Ẹvẹ Eva Nọ Who Fihọ Ọghẹnẹ E Ga te?
Ẹvẹ Eva Nọ Who Fihọ Ọghẹnẹ E Ga te?
“Kake guọlọ uvie [na].”—MATIU 6:33.
1, 2. Owọ vẹ oniọvo jọ ọ jẹ kpahe iruo riẹ, kọ fikieme?
ONIỌVO-ỌMỌZAE jọ ọ gwọlọ nọ a rẹ rehọ iẹe ruiruo ziezi evaọ ukoko riẹ. Rekọ ẹbẹbẹ na họ, iruo riẹ i bi ru ei bẹbẹ kẹe re o kpohọ iwuhrẹ ẹsikpobi. Kọ eme o ru? O ru uzuazọ riẹ lọhọ, o no iruo nọ ọ jọ, uwhremu na ọ tẹ ruẹ iruo nọ i kpomahọ iruẹru riẹ evaọ ukoko na ha. Nẹnẹ, osa nọ a be hwae u bu te epaọ ọsosuọ họ, rekọ ọ be sae rẹrote ẹgwọlọ uviuwou riẹ yọ o bi wo uvẹ ziezi rọ kẹ iruo ukoko na.
2 Kọ whọ riẹ oware nọ o lẹliẹ oniọvo yena j’owọ utioye na? Kọ who rri oma ra nọ whọ rẹ sai ru oware nọ o ru na whọ tẹ rrọ oghẹrẹ uyero nọ o wọhọ oriẹ na? U woma kẹhẹ, Ileleikristi buobu a ru ere no, yọ owojẹ rai u dhesẹ eva nọ a fihọ eyaa Jesu na: “Wha kake guọlọ uvie riẹ gbe [ẹrẹreokie] riẹ, eware enana kpobi a reti fi ai họ kẹ owhai.” (Matiu 6:33) A fi eva họ Jihova inọ ọ te sẹro rai ukpenọ a re fi eva họ akpọ na.—Itẹ 3:23, 26.
3. Fikieme o sai ro gbe ahwo jọ unu sọ o ginẹ rrọ oware areghẹ nẹnẹ re a fi Uvie Ọghẹnẹ họ oria ọsosuọ?
3 Ma te roro epanọ oke nọ ma be rria na o bẹ te, o rẹ sai gbe ahwo jọ unu sọ areghẹ ọ rrọ iroro nọ oniọvo yena ọ jẹ na. Nẹnẹ, ahwo jọ a rrọ uvuhu koikoi, rekọ ejọ e be ruẹ re kiọkọ. Ibuobu nọ e rrọ erẹwho nọ uvuhu o rrọ a rẹ j’abọ kru uvẹ kpobi nọ u rovie fihọ nọ u re ru eware woma kẹ ai omojọ. Evaọ abọdekọ riẹ, ibuobu nọ e rrọ erẹwho nọ i fe a bi ruiruo t’aso t’uvo re a ruẹsi wo igho nọ a rẹ sai ro yeri uzuazọ ulogbo keme ekọ i bi kie, yọ enọ e rehọ ahwo iruo e be ta kẹ ae nọ a ruiruo vi epaọ ọsosuọ. Ma te roro epanọ eyero uzuazọ inẹnẹ o ga te, o rẹ sai gbe ahwo jọ unu nọ, ‘Kọ nẹnẹ na, o ginẹ rrọ oware areghẹ re a kake gwọlọ Uvie na?’ Re u fi obọ họ kuyo onọ yena, roro kpahe ogbotu ahwo nọ Jesu ọ jẹ t’ẹme kẹ na.
‘Wha Ruawa Ha’
4, 5. Ẹvẹ Jesu o ro dhesẹ nnọ o kare iroro re ahwo nọ a be gọ Ọghẹnẹ a ruawa hrọ kpahe eware uzuazọ ekẹdẹ kẹdẹ?
4 Jesu ọ jọ obọ Galili, jẹ t’ẹme kẹ ogbotu ahwo buobu nọ i no eria sa-sa ze. (Matiu 4:25) Enwenọ ahwo nọ a jọ ogbotu na kpobi iyogbere. Ghele na, Jesu ọ ta udu họ ae awọ inọ oware nọ a rẹ rọ karo họ, orọnikọ ekwakwa efe he, rekọ inọ a le oware nọ o mae ghare—efe abọ-ẹzi. (Matiu 6:19-21, 24) Ọ ta nọ: “Wha ruawa uzuazọ rai hi, oware nọ wha rẹ ria, hayo oware nọ wha rẹ da, gbe awa oma rai hi, oware nọ wha re fihọ. Uzuazọ u gbe vi emu . . . , gbe oma u gbe vi iwu?”—Matiu 6:25.
