Jihova Ọ Be Sẹro Ra
Jihova Ọ Be Sẹro Ra
“Fi iroro ejẹ ra kpobi kpahe [Ọghẹnẹ] keme ọye ọ be sẹro ra.”—1 PITA 5:7.
1. Evaọ edhere ologbo vẹ Jihova avọ Setan a ro wo ohẹriẹ gaga?
JIHOVA avọ Setan a wo ohẹriẹ no ohwohwo gaga. Ohwo kpobi nọ oma o rẹ wọ re o si kẹle Jihova, Ẹdhọ o re tu ei oma. A dhesẹ ohẹriẹ onana via evaọ obe jọ nọ o viodẹ gaga. Rọ kpahe iruẹru Setan wọhọ epanọ a kere fihọ obe Job evaọ Ebaibol na, Encyclopædia Britannica (1970) o ta nọ: ‘Iruo Setan họ re ọ kọ akpọ na wariẹ be gwọlọ iruẹru hayo ahwo nọ ọ rẹ niyẹrẹ iyoma kpahe; fikiere iruo riẹ e hẹrioma gaga no erọ ‘ibiaro Olori na,’ enọ i bi rri akpọ na wariẹ be gwọlọ bọ enọ i woma ga (2 Irv. 16:9). Ewoma ohwo-akpọ nọ ọ kare oriobọ o rẹ dha Setan eva, yọ Ọghẹnẹ ọ kẹ riẹ uvẹ re ọ dawo iẹe evaọ otọ udu gbe uvẹ avọ uwhru nọ Ọghẹnẹ o fihọ.’ Uzẹme, ẹvẹ ohẹriẹ riẹ o rro te!—Job 1:6-12; 2:1-7.
2, 3. (a) Ẹvẹ oware nọ o via kẹ Job na u ro dhesẹ ẹgbagba otofa ubiẹme Griki nọ a se “Ẹdhọ” na? (b) Ẹvẹ Ebaibol na o ro dhesẹ nọ Setan ọ gbẹ be bọwo idibo Jihova nọ e rrọ otọakpọ ota?
2 Ubiẹme Griki nọ a se “Edhọ” na họ “ọnọ ọ rẹ ta erue kpahe amọfa,” hayo “ọtaraha.” Obe Job u ru rie vẹ inọ Setan ọ bọwo Job odibo ẹrọwọ Jihova na ota inọ fikiọ oriobọ ọ be rọ gọ E, be ta nọ: “Kọ Job ọ be dhozọ Ọghẹnẹ gheghe?” (Job 1:9) Ikuigbe nọ e rrọ obe Job i dhesẹ nọ ghelọ edawọ riẹ, Job o si kẹle Jihova viere. (Job 10:9, 12; 12:9, 10; 19:25; 27:5; 28:28) Nọ uye riẹ o vrẹ no, ọ tẹ ta kẹ Ọghẹnẹ nọ: “Mẹ rehọ ezọ mẹ yo kpahe owhẹ, rekọ enẹna ibiaro mẹ e ruẹ owhẹ no.”—Job 42:5.
3 Kọ Setan ọ siọ idibo ẹrọwọ Ọghẹnẹ ota ba ẹbọwo no anwọ oke Job ze? Ijo. Obe Eviavia u dhesẹ nọ evaọ oke urere nana, Setan ọ gbẹ be bọwo inievo Kristi nọ a wholo na ota, yọ u muẹro nọ ere ọvona o rrọ kẹ egbẹnyusu ẹrọwọ rai re. (2 Timoti 3:12; Eviavia 12:10, 17) Fikiere, ẹgwọlọ ọgaga ọrọ Ileleikristi uzẹme kpobi họ re ma rehọ oma mai kẹ Jihova, Ọghẹnẹ ẹruọsa mai na, rehọ uyoyou udidi gọ e jẹ rọ ere dhesẹ ota Setan fihọ ọrue. Eva ere oruo, ma ti ru eva were Jihova.—Itẹ 27:11.
