Fi Omarọkẹ Ọghẹnẹ Ba Ithihakọ Ra
Fi Omarọkẹ Ọghẹnẹ Ba Ithihakọ Ra
‘Wha rehọ ithihakọ tua orọwọ rai, rọ omarọkẹ Ọghẹnẹ rọ tua ithihakọ rai.’—2 PITA 1:5, 6.
1, 2. (a) Didi oghẹrẹ orro a rẹ gwọlọ mi ọmọ? (b) Ẹvẹ orro abọ-ẹzi u wuzou te?
ORRO u wuzou kẹ ọmọ, rekọ ọmọ ọ gwọlọ vi orro ugboma gheghe. A re je rẹro orro iroro gbe udu. Oke o be nyaharo na, ọmọ na o ve si obọ no idhere ọmaha riẹ ọ vẹ te rro ziezi te uvi ọzae hayo aye. Pọl ukọ na ọ t’ẹme kpahe onana nọ o kere nọ: “Okenọ mẹ jọ ọmaha, mẹ jẹ ta ẹme wọhọ ọmaha, mẹ jẹ jiroro wọhọ ọmaha, me wo iroro wọhọ ọmaha, rekọ nọ mẹ te kpako uno na, me siobọnọ eware emaha na.”—1 Ahwo Kọrint 13:11.
2 Eme ọ Pọl na e rehọ okpẹme jọ lahwe kpahe orro abọ-ẹzi. U fo re Ileleikristi e rro no emaha abọ-ẹzi kpohọ enọ i wo “iroro wọhọ ọkpako.” (1 Ahwo Kọrint 14:20) A rẹ nyaharo re a te ‘umuo orro ẹvọvọ Kristi.’ A gbẹ jọ “emaha ofa ha, nọ a fi kpenẹ a kpenẹ enọ kofou uwuhrẹ ọ rẹ wọ kpobonẹ kpobonẹ.”—Ahwo Ẹfẹsọs 4:13, 14.
3, 4. (a) Eme ma re ru hrọ re ma ruẹse rro te ọkpako evaọ abọ-ẹzi? (b) Didi ekwakwa Ọghẹnẹ ma re dhesẹ, kọ ẹvẹ i wuzou te?
3 Ẹvẹ ma sae rọ rro kpako evaọ abọ-ẹzi? Nọ ohwo ọ rẹ rro vrẹ ọvo evaọ otọ emamọ iyero na, orro abọ-ẹzi o gwọlọ iruo. U re muhọ avọ ewo eriariẹ Ẹme Ọghẹnẹ gbe owojẹ lele oware nọ ma wuhrẹ na. (Ahwo Hibru 5:14; 2 Pita 1:3) Kẹsena, onana u ve ru omai dhesẹ ekwakwa Ọghẹnẹ via. Wọhọ epanọ o rrọ evaọ orro ugboma gbe abọ sa-sa riẹ kpobi na, orro evaọ ewo ekwakwa Ọghẹnẹ sa-sa u re dhesẹ oma via ususu. Pita ukọ na o kere nọ: “Fiki onana, dawo oma re wha rehọ ọtẹruo tua orọwọ rai, wha jẹ rehọ eriariẹ tua ọtẹruo rai; jẹ rehọ oma-onyẹ tua eriariẹ, [ithihakọ] rọ tua oma-onyẹ, gbe oreva Ọghẹnẹ rọ tua [ithihakọ], wha vẹ jẹ rọ uyoyou-oniọvo rọ tua oreva Ọghẹnẹ, uyoyou-oniọvo kọ avọ uyoyou.”—2 Pita 1:5-7.
4 Ekwakwa nọ Pita ọ fodẹ kpobi na i wuzou, ọvuọvo ọ riẹ nọ a re sino ho. O fi bae nọ: “Keme re enana kpobi e tẹ rọ oma rai ria i re si owhai no oyẹlẹ, wha gbẹ jọ ababọ ubi eva ẹriẹ Jesu Kristi Ọnowo mai hi.” (2 Pita 1:8) Joma tẹrovi ẹgwọlọ nọ ma re ro fi omarọkẹ Ọghẹnẹ ba ithihakọ mai.
