Fikieme O Jẹ Bẹ Tere Re A Wou Unu?

EVAỌ July 2000, Ogbẹgwae Izi ọrọ Ubrotọ California evaọ obọ United States a fi uzi jọ họ onọ o rẹ wọ owha no ohwo uzou otẹrọnọ ohwo na o wounu kẹ ohwo nọ ọ nwoma fiki oware nọ ọ so. Fikieme a ro fi uzi na họ? A mu ẹro họ inọ otẹrọnọ oware ikpregede o wha omonwa hayo ọraha ze, ahwo a rẹ kaki wounu hu fikinọ u re ti dhesẹ oma via evaọ obọ okọto nọ a riabe. Evaọ abọdekọ riẹ, eva e rẹ sae dha enọ i roro nọ ohwo ọdekọ na ọ hai wounu kẹ ai, yọ a gbe rri otọ mu hu, omonwa osese o vẹ wha ẹwhọ ologbo ze.

Uzẹme, o r’oja ha re who wounu kẹ omonwa nọ whọ so ho. Yọ ẹsejọ o rẹ sae jọ oware areghẹ re whọ ma ẹme ra te. Itẹ anwae jọ o ta nọ: “No eme i re buobu, ọtathọ ọ rẹ kariẹ hẹ, rekọ ọnọ ọ rẹ yọrọ igbenu riẹ o wo areghẹ.” (Itẹ 10:19; 27:12) Ghele na, whọ rẹ sai fi obọ họ je dhesẹ ororokẹ.

Dede na, kọ o gbẹ rrọ uzẹme inọ ahwo buobu a siọ unu-uwou ba no, o tẹ make rọnọ ohwo ọdekọ o ti tu ai  ẹdhọ họ? Evaọ obọ uwou, aye uwou-orọo ọ sai bruenu nọ, ‘Ọzae mẹ o re wounu kẹ uvumọ oware he.’ Evaọ oria iruo, ọsẹro-iruo ọ sae ta nọ, ‘Ahwo iruo mẹ a rẹ rọwo iruthọ rai hi, yọ udugaga a re ro wou unu.’ Evaọ obọ isukulu, iticha ọ sae n’iyẹrẹ nọ, ‘A bi wuhrẹ emọ họ re a ta nọ rọ vrẹ omẹ.’

Oware jọ nọ ohwo ọ gbẹ rọ kaki wounu hu họ ozọ nnọ a te se unu-uwou riẹ. Fikinọ ọ gwọlọ re ahwo a gb’ẹsọ gb’uye họ iẹe oma ha, ọ rẹ gwọlọ ta oware nọ o rrọ udu riẹ hẹ. Ẹsejọ dede, ohwo nọ a ruthọ na ọ sai gbolo ovao kẹ ọnọ o ru rie thọ na, nọ u re ru ẹruẹhọ bẹ gaga.

Oware ofa jọ nọ o rẹ sai ru ahwo jọ nọ a gbẹ gwọlọ wounu hu họ ababọ ọdawẹ kẹ iroro amọfa. A rẹ sai roro nọ, ‘Mẹ tẹ maki wounu kẹhẹ, oware nọ o raha na o raha no.’ Amọfa a rẹ gwọlọ ta nọ a ruthọ họ fiki ozọ uye nọ o rẹ sai noi ze. A re roro nọ, ‘Kọ a gbe ti kru omẹ ta nọ mẹ hwa oware nọ o raha na?’ Dede na, omoya họ ugogo ẹbẹbẹ ologbo nọ u re ru ahwo nọ a gbẹ rọ rọwo oruthọ họ. Ohwo nọ o re roro oma riẹ kpehru vrẹ ẹta re ọ ta nọ “me ruthọ” ọ be jọ eva riẹ ta nọ, ‘Oma o te vo omẹ re mẹ ta nọ me ru oware uyoma oyena. Ahwo a gbẹ te k’omẹ adhẹẹ hẹ.’

Makọ oware nọ o wha riẹ ze kpobi, o rẹ gbẹdẹ ahwo jọ unu gaga re a wounu. Rekọ, u ghine fo re a wounu? Eme họ irere unu-uwou?

[Uwoho nọ o rrọ ẹwẹ-obe avọ 3]

“A bi wuhrẹ emọ họ re a ta nọ rọ vrẹ omẹ”

[Uwoho nọ o rrọ ẹwẹ-obe avọ 3]

“Ahwo iruo mẹ a rẹ rọwo iruthọ rai hi”

[Uwoho nọ o rrọ ẹwẹ-obe avọ 3]

“Ọzae mẹ o re wou unu hu”