5 Rọkẹ ibuobu nọ e jẹ gaviezọ na, eme ọ Jesu e rẹ sai do wọhọ oware nọ a sai lele he. A riẹ nnọ a gbe ruiruo gaga ha, uye o te bẹ iviuwou rai. Dede na, Jesu ọ ta kẹ ae inọ a kareghẹhọ evra. Umutho orọ okpẹdẹ ọvo evra e rẹ gwọlọ, rekọ Jihova ọ be sẹro rai. Jesu ọ tẹ jẹ ta kpahe oghẹrẹ nọ Jihova ọ be rọ sẹro idodo, enọ erru rai o vi orọ Solomọn evaọ oruaro riẹ kpobi. Otẹrọnọ Jihova ọ rẹ rẹro te evra gbe idodo, kọ ọ gbẹ te rẹro te omai viere? (Matiu 6:26-30) Wọhọ epanọ Jesu ọ ta, uzuazọ gbe ugboma mai i wuzou vi emu nọ ma rẹ re re ma ruẹse jọ uzuazọ gbe iwu nọ ma bi ro ruru oma mai. Ma tẹ raha oke mai kpobi bi ro le emuore gbe emuẹgọ, nọ ma gbe wo oke nọ ma rẹ rọ gọ Jihova ha, yọ ma ku ẹjiroro nọ ma rọ rrọ uzuazọ fiẹ no.—Ọtausiwoma Na 12:13.
Eriwo Owowa
6. (a) Owha-iruo vẹ Ileleikristi a wo? (b) Eme Ileleikristi a rehọ ẹruọrọsuọ rai kpobi kpahe?
6 Uzẹme, orọnikọ Jesu ọ ta kẹ ahwo na nnọ a siọ iruo ba rabọ muoma re Ọghẹnẹ o gbolo emu no obọ odhiwu ze kẹ iviuwou rai hi. Makọ evra dede a re no iwou rai nyae gwọlọ emu kẹ oma rai gbe emọ rai. Fikiere, Ileleikristi a re ruiruo otẹrọnọ a rẹ re emu. A rẹ rẹro te ewha-iruo uviuwou rai. Ileleikristi nọ i wo ilori nọ a be gbodibo kẹ, a re ruiruo gaga kẹ ilori rai. (2 Ahwo Tẹsalonika 3:10-12; 1 Timoti 5:8; 1 Pita 2:18) Pọl ukọ na ọ jẹ hae bọ iwou-owhre re ọ sae ko unu riẹ. (Iruẹru 18:1-4; 1 Ahwo Tẹsalonika 2:9) Ghele na, orọnikọ iruo itieye na Ileleikristi yena a rehọ uzuazọ rai kpahe he. A fi eva họ Jihova. Fikiere, a reawere udhedhẹ iroro nọ amọfa a wo ho. Ọso-ilezi na ọ ta nọ: “Enọ i fievahọ ỌNOWO a wọhọ ugbehru Zayọn, o nọ a rẹ sai nuhẹ hẹ, o rẹ jọ ri bẹdẹ.”—Olezi 125:1.
7. Didi eriwo ohwo nọ o fi eva kpobi họ Jihova ha ọ rẹ sai wo?
7 Ohwo nọ o fi eva kpobi họ Jihova ha ọ rẹ sai roro enẹ hẹ. Ahwo-akpọ buobu a rri efe wọhọ ugogo oware nọ o rẹ kẹ ufuoma evaọ uzuazọ. Fikiere, esẹgbini a be tudu họ emọ rai awọ inọ a rehọ oke uzoge rai kpobi le isukulu ikpehru, avọ irẹro inọ enẹ emọ na a ti ro wo iruo nọ a ti ro nwo igho fihọ uwou. U yoma kẹhẹ, iviuwou Ileleikristi jọ a ruẹ no nnọ a ku igho rai fihọ ame, keme emọ rai a nya siọ Ọghẹnẹ ba kọ efe ọvo a bi le.