Ẹgwọlọ Rọkẹ Ithihakọ
5. Fikieme ma jẹ gwọlọ ithihakọ?
5 Pita gbe Pọl a dhesẹ abọ nọ ithihakọ o wo kugbe omarọkẹ Ọghẹnẹ. (1 Timoti 6:11) Re a wo ithihakọ o gwọlọ vi akọ nọ a re thihi evaọ otọ ọbẹwẹ je kru udu ga ọvo. O gwọlọ odiri, udu, gbe aruọwha ababọ oyẹlẹ nọ o rẹ ro ohwo oma evaọ otọ edawọ, ezadhe, hayo ukpokpoma. Wọhọ enọ e gwọlọ “uzuazọ Ọghẹnẹ uyero eva Kristi Jesu,” ma rẹro nọ a ti kpokpo omai. (2 Timoti 3:12) Ma re thihakọ hrọ ma tẹ gwọlọ dhesẹ uyoyou mai kẹ Jihova via je wo ekwakwa nọ a gwọlọ kẹ esiwo. (Ahwo Rom 5:3-5; 2 Timoti 4:7, 8; Jemis 1:3, 4, 12) Ababọ ithihakọ, ma re wo uzuazọ ebẹdẹ bẹdẹ hẹ.—Ahwo Rom 2:6, 7; Ahwo Hibru 10:36.
6. Ithihakọ rite urere u dhesẹ nọ ma re ru eme?
6 Epanọ ma muhọ woma te kẹhẹ, oware nọ u muẹme họ ma re wo ithihakọ. Jesu ọ ta nọ: “Ọnọ o kiakọ te urere ọye a re ti siwẹ.” (Matiu 24:13) Ẹhẹ, ma re thihakọ te urere hrọ, rite urere uzuazọ mai nana hayo rite urere uyerakpọ omuomu nana. Onọ o via k’omai kpobi, ma re kru ẹgbakiete mai kẹ Ọghẹnẹ hrọ. Rekọ, ma gbe fi omarọkẹ Ọghẹnẹ ba ithihakọ mai hi, ma sai ru Jihova eva were he yọ ma ti wo uzuazọ ebẹdẹ bẹdẹ hẹ. Rekọ eme họ omarọkẹ Ọghẹnẹ?
Oware nọ Omarọkẹ Ọghẹnẹ U Dhesẹ
7. Eme họ omarọkẹ Ọghẹnẹ, kọ eme o rẹ wọ omai ru?
7 Omarọkẹ Ọghẹnẹ họ ọwhewhe, egagọ, hayo iruo nọ a re ru kẹ Jihova Ọghẹnẹ fiki omarokpotọ kẹ esuo ehrugbakpọ riẹ. Re ma dhesẹ omarọkẹ Ọghẹnẹ kẹ Jihova, ma gwọlọ eriariẹ egbagba kpahe iẹe gbe idhere riẹ. Ma rẹ gwọlọ riẹ Ọghẹnẹ viere ziezi. Onana o rẹ wọ omai wo usu okpekpe kugbe i, onọ u re dhesẹ oma via evaọ owojẹ gbe edhere uzuazọ mai. Ma rẹ dao oma jọ wọhọ Jihova—raro kele idhere riẹ gbe ekwakwa avọ uruemu riẹ. (Ahwo Ẹfẹsọs 5:1) Evaọ uzẹme, omarọkẹ Ọghẹnẹ o rẹ wọ omai gwọlọ ru Ọghẹnẹ eva were evaọ eware kpobi nọ ma bi ru.—1 Ahwo Kọrint 10:31.
8. Ẹvẹ omarọkẹ Ọghẹnẹ gbe egagọ udu kpobi i ro wo obọ kugbe?
8 Re ma sai dhesẹ uvi omarọkẹ Ọghẹnẹ, Jihova ọvo ma rẹ gọ, ma rẹ kẹ uvumọ oware uvẹ re o rehọ ẹta riẹ evaọ idu mai hi. Wọhọ Ọnọma omai, o te ọnọ ma rẹ rọ egagọ kpobi kẹ. (Iziewariẹ 4:24; Aizaya 42:8) Dede na, Jihova ọ rẹ gb’omai họ re ma gọe he. Ọ gwọlọ nọ ma rọ unevaze gọe. Uyoyou mai kẹ Ọghẹnẹ, onọ u re no eriariẹ egbagba kpahe iẹe ze, oye họ oware nọ o rẹ wọ omai nwene izuazọ mai jẹ rehọ oma kpobi mudhe kẹe ma vẹ jẹ rria lele omarọkẹ na.
