Eriariẹ Egbagba Kpahe Ọghẹnẹ E rẹ k’Omai Omosasọ

RỌ KẸ ahwo jọ, ẹme nọ Ebaibol na ọ ta kpahe uyoyou gbe ohrọ Ọghẹnẹ o kpare enọ idhọvẹ jọ ze. A rẹ nọ inọ: Otẹrọnọ Ọghẹnẹ ọ gwọlọ si eyoma no, yọ ọ riẹ epanọ o re ro si ei no, o te je wo ogaga nọ o re ro ru ei, fikieme eware iyoma i gbe bi ro vihọ? Rọ kẹ ai, o rrọ bẹbẹ re eware esa nana e rọwo kugbe: (1) Ọghẹnẹ o wo ogaga kpobi; (2) Ọghẹnẹ ọ rrọ yoyou jẹ rrọ wowoma; gbe (3) eware okpẹtu e gbẹ be via. Iroro rai họ, nọ ẹme avesa na ọ rrọ uzẹme na, koyehọ o tẹ kawo ovo jọ evaọ usu ivẹ ọsosuọ na o sae jọ uzẹme he. Rọ kẹ ai, ẹsejọhọ Ọghẹnẹ o wo ẹgba nọ ọ rẹ rọ whaha eware iyoma ha hayo ọ be daezọ họ.

Edẹ jọ nọ ọraha Oria Eki Akpọ-Soso evaọ New York o via no, osu egagọ jọ nọ ọ viodẹ evaọ United States ọ ta nọ: “A nọ omẹ . . . unuẹse buobu no kpahe oware nọ Ọghẹnẹ ọ rọ kẹ okpẹtu gbe uye-oruẹ uvẹ. Uzẹme riẹ họ mẹ riẹ uyo na gbagba ha, tubọ u ri v’omẹ ẹro dede he.”

Nọ ọ jẹ kpahe fihọ ẹme nana, profẹsọ ọ iwuhrẹ-egagọ jọ o kere inọ “emamọ uwuhrẹ” nọ osu egagọ yena o wuhrẹ na o were riẹ oma. Yọ ọ rọwo kugbe eriwo ọwena-isukulu jọ re ọnọ o kere nọ: “Epanọ oware nọ o wha uye-oruẹ ze u vẹro ho na ere Ọghẹnẹ o vẹro ho re.” Kọ ma sae ghinẹ ta nnọ o rọ bẹbẹ re ma riẹ oware nọ Ọghẹnẹ ọ rọ kẹ eware iyoma uvẹ?

Emuhọ Eware Iyoma

Wo ohẹriẹ no oware nọ isu egagọ a be ta, Ebaibol na o dhesẹ uvẹ nọ Ọghẹnẹ ọ kẹ eyoma wọhọ oware nọ o kare otoriẹ hẹ. Ugogo oware nọ a re ro wo otoriẹ oware nọ o wha eyoma ze họ, evuhumu inọ Jihova ọ ma akpọ omuomu hu. Ọ ma imava ọsosuọ na gbagba, ababọ uzioraha. Jihova o rri iruo emama riẹ ọ tẹ ruẹ nọ “i re wowoma.” (Emuhọ 1:26, 31) O jọ ẹjiroro riẹ kẹ Adamu avọ Ivi re a ru Aparadase Idẹn kẹre ruọ otọakpọ na soso re a je yẹ emọ evawere nọ e rrọ otọ ọthọwẹ esuo oyoyou riẹ vọe.—Aizaya 45:18.

Eyoma o muhọ no obọ omama ẹzi jọ ze, ọnọ o wo isiuru inọ a rẹ gọe, dede nọ ọ kaki je yo ẹme kẹ Ọghẹnẹ vẹre. (Jemis 1:14, 15) Ọkparesuọ riẹ ọ jọ otọakpọ dhesẹ oma via okenọ ọ thuẹthuẹ họ imava ọsosuọ na re a ku oma gbei wọso Ọghẹnẹ. Ukpenọ a yo ẹme kẹ uthubro uvevẹ Ọghẹnẹ inọ a rẹ re hayo ka obọ te ure eriariẹ ewoma gbe eyoma na ha, Adamu avọ Ivi a tẹ kọrọ ubi-ure na re. (Emuhọ 3:1-6) Evaọ ere oruo, orọnikọ a veghe uzou kẹ Ọghẹnẹ ọvo ho rekọ a te je dhesẹ nọ a gwọlọ jọ otọ esuo obọ rai.