8. Eriwo owowa vẹ Ileleikristi a re wo?
8 Fikiere, Ileleikristi nọ i wo areghẹ a re vuhumu nnọ ohrẹ Jesu na u wo iruo nẹnẹ wọhọ epanọ o jọ evaọ ikpe-udhusoi ọsosuọ na, yọ a be daoma jọ owowa. O tẹ make rọnọ a rẹ raha oke buobu evaọ iruo re a sae rẹro te uviuwou rai, a rẹ kuvẹ hẹ re ugho ogwọlọ u mi ai oke eware abọ-ẹzi nọ e mae rrọ oja.—Ọtausiwoma Na 7:12.
Ohrẹ Ofa Kpahe Epanọ Ma rẹ rọ Whaha Awaọruọ
9. Ẹvẹ Jesu ọ rọ bọ imuẹro enọ i fi eva kpobi họ Jihova ga?
9 Evaọ Ovuẹ obọ Ugbehru na, Jesu ọ ta udu họ enọ ọ jẹ t’ẹme kẹ nọ: “Wha ruawa ha, nnọ, Didi oware ma rẹ ria? hayo oware nọ ma rẹ da? hayo eme ma rẹ rehọ gọ egọ? Keme eware enana kpobi ahwo Egedhọ na erẹ guọlọ; keme Ọsẹ obọ odhiwu rai ọ riẹ nọ eware enana kpobi i kiọkọ kẹ owhai.” (Matiu 6:31, 32) Eme nana e rẹ ginẹ kẹ uduotahawọ! Ma te fi eva kpobi họ Jihova, o ti fi obọ họ kẹ omai ẹsikpobi. Rekọ, eme ọ Jesu na e rẹ jẹ lẹliẹ omai roro. Eme na e kareghẹhọ omai inọ otẹrọnọ ma rẹ rọ okpakpa le ekwakwa iwo, koyehọ ma bi roro wọhọ “ahwo Egedhọ,” ahwo nọ a rrọ Ileleikristi uzẹme he.
10. Nọ ọmoha jọ o bru Jesu ze kẹ ohrẹ, ẹvẹ Jesu o ro dhesẹ oware nọ ọmoha na ọ mai you?
10 Ẹdẹjọ, ọmoha jọ nọ o fe gaga ọ nọ Jesu oware nọ o re ru re ọ sai wo uzuazọ ebẹdẹ bẹdẹ. Jesu ọ kareghẹhọ iẹe oware nọ Uzi na, onọ a gbe je lele evaọ oke yena, o gwọlọ. Ọmoha na ọ ta kẹ Jesu nọ: “Me koko enana kpobi no; eme o gbe kiọkọ kẹ omẹ?” Ahwo buobu a rẹ sai rri uyo nọ Jesu ọ kẹ wọhọ oware nọ a rẹ sai lele he. Ọ ta nọ: “Whọ tẹ guọlọ nọ whọ rẹ gbunu re nya e zẹ eware no who wo, whọ rọ kẹ iyogbere, who re ti wo efe eva obọ odhiwu; whọ nyaze ti lele omẹ.” (Matiu 19:16-21) Ọmoha na ọ nyavrẹ avọ uweri, keme ọ sai roro ku oware nọ o rẹ lẹliẹe si obọ no efe riẹ hẹ. Epanọ ọ maki you Jihova te kẹhẹ, ekwakwa efe riẹ ọ mai you.
11, 12. (a) Didi eme nọ i re gbunu Jesu ọ ta kpahe efe? (b) Ẹvẹ ekwakwa iwo e sai ro ru ei bẹbẹ kẹ ohwo re ọ gọ Jihova?
11 Oware yena nọ o via na, o lẹliẹ Jesu ta ẹme jọ nọ o gbunu gaga: “O rẹ te jọ bẹbẹ rọ kẹ ọdafe re ọ ruọ uvie odhiwu. . . . O lọhọ kẹ kamẹl re o dhe uzou họ eghogho ẹguede vi ọdafe nọ rọ ruọ uvie Ọghẹnẹ.” (Matiu 19:23, 24) Kọ Jesu ọ be ta nnọ uvumọ ọdafe ọ te ruọ Uvie na ha? Ijo, keme ọ nyaharo ta nnọ: “Eware kpobi e rẹ lọlọhọ eva obọ Ọghẹnẹ.” (Matiu 19:25, 26) Evaọ uzẹme, avọ obufihọ Jihova, edafe jọ evaọ oke yena a zihe ruọ Ileleikristi nọ a wholo. (1 Timoti 6:17) Rekọ gheghe Jesu ọ rọ ta eme yena ha. Unuovẹvẹ ọ jẹ kẹ na.
