‘Uyoyou Mai U Diwi Viere No’
‘Uyoyou Mai U Diwi Viere No’
Evaọ Edisoi-Oka, March 31, 2000, Ugbehru Usu evaọ Hokkaido, Japan, o tẹ sa nọ o dọmu oria ovo te ikpe 23 no. Ahwo idu buobu a dhẹ no oria okpẹtu na. Iwou gbe iruo ahwo buobu i vru, rekọ u woma inọ uvumọ ohwo o whu hu. Isẹri Jihova 48 a jọ usu ahwo nọ a dhẹ na—rekọ a kare obufihọ họ.
Uzedhe ẹdẹ nọ ugbehru na o rọ sa na, ọgbodibo ọnyawariẹ Oleleikristi nọ o weze ziọ oria oyena o te muọ ọruẹrẹfihotọ obufihọ họ eruo. U kri hi, ekwakwa obufihọ i te mu ikoko ekẹloma họ eno ze. A rehọ ogbẹgwae obufihọ mu vẹrẹ vẹrẹ, unevaze no obọ Isẹri Jihova ze i te muọ Japan soso họ ezurie no ze ruọ ẹkpa obufihọ na. Re a ruẹ nọ iruẹru abọ-ẹzi e nyaharo, a vi egbodibo oke-kpobi erọ Isẹri Jihova kpohọ ukoko nọ okpẹtu na ọ mai kpomahọ, ọsẹro okogho na o te je dhe oria oyena ẹnyẹnya re ọ wha ahwo na udu ga jẹ kẹ ai obufihọ abọ-ẹzi.
Isẹri nọ e rrọ oria nọ okpẹtu na o kpomahọ na a gbe je kpohọ iwuhrẹ Ileleikristi evaọ etoke ẹbẹbẹ na evaọ iwou ahwo nọ okpẹtu na o te he. Nọ a woro nọ ahwo a sai zihe kpohọ iwou rai evaọ oria nọ Ọgwa Uvie na ọ rrọ, inievo na e tẹ ruẹ nnọ ọgwa na o nwo rri abọvo jẹ va. Nwane kẹle Ọgwa Uvie na, iwiri i gbe bi kunye no eghogho nọ ọ rrọ ugbehru na ze. Isẹri na i te roro nọ, ‘Kọ o rrọ oware areghẹ re a gbẹ jọ oria nana ru iwuhrẹ? Kọ a sae ruẹrẹ Ọgwa Uvie na?’
A tẹ jiroro nnọ a rẹ bọ Ọgwa Uvie ọkpokpọ fihọ oria ekẹloma nọ o mae foma. Ogbẹgwae Ebabọ Ubrotọ na o tẹ kẹ obufihọ nọ u fo. Igho nọ Isẹri na e zọhọ no orẹwho na soso ze a ro ru ebabọ na. A d’otọ vẹrẹ vẹrẹ, yọ avọ obufihọ ahwo unevaze udhusoi buobu, u kri hi a tẹ bọ Ọgwa Uvie okpokpọ. Evaọ Ẹdoka, July 23, ahwo 75 a jọ ewuhrẹ ọsosuọ nọ a ru evaọ Ọgwa Uvie ọkpokpọ na. Irui i je no ibuobu nọ e jọ ewuhrẹ na aro ze. Okenọ a rọ Ọgwa Uvie na mudhe evaọ October ukpe ovo na, oma o wọ ọkpako ukoko na jọ ta nọ: “Okpẹtu na ọ wha ọbẹwẹ gbe uye-oruẹ ze. Dede na, ebabọ nana i zihe ozodhẹ mai ruọ oghọghọ no. Uyoyou mai kẹ Jihova gbe inievo Ileleikristi eghaghae mai u diwi viere no!”
[Ọnọ o wo uwoho nọ o rrọ ẹwẹ-obe avọ 13]
Ẹsazue Ugbehru ọ Usu: AP Photo/Koji Sasahara