 A Kpare Avro Uruemu Ze

Ọkparesuọ nana evaọ Idẹn ọ kpare avro uruemu jọ ze, avro nọ o kpomahọ ehrugbakpọ soso. Ahwo-akpọ ọwọsuọ na a tẹ wha avro jọ ze sọ Jihova o bi su emama riẹ ziezi. Kọ Ọnọma na o wo udu nọ ọ rẹ rọ gwọlọ ẹmeoyo mi ahwo-akpọ? Kọ o te mai woma kẹ ahwo otẹrọnọ a su omobọ rai?

Oware nọ Jihova o ru kpahe avro nana nọ o kpomahọ esuo riẹ na u dhesẹ edhere owowa ọgbagba nọ ọ be rọ kpọ uyoyou, uvi-ẹdhoguo, areghẹ, gbe ogaga riẹ. Ọ hẹ sae rọ ogaga riẹ raha ọkparesuọ na no ẹsiẹsiẹe. Oyena o hae jọ gbagba evaọ aro mai, keme o wo udu nọ o re ro ru ere. Rekọ ere oruo o hae kuyo enọ uruemu nọ a fihọ otọ na ha. Hayo evaọ abọdekọ riẹ, Ọghẹnẹ ọ hẹ sae nwane kpairoro vrẹ uzioraha na. Ahwo jọ nẹnẹ a hai ti rri oyena wọhọ oware uyoyou. Ghele na, onana o hae kẹ uyo avro Setan na ha inọ u re woma kẹ ahwo-akpọ viere otẹrọnọ a su omobọ rai. Ofariẹ, kọ owojẹ oyena o gbẹ hae kẹ amọfa udu re a kie no edhere Jihova? Iyẹrẹ nọ e hai noi ze họ uye-oruẹ nọ u re kuhọ họ.

Evaọ areghẹ riẹ, Jihova ọ kẹ ahwo-akpọ uvẹ re a ru onọ u je rai evaọ omoke. Dede nọ onana o gwọlọ nọ a rẹ kẹ emuemu uvẹ evaọ omoke jọ, o kẹ ahwo-akpọ uvẹ no re a dhesẹ sọ a sai su omobọ rai avọ obokparọ ababọ Ọghẹnẹ, be rria lele itee obọ rai kpahe onọ u woma gbe onọ u yoma. Eme o no rie ze no? Ikuigbe ahwo-akpọ e vọ avọ ẹmo, ẹdhoguo-okienyẹ, okienyẹ, gbe uye-oruẹ. Ekie ọkparesuọ wọso Jihova na u ti ku avro nọ a jọ Idẹn kpare ze na họ riẹriẹriẹ.

Taure oke yena u te ti te, Ọghẹnẹ o dhesẹ uyoyou riẹ no ẹkwoma Ọmọ riẹ, Jesu Kristi, nọ ọ rọ kẹ, ọnọ o siobọno uzuazọ ohwo-akpọ riẹ wọhọ idhe ẹtanigbo. Onana o te lẹliẹ ahwo-akpọ ẹmeoyo wo ufuoma no obrukpe uzioraha gbe uwhu nọ aghẹmeeyo Adamu o wha ze. Ẹtanigbo na o rovie  edhere uzuazọ ebẹdẹ bẹdẹ fihọ no kẹ enọ i fi ẹrọwọ họ Jesu kpobi.—Jọn 3:16.

Ma wo imuẹro omosasọ ọrọ Jihova inọ uye-oruẹ ohwo-akpọ o rrọ kẹ ubroke. Ọso-ilezi na o kere nọ: “Omoke kakao, iru-umuomu e gbẹ te jọ họ; dede nọ wha bi ri oria riẹ ziezi na, ọ rẹ te jọ etẹe he. Rekọ enọ e rọ oma kpotọ, e rẹ te rọ otọ na reuku; oma o rẹ te were ae evaọ omofọwẹ.”—Olezi 37:10, 11.

Obaro Omofọwẹ gbe Evawere

Orugba eruẹaruẹ Ebaibol i dhesẹ inọ oke nọ Ọghẹnẹ o ti ro si ẹyao, uweri, gbe uwhu no o kẹle no. Muẹrohọ ẹruore eware ezi nọ e be tha nọ a rọ kẹ Jọn ukọ na evaọ eruẹaruẹ. O kere nọ: “Mẹ ruẹ odhiwu ọkpokpọ gbe akpọ ọkpokpọ. Keme odhiwu ọsosuọ avọ akpọ ọsosuọ e vrẹ no, abade ọvuọvo ọ gbẹ jọ họ. . . . Ọghẹnẹ [avọ ahwo-akpọ] a gbẹ te jọ, . . . Ọghẹnẹ o ve ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho, keme eware anwae evrẹ no.” Evaọ ẹme nọ o dhesẹ epanọ eyaa nana i muẹro te, a ta kẹ Jọn inọ: “Kere, keme eme nana kpobi eme uzẹme gbe ọtẹruo.”—Eviavia 21:1-5.

Kọ ẹvẹ kpahe ima-idu nọ e riẹ onahona ha nọ i whu no anwọ oke ọkparesuọ Idẹn na ze? Jihova ọ yeyaa nọ ọ te kpare enọ i whu no wariẹ ziọ uzuazọ. Pọl ukọ na ọ ta nọ: “Me wo ẹruore kpahe Ọghẹnẹ . . . inọ ẹkparomatha enọ ikiete avọ enọ ikiete he e rẹ te jarọ.” (Iruẹru 24:15) Ahwo nana a ti wo ẹruore uzuazọ evaọ akpọ nọ “ẹrẹreokie ọ be ria.”—2 Pita 3:13.

Wọhọ epanọ ọsẹ oyoyou ọ rẹ kuvẹ re ọmọ riẹ ọ ruẹ uye oma-obẹrọ ọdada fikinọ ọ riẹ nọ o te jọ obaro wha erere se i na, ere ọvona Jihova ọ kẹ ahwo-akpọ uvẹ re a ruẹ uye eyoma evaọ otọakpọ na omojọ. Dede na, eghale ebẹdẹ bẹdẹ e rrọ obaro be hẹrẹ enọ e gwọlọ ru oreva Ọghẹnẹ kpobi. Pọl o dhesẹ i rie nọ: “Keme enama na e jọ ọthobọ eware ifofe, orọnikọ oreva riẹ hẹ, rekọ fiki epa ọnọ o ru họ ọtahobọ eva ẹruore; kemena ukpuzou enama na a reti si ei no igbo egbogbo eruọ eva uvẹ oruaro emọ Ọghẹnẹ.”—Ahwo Rom 8:20, 21.

Onana ghinọ usi—orọnikọ itienọ ma be jọ ebe-usi se ku hayo nọ ma be jọ etehe-ughe ruẹ na ha, rekọ emamọ usi. Onana yọ usi nọ o mai woma kpobi, onọ u no obọ “Ọghẹnẹ omosasọ kpobi” ze, ọnọ ọ be ghinẹ daezọ mai.—2 Ahwo Kọrint 1:3.

[Iwoho nọ e rrọ ẹwẹ-obe avọ 6]

Oke nọ a kẹ na u dhesẹ no inọ ahwo-akpọ a sai su omobọ rai avọ obokparọ họ ababọ Ọghẹnẹ

[Ọnọ o wo uwoho]

Uviuwou Somalia: IFOTO UN 159849/M. GRANT; ọgbaudu enua: Ifoto USAF; ega-uye: Ifoto U.S. National Archives