Ileleikristi Nọ E Rrọ Abọ Ọvuọvo Ho Evaọ Edẹ Urere Na
Ileleikristi Nọ E Rrọ Abọ Ọvuọvo Ho Evaọ Edẹ Urere Na
“A rọ e rọ akpọ na ha, wọhọ epanọ mẹ rọ ọ rọ akpọ na ha.”—JỌN 17:16.
1, 2. Eme Jesu ọ ta kpahe usu ilele riẹ kugbe akpọ na, kọ didi enọ eme riẹ na e kpare ze?
EVAỌ aso urere uzuazọ riẹ wọhọ ohwo-akpọ ọgbagba, Jesu ọ lẹ olẹ uthethei jọ evaọ iraro ilele riẹ. Evaọ olẹ na, ọ ta oware jọ nọ u dhesẹ oghẹrẹ nọ uzuazọ Ileleikristi uzẹme kpobi o rẹ jọ. Be ta kpahe ilele riẹ, ọ ta nọ: “Mẹ kẹ rae ẹme ra; akpọ na o te mukpahe ae, fiki epanọ a rọ e rọ akpọ na ha, wọhọ epanọ mẹ rọ ọ rọ akpọ na ha. Mẹ lẹ nọ who si ai no eva akpọ na ha, rekọ re who siwi ai no obọ oyoma na. A rọ e rọ akpọ na ha, wọhọ epanọ mẹ rọ ọ rọ akpọ na ha.”—Jọn 17:14-16.
2 Isiava Jesu ọ ta inọ ilele riẹ a rẹ jọ erọ akpọ na ha. Ofariẹ, omohẹriẹ oyena o te wha ebẹbẹ ze—akpọ na o ti mukpahe ae. Ghele na, udu u re bru Ileleikristi hi; Jihova ọ te sẹro rai. (Itẹ 18:10; Matiu 24:9, 13) Fiki eme ọ Jesu yena, u re woma re ma nọ inọ: ‘Fikieme Ileleikristi uzẹme a gbẹ rọ rrọ erọ akpọ na ha? Eme u dhesẹ re a sioma no akpọ na? Otẹrọnọ akpọ na o mukpahe Ileleikristi, ẹvẹ a re rri akpọ na? Maero, ẹvẹ a re rri egọmeti akpọ na?’ Iyo Ikereakere kẹ enọ nana i w’uzou keme i kpomahọ omai kpobi.
“Ma Riẹ nọ Mai E rọ Ọghẹnẹ”
3. (a) Eme o ru omai hẹriẹ oma no akpọ na? (b) Didi imuẹro e riẹ inọ akpọ na ọ rrọ “obọ ogaga oyoma na”?
3 Usu okpekpe mai kugbe Jihova yọ ẹjiroro jọ nọ ma gbẹ rọ rrọ erọ akpọ na ha. Jọn ukọ na o kere nọ: “Ma riẹ nọ mai e rọ Ọghẹnẹ, jegbe akpọ na ọsoso ọ rọ obọ ogaga oyoma na.” (1 Jọn 5:19) Eme nọ Jọn ọ ta kpahe akpọ na e ghinẹ rrọ uzẹme . Emo, ethube, evega, okienyẹ, ofruriọ, gbe ọfariẹ-ogbe nọ i bi titi nẹnẹ na e kẹ imuẹro inọ Setan họ ọnọ ọ rrọ emu rai, orọnikọ Ọghẹnẹ hẹ. (Jọn 12:31; 2 Ahwo Kọrint 4:4; Ahwo Ẹfẹsọs 6:12) Okenọ ohwo o te zihe ruọ omọvo Isẹri Jihova, o re ru hayo jẹ iruemu ethọthọ itieye na rehọ họ, oyena u ru nọ ọ gbẹ rrọ ọrọ akpọ na ha.—Ahwo Rom 12:2; 13:12-14; 1 Ahwo Kọrint 6:9-11; 1 Jọn 3:10-12.