12 Ohwo ọ tẹ talamu ekwakwa efe riẹ wọhọ epanọ ọmoha yena nọ ọ jọ ọdafe o ru na, o rẹ sae whaha iẹe udu kpobi nọ ọ rẹ rọ gọ Jihova. O rẹ sae jọ ere kẹ ohwo nọ ọ rrọ ọdafe gbe “ahwo nọ a re siuru efe.” (1 Timoti 6:9, 10) Ohwo o te fi eva họ ekwakwa iwo hrọ o rẹ sae whae ze nọ o gbe ro ‘se ẹgwọlọ abọ-ẹzi riẹ’ gboja tere he. (Matiu 5:3) Fikiere, o re tube roro nnọ ọ gwọlọ obufihọ Jihova ha. (Iziewariẹ 6:10-12) O ve ti rẹro nnọ ahwo a rẹ ruzou kpotọ kẹe evaọ ukoko na. (Jemis 2:1-4) Yọ ọ sae rehọ enwenọ oke riẹ kpobi rọ reawere efe riẹ ukpenọ ọ rehọ oke na gọ Jihova.
Wo Eriwo nọ O Fo
13. Eriwo ọthọthọ vẹ ahwo Laọdisia a wo?
13 Ahwo jọ nọ a wo eriwo ọthọthọ kpahe ekwakwa iwo họ ukoko Laọdisia ọrọ ikpe-udhusoi ọsosuọ. Jesu ọ ta kpahe ae nọ: “Wha be ta nọ, Me fe hrọ no, mẹ kpare-obọ no, eware nọ mẹ guọlọ eva akpọ na kpobi me wo rai gba no; wha gbẹ riẹ nọ whai họ enọ e mae rọ ọkora, nyouzou, yogbe, tuaro jẹ bafihọ họ.” Orọnikọ igho nọ a wo o lẹliẹ ahwo Laọdisia kpemu tenẹ evaọ abọ-ẹzi hi. Oware nọ o soriẹ ze họ a fi eva họ efe viukpọ Jihova. Fikiere, a tẹ rrọ ruọruọruọ evaọ abọ-ẹzi, yọ Jesu o bi ti ‘nwo ai no’ unu riẹ.—Eviavia 3:14-17.
14. Fikieme ujiro nọ Pọl ọ kẹ Ileleikristi obọ Hibru na u ro fo ai?
14 Evaọ abọdekọ riẹ, Pọl o jiri Ileleikristi obọ Hibru fiki uruemu nọ a dhesẹ evaọ etoke ukpokpoma. Ọ ta nọ: “Wha jẹ hẹ riohrọ e nọ a fihọ uwou-odi [yọ okenọ a] raha eware rai yọ wha be ghọghọ ghele, yọ wha wo ẹruore efe owoma nọ ọ rẹ jọ ribri.” (Ahwo Hibru 10:34) Ileleikristi yena a jọ ọkora ha fikinọ ekwakwa iwo rai i vru mi ai. A jẹ ghọghọ ghele keme a gbobọ kru oware nọ o mae ghare kẹ ai kpobi, “ẹruore efe owoma nọ ọ rẹ jọ ribri.” Wọhọ ọthueki na evaọ ohare Jesu nọ ọ zẹ eware nọ o wo kpobi fiki uzuu ọghaghae na, a gba riẹ mu inọ a re si obọ no ẹruore Uvie na ha, makọ oware nọ o rẹ via kpobi. (Matiu 13:45, 46) Uruemu rai u woma kẹhẹ!
15. Ẹvẹ oniọvo jọ evaọ obọ Liberia o ro fi isiuru Uvie na họ oria ọsosuọ?