Jihova Ọ Gwọlọ Fi Obọ Họ k’Omai
4, 5. (a) Wo ohẹriẹ no Setan, eme Jihova ọ be gwọlọ eva otọakpọ? (b) Re Jihova ọ ruẹsi dhesẹ ohrọ riẹ k’omai, eme u fo nọ ma re ru?
4 Ẹdhọ ọ rrọ otọakpọ na ghoro, be gwọlọ ohwo nọ ọ rẹ bọwo ota je mu lọ. (Job 1:7, 9; 1 Pita 5:8) Wo ohẹriẹ, Jihova ọ gwọlọ fi obọ họ kẹ enọ e gwọlọ ẹgba riẹ. Hanani ọruẹaro na ọ vuẹ Asa Ovie na nnọ: “Keme ibiaro ỌNOWO na e rẹ nya akpọ na re re o dhesẹ ẹgba riẹ rọ kẹ enọ i wo eva efuafo rọ kpahe iẸe.” (2 Iruẹru-Ivie 16:9) Ẹvẹ ohẹriẹ nọ o rrọ ẹro ọfiọfiọ omukpahe Setan gbe ẹruọsa uyoyou Jihova o rro te!
5 Orọnikọ Jihova o bi nyo omai riwi re ọ ruẹ iruthọ gbe oyẹlẹ mai kpobi hi. Ọso-ilezi na o kere nọ: “O ỌNOWO, otẹrọnọ, who roro imuemu mai, ỌNOWO kọ ono ọ rẹ sai dikihẹ?” (Olezi 130:3) Uyo ogbagba riẹ họ: ohwo ọvo ho. (Ọtausiuwoma Na 7:20) Ma tẹ rehọ udu ogbagba si kẹle Jihova, ọ te tọ ẹro vi omai, orọnikọ re o brukpe omai hi, rekọ re o mu ẹro họ omodawọ mai jẹ k’uyo elẹ mai kẹ obufihọ gbe erọvrẹ. Pita ukọ na o kere nọ: “ỌNOWO ọ be tẹro riẹ muẹ enọ ikiẹrẹe, ezọ riẹ i rovie kẹ elẹ rai. Rekọ ovao ỌNOWO u mukpahe iru umuomu.”—1 Pita 3:12.
6. Ẹvẹ oware nọ o via kẹ Devidi o rọ rrọ ọbọga gbe ozọ-usio k’omai?
6 Devidi ọ gba ha yọ ọ thuzi ulogbo jọ. (2 Samuẹle 12:7-9) Rekọ o horie eva riẹ kẹ Jihova o te je si kẹle iẹe evaọ olẹ ogaga. (Olezi 51:1-12, eme obehru na) Dede nọ Devidi ọ ruẹ uye gaga fiki uzioraha riẹ, Jihova o yo olẹ riẹ ọ tẹ rọ vrẹ riẹ. (2 Samuẹle 12:10-14) Onana o rẹ jọ ọbọga gbe ozọ-usio k’omai. O rrọ ọbọga re ma riẹ nọ u re no Jihova eva ze re ọ rọ izieraha mai vrẹ omai otẹrọnọ ma ghine kurẹriẹ, rekọ o rrọ oware iroro re ma riẹ nọ izieraha e rẹ wha ebẹbẹ ze ẹsibuobu. (Ahwo Galesha 6:7-9) Ma tẹ gwọlọ si kẹle Jihova, ma rẹ kẹnoma kẹ oware kpobi nọ o rẹ dhae eva.—Olezi 97:10.