4. Idhere vẹ ma re ro dhesẹ nọ ma rrọ rọkẹ Jihova?
4 Wo ohẹriẹ no akpọ na, Jọn ọ ta nọ Ileleikristi a rrọ “e rọ Ọghẹnẹ.” Enọ e rehọ oma rai mudhe kẹ Jihova kpobi a rrọ kẹe. Pọl ukọ na ọ ta nọ: “Ma tẹ rọ uzuazọ, ma rọ uzuazọ kẹ Ọnowo na, ma te whu, ma whu kẹ Ọnowo na; fikiere ma zọ, hayo ma whu, yọ mai erọ Ọnowo na.” (Ahwo Rom 14:8; Olezi 116:15) Fikinọ ma rrọ kẹ Jihova, ọye ọvo ma rẹ gọ. (Ọnyano 20:4-6) Fikiere, Oleleikristi uzẹme ọ rẹ rọ uzuazọ riẹ le isiuru-ọkwa-kpehru akpọ na ọvuọvo ho. Yọ dede nọ ọ rẹ rọ adhẹẹ kẹ eware oka erẹwho, ọ rẹ gọ ae he, evaọ uruemu hayo evaọ udu riẹ. Ọ rẹ gọ ikpahwo aruọza hayo eghẹrẹ emedhọ efa erọ ọgbọna vievie he. Uzẹme, ọ rẹ rọ adhẹẹ kẹ udu amọfa nọ a re ro ru onọ u je rai, rekọ Ọnọma na ọvo ọ rẹ gọ. (Matiu 4:10; Eviavia 19:10) Onana u ru rie hẹriẹ oma no akpọ na re.
“Uvie Mẹ [O Rrọ] Orọ Akpọ na Ha”
5, 6. Ẹvẹ omarokpotọ kẹ Uvie Ọghẹnẹ u ro ru omai hẹriẹ oma no akpọ na?
5 Ileleikristi yọ ilele Jesu Kristi gbe enọ e rrọ kẹ Uvie Ọghẹnẹ, nọ u ru rai hẹriẹ oma no akpọ na re. Okenọ a je gu Jesu ẹdhọ evaọ aro Pọntiọs Pailet, ọ ta nọ: “Uvie mẹ [o rrọ] orọ akpọ na ha; uvie mẹ ohẹ jọ orọ akpọ na, idibo mẹ e hẹ họre kẹ omẹ re a se omẹ ba ẹrehọ kẹ ahwo Ju; rekọ enẹna uvie mẹ orọ etenẹ hẹ.” (Jọn 18:36) Ẹkwoma Uvie na a ti ro ru odẹ Jihova fo, kpare esuo riẹ kpehru, a vẹ jẹ jọ otọakpọ na ru oreva riẹ wọhọ epanọ a rrọ obọ odhiwu ru na. (Matiu 6:9, 10) Evaọ etoke odibọgba riẹ kpobi, Jesu o whowho usiuwoma Uvie na, ọ tẹ jẹ ta nọ ilele riẹ i re ti whowho iei rite ekuhọ uyerakpọ na. (Matiu 4:23; 24:14) Evaọ 1914, eme ọ eruẹaruẹ nọ e rrọ Eviavia 11:15 i te rugba: “Uvie akpọ nana u re ti zihe ruọ uvie Ọnowo mai gbe orọ Kristi riẹ, ọye o re ti suẹ bẹdẹ bẹdẹ.” Ẹdẹjọ kẹle na, Uvie obọ odhiwu oyena ọvo o rẹ te jọ ogaga nọ u ti su ahwo-akpọ kpobi. (Daniẹl 2:44) Okejọ u ti te nọ makọ isu egọmeti a ti ro vuhu udu-esuo riẹ mu.—Olezi 2:6-12.
6 Avọ oyena kpobi nọ a wo fihọ iroro, Ileleikristi uzẹme nẹnẹ a rrọ kẹ Uvie Ọghẹnẹ, yọ a bi lele ohrẹ Jesu re a ‘hẹ kake gwọlọ uvie na gbe ẹrẹreokie Ọghẹnẹ.’ (Matiu 6:33) Orọnikọ oyena u re ru ai wọso orẹwho nọ a be rria ha, rekọ u re ru ai hẹriẹ oma no akpọ na evaọ abọ-ẹzi. Wọhọ epanọ o jọ evaọ ikpe-udhusoi ọsosuọ, ugogo iruo Ileleikristi nẹnẹ họ ‘re a se emamọ isẹri kpahe uvie Ọghẹnẹ.’ (Iruẹru 28:23) Uvumọ egọmeti ohwo-akpọ ọ riẹ hẹ nọ o w’udu nọ ọ rẹ rọ whaha iruo yena nọ Ọghẹnẹ ọ rọ kẹ ae na.
