Epanọ Ewoma O Ti Ro Fi Eyoma Kparobọ

Devidi Ovie na ọ jọ emamọ ohwo. O you Ọghẹnẹ gaga, o you uvi-oziẹ, o te je you iwhrori. Ghele na, ovie owoma nana o lele aye omọvo egbaẹmo jọ nọ o fievahọ gaga wezẹ. Yọ okenọ Devidi o yo nnọ aye na, Batshẹba, o dihọ kẹe no, ọ tẹ gbẹ edhere nọ a ro kpe ọzae riẹ. Ọ tẹ rehọ Batshẹba re ọ ruẹsi ruru emuemu riẹ.—2 Samuẹle 11:1-27.

 ORRỌ vevẹ inọ ahwo-akpọ a wo ẹgba nọ a re ro ru ewoma. Kọ, fikieme a bi ro ru eware iyoma tere? Ebaibol o dhesẹ eware buobu nọ e be whae ze. U te je dhesẹ epanọ Ọghẹnẹ ọ te rọ rehọ ẹkwoma Kristi Jesu si eyoma n’otọ bẹdẹ bẹdẹ.

Eva nọ E Vọ avọ Emuemu

Devidi Ovie na omariẹ ọ fodẹ oware jọ nọ o be wha emuemu ze. Nọ a fere eyoma riẹ via kẹe, ọ rọwo oruthọ riẹ. Avọ ọkora, o kere nọ: “Ri, eva eyoma a jẹ yọrọ omẹ, jegbe eva uzioraha oni mẹ o je dieva mẹ họ.” (Olezi 51:5) O jọ ẹjiroro Ọghẹnẹ vievie he re a yẹ ahwo-akpọ avọ uzioraha. Rekọ, okenọ Adamu avọ Ivi a salọ nnọ a rẹ wọso Ọghẹnẹ, a te ku ẹgba nọ a re ro yẹ emọ nọ e kare uzioraha fiẹ. (Ahwo Rom 5:12) Nọ uviuwou ohwo-akpọ sebaẹgba u bi vihọ na, u te ti dhesẹ oma via inọ “evaọ ohwo e vọ avọ umuomu nọ emaha ze.”—Emuhọ 8:21.

Ohwo-akpọ ọ gbẹ kpọ iroro nana nọ e vọ avọ emuemu na ha, i re su kpohọ ‘ẹnwae-obro . . . egrẹọjẹ, ozighi, ihri-eriọ, ofuomuo, eguae-iyoma, omohẹriẹ, ewuhrẹ-erue, ẹro-oyoma,’ gbe iruemu ọraha efa nọ Ebaibol na i dhesẹ wọhọ “iruo uwo.” (Ahwo Galesha 5: 19-21) Wọhọ oriruo, Devidi Ovie na o fi oma h’otọ kẹ ewhrehe uwo o te bruẹnwae, onọ o wha okpẹtu ze. (2 Samuẹle 12:1-12) Ọ hae sae whaha iroro ọfariẹ-ogbe na. Ukpoye, fikinọ ọ kẹ isiuru nọ o wo kẹ Batshẹba uvẹ re e rro evaọ udu riẹ, Devidi o te lele edhere nọ Jemis olele na ọ ta ẹme te uwhremu na: “Kohwo kohwo o re kie ruọ odawọ okenọ urusio avọ eguọlọ-aguọlọ riẹ e gba riẹ họ. Kẹsena, nọ urusio u te dihọ, u ve yẹ umuomu, nọ umuomu o jẹ ro thẹtawa no o vẹ wha uwhu ze.”—Jemis 1:14, 15.

Ikpakpe otu, ọgbaduo, gbe eware amọfa igboro nọ ma jọ uzoẹme nọ o vrẹ fodẹ na yọ iriruo nọ i yoma vrẹta erọ oware nọ o rẹ sae via okenọ ahwo a tẹ kẹ isiuru iyoma rai uvẹ re e kpọ ae.