Jihova O Bi Si Ahwo Riẹ Kẹle Oma
7. Eghẹrẹ ahwo vẹ Jihova o re fi ẹro họ, kọ ẹvẹ o re ro si rai bru omariẹ?
7 Devidi o kere evaọ ilezi riẹ jọ nọ: “Makọ epanọ ỌNOWO okpehru te na ọ rẹ karohọ imiwhrori, rekọ otu ibruoma-oro ọ riẹ rai eva ugbo.” (Olezi 138:6) Epọvo na re, olezi ọfa ọ ta nọ: “Ono ọrọ wọhọ ỌNOWO Ọghẹnẹ mai na, ọnọ ọ keria oria ukpehru, nọ o bi riwi ihru gbe akpọ? Ọ kpare iyogbere no otọ, ọ tẹ jẹ wọ enọ ohọwo u re kpe no enwo.” (Olezi 113:5-7) Ẹhẹ, Ọnọma erumeru ọrọ ehrugbakpọ na o hrẹ oma kpotọ re o rri ze otọakpọ na, yọ ibiaro riẹ e be ruẹ ‘otu ọ omarokpotọ na,’ ‘otu ọ iruori na,’ ahwo nọ a bi “dimẹ je bi bo fiki eware oma-uzue nọ a bi ruẹ.” (Izikiẹl 9:4) Ọ be rehọ ẹkwoma Ọmọ riẹ si ahwo itieye na kẹle oma riẹ. Nọ ọ jọ otọakpọ, Jesu ọ ta nọ: “Ohwo ọvo ọ sai bru omẹ tha ha ajokpa nọ Ọsẹ nọ o vi omẹ ze o si rie . . . Ohwo ọvo ọ sai bru omẹ tha ha ajokpa nọ Ọsẹ mẹ ọ rọwo kẹ e.”—Jọn 6:44, 65.
8, 9. (a) Fikieme o jẹ gwọlọ nọ mai kpobi ma re bru Jesu ze? (b) Eme o gbunu gaga evaọ ọruẹrẹfihotọ ẹtanigbo na?
8 U fo re ahwo-akpọ kpobi a bru Jesu ze re a fi ẹrọwọ họ idhe ẹtanigbo na keme a yẹ rai erahaizi, nọ e hẹrioma no Ọghẹnẹ. (Jọn 3:36) O gwọlọ nọ a rẹ ruẹrẹhọ kugbe Ọghẹnẹ. (2 Ahwo Kọrint 5:20) Ọghẹnẹ ọ hẹrẹ hẹ re erahaizi a nyaze te lẹe kẹ ọruẹrẹfihotọ nọ a re ro wo udhedhẹ kugbei. Pọl ukọ na o kere nọ: “Onana Ọghẹnẹ oro ru uyoyou riẹ gba kẹ omai keme okenọ ma gbẹ jọ erahaizi, Kristi o te whu kẹ omai. . . . Keme otẹrọnọ okenọ ma jọ ewegrẹ a rọ fiki uwhu ọmọ riẹ kuomaigbe Ọghẹnẹ, kẹvẹ a rẹ te rọ fiki uzuazọ riẹ si omai viere te re nọ a kuomai gbe i no na.”—Ahwo Rom 5:8, 10.
9 Jọn ukọ na ọ k’imuẹro uzẹme urirẹ na nnọ Ọghẹnẹ ọ be ruẹrẹ ahwo họ zihe bru omariẹ ze, nọ o kere nọ: “Eva onana a je ru uyoyou Ọghẹnẹ via udevie mai, epanọ Ọghẹnẹ o vi Ọmọvo riẹ ze eva akpọ na, re ma ruẹse rọ fiki riẹ zọ. Eva onana uyoyou o rọ, orọnikọ ma you Ọghẹnẹ hẹ, rekọ ọye o you omai, o je vi Ọmọ riẹ kere ọ ze jọ okiofu izieraha mai.” (1 Jọn 4:9, 10) Ọghẹnẹ ọ kake jowọ na, orọnikọ ahwo-akpọ họ. Kọ oma o gbẹ be wọ owhẹ si kẹle Ọghẹnẹ nọ o dhesẹ uyoyou ulogbo utioye k’omai na, ahwo-akpọ nọ e rrọ orọnikọ “erahaizi” ọvo ho rekọ tubọ “iwegrẹ”?—Jọn 3:16.
Ẹgwọlọ nọ A rẹ rọ Gwọlọ Jihova
10, 11. (a) Re ma gwọlọ Jihova, eme ma re ru hrọ? (b) Ẹvẹ ma re riwi eyero-akpọ Setan?