Bọ Usu Kugbe Ọghẹnẹ
9, 10. Ẹvẹ ma sae rọ bọ jẹ yọrọ usu okpekpe kugbe Ọghẹnẹ?
9 Ma te dhesẹ omarọkẹ Ọghẹnẹ mai via no ẹkwoma ame-ọhọ, o gbẹ gwọlọ nọ ma rẹ bọ usu mai kugbe i kpekpe viere. Fikiere, isiuru mai re ma ru ere jẹ rọ ẹrọwọ gọ Jihova o rẹ wọ omai nọ ma rẹ rọ ruabọhọ ewuhrẹ Ẹme riẹ je roro kpahe iẹe. Nọ ma be kẹ ẹzi Ọghẹnẹ uvẹ re o jọ iroro gbe idu mai ruiruo na, uyoyou mai kẹ Jihova u re diwi viere. Usu mai kugbe i o rẹ jọ oware nọ o mai wuzou evaọ izuazọ mai ẹsikpobi. Ma rẹ rehọ Jihova wọhọ Ogbẹnyusu mai nọ ọ mai woma kpobi ma vẹ jẹ gwọlọ ru ei eva were ẹsikpobi. (1 Jọn 5:3) Isiuru mai kpahe emamọ usu mai kugbe Ọghẹnẹ o rẹ rro viere, yọ o rẹ were omai inọ ọ be rọ uyoyou wuhrẹ omai jẹ kpọ omai vi evaọ oria nọ u je fo.—Iziewariẹ 8:5.
10 Ma gbẹ be dao oma ẹsikpobi re ma ru usu oghaghae mai kugbe Jihova ga ha, o rẹ sae hiẹ. Oyena o tẹ via, obọ Ọghẹnẹ u n’oze he, keme “otheri omai ọvuọvo abọ họ.” (Iruẹru 17:27) Ẹvẹ eva e rẹ were omai te inọ Jihova o ru rie bẹbẹ hẹ re a nyabru ei! (1 Jọn 5:14, 15) Uzẹme, o gwọlọ iruo mi omai re ma sae yọrọ usu okpekpe kugbe Jihova. Dede na, o re fi obọ họ k’omai re ma si kẹle iẹe ẹkwoma ekwakwa nọ ma gwọlọ kpobi nọ ọ rẹ k’omai re ma sae bọ jẹ yọrọ omarọkẹ Ọghẹnẹ. (Jemis 4:8) Ẹvẹ ma sae rọ rehọ eruẹrẹfihotọ iyoyou enana kpobi ruiruo?
Jọ Gaga Evaọ Abọ-Ẹzi
11. Didi idhere jọ ma re ro dhesẹ omorọkẹ Ọghẹnẹ mai via?
11 Uyoyou udidi mai kẹ Ọghẹnẹ o rẹ wọ omai dhesẹ edidi omarọkẹ Ọghẹnẹ mai via, rọwo kugbe ohrẹ Pọl na: “Dawo oma re whọ sai ru oma ra wọhọ ọnọ a jẹrehọ no, obọ aro Ọghẹnẹ jẹ wọhọ oruiruo ọnọ ọ kare omaovuọ, nọ rẹ yọrọ ẹme uzẹme na ziezi.” (2 Timoti 2:15) Onana uruo o gwọlọ nọ ma re wo uwuhrẹ Ebaibol nọ ma rẹ nya lele ẹsikpobi, ekpohọ ewuhrẹ, gbe usiuwoma ota. Ma rẹ sai je si kẹle Jihova ẹkwoma “ẹlẹlẹ.” (1 Ahwo Tẹsalonika 5:17) Enana kpobi yọ idhere nọ ma re ro dhesẹ omarọkẹ Ọghẹnẹ mai via. Abọgbekẹ enana jọ o rẹ wha ẹyao abọ-ẹzi ze je kpe omai fihọ kẹ egbefẹ Setan.—1 Pita 5:8.
12. Ẹvẹ ma sai ro thihakọ edawọ avọ obokparọ?