Ẹsejọ Ogbori Ọ rẹ Lẹliẹ Ahwo Ru Eware Iyoma

Oware nọ o via kẹ Pọl ukọ na u dhesẹ oware avivẹ nọ o be whae ze nọ ahwo a bi ro ru eware iyoma. Okenọ o ro whu, a riẹ Pọl wọhọ ohwo nọ o re duẹme he, nọ o wo uyoyou. Ọ lahiẹ oma riẹ kpobi rọ gbodibo kẹ inievo Ileleikristi riẹ. (1 Ahwo Tẹsalonika 2:7-9) Rekọ, evaọ oke ọsosuọ, okenọ a riẹe wọhọ Sọl, ọ jẹ “ruabọhọ bi guegue” ẹko ahwo ọvo nana inọ “o re kpe ai.” (Iruẹru 9:1, 2) Fikieme Pọl ọ rọ rọwo kugbe je w’obọ evaọ oja nọ a gbe kẹ Ileleikristi ọsosuọ na? Wọhọ epanọ ọ ta, ọ jọ “ogbori.” (1 Timoti 1:13) Ẹhẹ, evaọ oke ọsosuọ, Pọl o “wo ajọwha Ọghẹnẹ, rekọ u ri vẹ te he,” koyehọ, o wo ajọwha rekọ ọ kare eriariẹ egbagba.—Ahwo Rom 10:2.

Wọhọ Pọl, ahwo oruọzewọ buobu a ru eware iyoma no fikinọ a kare eriariẹ egbagba kpahe oreva Ọghẹnẹ. Wọhọ oriruo, Jesu ọ vẹvẹ ilele riẹ unu nọ: “Oke o be tha [nọ] kohwo kohwo nọ o kpe owhai, o reti roro nọ Ọghẹnẹ ọ rọ ẹgọ.” (Jọn 16:2) Isẹri Jihova erọ ọgbọna a jọ oma rai ruẹ orugba eme Jesu nana no. Evaọ ekwotọ buobu, ahwo nọ a se oma rai eg’Ọghẹnẹ a kpokpo i rai je tube kpe ejọ rai no dede. U re vevẹ, ọwhọ ọthọthọ otiọye na ọ rẹ were Ọghẹnẹ uzẹme na ha.—1 Ahwo Tẹsalonika 1:6.

Ọnọ Ọ Tuọ Emuemu Họ

Jesu ọ fodẹ ugogo oware nọ o wha emuemu ze. Nọ ọ jẹ t’ẹme kẹ isu egagọ nọ e gba riẹ mu nnọ a re kpei, ọ ta nọ: “Whai e rọ ọsẹ rai ukumuomu na, o tẹ were owhai nọ wha re ru ẹguọlọ ọsẹ rai. Nọ emuhọ ze ọrọ ojihẹ.” (Jọn 8:44) Setan họ ohwo nọ ọ rehọ oriobọ bẹbẹ Adamu avọ Ivi họ re a wọso Ọghẹnẹ. Ọwọsuọ yena o wha uzioraha se ahwo-akpọ kpobi, uwhu u te lele iei.

Udu ojihẹ nọ Setan o wo u dhesẹ oma via viere evaọ edhere nọ o ro gboja kẹ Job. Nọ Jihova ọ kẹe uvẹ inọ ọ dawo ẹgbakiete Job, ekọ Job kpobi nọ ọ raha ku ei e vọ Setan eva ha. O si uwhu kpe emọ ikpe riẹ re. (Job 1:9-19) Evaọ ikpe jọ nọ e vrẹ na, ahwo-akpọ a rọ ẹro ruẹ emuemu nọ o viharo gaga no fiki ogbori gbe sebaẹgba ahwo-akpọ gbe fikinọ Setan o bi dhoma họ iruẹru ahwo-akpọ vi epaọ ọsosuọ. Ebaibol o dhesẹ nọ a “gele [Ẹdhọ] ze otọ akpọ, a te gele ikọ riẹ lele ie.” Eruẹaruẹ  evo yena e ta gbagba inọ egele nọ a gele Setan ziọ otọakpọ na o te wha ‘uye se akpọ na’ nọ a re ruẹ obọ riẹ hẹ. Dede nọ Setan ọ sae gba ahwo họ ru eware iyoma ha, o wo ona gaga nọ ọ be rọ ‘viẹ akpọ na kpobi họ.’—Eviavia 12:9, 12.

Esino Iroro nọ E rẹ Wọ Ohwo Ru Emuemu

Re emuemu ọ sai no otọakpọ na no, eware nọ a rẹ kake rẹriẹ ovao dhe họ iroro imuomu nọ e rrọ ohwo eva, ogbori, gbe okpokpoho Setan. Orọ ọsosuọ, ẹvẹ a sai ro si iroro emuemu nọ e rrọ ohwo-akpọ eva no?

