Uwuhrẹ Mi Ogbodu

“MAKỌ ogbodu nọ ọ rọ obọ ihru dede ọ riẹ oke riẹ . . . Rekọ ahwo mẹ a riẹ ijaje ỌNOWO na ha.” (Jerimaya 8:7) Jerimaya ọruẹaro na ọ rehọ eme eyena woro ẹdhoguo Jihova mukpahe ahwo Juda nọ i kie no ẹrọwọ no, enọ e nya siọ Jihova Ọghẹnẹ rai ba no a tẹ rẹriẹ ovao ku egagọ eghẹnẹ erara. (Jerimaya 7:18, 31) Fikieme Jerimaya ọ jẹ fodẹ ogbodu wọhọ oware uwuhrẹ kẹ ahwo Ju nọ e kare ẹrọwọ na?

Rọ kẹ emọ Izrẹl, ogbodu, maero kọ ogbodu ọfuafo na, ọ jọ ọvra nọ a riẹ gaga nọ o re no oria ruọ oria evaọ ekwotọ Ebaibol. Odẹ nọ ẹvẹrẹ Hibru o se ọvra ologbo ọnana, nọ awọ riẹ ọ rrọ thethei na, u kie kpahe aye nọ otofa riẹ o rrọ “ọrọ omarokpotọ; ọrọ uyoyou-ẹwo.” Onana u fo, keme wo ohẹriẹ no evra buobu, ogbodu ọfuafo erọ ezae gbe eyae a rẹ jọ kugbe ohwohwo bọwo ẹdẹ uwhu. A tẹ raha oke uriri na no evaọ eria nọ e dina ruọruọ omojọ, k’ukpe k’ukpe igbodu buobu i re zihe ziọ uwou nọ a jẹ rria vẹre na.

Uruemu ẹkoma ogbodu na u dhesẹ okwakwa omarokpotọ evaọ idhere igbunu efa. Te erọ ezae gbe erọ eyae a re ruru ike na kugbe a vẹ jẹ ko emọ rai. Obe na Our Magnificent Wildlife o ta nọ: “Wọhọ esẹgbini, igbodu i wo ọtẹruo gaga. Ogbodu ọzae jọ evaọ Germany ọ rra fihọ ufi ẹlẹtriki, ikpẹ na i te kpei. Ọrivẹ riẹ ọvo o te rruẹ ike na edẹ 3, ọ rẹ dina rra no uwou riẹ ọvo re ọ gwọlọ emu. . . . Evaọ oria ofa, nọ a kpe ogbodu aye na no, ọsẹ na ọvo ọ yọrọ emọ na.”

Evaọ uzẹme, fiki ọtẹruo nọ o dhesẹ kẹ ọrivẹ etoke uzuazọ soso riẹ gbe uvi ẹruọsa emọ riẹ, ogbodu o bi ghine ru otofa odẹ riẹ gba—“ọrọ omarokpotọ.” Fikiere, igbodu e rrọ uwuhrẹ ulogbo kẹ emọ Izrẹl nọ e kare ẹrọwọ jẹ ruọ ẹwọ no na.

Rọ kẹ ahwo buobu nẹnẹ, omarokpotọ gbe ẹrọwọ yọ eware oke anwae—eware nọ i wo iruo ho. Evihọ erọo nọ e be fa, ẹdhẹseba, iwhayo, gbe iruemu ewhariọ efa i dhesẹ nọ omarokpotọ o gbẹ ghare ahwo ẹro ho. Wo ohẹriẹ, Ebaibol na o rri omarokpotọ nọ u no uyoyou gbe ẹwo ze ghaghae gaga. O tuduhọ Ileleikristi awọ re a “wha ohwo ọkpokpọ na họ oma, ọnọ a ma tho Ọghẹnẹ eva uvi ẹrẹreokie gbe ẹfuọ.” (Ahwo Ẹfẹsọs 4:24) Ẹhẹ, uruemu okpokpọ u re fi obọ họ k’omai re ma roma kpotọ, rekọ ma rẹ sai je wuhrẹ oware kpahe omarokpotọ mi ogbodu.