10 Wọhọ epanọ ma riẹ, Jihova ọ be gb’omai họ bru omariẹ hẹ. Ma rẹ gwọlọ iẹe hrọ, ‘kie lele iei, dede na orọnikọ o theri omai ọvuọvo abọ họ.’ (Iruẹru 17:27) Ma re vuhumu hrọ inọ Jihova o te ọnọ ọ rẹ gwọlọ ẹmeoyo mai. Jemis olele na o kere nọ: “Fikiere wha rọ omarai kẹ Ọghẹnẹ. Mudhe kẹ ẹzi ukumuomu ọ rẹ te dhẹ se owhẹ ba. Bigba Ọghẹnẹ o re ti bigba owhẹ. Wozẹ abọ ra fo, whai erahaizi, wha veje ru eva rai fo, whai enọ i wo iroro ivẹ.” (Jemis 4:7, 8) Ma rẹ raha oke he re ma mudhe kẹ Ẹdhọ je dikihẹ kẹ abọ Jihova.
11 Onana u dhesẹ nọ ma rẹ kẹnoma kẹ eyero eware imuomu Setan lelele. Jemis o kere re nọ: “Wha gbẹ riẹ nọ ohwo nọ ọrọ ogbẹnyusu akpọ na yọ avọ Ọghẹnẹ a rọ egrẹ? Fikiere kohwo kohwo nọ ọ guọlọ nọ o re mu akpọ na ogbẹnyusu, ọye ọvọ o ru oma riẹ ọwegrẹ Ọghẹnẹ.” (Jemis 4:4) Eva abọdekọ riẹ, ma tẹ gwọlọ jọ egbẹnyusu Jihova, ma re rẹro nọ akpọ Setan o ti mukpahe omai.—Jọn 15:19; 1 Jọn 3:13.
12. (a) Eme ọ omosasọ vẹ Devidi o kere? (b) Didi unuovẹvẹ Jihova ọ rehọ ekwoma ọ Azaraya ọruẹaro na kẹ?
12 Okenọ akpọ Setan ọ tẹ wọso omai evaọ edhere jọ, o gwọlọ nọ ma re bo bru Jihova evaọ olẹ, yare obufihọ riẹ. Devidi, ọnọ ọ ruẹ usiwo Jihova unuẹse buobu, o kere eme nana nọ e rẹ kẹ omai omosasọ na: “ỌNOWO na ọ kẹle enọ i bo se ei kpobi evaọ uzẹme. O re ru gba kẹ enọ e rọ ozọ riẹ ẹdhẹ kpobi, o ve je yo oviẹ rai, o ve je siwi ai. ỌNOWO na ọ rẹ yọrọ enọ i you rie kpobi; rekọ iru-umuomu na kpobi ọ rẹ raha ae.” (Olezi 145:18-20) Olezi ọnana o dhesẹ nọ Jihova ọ rẹ sai siwi omai eva okenọ omomọvo mai ọ tẹ rrọ odawọ gbe nọ o ti siwi ahwo riẹ kpobi eva etoke ‘uye ulogbo na.’ (Eviavia 7:14) Jihova o re si kẹle omai otẹrọnọ ma si kẹle iẹe. Eva otọ ekpakpọ “ẹzi Ọghẹnẹ,” Azaraya ọruẹaro na o dhesẹ oware nọ ma rẹ sai se uzẹme ẹme na kpobi inọ: “ỌNOWO ọ rọ kugbe owhai, wha tẹ jẹ rọ kugbe i re. Otẹrọnọ wha gwọlọ e riẹ, wha rẹ te rue riẹe, rekọ wha tẹ se iẹe, ọ rẹ te se owhai re.”—2 Iruẹru-Ivie 15:1 2.
Ma re Wo Imuẹro Egaga Kpahe Jihova Hrọ
13. Oghẹrẹ vẹ ma sai ro dhesẹ nọ Jihova o mu omai ẹro?
13 Pọl ukọ na o kere kpahe Mosis nnọ ‘o dikihẹ whawha epaọ ẹsenọ ọ be ruẹ Ọnọ a rẹ ruẹ hẹ na.’ (Ahwo Hibru 11:27) Uzẹme, Mosis ọ ghinẹ ruẹ Jihova ha. (Ọnyano 33:20) Rekọ Jihova o mu rie ẹro te epanọ o rọ jọ wọhọ ẹsenọ ọ be rue Riẹ. Ere ọvo na re, nọ edawọ riẹ e vrẹ no, ibiaro ẹrọwọ Job e tẹ ruẹ Jihova vẹ viere, wọhọ Ọghẹnẹ nọ ọ rẹ kuvẹ kẹ idibo ẹrọwọ riẹ re a ruẹ ẹdawọ rekọ ọnọ o re gb’abọ kẹ ai vievie he. (Job 42:5) A ta kpahe Enọk avọ Noa nnọ a ‘lele Ọghẹnẹ nya.’ A ru onana ẹkwoma Ọghẹnẹ nọ a ru eva were je yo ẹme riẹ. (Emuhọ 5:22-24; 6:9, 22; Ahwo Hibru 11:5, 7) Otẹrọnọ Jihova o mu omai ẹro te epanọ ọ jọ kẹ Enọk, Noa, Job, gbe Mosis na, ma re ‘fi ẹro họ iẹe’ evaọ idhere mai kpobi, yọ o re ti ru “idhere [mai] kpọvi.”—Itẹ 3:5, 6.
14. Eme u dhesẹ re a “dhẹgbalọ” Jihova?
14 Taure emọ Izrẹl e tẹ te ro Ẹkwotọ Eyaa na, Mosis ọ kẹ rai uthubro nọ: “Wha rẹ te nya lele ỌNOWO na Ọghẹnẹ rai wha vẹ dhẹ ozọ riẹ, je koko izi riẹ, yo uru riẹ, wha vẹ te gọ e jẹ dhẹgbalọ iẹ.” (Iziewariẹ 13:4) A re lele Jihova, dhozọ riẹ, yo ẹme riẹ, jẹ dhẹgbalọ iẹe. Rọ kpahe ẹme nọ a jọ etenẹ fa “dhẹgbalọ” na, ọmọ-uwuhrẹ Ebaibol jọ ọ ta nọ “otofa ubiẹme na họ usu nọ o kpekpe gaga nọ a re wo kugbe ohwo.” Ọso-ilezi na ọ ta nọ: “Okugbe ỌNOWO ọ rẹ jọ kẹ enọ e rẹ dhẹozọ riẹ.” (Olezi 25:14) Ma re wo usu oghaghae onana kugbe Jihova otẹrọnọ o mu omai ẹro, gbe otẹrọnọ ma you rie te epanọ ma rẹ rọ dhozọ eva nọ ma re ru dhae evaọ oghẹrẹ jọ.—Olezi 19:9-14.
Kọ Whọ Riẹ Kpahe Ẹruọsa Jihova?
15, 16. (a) Ẹvẹ Olezi avọ 34 o ro dhesẹ nọ Jihova ọ be sẹro mai? (b) Eme ma re ru otẹrọnọ o rrọ bẹbẹ re ma kareghẹhọ iruo iwoma nọ Jihova o ru k’omai no?