12 Ẹjọ gaga avọ ọwhọ evaọ abọ-ẹzi u re je fi obọ họ k’omai rẹriẹ ovao dhe edawọ buobu nọ i re zere omai. Edawọ e rẹ sai no eria nọ e rẹ dawo omai gaga ze. O sae jọ bẹbẹ gaga re a thihakọ ababọ-isiuru, ọwọsuọ, gbe ukpokpoma nọ i te no obọ ahwo uviuwou ekpekpe, imoni, hayo erivẹ ze. Itunyẹ ẹghẹ re ma si obọ no ehri-izi Ileleikristi mai e sae roma via eva oria iruo mai hayo evaọ obọ isukulu. Elọhoma, ẹyao, gbe ọkora e sae lọhọ omai oma u ve ru ei bẹbẹ viere re ma dadamu kẹ edawọ ẹrọwọ. Rekọ ma rẹ sae kparobọ vi edawọ enana kpobi ma tẹ ruabọhọ “uzuazọ ẹfuọ gbe orọ Ọghẹnẹ, . . . be hẹrẹ je bi rẹro ẹtha ẹdẹ Ọghẹnẹ vẹrẹ vẹrẹ!” (2 Pita 3:11, 12) Yọ ma sae yọrọ oghọghọ mai evaọ ere oruo, avọ evaifihọ kpahe eghale Ọghẹnẹ.—Itẹ 10:22.
13. Eme ma re ru hrọ otẹrọnọ ma rẹ ruabọhọ edhesẹ omarọkẹ Ọghẹnẹ?
13 Dede nọ Setan ọ rẹriẹ ovao dhe enọ i wo uruemu omarọkẹ Ọghẹnẹ, ozọ u re du mu omai hi. Fikieme? Keme “Ọnowo ọ riẹ epanọ o re ro siwẹ ahwo-Ọghẹnẹ no edawọ.” (2 Pita 2:9) Re ma thihakọ edawọ jẹ ruẹ usiwo utiọye na, ma rẹ “se edhọ-egọ avọ urusio akpọ na ba, re ma yeri uzuazọ uwowolẹ, avọ ẹrẹreokie, gbe uzuazọ Ọghẹnẹ u yero eva akpọ nana.” (Taitọs 2:12) Wọhọ Ileleikristi, ma rẹ yọroma re elọhoma kpobi nọ i re no isiuru gbe iruẹru uwo ze e siọ obọ ba eduhọ omarọkẹ Ọghẹnẹ mai jẹ raha iẹe. Joma t’ẹme kpahe eware ọza enana jọ.
Yọroma kẹ Eware Nọ E rẹ Wha Ọza te Omarọkẹ Ọghẹnẹ
14. Eme ma rẹ kareghẹhọ otẹrọnọ agbefẹ isiuru ekwakwa efe o bi si omai rehọ?
14 Isiuru-ekwakwa-efe yọ agbefẹ kẹ ibuobu. Ma rẹ sae viẹ omobọ mai họ dede, bi “roro nọ oreva Ọghẹnẹ uruo yọ edhere nọ a jẹ ruẹ erere” eware iwo. Ma vẹ g’udu wha ibe enọ e rọwo ria fiki eva nọ ibe orọwọ mai a fihọ omai. (1 Timoti 6:5) Ma sai tube ku ei họ thọthọ dede inọ u kiehọ re ma thuẹthuẹ họ Oleleikristi nọ o w’ugho re o momo ugho k’omai dede nọ ma riẹ nọ ma sae te hwa zihe he. (Olezi 37:21) Rekọ omarọkẹ Ọghẹnẹ họ oware nọ u wo “eya rọ kẹ uzuazọ onana jegbe rọ kẹ uzuazọ no tha,” orọnikọ ekwakwa efe he. (1 Timoti 4:8) Nọ ma ‘wha oware ovo ziọ akpọ họ na yọ ma rẹ sae wha oware ovo noi hi na,’ joma rọ ọwhọ le ‘omarọkẹ Ọghẹnẹ avọ edẹro’ re ‘emuore gbe emuẹgọ e d’omai ẹro.’—1 Timoti 6:6-11.
15. Eme ma rẹ sai ru otẹrọnọ ilale isiuru i bi gele omarọkẹ Ọghẹnẹ mai họ akotọ?
15 Ilale omawere o rẹ sai mi omarọkẹ Ọghẹnẹ otọ. Kọ u fo re ma ru inwene ekpakpata evaọ abọ nana? Uzẹme, irere jọ i re no oma-urukpokpọ ze. Ghele na, irere eyena i tulo ho a tẹ rehọ ae wawo uzuazọ ebẹdẹ bẹdẹ. (1 Jọn 2:25) Nẹnẹ na, ibuobu i “yowọ enu-awere siọ Ọghẹnẹ ba, a rẹ yọrọ oghẹrẹ egagọ a vẹ vro ogaga nọ o rọ eva riẹ,” yọ u fo re ma kẹnoma no ahwo otiọye na. (2 Timoti 3:4, 5) Ahwo nọ a se omarọkẹ Ọghẹnẹ gboja a bi “fi otọhotọ uwoma họ kẹ oma rai be hẹrẹ obaro, re uzuazọ nọ o ghine rọ uvi uzuazọ o ruẹse te ae obọ.”—1 Timoti 6:19.