Uvumọ edọkita hayo umu nọ o rẹ sai ru onana o riẹ hẹ. Rekọ Jihova Ọghẹnẹ ọ gbẹ edhere no nọ a re ro wo ufuoma no uzioraha gbe sebaẹgba nọ ahwo-akpọ a reuku rai na, yọ ohwo kpobi nọ ọ gwọlọ ọ rẹ sai wo erere noi ze. Jọn ukọ na o kere nọ: “Azẹ Jesu . . . [ọ] wozẹ omai fo no izieraha kpobi.” (1 Jọn 1:7) Okenọ Jesu ọzae ọgbagba na ọ rehọ unevaze fi uzuazọ riẹ họ otọ, “ọ rọ oma obọ riẹ wha izieraha mai eva ehru ure na, re ma je whu kẹ eware iyoma, ma vẹ zọ kẹ ẹrẹreokie.” (1 Pita 2:24) Uwhu idheidhe Jesu u ti si uye nọ emuemu Adamu o wha ze no. Pọl ọ ta nọ Kristi Jesu “ọ rehọ oma riẹ ta ahwo kpobi.” (1 Timoti 2:6) Ẹhẹ, uwhu Kristi u rovie edhere fihọ kẹ ahwo-akpọ kpobi re a wariẹ wo ẹgbagba nọ Adamu o kufiẹ na.

Rekọ, whọ rẹ sae nọ inọ, ‘Otẹrọnọ uwhu nọ Jesu o whu evaọ ikpe 2,000 nọ e vrẹ u ru rie lọhọ nọ ahwo-akpọ a rẹ rọ wariẹ wo ẹgbagba, fikieme emuemu gbe uwhu e gbẹ rọ r’otọ?’ Ma tẹ sae ruẹ uyo kẹ onọ yena o sai fi obọ họ si oware avivẹ nọ o soriẹ ze nọ emuemu ọ rọ rrọ otọ na no—ahwo-akpọ a rrọ ogbori kpahe ẹjiroro Ọghẹnẹ.

Eriariẹ Egbagba E tẹ Riẹ, Ewoma Ọ rẹ Dafia

Eriariẹ egbagba kpahe oware nọ Jihova gbe Jesu a bi ru enẹna re a ro si emuemu no u re ru ei nọ ohwo oruọzewọ o gbe keke aro fihọ jẹ eyoma rehọ họ, hayo tubẹ mai yoma, ‘jọ ọnọ ọ be họre Ọghẹnẹ.’ (Iruẹru 5:38, 39) U no Jihova Ọghẹnẹ eva ze re ọ kpairoro vrẹ emuemu nọ ohwo ọ rehọ ibiaro ogbori ru vrẹ no. Nọ ọ jẹ t’ẹme evaọ Athẹns, Pọl ukọ na ọ ta nọ: “Ọghẹnẹ o ri oke ogbori oyena vo no; fikiere enẹna o juzi kẹ ahwo evaọ koria koria nọ a kuevarẹriẹ, keme o bru ẹdẹ no, nọ o ti ro guẹdhọ akpọ na avọ ẹrẹreokie evaọ obọ ohwo nọ o romu vẹre ino, o ru imuẹro riẹ kẹ ahwo kpobi, nọ ọ kpariẹe no iwhuowhu.”—Iruẹru 17:30, 31.

Ẹkwoma oware nọ ọye ọvo ọ rọ ẹro riẹ ruẹ, Pọl ọ riẹ inọ Jesu ọ kparoma no iwhuowhu ze no, orọnikọ ohwo jọ ọ ta kẹe he, keme Jesu nọ ọ kparoma ze no na ọ t’eme kẹ Pọl ọ tẹ jẹ whaha iẹe ekpokpo nọ o je kpokpo Ileleikristi ọsosuọ na. (Iruẹru 9:3-7) Nọ Pọl ọ nwani wo eriariẹ egbagba erọ ẹjiroro Ọghẹnẹ no, o te nwene, o te ti zihe ruọ emamọ ohwo evaọ aruorokele Kristi. (1 Ahwo Kọrint 11:1; Ahwo Kọlọsi 3:9, 10) Fibae, Pọl ọ rehọ ọwhọ whowho “usiuwoma uvie na.” (Matiu 24:14) Evaọ enwenọ ikpe 2,000 nọ e vrẹ na anwẹnọ Jesu o ro whu jẹ kparoma ze no na, ọ jọ udevie ahwo-akpọ salọ enọ, wọhọ Pọl, i ti lele iei su evaọ Uvie riẹ.—Eviavia 5:9, 10.