15 Iruẹru ẹghẹ Setan jọ họ re ọ daoma ru omai si iroro no uzẹme na nnọ Ọghẹnẹ mai, Jihova, ọ be sẹro idibo ẹrọwọ riẹ ẹsikpobi. Devidi Ovie Izrẹl na ọ riẹ kpahe uketha Jihova ziezi makọ okenọ ọ rẹriẹ ovao dhe etoke imuozọ dede. Oke nọ o gbae họ re ọ faki ru wọhọ ọruẹ evaọ aro ọ Akish Ovie obọ Gat, ọ kere ole, olezi owoma jọ, nọ u kugbe eme ẹrọwọ enana: “O wha lele omẹ jiri ỌNOWO na, jo ma kuomagbe jiri ỌNOWO re ma kpare odẹ riẹ kpehru! Mẹ gwọlọ ỌNOWO, ọ tẹ kẹ omẹ uyo, o te si omẹ nọ ozọodhẹ mẹ kpobi. Ukọ-odhiwu ỌNOWO ọ rẹ ria gba enọ e be dhẹozọ riẹ, o ve siwi ai. O jawo, re whọ ruẹ nọ ỌNOWO o woma! Oghale u te ọnọ ỌNOWO ọ rọ oria adhẹzọ riẹ! ỌNOWO ọ kẹle enọ i wo eva owhrori, o je siwi enọ a nwẹ eva ẹzi. Ikpokpoma ohwo okiẹrẹe e rẹ jọ buobu; rekọ ỌNOWO ọ rẹ te thọ e no ae kpobi.”—Olezi 34:3, 4, 7, 8, 18, 19; 1 Samuẹle 21:10-15.
16 Ẹgba usiwo Jihova u mu owhẹ ẹro? Whọ riẹ kpahe uketha enjẹle riẹ? Kọ whọ dawo no jẹ ruẹ nọ Jihova o woma? Okevẹ kẹle na whọ ghinẹ rue riẹ vevẹ nnọ Jihova o ru ewoma k’owhẹ? Dai roro kp’emu. O sae jọ nọ orọ uwou urere nọ who kpohọ evaọ odibọgba na, okenọ omaa o j’owhẹ eheho na? Otiẹsejọhọ who lele ọnọ o wo uwou na t’ẹme isiuru jọ. Kọ whọ kareghẹhọ yere Jihova fikinọ ọ k’owhẹ ẹgba ọfa nọ whọ gwọlọ gbe ẹghale nọ ọ ghale owhẹ na? (2 Ahwo Kọrint 4:7) Evaọ abọdekọ riẹ, ẹsejọhọ o rrọ bẹbẹ k’owhẹ re whọ kareghẹhọ iruo iwoma jọ nọ Jihova o ru kẹ owhẹ no. Ẹsejọ who re roro kpemu kpohọ oka, amara, ẹgbukpe, hayo vrẹ ere dede. Otẹrọnọ ere o rrọ k’owhẹ, eme whọ gbẹ daoma viere re who si kẹle Jihova viere jẹ daoma ruẹ oghẹrẹ nọ ọ be rọ kpọ je su owhẹ hẹ? Pita ukọ na ọ kẹ Ileleikristi ohrẹ nọ: “Hrẹ oma rai kpotọ họ obọ otọ ogaga Ọghẹnẹ . . . fi iroro ejẹ ra kpobi kpahe iẹ keme ọye ọ be sẹro ra.” (1 Pita 5:6, 7) Eva uzẹme, oghẹrẹ nọ ọ be sẹro ra te u ti gb’owhẹ unu!—Olezi 73:28.
Gbẹ Hae Gwọlọ Jihova
17. Eme ọ r’oja otẹrọnọ ma rẹ ruabọhọ ẹgwọlọ Jihova?
17 Ẹyọrọ usu mai kugbe Jihova o rẹ jọ oware nọ ma rẹ ruabọhọ. Jesu ọ ta evaọ olẹ se Ọsẹ riẹ nọ: “Onana họ uzuazọ ebẹdẹ bẹdẹ, re a riẹ owhẹ nọ whẹ ọvo họ uvi Ọghẹnẹ, gbe Jesu Kristi ọnọ who vi.” (Jọn 17:3) Eriariẹ Jihova avọ ọrọ Ọmọ riẹ nọ ma re wo o gwọlọ omodawọ ikẹse kẹse mi omai. Ma gwọlọ obufihọ olẹ gbe ẹzi ọfuafo na re ma te wo otoriẹ “eware ididi Ọghẹnẹ.” (1 Ahwo Kọrint 2:10; Luk 11:13) Ma tẹ jẹ gwọlọ ọkpọvio ‘ọrigbo nọ o wo ẹrọwọ avọ areghẹ na’ re ma sae rehọ emu abọ-ẹzi ko iroro mai ‘eva ẹruoke.’ (Matiu 24:45) Ẹkwoma edhere yena, Jihova ọ hrẹ omai no re ma se Ẹme riẹ kẹdẹ kẹdẹ, kpohọ iwuhrẹ Ileleikristi mai ẹsikpobi, je w’abọ ziezi evaọ ewhowho ‘emamọ usi Uvie na.’ (Matiu 24:14) Ẹkwoma ere oruo, ma te ruabọhọ ẹgwọlọ Jihova, Ọghẹnẹ ẹruọsa mai na.
