Enọ Ahwo nọ A s’Ebe

Kọ Ebẹle ọ riẹ nnọ o gwọlọ nọ a re dhe idhe arao re a ruẹsi wo ọjẹrehọ Ọghẹnẹ?

Ikuigbe Ebaibol kpahe Keni avọ Ebẹle nọ a dheidhe o kpẹre gaga. Eva Emuhọ 4:3-5, ma se nọ: “Nọ u te ezi, Keni ọ tẹ rehọ ibi otọ riẹ ze akpẹwẹ, Ebẹle ọ tẹ rehọ arao ọsosuọ [ọpoporiẹ] eva uthuru riẹ ze akpẹwẹ re. ỌNOWO na ọ ruẹ nọ idhe Ebẹle i woma, o te mi ai, rekọ fiki epanọ Keni avọ akpẹwẹ riẹ e were Ọghẹnẹ hẹ, o gbe mi idhe riẹ hẹ.”

A jọ uvumọ oria Ebaibol na ta nnọ taure oke nana u te ti te, Jihova ọ kẹ ugogo evuẹ jọ kpahe idhe gbe oghẹrẹ idhe nọ ọ rẹ jẹrehọ họ. Fikiere, o wọhọ nọ iroro eva rai Keni avọ Ebẹle a ro dheidhe rai. A whaha e rai ẹruọ uwou Aparadase ọsosuọ ọsẹgboni rai; a te muọ uye uzioraha họ ẹruẹ; a tẹ jẹ hẹriẹ oma no Ọghẹnẹ. Evaọ uyero uzioraha, gbe oja rai na, o ja rai oma nnọ a rẹ dhẹ bru Ọghẹnẹ kẹ obufihọ. Okẹ nọ a kẹ Ọghẹnẹ na ẹsejọhọ yọ edhere nọ o no rae eva ze nọ a gwọlọ ro wo aruoriwo Ọghẹnẹ.

Wọhọ oware nọ u no rie ze, Ọghẹnẹ ọ jẹ idhe Ebẹle rehọ, rekọ ọ se erọ Keni. Fikieme? Kọ fikinọ oware nọ Ebẹle o ro dheidhe u woma vi orọ Keni? Ma rẹ sae ta ha sọ oghẹrẹ idhe na o r’oja evaọ ẹme na ha, keme a ta kẹ ọvuọvo rai vẹre kpahe oware nọ a rẹ jẹrehọ gbe ọnọ a rẹ jẹrehọ họ họ. Dede na, o wọhọ nọ eware ivẹ nọ a ro dheidhe i kiehọ. Evaọ Uzi nọ Jihova ọ rọ kẹ orẹwho Izrẹl, idhe nọ a rẹ jẹrehọ orọnikọ orọ erao gbe abọjọ erao ọvo ho rekọ te eka nọ a tọ, ekru eka, eka nọ a wuhu, eware nọ a vuhu, gbe udi. (Iruo-Izerẹ 6:19-23; 7:11-13; 23:10-13) U muẹro inọ, orọnikọ oghẹrẹ eware nọ Keni gbe Ebẹle a rọ ze ọvo o lẹliẹ Ọghẹnẹ jẹ ọjọ rehọ ọ jẹ se ọdekọ họ.—Wawo Aizaya 1:11; Emọs 5:22.

Ikpe-udhusoi buobu e vrẹ no, Pọl ukọ na ọ ta nọ: “Fiki orọwọ jabọ nọ Ebẹle ọ jẹ rehọ ekẹ nọ iwoma nọ e rẹ jaimie vi e rọ Keni dhe idhe kẹ Ọghẹnẹ nọ o je se isẹi kẹe, mi ei ekẹ riẹ.” (Ahwo Hibru 11:4) Fikiere, ẹrọwọ họ oware nọ o soriẹ ze nọ Ọghẹnẹ ọ rọ jẹ Ebẹle rehọ inọ o kiẹrẹe. Rekọ ẹrọwọ kpahe eme? Ẹrọwọ kpahe eyaa Jihova inọ ọ te rehọ Ubi lahwe, ọnọ ọ te ‘nwa araomuomu na uzou’ je zihe udhedhẹ gbe ẹgbagba nọ ahwo-akpọ a reawere riẹ okejọ na ze. Fiki ẹme na inọ a te ‘nwa Ubi na ithihrawọ,’ o sae jọ nọ Ebẹle o roro nnọ o gwọlọ idhe nọ azẹ o re jo hwẹ. (Emuhọ 3:15) Oghẹrẹ nọ o rrọ kpobi kẹhẹ, uzẹme o rrọ inọ ẹrọwọ Ebẹle họ oware nọ u ru ‘idhe riẹ ghare vi erọ Keni.’

Epọvo na re, orọnikọ fiki oware othọthọ nọ Keni o ro dheidhe a rọ se ẹe he, rekọ fikinọ ọ kare ẹrọwọ, wọhọ epanọ owojẹ riẹ u dhesẹ na. Jihova ọ ta vevẹ kẹ Keni inọ: “Orọnikọ whọ riẹ ru-oyo, a gbe he mi akpẹwẹ ra?” (Emuhọ 4:7) Orọnikọ fikinọ oware nọ o ro dhe idhe riẹ o were e riẹ hẹ o lẹliẹ Ọghẹnẹ siọ Keni hi. Ukpoye, Ọghẹnẹ ọ se Keni keme “iruo riẹ i yoma,” iruo riẹ e vọ avọ ihri-eriọ, omukpahe, ukuhọ riẹ kọ ohwo-okpe.—1 Jọn 3:12.