16. Didi isiuru uzioraha e rẹ whaha ejọ ẹria te itee ikiẹrẹe Ọghẹnẹ, kọ ẹvẹ ma sae rọ kparobọ vi isiuru enana?
16 Ọgba-idi gbe ogbẹlọ imu, ọfariẹ-ogbe, gbe isiuru emuemu e rẹ sae raha omarọkẹ Ọghẹnẹ mai. Ekie kẹ enana o rẹ whaha omai ẹria te itee ikiẹrẹe Ọghẹnẹ. (1 Ahwo Kọrint 6:9, 10; 2 Ahwo Kọrint 7:1) Makọ Pọl dede o je lele ugboma uzioraha riẹ muabọ ẹsikpobi. (Ahwo Rom 7:21-25) O gwọlọ obọ ogaga re a sai si isiuru ethọthọ no udu. Oware jọ họ, ma rẹ gbae mu hrọ re ma jọ fuafo evaọ uruemu. Pọl ọ ta k’omai nọ: “Wha kpe abọ akpọ nọ e ro oma rai no: igberedia, egbegbe, urusio nọ o rẹ vrẹ ẹta, eware iyoma eguọlọ, gbe eware amọfa eguọlọ, onọ orọ edhọ egọ.” (Ahwo Kọlọsi 3:5) Ekpe ekwakwa ugboma mai nọ i wo obọ kpahe eware uzioraha itieye na o gwọlọ ọtamuo re ma sai si ai no, le ai thabọ no oma. Olẹ owhawha kẹ obufihọ Ọghẹnẹ u re ru omai whaha isiuru emuemu je le ẹrẹreokie gbe omarọkẹ Ọghẹnẹ evaọ udevie uyerakpọ omuomu ọnana.
17. Ẹvẹ ma re rri ọwhọkuo?
17 Elọhoma e rẹ sae raha ithihakọ mai je kpomahọ omarọkẹ Ọghẹnẹ mai yoyoma. Idibo Jihova buobu a rẹriẹ aro ku elọhoma no. (Ikelakele 11:11-15; Ẹzra 4:4; Jona 4:3) Elọhoma e rẹ mae wha ọraha ze otẹrọnọ ẹgo o lele i rie fikinọ ma roro nọ a ru omai thọ hayo inọ a k’omai uye hayo whọku omai vrẹta. Rekọ ọwhọkuo gbe ọkpọvio yọ imuẹro isiuru gbe ẹruọsa uyoyou Ọghẹnẹ kẹ omai. (Ahwo Hibru 12:5-7, 10, 11) U fo re ma rehọ ọwhọkuo wọhọ uye gheghe he rekọ wọhọ edhere nọ a bi ro wuhrẹ omai fihọ edhere ẹrẹreokie. Ma te wo omarokpotọ, ma re rri ohrẹ ghaghae jẹ jẹe rehọ, vuhumu nnọ “ẹwhọku ohrẹ oyehọ edhere uzuazọ.” (Itẹ 6:23) Onana o sai fi obọ họ k’omai ru ẹnyaharo abọ-ẹzi evaọ ele omarọkẹ Ọghẹnẹ.