7. Fikieme Ileleikristi uzẹme a gbẹ rrọ uvumọ abọ họ, kọ ẹvẹ a ro dhesẹ onana no?
7 Fikinọ Jihova họ ọnọ o wo rai gbe nnọ a rrọ ilele Jesu gbe enọ e rrọ kẹ Uvie Ọghẹnẹ, Isẹri Jihova a fi oma họ abọ ọvuọvo ho evaọ ozighi erẹwho ọrọ ikpe-udhusoi avọ 20 gbe ọrọ avọ 21 na. A rrọ uvumọ abọ họ, a re wọ ugbeke le uvumọ ohwo ho, yọ a be t’eme mukpahe uvumọ egọmeti hi. Ẹkwoma edhesẹvia ẹrọwọ ọgaga evaọ aro ọwọsuọ nọ ọ rro thesiwa, a lele ehri-izi nọ a ta kẹ isu Nazi erọ Germany evaọ 1934 na no: “Ma wo uvumọ isiuru kpahe iruẹru esuo ho, rekọ uvie Ọghẹnẹ nọ o rrọ otọ Kristi Ovie riẹ ma rehọ oma mai kpobi kẹ. Ma be nwa uvumọ ohwo oma ha. O te were omai re ma rria dhedhẹ je ru ewoma kẹ ahwo kpobi wọhọ epanọ uvẹ u rovie k’omai te.”
Unuẹworo Gbe Enyukọ Rọkẹ Kristi
8, 9. Edhere vẹ Isẹri Jihova nẹnẹ a rọ rrọ unuẹworo gbe enyukọ, kọ ẹvẹ onana u ro kpomahọ usu rai kugbe erẹwho na?
8 Pọl o dhesẹ oma riẹ gbe ibe Ileleikristi nọ a wholo wọhọ ‘unuẹworo Kristi, epaọ ẹsenọ Ọghẹnẹ ọ be rehọ ae ta ẹme.’ (2 Ahwo Kọrint 5:20; Ahwo Ẹfẹsọs 6:20) Anwọ 1914 ze, a rẹ sae ta gbagba kpahe Ileleikristi nọ a rọ ẹzi wholo na inọ a rrọ unuẹworo rọkẹ Uvie Ọghẹnẹ, Uvie nọ a rrọ “emọ” riẹ na. (Matiu 13:38; Ahwo Filipai 3:20; Eviavia 5:9, 10) Ofariẹ, Jihova ọ rehọ “otu obuobu” ọrọ “igodẹ efa” no erẹwho na ze no, Ileleikristi nọ i wo ẹruore otọakpọ, re a tha emọ nọ a wholo na uke evaọ iruo nọ a jẹ rrọ unuẹworo na. (Eviavia 7:9; Jọn 10:16) A rẹ sai se “igodẹ efa” enana “enyukọ” erọ Uvie Ọghẹnẹ.
9 Unuẹworo avọ ahwo riẹ a re dhe oma họ iruẹru orẹwho nọ a vi rai kpohọ na ha. Epọvo na re, Ileleikristi a rẹ jọ uvumọ abọ họ evaọ iruẹru esuo ọrọ erẹwho akpọ na. A rẹ ruabọ hayo wọso orẹwho, uyẹ, uyerakpọ, hayo utu ahwo jọ fiki oghẹrẹ uyero abọ-ugho rai hi. (Iruẹru 10:34, 35) Ukpoye, a re “ru iruo ezi kẹ ahwo kpobi.” (Ahwo Galesha 6:10) Seomaba-edhehọ Isẹri Jihova u dhesẹ nọ uvumọ ohwo ọ sae rọ obọ s’udu se ovuẹ rai hi re o gu unoma nọ fikinọ a rrọ abọdekọ evaọ ẹwhọ uyẹ, orẹwho, hayo orua.
