Mugba Kẹ Setan, Ọ Rẹ Te Dhẹ Se Owhẹ ba!
Mugba Kẹ Setan, Ọ Rẹ Te Dhẹ Se Owhẹ ba!
“Wha rọ omarai kẹ Ọghẹnẹ. Mudhe kẹ ẹzi ukumuomu ọ rẹ te dhẹ se owhẹ ba.” —JEMIS 4:7.
1, 2. (a) Uruemu Ukumuomu na vẹ u dhesẹ oma via evaọ oware nọ a kere fihọ Aizaya uzou avọ 14 na? (b) Enọ vẹ ma te ta ẹme kpahe na?
ẸDHỌ họ ohwo nọ ọ mai wo ẹzi uke-ufuo. Ẹme nọ Aizaya ọruẹaro Ọghẹnẹ na o kere fihotọ u dhesẹ omoya riẹ via. Bu vrẹ ikpe udhusoi taure Babilọn o te ti zihe ruọ ọnowuzou ogaga-esuo akpọ-soso, a rehọ unu idibo Jihova gu wọhọ ẹsenọ a be ta kpahe “ovie Babilọn” inọ: “Whọ jọ eva ra tanọ, ‘Me reti muvrẹ kpehru; vi isi Ọghẹnẹ [ivie erọ uyẹ-uvie Devidi.] Mẹ te kpare agbara uvie mẹ kpehru . . . Me ti ru oma mẹ wọhọ ọnọ ọ mai kpehru na.’ ” (Aizaya 14:3, 4, 12-15; Ikelakele 24:17) Omoya “ovie Babilọn” u tho orọ Setan, “ọghẹnẹ akpọ nana.” (2 Ahwo Kọrint 4:4) Rekọ omoya Setan u ti kuhọ evaọ ọraha, nwane wọhọ epanọ uviuwou-isu Babilọn u te oba evaọ edhere omovuọ na.
2 Dede na, nọ Ukumuomu na ọ gbẹ rrọ na, enọ jọ e rẹ sae kẹ omai idhọvẹ wọhọ: Kọ ma rẹ dhozọ Setan? Fikieme ọ be rọ wọ ahwo rehọ ukpokpoma te Ileleikristi? Kọ eme ma rẹ sai ru nọ obọ Ukumuomu na u gbe ro te omai hi?
Kọ Ma rẹ Dhozọ Ukumuomu Na?
3, 4. Fikieme Ileleikristi nọ a wholo na gbe egbẹnyusu rai a gbẹ be rọ dhozọ Edhọ họ?
3 Eme ọ Jesu Kristi nana e rrọ obọdẹ uduotahawọ kẹ Ileleikristi nọ a wholo na: “Whọ dhẹ ozọ eware nọ whọ bete ruẹ uye rai hi, riri, ukumuomu na ọ be guọlọ re omu otu rai jọ fihọ uwouodi, re ọ jawo owhai, otiẹsejọ eva edẹ ikpe wha reti wo ẹlahiẹ. Fi eva họ ri bọwo ẹdẹ uwhu, mẹ rẹte kẹ owhai etu uvie uzuazọ.” (Eviavia 2:10) Ileleikristi nọ a wholo na avọ egbẹnyusu rai nọ i wo ẹruore otọakpọ a be dhozọ Ukumuomu na ha. Orọnikọ a yẹ rai avọ uduowha nana ha. A wo uduowha na fiki ozodhẹ orọ adhẹẹ nọ a wo kẹ Ọghẹnẹ, a tẹ jẹ rehọ ‘uwoho ibekpe riẹ ru oria adhẹzọ rai.’—Olezi 34:9; 36:7.
4 Ilele ọsosuọ Jesu Kristi nọ e kare ozọ a yọrọ ẹrọwọ rai makọ rite uwhu ghelọ ebẹbẹ nọ a ruẹ uye rai. A dhozọ oware nọ Setan Ẹdhọ ọ rẹ sai ru hu, keme a riẹ nọ Jehovah o re kiuke ku otu nọ o kru ẹgbakiete rai vievie he. Epọvo na re, eva otọ ukpokpoma ogaga nọ u bi te ai ọgbọna, o rrọ ọtamuo Ileleikristi nọ a wholo na gbe egbẹnyusu rai nọ e rehọ oma mudhe no inọ a re si obọ no ẹgbakiete rai evaọ egagọ Ọghẹnẹ vievie he. Dede na, Pọl ukọ na ọ ta nọ Ukumuomu na o wo ogaga nọ ọ sae rọ wha uwhu ze. Kọ oyena u gbe ru ozọ mu omai?
5. Eme ma wuhrẹ no Ahwo Hibru 2:14, 15 ze?
5 Pọl ọ ta nọ Jesu ọ ‘rehọ oma uwo gbe azẹ’ re ‘ọ rehọ fiki uwhu ruẹse raha ọnọ o wo ogaga nọ ọ sae rọ wha uwhu ze, ọ yena họ ukumuomu na, gbe re ọ ruẹse sai siwi enọ e rehọ fiki ozọ uwhu rọ rọ igbo eva uzuazọ rai kpobi.’ (Ahwo Hibru 2:14, 15) Wọhọ ‘ọnọ o wo ogaga nọ ọ sae rọ wha uwhu ze,’ Setan ọ rehọ Judas Iskariọt ru iruo kẹsena ọ tẹ rehọ isu ahwo Ju gbe erọ Rom kpe Jesu. (Luk 22:3; Jọn 13:26, 27) Dede na, Jesu ọ rehọ ẹkwoma uwhu idheidhe riẹ siwi ahwo-akpọ uzioraha no obọ Setan je ru ei lọhọ nọ ma ro wo uvẹ uzuazọ ebẹdẹ bẹdẹ.—Jọn 3:16.
6, 7. Diẹse ogaga Ukumuomu na nọ ọ rẹ sae rọ wha uwhu ze u mu?
6 Diẹse ogaga Ukumuomu na nọ ọ sae rọ wha uwhu ze na u mu? Anwọ oke nọ Setan ọ rọ to emuemu họ, ọrue gbe ekpakpọ riