Iwhowho Uvie A n’Iyẹre

Egwa Uvie I Rovie Fihọ kẹ Ahwo Kpobi

OKENỌ o je wuhrẹ ilele riẹ kẹ odibọgba ẹgbede na, Jesu Kristi ọ ta udu họ ai awọ re a “jọ ehru ebọ woro iei.” (Matiu 10:27) Ẹhẹ, a re ru odibọgba Ileleikristi rai evaọ ẹgbede, evaọ aro ahwo kpobi. Nya lele ohrẹ onana, Isẹri Jihova a bi ru iruo rai evaọ ẹgbede. Iruo ẹgbede nana o lẹliẹ Isẹri na fi ọwọsuọ kparobọ jẹ lẹliẹ ahwo muẹrohọ iruo rai ziezi no.

Dede nọ ohwo kpobi ọ rẹ sae ziọ iwuhrẹ ukoko erọ Isẹri Jihova, eme iyoma e be lẹliẹ ahwo jọ sienẹ h’emu re a ruọ Ọgwa Uvie. Onana o rrọ ere evaọ Finland. Rọkẹ amọfa jọ, ozọ u re mu ai re a kpohọ oria nọ a ri te ẹdọvo ho. O rrọ uruemu rai inọ okenọ a tẹ bọ Ọgwa Uvie okpokpọ hayo a tẹ ruẹrẹ ọgwa nọ a bọ no anwẹdẹ, a re rovie uwou na. A rẹ daoma gaga re a zizie erivẹ rai re a ziọ Ọgwa Uvie na ẹdẹ ọyena re a riẹ kpahe iruẹru Isẹri Jihova.

Evaọ oria jọ, Isẹri na a ruẹrẹ ẹvravra emagazini fihọ ẹdẹ nọ a gwọlọ ro rovie Ọgwa Uvie okpokpọ rai na. Isẹri ivẹ jọ a nyaku ọkpọkuọzae jọ nọ ọ ta nọ emagazini ọ Uwou-Eroro gbe Awake! na e rẹ were ẹe ese. Inievo na a tẹ ta kẹe kpahe uwou nọ a gwọlọ rovie na jẹ ta nọ a ti sei gb’oma kpohọ Ọgwa Uvie na. Ọzae na ọ tẹ ta nọ eva e te were iẹe re ọ nya. Aye riẹ, ọnọ ọ jẹ gaviezọ kẹ ẹme na, o te bo nọ, “Mẹ gwọlọ nya re!”

Nọ a rueva Ọgwa Uvie na, ọzae na o te rri wariẹ ọ tẹ ta nọ: “Uwou nana o rrọ tuẹtu vievie he. O rrọ wowoma je bi lo. A ta k’omẹ nọ Ọgwa Uvie na ọ te jọ tuẹtu!” Ọzae avọ aye na a keria omojọ no a tẹ yare ebe jọ nọ a fihọ oria obe evaọ ọgwa na.

Ukoko jọ o gwọlọ jọ obe-usi ẹwho na woro nọ a gwọlọ rovie ọgwa rai evaọ oke eromudhe Ọgwa Uvie na. Nọ ọ riẹ oware nọ a gwọlọ ru no, ọnọ o wuzou enọ i bi kere eme na ọ tẹ jiroro nnọ a kere kpahe uzoẹme na. Inievo na a tẹ rọwo, u kri hi emamọ uzoẹme jọ nọ o gba ubro ẹwẹ-obe, o tẹ roma via evaọ obe-usi na, onọ o ta kpahe erovie uwou na je dhesẹ iruẹru ukoko Isẹri Jihova nọ o rrọ ẹwho na.

Nọ a kporo uzoẹme na no, Osẹri jọ nọ ọ kpako no ọ tẹ nyaku ọrivẹ riẹ ọnọ ọ ta kẹe nọ: “Mẹ jọ obe-usi inẹnẹ na ruẹ uzoẹme uwoma jọ kpahe Isẹri Jihova!” Oniọvo na o te se isẹi kẹe je fi ibroshọ na, Jehovah’s Witnesses in the Twentieth Century họ ada kẹe.

U te no eme ethọthọ jọ nọ o rẹ kpọ no Isẹri Jihova uzou no, oghẹrẹ eruẹrẹfihọ eyena wọhọ erovie gbe eromudhe Egwa Uvie ekpokpọ e kẹ iwhowho-uvie na ọwhọ jẹ tuduhọ ai awọ no re a zizie amọfa buobu ziọ iwuhrẹ. Ẹhẹ, evaọ Finland kugbe ekwotọ efa buobu, ahwo a vuhumu no inọ Egwa Uvie Isẹri Jihova i rovie fihọ kẹ ahwo kpobi.