Mai Kpobi Ma Gwọlọ Ujiro

ẸDẸ na o kiehọ ziezi kẹ ọmọtẹ ọboba na. Dede nọ a be hae whọku ei evaọ oke nọ o vrẹ, uzedhe ẹdẹ ọnana o dhesẹ emamọ uruemu gaga. Rekọ, evaọ aso riẹ, nọ a wọ ọmọtẹ na fihọ ehwa no, oni riẹ o te yo urru riẹ nọ ọ be viẹ. Nọ a nọe oware nọ u bi ru ei, o te si inwe oviẹ ta nọ: “Kọ me dhesẹ emamọ uruemu nẹnẹ?”

Onọ na u du obọ te oni na gaga. Oke kpobi nọ ọmọ na o te ru oware thọ, ọ rẹ whọku ei vẹrẹ vẹrẹ. Rekọ ẹdẹ ọnana, dede nọ ọ ruẹ nọ ọmọ na ọ daoma riẹ ru ziezi, oni na o tube jiri ei omojọ dede he.

Orọnikọ emetẹ eboba ọvo họ enọ e gwọlọ ujiro gbe udu otahọ awọ họ. O rrọ ẹgwọlọ mai kpobi re—wọhọ epanọ ma gwọlọ ohrẹ gbe ọkpọvio na.

Ẹvẹ oma o rẹ j’omai okenọ a te jiri omai? Kọ u gbe ru udu mai sasa je ru ẹdẹ na vọ avọ evawere k’omai? O rẹ ta kẹ omai inọ ohwo jọ o muẹrohọ oware uwoma nọ ma ru, inọ ohwo jọ ọ daezọ. O rẹ k’omai imuẹro inọ ma raha ogaga mai fiẹ hẹ, yọ o rẹ wọ omai ru viere evaọ obaro. Fikiere u re gbunu hu inọ emamọ ujiro u re si omai kẹle ohwo nọ ọ ta ẹme uduotahawọ kẹ omai na.—Itẹ 15:23.

Jesu Kristi o vuhu ẹgwọlọ nọ a rẹ rọ kẹ ujiro mu. Evaọ ohare etalẹnte na, olori na (ọnọ o dikihẹ kẹ Jesu omariẹ) o jiri omomọvo irigbo ẹrọwọ ivẹ na ziezi, ta nọ: “Whẹ emamọ ohwo whọ riẹ ru, whẹ oruọzewọ.” Ẹvẹ o rẹ sasa udu te! Dede nọ a wo ọvuọvuọ oghẹrẹ ẹgba gbe iyẹrẹ sa-sa, oghẹrẹ ọvo na o jiri rai.—Matiu 25:19-23.

Fikiere, ajọ ma kareghẹhọ oni ọmọtẹ ọmaha yena. Ma rẹ hẹrẹ re amọfa a viẹ taure ma te jiri ai hi. Ukpoye, ma rẹ daoma gwọlọ uvẹ nọ ma re ro jiri ai. Evaọ uzẹme, ma wo emamọ ẹjiroro nọ ma re ro jiri ahwo ziezi eva uvẹ kpobi.