15 Ahwo buobu nẹnẹ a wuhrẹ uruemu ezi utioye na no. Wọhọ oriruo, evaọ obọ Liberia, a kẹ uvovo aye jọ nọ ọ rrọ Oleleikristi uvẹ re o kpohọ isukulu ikpehru. Evaọ orẹwho yena, a tẹ kẹ ohwo uvẹ utioye na, a re rri rie nọ obaro-akpọ riẹ o woma no. Dede na, oniọvo na ọ jọ ọkobaro, ọtausiuwoma oke-kpobi, yọ obe u te rie obọ no re o ruiruo ọkobaro obọdẹ ọrọ ubroke. Ọ salọ nnọ Uvie na ọ rẹ kake gwọlọ, ọ tẹ daji iruo odibọgba oke-kpobi riẹ. Ọ kwa kpohọ ẹkwotọ nọ a kẹ riẹ o te muọ ebe-iwuhrẹ Ebaibol 21 họ evaọ emerae esa. Oniọvo nana avọ idu efa buobu wọhọ ọye omariẹ a be kake gwọlọ Uvie na, dede nọ o gwọlọ obusino uvẹ nọ a re ro fe. Ẹvẹ a be sae rọ yọrọ uruemu utioye na evaọ akpọ nana nọ ẹzi efe ole ọ dafia na? A wuhrẹ ekwakwa aghae buobu no nọ u bi fi obọ họ kẹ ae. Joma t’ẹme kpahe ejọ rai.
16, 17. (a) Fikieme omarokpotọ o rọ r’oja re ma sai fi eva họ Jihova? (b) Fikieme ma je fi eva họ eyaa Ọghẹnẹ?
16 Omarokpotọ: Ebaibol e ta nọ: “Rehọ ẹroọrọsuọ ra kpobi kpahe ỌNOWO na whọ rehọ eva kpahe ẹriẹ omobọ ra ha. Eva idhere ra kpobi ọ thọrọ owhẹ ẹro ho, o ve ti ruọ idhere ra kpọvi. Who roro nọ who wo areghẹ hrọ họ.” (Itẹ 3:5-7) Ẹsejọ, ohwo ọ tẹ rehọ ubiẹro akpọ na rri oghẹrẹ edhere jọ, ọ rẹ sai roro nọ edhere na o fo. (Jerimaya 17:9) Dede na, uvi Oleleikristi ọ rẹ rẹro so Jihova kẹ ọkpọvio. (Olezi 48:14) ‘Eva idhere riẹ kpobi’—evaọ eware nọ i kpomahọ ukoko na, isukulu hayo iruo, eriosehọ, hayo oware ofa jọ kpobi—ọ rẹ rehọ omarokpotọ gwọlọ ohrẹ Jihova.—Olezi 73:24.
17 Eva nọ a re fihọ eyaa Jihova: Pọl ọ ta nọ: “Ohwo kpobi nọ o bikẹle Ọghẹnẹ ọ rẹ rọwo nọ Ọghẹnẹ ọ rọ, jegbe ọ rẹ te hwosa kẹ e nọ e guọlọ e riẹ.” (Ahwo Hibru 11:6) U gbe mu omai ẹro ho nnọ Jihova o ti ru eyaa riẹ gba, o sae jọ omai ẹro wọhọ oware areghẹ ‘re ma rehọ akpọ na ruiruo vọvọ.’ (1 Ahwo Kọrint 7:31) Evaọ abọdekọ riẹ, ẹrọwọ mai ọ tẹ rrọ gaga, ma rẹ gbae mu inọ ma rẹ kake gwọlọ Uvie na. Ẹvẹ a sai ro wo ẹrọwọ ọgaga? Ẹkwoma esikẹle Jihova evaọ uvi olẹ nọ u no udu ze gbe uwuhrẹ omobọ ohwo nọ a re ru kẹse kẹse. (Olezi 1:1-3; Ahwo Filipai 4:6, 7; Jemis 4:8) Wọhọ Devidi Ovie na, ma rẹ sae lẹ nọ: “Me fievahọ owhẹ, O ỌNOWO, mẹ ta nọ, ‘Whẹ họ Ọghẹnẹ mẹ.’ O ẹvẹ ewoma ra o bu te!”—Olezi 31:14, 19.
18, 19. (a) Ẹvẹ oma kpobi nọ ma rẹ rọ kẹ iruo Ọghẹnẹ u re ro ru eva nọ ma fihọ Jihova ga ziezi? (b) Fikieme u je no Oleleikristi eva ze re o si obọ no eware jọ fiki iruo Ọghẹnẹ?
