Enọ Ahwo nọ A s’Ebe
Enọ Ahwo nọ A s’Ebe
Kọ a sae rehọ iẹe wọhọ ọgwakugbe-ẹrọwọ re a dẹ uwou egagọ efa jọ rehọ jẹ rẹriẹe kpohọ Ọgwa Uvie?
N’otọ avọ otọ ze, Isẹri Jihova a rẹ whaha oghẹrẹ usu utioye na kugbe egagọ efa. Rekọ o tẹ make via ere, edadẹ itieye na o sae jọ ọgwakugbe-ẹrọwọ họ. A rẹ sai rri rie wọhọ edadẹ ẹsiẹvo gheghe. Orọnikọ ukoko Isẹri Jihova o gb’obọ kugbe egagọ efa re a bọ oria nọ ẹko egagọ ivẹ na a re ro ruiruo kugbe he.
Eme Jihova o re rri fihọ ọgwakugbe-ẹrọwọ? Roro kpahe ọkpọvio nana nọ Pọl ukọ na ọ kẹ na: “Wha ku oma rai gbe egedhọ họ. Keme didi okugbe ẹrẹreokie avọ umuomu a wo i? Hayo didi okuomagbe evevẹ avọ ebi a wo i? Didi atamu ọ rọ udevie Kristi avọ Belial? Hayo eme enọ e rọwo avọ enọ e rọwoho a wo kugbe? Didi ọrọwokugbe ọ rọ uwou Ọghẹnẹ avọ o rọ ẹdhọ? . . . Fikiere wha nya no udevie rai no, re wha jẹ hẹriẹ oma no ai no, ere Ọnowo ọ tai, wha rọ obọ te oware ugbegbe ovo ho; kẹsena me ve ti dede owhai rehọ.” (2 Ahwo Kọrint 6:14-17) Eme họ otofa “okugbe” gbe “ọrọwokugbe” nọ Pọl ọ ta na?
Okugbe nọ Pọl ọ fodẹ na o kpomahọ egagọ gbe iruẹru abọ-ẹzi ro kugbe egedhọ gbe enọ e rọwo ho. Ọ vẹvẹ ahwo Kọrint na unu mukpahe ‘emu nọ a rẹ re evaọ emẹjẹ izi igbegbe.’ (1 Ahwo Kọrint 10:20, 21) Fikiere, ọgwakugbe-ẹrọwọ họ obọ nọ a re wo kugbe evaọ egagọ hayo usu abọ-ẹzi nọ a re wo kugbe egagọ efa. (Ọnyano 20:5; 23:13; 34:12) A tẹ dẹ uwou nọ ahwo egagọ efa a jẹ jọ gọ vẹre mi ae, ẹjiroro riẹ họ re a rẹriẹ uwou na kpohọ Ọgwa Uvie. Taure a tẹ te rehọ iẹe ruiruo wọhọ Ọgwa Uvie, a re si eware nọ i wo obọ kpahe egagọ erue kpobi noi no. Nọ a tẹ ruẹrẹ uwou na no, a vẹ rehọ iẹe mudhe kẹ Jihova re a jariẹ gọe ọvo. Uvumọ ọrọwokugbe hayo okugbe ọ rrọ udevie egagọ uzẹme avọ ọrọ erue he.
A tẹ be nya onya edadẹ itieye na, a re ku usu okpekpe kugbe ahwo abọdekọ na ha, yọ onya na o rẹ jọ orọ edadẹ na ọvo. Ahwo ukoko Ileleikristi na a re roro kpahe unuovẹvẹ Pọl re a whaha ‘oma ukugbe egedhọ.’ Dede nọ ma be wọ oma kpehru vi ahwo egagọ efa ha, ma rẹ whaha oma nọ ma re kugbe ai hayo egagọ rai nọ ma re dh’oma họ. *
Kọ ẹvẹ kpahe ukoko nọ o rẹ haya uwou mi egagọ efa jọ? Uwou nọ a rẹ haya o rẹ wha usu ẹro ọruẹ ẹsikpobi ze, yọ onana o thọ. A tẹ make be haya uwou na kẹ iruẹru ẹsiẹvo jọ ọvo, ugboma ekpako na a re roro kpahe eware enana: Kọ iwoho egagọ jọ e te jọ eva hayo otafe uwou na? Ẹvẹ ahwo ẹwhọ na a ti rri rie re ma jọ uwou na ru iruẹru egagọ? Kọ ohwo jọ evaọ ukoko na o ti zoruẹ otẹrọnọ ma jọ uwou na ru iruẹru egagọ? (Matiu 18:6; 1 Ahwo Kọrint 8:7-13) Ekpako na a re roro kpahe eme enana a vẹ rọ ere jẹ iroro. A re roro kpahe obroziẹ-iroro rai gbe orọ ukoko na, nọ a tẹ be jẹ iroro re a dẹ hayo rẹriẹ uwou utioye na kpohọ Ọgwa Uvie.
[Oruvẹ-obotọ]
^ edhe-ẹme 6 Rri Uwou-Eroro Na, April 15, 1999, ẹwẹ-obe avọ 28, gbe 29 (ọrọ Oyibo), rọkẹ ovuẹ kpahe usu ekiọthuọ nọ a re wo kugbe ikoko nọ Jihova ọ jẹ rehọ họ.
[Uwoho nọ o rrọ ẹwẹ-obe avọ 31]
A dẹ uwou nana nọ o jọ uwou-egagọ ahwo Ju vẹre, a tẹ rẹriẹ iẹe kpohọ Ọgwa Uvie