A be Rehọ Uyoyou Vuhu Ai
10. Ẹvẹ uyoyou u w’uzou te kẹ Oleleikristi?
10 Fiba eware nọ a t’ẹme te evaọ obehru na, Ileleikristi a rrọ abọ ọvuọvo ho evaọ iruẹru akpọ na fiki usu rai kugbe ibe Ileleikristi efa. Jesu ọ ta kẹ ilele riẹ nọ: “Fiki onana ahwo kpobi a jẹ riẹ nọ whai ilele mẹ re whai ohwo o te you ohwo.” (Jọn 13:35) Uyoyou inievo yọ abọ ologbo orọ ẹjọ Oleleikristi. (1 Jọn 3:14) Wọhọ epanọ usu riẹ kugbe Jihova avọ Jesu o kpekpe te na, usu nọ Oleleikristi o wo kugbe ibe Ileleikristi o kpekpe gaga. Orọnikọ ahwo nọ a gbẹ rrọ ukoko ẹwho riẹ ọvo o re you hu. O rẹ kẹre te ‘imoni riẹ nọ e rrọ akpọ na soso.’—1 Pita 5:9.
11. Ẹvẹ uyoyou Isẹri Jihova kẹ ohwohwo u kpomahọ uruemu rai no?
11 Nẹnẹ, Isẹri Jihova a bi dhesẹ uyoyou inievo rai ẹkwoma erugba eme ọ Aizaya 2:4 na: “A ve ti duwu egbọdọ rai zihe ruọ etọẹkpẹ gbe izuẹ rai zihe ruọ ubru-ebe; orẹwho o gbẹ te wọ ẹmo bru orẹwho ho, hayo wuhrẹ kpahọ ẹmo-ofio ofa ha.” Fikinọ Jihova o wuhrẹ i rai no, Ileleikristi uzẹme a rrọ udhedhẹ kugbe Ọghẹnẹ je kugbe ohwohwo. (Aizaya 54:13) Fikinọ a you Ọghẹnẹ gbe inievo rai, o rẹ jọ oware aghọ re a tọlọ ugbeke ro kpe ibe Ileleikristi—hayo omọfa jọ dede—evaọ ekwotọ efa. Udhedhẹ gbe okugbe rai yọ abọ ologbo ọrọ egagọ rai, odhesẹvia inọ a ghine wo ẹzi Ọghẹnẹ. (Olezi 133:1; Maeka 2:12; Matiu 22:37-39; Ahwo Kọlọsi 3:14) A be “gwọlọ udhedhẹ, [jẹ] dhẹ lele iei,” keme a riẹ nọ “ibiaro ỌNOWO i bi ri ikiẹrẹe.”—Olezi 34:14, 15.
Epanọ Ileleikristi A Re Rri Akpọ Na
12. Didi uruemu Jihova kpahe ahwo akpọ na Isẹri Jihova a be raro kele, kọ evaọ oghẹrẹ vẹ?
12 Jihova o brukpe akpọ nana no, rekọ o ri gu ahwo nọ a rrọ akpọ na kpobi ẹdhọ họ. Ọ te rọ ẹkwoma Jesu ru ere evaọ ẹruoke Riẹ. (Olezi 67:3, 4; Matiu 25:31-46; 2 Pita 3:10) Obọnana, o bi dhesẹ uyoyou ulogbo kẹ ahwo-akpọ. Ọ tubẹ rehọ Ọmọ ọvo riẹ kẹ re ohwo kpobi o wo uvẹ nọ o re ro wo uzuazọ ebẹdẹ bẹdẹ. (Jọn 3:16) Wọhọ Ileleikristi, ma be raro kele uyoyou Ọghẹnẹ ẹkwoma amọfa nọ ma be ta kẹ kpahe eruẹrẹfihotọ Ọghẹnẹ kẹ esiwo, dede nọ ahwo a bi gbolo ovao kẹ omodawọ mai ẹsibuobu.
13. Ẹvẹ ma re rri isu egọmeti?