Evaọ ikpe-udhusoi nọ o vrẹ na rite inẹnẹ, Isẹri Jihova a rehọ ọwhọ ru iruo nọ Jesu ọ kẹ rai na gba no, inọ: “Fikiere wha wuhrẹ ahwo erẹwho kpobi, wha họ ae ame evaọ odẹ Ọsẹ, gbe Ọmọ gbe Ẹzi Ẹri, wha wuhrẹ ai, re a ru eware kpobi nọ mẹ vuẹ owhai.” (Matiu 28:19, 20) Enọ e jẹ ovuẹ nana rehọ a wo ẹruore ẹria otọakpọ na bẹdẹ bẹdẹ evaọ otọ egọmeti obọ odhiwu ọrọ Kristi. Jesu ọ ta nọ: “Onana họ uzuazọ ebẹdẹ bẹdẹ, re a riẹ owhẹ nọ whẹ ọvo họ uvi Ọghẹnẹ, gbe Jesu Kristi ọnọ who vi.” (Jọn 17:3) Re ohwo o fi obọ họ kẹ omọfa wo eriariẹ nana họ ewoma nọ ọ mae rro kpaobọ nọ ohwo ọ rẹ sai ru kẹ ọrivẹ riẹ.

Enọ i dede emamọ usi Uvie nana rehọ a re dhesẹ ekwakwa wọhọ “uyoyou, oghọghọ, udhedhẹ, uye oruẹ krẹkri, oma-onyẹ,  ewoma, orọwọ, oma-urokpotọ, oma-oyọrọ,” dede nọ emuemu ọ wariẹ e rai họ. (Ahwo Galesha 5:22, 23) Evaọ aruorokele Jesu, a rẹ “rehọ eyoma hwosa eyoma kẹ ohwo ọvo ho.” (Ahwo Rom 12:17) Omomọvo rai ọ rẹ daoma ‘rehọ uwoma kparobo vi uyoma.’—Ahwo Rom 12:21; Matiu 5:44.

Okenọ A Ti Ro Fi Eyoma Kparobọ Riẹriẹriẹ

A te vu ahwo-akpọ wa, ae ọvo a wo ogaga nọ a sai ro fi ọsẹ emuemu, Setan Ẹdhọ, kparobọ vievie he. Rekọ, kẹle na, Jihova ọ te rehọ Jesu nwa Setan uzou. (Emuhọ 3:15; Ahwo Rom 16:20) Jihova ọ te jẹ ta kẹ Kristi Jesu re ọ “whọlọ [isuẹsu akpọ] na kpobi ọ vẹte rehọ ai ze oba,” keme ibuobu rai e wha emuemu buobu nọ a ru no evaọ ikuigbe na ze. (Daniẹl 2:44; Ọtausiwoma Na 8:9) Evaọ oke ẹdhoguo nana nọ o be tha na, enọ e “kezọ usiuwoma Jesu Ọnowo mai hi . . . [a] te re oja ọraha ibẹdẹ bẹdẹ.”—2 Ahwo Tẹsalonika 1:8, 9; Zefanaya 1:14-18.

Nọ a te si Setan gbe enọ e rrọ abọ riẹ kpobi no, Jesu o ve ti fi obọ họ kẹ enọ e zọ re a zihe otọakpọ na kpohọ epanọ o kake jọ vẹre. Kristi ọ vẹ te jẹ kpare enọ i te kẹ ẹrria evaọ otọakpọ nọ a wariẹ ruẹrẹ no na ze. (Luk 23:32, 39-43; Jọn 5:26-29) Evaọ ere oruo, o ve ti voro edada jọ nọ eyoma ọ wha ze nọ ahwo-akpọ a ruẹ uye rai no.

Jihova ọ te gba ahwo họ re a gaviezọ kẹ emamọ usi kpahe Jesu hu. Dede na, ọ be kẹ ahwo uvẹ nọ a re ro wo eriariẹ nọ i re su kpohọ uzuazọ. O rrọ oja re ma rehọ uvẹ nana ruiruo enẹna! (Zefanaya 2:2, 3) Who te ru ere, who ti wuhrẹ epanọ who re ro thihakọ eyoma kpobi nọ o be kẹ owhẹ idhọvẹ jọ evaọ uzuazọ. Whọ te jẹ ruẹ epanọ Kristi ọ te rọ kobaro evaọ ohọre nọ a ti ro fi emuemu kparobọ bẹdẹ bẹdẹ.—Eviavia 19:11-16; 20:1-3, 10; 21:3, 4.

[Uwoho nọ o rrọ ẹwẹ-obe avọ 5]

Sọl ọ jẹ oware uyoma rehọ fikinọ ọ kare eriariẹ egbagba

[Uwoho nọ o rrọ ẹwẹ-obe avọ 7]

Obọ nọ a re fihọ kẹ ohwo wuhrẹ eriariẹ egbagba erọ Ọghẹnẹ họ ewoma nọ ọ mae rro nọ ohwo ọ rẹ sai ru kẹ ọrivẹ riẹ