A Kaki Le Ai n’Oma, A Te Se Ai gb’Oma Uwhremu Na

IKPE jọ nọ e vrẹ, Santiago avọ aye riẹ, Loudes, a kwa kpohọ ẹwho owowoma jọ nọ a re se Huillcapata, Peru, re a rehọ ovuẹ Ebaibol nọ o rẹ kẹ ẹruore na se ahwo nọ e rrọ etẹe. Rekọ, u kri hi, ozerẹ ichọche jọ o te no obọ Cuzco ze o te se ahwo ẹwho na kpobi kokohọ. Ozerẹ na ọ vẹvẹ ahwo na unu inọ Isẹri Jihova nọ e rrọ ẹwho rai na o te wha ekpehre ẹyao ziọ ẹwho na, ekpalekpa-ame i ve je ti kie gaga nọ i ti kpe iruẹ rai jẹ raha ekakọ rai no.

Ahwo buobu a rọwo “eruẹaruẹ” nana, yọ evaọ oware wọhọ emerae ezeza gbọ, uvumọ ohwo evaọ ẹwho na ọ rọwo inọ Santiago avọ aye riẹ, Lourdes a wuhrẹ Ebaibol kugbe ai hi. Okpohwo egọmeti jọ nọ ọ rrọ ẹwho na nọ a re se Miguel o le Santiago avọ Lourdes ruọ oko ẹwho na, be rehọ itho fi ai. Rekọ ọzae avọ aye nana a lele ahwo na whẹwhọ họ.

Nọ oke o be nyaharo na, ahwo ẹwho na jọ a tẹ rọwo nnọ a wuhrẹ ai Ebaibol. Makọ Miguel dede o nwene uruemu riẹ. Santiago o te mu ei Ebaibol họ ewuhrẹ, ọ tẹ te siọ idi nọ ọ jẹ da vrẹta ba, o te zihe ruọ ohwo dhedhẹ. Uwhremu na, Miguel, aye riẹ, gbe emetẹ ivẹ rai a te ti kurẹriẹ.

Nẹnẹ, ukoko Isẹri Jihova o rrọ ẹwho na gidigba. Eva e were Miguel inọ itho buobu nọ o fi na i kie Santiago avọ Lourdes he, yọ o yere ọzae avọ aye na fiki emamọ oriruo udhedhẹ nọ a fihọ otọ.

[Iwoho nọ e rrọ ẹwẹ-obe avọ 32]

Uruemu udhedhẹ orọ Santiago avọ Lourdes (nọ e rrọ obehru na) o lẹliẹ udu ọ Miguel (nọ ọ rrọ ofẹ obọze na) nwene