13 Ẹvẹ ma re rri isu nọ e rrọ akpọ na? Pọl ọ k’uyo na nọ o kere nọ: “Jọ kohwo kohwo oyo ẹme enọ a kẹ udu na. Keme ogaga ovo orọ họ ajokpa onọ uno obọ Ọghẹnẹ ze, gbe enọ a kẹ udu na Ọghẹnẹ ọvo ọ rehọ e rai mu.” (Ahwo Rom 13:1, 2) Ahwo-akpọ a rrọ ekwa “enọ a kẹ udu” (ejọ rai i kpehru vi edekọ rekọ ai kpobi a rrọ otọ Jihova) keme Erumeru na ọye ọ kẹ rai uvẹ re a jọ ekwa na. Oleleikristi ọ rẹ roma kpotọ kẹ enọ a kẹ udu na keme oyena o rrọ abọjọ ẹmeoyo riẹ kẹ Jihova. Rekọ ẹvẹ otẹrọnọ egọmeti ahwo-akpọ a gwọlọ oware nọ Ọghẹnẹ ọ ghọ?
Izi Ọghẹnẹ gbe Erọ Siza
14, 15. (a) Evaọ ẹme kpahe ẹmeoyo, edhere vẹ Daniẹl ọ sae rọ whaha ẹbẹbẹ ologbo jọ? (b) Eme emọ Hibru esa na a ru evaọ okenọ o jọ bẹbẹ re a dhẹ no odawọ izi nọ i mukpahe uzi Ọghẹnẹ?
14 Daniẹl gbe egbẹnyusu esa riẹ a kẹ emamọ oriruo ọrọ epanọ a re ru re omarokpotọ kẹ egọmeti ahwo-akpọ avọ omarokpotọ kẹ udu-esuo Ọghẹnẹ e jọ owowa. Okenọ emoha ene Hibru na a jọ igbo evaọ Babilọn, a yo ẹme kẹ izi orẹwho na fikiere a tẹ riẹ obọ họ ai vẹrẹ vẹrẹ kẹ obọdẹ ewuhrẹ. Nọ Daniẹl ọ ruẹ nọ ewuhrẹ na ọ sai ti su kpohọ ẹraha Uzi Jihova, ọ tẹ rọ ẹme na kpọ oletu nọ ọ be sẹro rai na ozọ. Fikiere, a tẹ gbẹ obọdẹ edhere nọ a rẹ rọ rehọ adhẹẹ kẹ obroziẹ-iroro emọ Hibru ene na. (Daniẹl 1:8-17) Isẹri Jihova a bi lele oriruo Daniẹl okenọ a tẹ rọ ona dhesẹ edikihẹ rai kẹ enọ e rrọ ọkwa re u fi obọ họ whaha ebẹbẹ nọ i fioka ha.
15 Rekọ, evaọ obaro riẹ, a te fi uzi jọ họ nọ u kpeke kugbe erọ Ọghẹnẹ. Ovie Babilọn na ọ rehọ ẹmema ologbo jọ vi ukiekpotọ Dura o te j’uzi kẹ iletu ikpehru, jegbe isu ibrotọ na, re a kokohọ kẹ erovi riẹ. Oke nana yọ a rehọ egbẹnyusu esa Daniẹl na mu isu ibrotọ erọ Babilọn no, fikiere uzi na o gba rai. Nọ a ru ehaa na te oria jọ no, o tẹ gwọlọ nọ ahwo na kpobi a re ruwẹ kẹ ẹmema na. Rekọ emọ Hibru na a riẹ inọ onana u mukpahe uzi Ọghẹnẹ. (Iziewariẹ 5:8-10) Fikiere nọ ahwo na kpobi a ruwẹ, a te gbe dikihẹ. Fikinọ a yo ẹme kẹ uzi ovie na ha, a rọ ovao dhe uwhu imuozọ, o gbẹ rrọ edhere igbunu nọ a ro siwi izuazọ rai hi; ghele na a salọ nọ a re fi uzuazọ rai họ awa ukpenọ a rẹ ghẹmeeyo kẹ Jihova.—Daniẹl 2:49–3:29.
16, 17. Didi uyo ikọ na a kẹ okenọ a j’uzi kẹ ai inọ a siọ usiuwoma ota ba, kọ fikieme?