18, 19. (a) Eme ma rẹ gbamu nọ ma re ru? (b) Ma te dikihẹ ga mudhe kẹ Ẹdhọ jẹ gwọlọ Jihova, didi eghale ma ti wo?
18 Setan ọ be dawo ẹgba riẹ kpobi re ọ rehọ ukpokpoma, ọwọsuọ, gbe otunyẹ te ahwo Jihova evaọ k’abọ k’abọ. Ọ be daoma re o fi ozighi họ udhedhẹ mai jẹ raha emamọ edikihẹ nọ ma wo kugbe Ọghẹnẹ mai. Ọ gwọlọ nọ ma nyaharo evaọ iruo mai hi orọ ẹgwọlọ via enọ i wo udu-oruọzewọ je fi obọ họ kẹ ai ze abọ Jihova evaọ ẹme avro esuo ehrugbakpọ na. Rekọ ma rẹ gbaemu hrọ re ma roma kpotọ kẹ Jihova, fi eva họ iẹe inọ o ti siwi omai no abọ omuomu na. Ẹkwoma Ẹme Ọghẹnẹ nọ ma rẹ kuvẹ kẹ re o su omai gbe abọ nọ ma re wo kugbe ukoko riẹ nọ a rẹ rọ ẹro ruẹ ziezi, u re mu omai ẹro nnọ ọ rrọ omai emu ẹsikpobi re ọ thọ omai.—Aizaya 41:8-13.
19 Fikiere, ajọ mai kpobi ma dikihẹ ga mudhe kẹ Ẹdhọ avọ iruẹru ẹghẹ riẹ, re ma gbẹ hae gwọlọ Ọghẹnẹ ọghaghae mai na, Jihova, ọnọ o re ti ‘ru omai ga, jẹ k’omai ẹgba.’ (1 Pita 5:8-11) Ere ma ‘te gbẹ rọ jọ uyoyou Ọghẹnẹ, nọ ma be hẹrẹ ohrọ-oriọ Olori mai Jesu Kristi avọ irẹro uzuazọ ebẹdẹ bẹdẹ na.’—Jud 21.
Ẹvẹ Whọ te k’Uyo?
• Eme họ otofa ẹme Griki nọ a ro se “Ẹdhọ” na, kọ ẹvẹ Ẹdhọ o bi ro dhesẹ nọ odẹ na u mu rie oma?
• Ẹvẹ Jihova o ro wo ohẹriẹ no Ẹdhọ evaọ oghẹrẹ nọ O re riwi enọ e be rria otọakpọ na?
• Fikieme o jẹ rrọ ọgbahọ re ohwo nọ o bi bru Jihova ze ọ jẹ ẹtanigbo na rehọ?
• Eme u dhesẹ re a “dhẹgbalọ” Jihova, kọ ẹvẹ ma sae rọ gwọlọ iẹe n’oke te oke?
[Enọ Uwuhrẹ]
[Uwoho nọ o rrọ ẹwẹ-obe avọ 15]
Ghelọ edawọ riẹ, Job o ti vuhumu nnọ Jihova ọ be sẹro riẹ
[Iwoho nọ e rrọ ẹwẹ-obe avọ 16, 17]
Isase Ebaibol ikẹdẹ kẹdẹ, ekpohọ iwuhrẹ Ileleikristi ẹsikpobi, gbe ọwhọ nọ ma re ro w’obọ evaọ iruo usiuwoma ota na o rẹ kareghẹhọ omai nnọ Jihova ọ be sẹro mai