibol na ọ ta nọ: “Ugheghẹ o rọ eva ọmaha, rekọ oviaviẹ ofa u re le i noi eva.”—Itẹ 22:15.

Evaọ etenẹ oviaviẹ u dikihẹ kẹ udu ọsẹ gbe oni. Uzẹme o rrọ inọ umutho emọ jọ ọvo ọwhọkuo ọ rẹ were. O tẹ gwọlọ uye-okẹ jọ, a sae se iẹe. Ghele na, esẹgbini iyoyou, enọ i wo areghẹ, a re rri vrẹ edada nọ o rẹ kẹ ọmọ na kpohọ erere riẹ. Esẹgbini Ileleikristi a riẹ nọ Ẹme Ọghẹnẹ ọ ta gba nọ ọ ta nọ: “Awere ọ rọ uye orọkẹ eva oke ọsosuọ họ; rekọ uwhremu riẹ o rẹ mọ ubi udhedhẹ o rọ ẹrẹreokie rọ kẹ e nọ a kẹ uye na.”—Ahwo Hibru 12:11; Itẹ 13:24.

Dede na, orọnikọ emọ ọvo e gwọlọ ọwhọkuo ho. Ekpako e gwọlọ e riẹ re. Ebaibol ọ be t’ẹme kẹ ekpako na nọ ọ ta nọ: “Yọrọ uwuhrẹ, ova owhẹ obọ họ, sẹro riẹ keme [oye] họ uzuazọ ra.” (Itẹ 4:13) Ẹhẹ, ahwo nọ i wo areghẹ—t’emaha t’ekpako—a rẹ jẹ ọwhọkuo nọ o no Ẹme Ọghẹnẹ, Ebaibol na ze rehọ, keme ere oruo o ti siwi uzuazọ rai.