16 Evaọ ikpe-udhusoi ọsosuọ na, a se ikọ Jesu Kristi dikihẹ aro isu ahwo Ju na evaọ Jerusalẹm a te j’uzi kẹ ai re a siọ usiuwoma ba ẹta evaọ odẹ Jesu. Eme a ru? Jesu o vi rai uwou no re a ru ilele evaọ erẹwho kpobi, onọ u kugbe Judia. Ọ tẹ jẹ ta kẹ ai re a jọ isẹri riẹ evaọ Jerusalẹm, jegbe abọ akpọ na soso. (Matiu 28:19, 20; Iruẹru 1:8) Ikọ na a riẹ inọ ujaje nọ Jesu ọ kẹ rai na yọ oreva Ọghẹnẹ kẹ ai. (Jọn 5:30; 8:28) Fikiere, a tẹ ta nọ: “Ma re yo ẹme Ọghẹnẹ vi o rọ ahwo.”—Iruẹru 4:19, 20; 5:29.
17 Orọnikọ ikọ na a je veghe uzou hu. (Itẹ 24:21) Dede na, okenọ isu ahwo-akpọ a j’uzi inọ a ru oreva Ọghẹnẹ hẹ, uyo nọ a rẹ sae kẹ kpobi họ, ‘Ọghẹnẹ ma re yo ẹme kẹ, orọnikọ ohwo ho.’ Jesu ọ ta inọ ma rẹ rehọ “eware Siza kẹ Siza, gbe eware Ọghẹnẹ kẹ Ọghẹnẹ.” (Mak 12:17) Ma tẹ ghẹmeeyo kẹ uzi Ọghẹnẹ fikinọ ohwo-akpọ jọ ọ ta k’omai nọ ma ru ere, koyehọ ma be rọ eware Ọghẹnẹ kẹ ohwo-akpọ. Ukpoye, ma rẹ rehọ eware nọ i te Siza kpobi kẹ Siza, rekọ ma vuhumu nnọ Jihova họ ọnọ ọ mai kpehru. Ọye họ Osu Ehrugbakpọ na, Ọnọma na, uzedhe Ehri udu-esuo kpobi.—Eviavia 4:11.
Ma Ti Dikihẹ Ga
18, 19. Didi emamọ edikihẹ inievo mai buobu a rehọ no, kọ ẹvẹ ma sai ro lele oriruo rai?
18 Obọnana, egọmeti akpọ na a riẹ kpahe edikihẹ Isẹri Jihova nọ a rọ rrọ abọ ọvuọvo ho na, yọ oyena o be were omai eva. Rekọ evaọ ekwotọ jọ, Isẹri na a rẹriẹ ovao ku ọwọsuọ ologbo no. Evaọ etoke ikpe-udhusoi avọ 20 na kpobi ri te enẹna, uye o bẹ inievo mai jọ gaga no, evaọ abọ-ẹzi a be họre “uvi ohọre orọwọ na.”—1 Timoti 6:12.
19 Ẹvẹ ma sai ro dikihẹ ga wọhọ inievo mai eyena? Orọ ọsosuọ, ma kareghẹhọ nnọ ma re rẹro ọwọsuọ. U re guegue hayo gb’omai unu hu nọ ma tẹ nyaku ei. Pọl ọ vẹvẹ Timoti unu nọ: “Ahwo kpobi nọ a guọlọ uzuazọ Ọghẹnẹ uyero eva Kristi Jesu a re wo ukpokpoma.” (2 Timoti 3:12; 1 Pita 4:12) Evaọ akpọ nọ ogaga Setan o jọ rọ obọ duotọ, eme ma gbẹ rọ nyaku ọwọsuọ họ? (Eviavia 12:17) Nọ ma te kru ẹrọwọ mai ga, u ti he wo ahwo jọ nọ ‘u ti gbe unu a vẹ te l’omai eka.’—1 Pita 4:4.
