Kọ Whọ Wọhọ Ure Lagani Auna?

EVAỌ iwhre jọ nọ e kẹle Port Moresby, Papua New Guinea, etausiuwoma ivẹ a je zihe no iruo usiuwoma ota rai ze. Nọ a be nya na, a tẹ ruẹ ure jọ nọ o rrọ wowoma. Ọzae nọ ọ jọ usu rai kpako na ọ tẹ ta nọ: “Ah, ure nọ a re se lagani auna!” Nọ ọ rẹriẹ ovao ku ọzae ọdekọ na ọ tẹ ta haro nọ: “Otofa odẹ na họ ‘ure ẹgbukpe.’ Wo ohẹriẹ no ire efa buobu evaọ obonẹ, kukpe kukpe ọ rẹ fa ebe no, o vẹ wọhọ ẹsenọ o whu no. Rekọ, nọ isoi i te muhọ ẹrọ no, ọ vẹ whẹ ẹbe họ, whẹ idodo họ, ọ vẹ wariẹ dhesẹ eru riẹ via.”

Oware jọ o riẹ nọ a rẹ sai wuhrẹ no ure lagani auna na ze. Wọhọ epanọ ewena jọ a ta, o rrọ usu ire isoi nọ e rẹ whẹ idodo họ nọ e mai wo erru evaọ akpọ na. Dede nọ ọ rẹ fa ebe gbe idodo riẹ no evaọ oke uvo, ure na o rẹ rawo ame evaọ oma riẹ. Awọ riẹ ọ rẹ nya ruotọ gaga, yọ e rẹ sae ta wariẹ itho nọ e rrọ obotọ didi. Ọ rẹ rọ enẹ dada awọ muotọ kẹ okpofou. Uzẹme riẹ họ, ure na ọ rẹ jọ bọbọbọ ghelọ uvo egaga.

Ma rẹ sae nyaku iyero nọ e rẹ dawo epanọ ẹrọwọ mai ọ ga te. Eme o ti fi obọ họ kẹ omai thihakọ? Wọhọ ure lagani auna na, ma rẹ sae da ame nọ o rẹ kẹ uzuazọ nọ o rrọ evaọ Ebaibol na, ma vẹ jẹ rawo ame na evaọ oma mai. Ma rẹ jẹ dada abọ mu ‘utho mai,’ Jihova, jegbe ukoko riẹ. (2 Samuẹle 22:3) Uzẹme, ure lagani auna na o rrọ emamọ ekareghẹhọ inọ evaọ otọ iyero ebẹbẹ, ma rẹ sae yọrọ ẹgba gbe erru abọ-ẹzi mai otẹrọnọ ma rẹ rehọ eruẹrẹfihotọ nọ Jihova ọ kẹ omai ro ruiruo ziezi. Ẹkwoma ere oruo, ma te rọ “reuku eya” nọ ọ yaa na, nọ e kere te eyaa uzuazọ ebẹdẹ bẹdẹ.—Ahwo Hibru 6:12; Eviavia 21:4.