18. Didi owha-iruo ma wo evaọ ẹme kpahe ẹwhọ nọ ọ roma via evaọ udevie imava?
18 Ẹwhọ gbe eware nọ a ro ru omai thọ e sae jọ use-abọ kẹ omarọkẹ Ọghẹnẹ mai. E sae wha awaọruọ ze hayo wọ otujọ jẹ ekpere owọ orọ oma nọ a re si no inievo abọ-ẹzi rai. (Itẹ 18:1) Rekọ u woma re ma kareghẹhọ nnọ ẹgo hayo egrẹ nọ a re fihọ eva kpahe amọfa o rẹ sae raha usu mai kugbe Jihova. (Iruo-Izerẹ 19:18) Evaọ uzẹme, “ọnọ o you omoni riẹ hẹ, ọnọ ọ rẹ ruẹ, ọsai you Ọghẹnẹ hẹ, ọnọ ọ rẹ ruẹ hẹ.” (1 Jọn 4:20) Evaọ Ovuẹ obọ Ugbehru riẹ na, Jesu ọ fodẹ ẹgwọlọ nọ a rẹ rọ j’owọ kpatakpata re a ku ẹwhọ nọ o rrọ udevie imava họ. Ọ ta kẹ enọ i bi yo ẹme riẹ nọ: “Fikiere whọ tẹ be kẹ okẹ ra evaọ aruẹri, etẹe who je roro nọ whẹ avọ omoni ra wha wo ẹme, siọ okẹ ra ba obọ aruẹri na tao, nyavrẹ, kake ruẹrẹ omoni ra họ, kẹsena whọ tẹ nyatha te kẹ okẹ ra.” (Matiu 5:23, 24) Unu-uwou o sai fi obọ họ kiofu ẹme hayo oware uyoma jọ nọ ma ru. Ma rẹ sai ku ẹwhọ họ je zihe udhedhẹ ze ma tẹ yare erọvrẹ jẹ rọwo nnọ ma ruthọ. Jesu ọ kẹ ehrẹ efa kpahe ekuhọ ẹwhọ re. (Matiu 18:15-17) Ẹvẹ eva e rẹ were omai te otẹrọnọ ma sai ku ẹwhọ họ!—Ahwo Rom 12:18; Ahwo Ẹfẹsọs 4:26, 27.
Lele Oriruo Jesu
19. Fikieme u je wuzou tere re ma raro kele oriruo Jesu?
19 Edawọ e rẹ te roma via hrọ, rekọ u du fo nọ i re gele omai no ohrẹ uzuazọ ebẹdẹ bẹdẹ na ha. Kareghẹhọ inọ Jihova ọ sae thọ omai no edawọ. Nọ ma be “siọ owreze ba” jẹ “rehọ oriori dhẹ ohrẹ nọ a fihọ kẹ omai na,” j’oma “ri Jesu nọ ọ rọ emuhọ gbe ekuhọ orọwọ mai” na. (Ahwo Hibru 12:1-3) Oriruo Jesu nọ ma rẹ tẹro mu ziezi jẹ dao oma raro kele iei evaọ ẹmeunu gbe uruemu u ti fi obọ họ k’omai bọ omarọkẹ Ọghẹnẹ je dhesẹ iẹe via viere.
20. Didi irere i re no ele ithihakọ gbe omarọkẹ Ọghẹnẹ ze?
20 Ithihakọ gbe omarọkẹ Ọghẹnẹ i re ruiruo kugbe fi obọ họ ru esiwo mai muẹro. Ẹkwoma edhesẹ ekwakwa eghagha enana, ma rẹ sae rehọ ẹrọwọ nyaharo evaọ iruo efuafo Ọghẹnẹ mai na. Ma tẹ make rrọ otọ ẹdawọ, ma te wereva ghele nọ ma be ruẹ uyoyou gbe oghale Jihova fikinọ ma thihakọ no je bi dhesẹ omarọkẹ Ọghẹnẹ na. (Jemis 5:11) Ofariẹ, Jesu omariẹ ọ k’omai imuẹro nọ: “Evaọ akothiho rai wha re ti ro wo uzuazọ rai.”—Luk 21:19.
Ẹvẹ Whọ te k’Uyo?
• Fikieme akothiho o je wuzou?
• Eme họ omarọkẹ Ọghẹnẹ, kọ ẹvẹ a re ro dhesẹ iẹe?
• Ẹvẹ ma sae rọ bọ jẹ yọrọ usu okpekpe kugbe Ọghẹnẹ?
• Eware vẹ jọ e rẹ raha omarọkẹ Ọghẹnẹ mai, kọ ẹvẹ ma rẹ rọ whaha ae?
[Enọ Uwuhrẹ]
[Iwoho nọ e rrọ ẹwẹ-obe avọ 6, 7]
A re dhesẹ omarọkẹ Ọghẹnẹ evaọ idhere buobu
[Iwoho nọ e rrọ ẹwẹ-obe avọ 8]
Yọroma kẹ eware nọ e rẹ raha omarọkẹ Ọghẹnẹ ra