20. Uzẹme vẹ nọ o rẹ kẹ ọbọga a kareghẹhọ omai?
20 Orọ avivẹ, u mu omai ẹro inọ Jihova avọ enjẹle riẹ a te th’omai uke. Wọhọ epanọ Elaesha ọrọ oke anwae ọ ta, “enọ e rọ kugbe omai i bu vi enọ e rọ kugbe ai.” (2 Ivie 6:16; Olezi 34:7) O sae jọ nọ fiki emamọ ẹjiroro jọ, Jihova ọ rẹ kuvẹ kẹ otunyẹ no obọ otu ọwọsuọ ze evaọ ubroke. Ghele na, ọ te k’omai ẹgba nọ ma re ro thihakọ. (Aizaya 41:9, 10) A kpe ejọ no, rekọ oyena o rẹ lẹliẹ oma lọhọ omai hi. Jesu ọ ta nọ: “Wha dhozọ enọ i re kpe oma na ha, rekọ a rẹ sai kpe ẹzi hi; rekọ ikpoye, wha dhẹ ọnọ ọ rẹ raha [ẹzi] gbe oma evaọ ẹri-erae.” (Matiu 10:16-23, 28) Mai yọ “enọ e be rria ubroke” gheghe evaọ uyerakpọ ọnana. Ma be rehọ oke mai evaọ eyero ọnana ro le “uvi uzuazọ” na, uzuazọ ebẹdẹ bẹdẹ evaọ akpọ ọkpokpọ Ọghẹnẹ. (1 Pita 2:11; 1 Timoti 6:19) Uvumọ ohwo-akpọ ọ sai mi omai osa yena ha thakpinọ ma kru ẹrọwọ mai kẹ Ọghẹnẹ.
21. Eme ma re fihọ iroro ẹsikpobi?
21 Fikiere, ajọ ma kareghẹhọ usu ọghọ nọ ma wo kugbe Jihova Ọghẹnẹ. Ajọ ma wo ovuhumu ẹsikpobi kẹ oghale orọ ẹjọ ilele Kristi gbe enọ e rrọ kẹ Uvie na. Ajọ ma rehọ udu kpobi you inievo mai, jẹ ghọghọ fiki uyoyou nọ a bi dhesẹ kẹ omai. Maero, ajọ ma yo eme ọso-ilezi na: “Hẹrẹ ỌNOWO; kru oma ga, jọ udu u kie owhẹ vi; uzẹme, hẹrẹ ỌNOWO!” (Olezi 27:14; Aizaya 54:17) Kẹsiẹe, wọhọ Ileleikristi efa nọ a rẹ sai kele he nọ e kake rehọ omai jọ, ma ve ti dikihẹ ga avọ ẹruore mai nọ ọ dọmu—Ileleikristi ẹrọwọ nọ e rrọ uvumọ abọ họ enọ e rrọ erọ akpọ na ha.
Kọ Whọ Sae k’Iyo Nana Vevẹ?
• Ẹvẹ usu mai kugbe Jihova u ro ru omai hẹriẹ oma no akpọ nana?
• Wọhọ ahwo nọ a rrọ kẹ Uvie Ọghẹnẹ, ẹvẹ ma sai ro kru edikihẹ ma rrọ uvumọ abọ họ evaọ akpọ nana?
• Idhere vẹ uyoyou kẹ inievo mai u re ro ru omai siọ abọ jọ ba ẹjọ, hẹriẹ oma no akpọ na?
[Enọ Uwuhrẹ]
[Uwoho nọ o rrọ ẹwẹ-obe avọ 25]
Ẹvẹ omarokpotọ mai kẹ Uvie Ọghẹnẹ u re ro kpomahọ usu mai kugbe akpọ na?
[Uwoho nọ o rrọ ẹwẹ-obe avọ 26]
Ahwo Hutu gbe Tutsi nọ e be rọ evawere ruiruo kugbe
[Uwoho nọ o rrọ ẹwẹ-obe avọ 27]
Inievo Ileleikristi Ju gbe Arab
[Uwoho nọ o rrọ ẹwẹ-obe avọ 27]
Ileleikristi erọ Serbia, Bosnia, gbe Croatia a be re awere usu ohwohwo
[Uwoho nọ o rrọ ẹwẹ-obe avọ 28]
Owọ vẹ u fo nọ ma rẹ jẹ okenọ isu i te j’uzi k’omai re ma raha uzi Ọghẹnẹ?