18 Ọwhọ evaọ iruo Jihova: Pọl ọ rehọ eva nọ a re fihọ eyaa Jihova t’ẹme jẹhọ ọwhọ nọ o kere nọ: “Whaọ ma guọlọ re ohwo kpobi o dhesẹ ajọwha otiọyena via eva ẹriẹ evavọ umuẹro ẹruore na rite urere.” (Ahwo Hibru 6:11) Ma tẹ rrọ owhreze evaọ iruo riẹ, Jihova o ti fi obọ họ kẹ omai. Oke kpobi nọ ma ruẹ uketha riẹ, eva nọ ma fihọ iẹe e rẹ ga viere, ma ve ti ‘dikihẹ whawha, ababọ enuhu.’ (1 Ahwo Kọrint 15:58) Ẹrọwọ mai ọ rẹ kpokpọ, ẹruore mai o ve muẹro ziezi.—Ahwo Ẹfẹsọs 3:16-19.
19 Unevaze nọ ohwo o re ro si obọ no eware jọ: Pọl o siobọno uvẹ nọ ọ hai ro fe re ọ ruẹsi lele Jesu. Emamọ abọ ọ salọ na, dede nọ ẹsejọ eware e jọ gaga kẹe. (1 Ahwo Kọrint 4:11-13) Jihova ọ yeyaa uzuazọ akpọriọ kẹ idibo riẹ hẹ, ẹsejọ a rẹ ruẹ uye ọbẹwẹ. Unevaze nọ ma re ro ru uzuazọ mai lọhọ je si obọ no eware jọ fiki iruo Ọghẹnẹ u dhesẹ epanọ ọtamuo mai inọ ma rẹ gọ Jihova ọ ga te.—1 Timoti 6:6-8.
20. Fikieme odiri ọ rọ rrọ oja kẹ ohwo nọ ọ be rehọ isiuru Uvie na karo?
20 Odiri: Jemis olele na ọ ta udu họ ibe Ileleikristi awọ nọ: “Fikiere, wha wo ithihakọ, imoni mẹ, bẹsenọ Ọnowo na ọ rẹ tha.” (Jemis 5:7) Evaọ akpọ nana nọ ahwo kpobi a be jọ họoma na, o re bẹbẹ re a wo odiri. Ma gwọlọ nnọ eware e via vẹrẹ vẹrẹ. Rekọ Pọl ọ ta udu họ omai awọ inọ ma raro kele enọ ‘e rehọ fiki odiri gbe orọwọ reuku eya na.’ (Ahwo Hibru 6:12) Jọ u no owhẹ eva ze re whọ hẹrẹ Jihova. Uzuazọ ebẹdẹ bẹdẹ evaọ otọakpọ aparadase—oyena u gine te oware nọ a rẹ hẹrẹ!
21. (a) Eme ma bi dhesẹ via okenọ ma tẹ rehọ isiuru Uvie na karo? (b) Eme ma te ta kpahe evaọ uzoẹme nọ o rrọ obaro na?
21 Ẹhẹ, ohrẹ Jesu inọ ma rehọ Uvie na karo o rrọ oware nọ a rẹ sai lele. Ma te ru ere, yọ ma bi dhesẹ nọ ma gine fi eva họ Jihova jẹ ha edhere ọvuọvo nọ o fo kẹ Oleleikristi elele. Dede na, Jesu ọ hrẹ omai re inọ ma hae ‘kake guọlọ ẹrẹreokie Ọghẹnẹ.’ Evaọ uzoẹme nọ o rrọ obaro na, ma te ruẹ oware nọ uduotahawọ yena o mai ro fo nẹnẹ.
Kọ Whọ Sae k’Iyo Nana Vevẹ?
• Kpahe ekwakwa iwo, uruemu owowa vẹ Jesu ọ ta udu họ omai awọ nọ ma re wo?
• Eme ma wuhrẹ no ọtadhesẹ Jesu ọrọ ekamẹle avọ eghogho ẹguede na ze?
• Didi ekwakwa aghae Oleleikristi i re fi obọ họ kẹ omai kake gwọlọ Uvie na?
[Enọ Uwuhrẹ]
[Uwoho nọ o rrọ ẹwẹ-obe avọ 23]
Ibuobu nọ i yo eme Jesu a jọ iyogbere
[Uwoho nọ o rrọ ẹwẹ-obe avọ 25]
Ọdafe nana o you ekwakwa efe riẹ vi Ọghẹnẹ
[Uwoho nọ o rrọ ẹwẹ-obe avọ 25]
Ọthueki ọrọ ohare Jesu na o si obọ no eware riẹ kpobi fiki uzuu oghaghae ọvo
[Uwoho nọ o rrọ ẹwẹ-obe avọ 26]
Ma tẹ rrọ owhreze evaọ iruo riẹ, Jihova o ti fi obọ họ kẹ omai