Iwhowho Uvie A n’Iyẹrẹ

A Kpare Okẹ-Ọghọ kẹ Ọgwa Uvie Jọ Fiki Ewoma Riẹ

ẸKO-IRUO ọ Ẹruorote Okegbe evaọ Finland o ruẹrẹ ukpe 2000 fihọ wọhọ “Ukpe ọ Erru-Ọwhẹhọ Otọ.” Omọvo ẹko-iruo na jọ ọ ta nọ “ẹjiroro nọ ma rọ rehọ erru-ọwhẹhọ otọ ro ru uzoẹme ẹgbukpe na họ re o kareghẹhọ omai kpobi epanọ ẹbe ọrọrọ nọ a kọ fihọ okegbe o w’iruo te evaọ izuazọ ekẹdẹ kẹdẹ gbe omokpokpọ mai.”

Evaọ January 12, 2001, ileta ọ Ukoko Erru-Ọwhẹhọ Otọ Finland i te uwou ogha ọ Isẹri Jihova evaọ Finland obọ. Ileta na i dhesẹ nnọ a kpare okẹ-ọghọ orọ erru-ọwhẹhọ otọ ẹgbukpe na jọ kẹ Ọgwa Uvie Isẹri Jihova nọ o rrọ Tikkurila fiki obọdẹ ona nọ a ru fihọ okegbe riẹ gbe ogege riẹ nọ a nabi fi ruẹhọ ziezi. Ileta na i fibae nnọ “epanọ otọ okegbe na soso o rrọ, te evaọ oke uvewhru gbe oke uriri, u siuru, o vọ avọ erru, yọ ona riẹ u kpehru gaga.”

A rehọ okẹ-ọghọ na kẹ Isẹri Jihova eva Rosendahl Hotel nọ o rrọ Tampere, Finland, evaọ ehaa nọ ewena gbe ehreki 400 e jọ. Ukoko Erru-Ọwhẹhọ Otọ Finland o tẹ jẹ t’ẹme fihọ ekwakwa awhusi, onọ o ta nọ: “Evaọ abọ sa-sa orẹwho na, o rẹ bẹbẹ re a duku Ọgwa Uvie Isẹri Jihova nọ a bọ wowoma ha. Ẹruorote okegbe rai o re si ohwo kpobi urru. Ọgwa Uvie nọ ọ rrọ Tikkurila na yọ oriruo jọ ọrọ ighẹ nọ omariẹ kpobi o rrọ obọdẹ okegbe. Uwou na gbe otọ ighẹ okẹkẹe na i ku obọgbe fi erru urirẹ họ ighẹ na jẹ rrọ kpatiẹ.”

Egwa Uvie 233 e rrọ Finland, egbọ iwoma e wariẹ ibuobu rai họ. Rekọ oware nọ o lẹliẹ eria nana ghine wo erru na họ e rrọ eria egagọ uzẹme gbe ewuhrẹ Ebaibol. Rọ kẹ Isẹri Jihova nọ i bu vi ima ezeza evaọ akpọ na soso, Ọgwa Uvie—ọnọ ọ rrọ kpatiẹ—yọ oria obọdẹ. Oye jabọ nọ a jẹ sẹro rai gaga na. Ethẹ Egwa Uvie na i rovie fihọ kẹ ahwo kpobi nọ a rọ ẹwho ra!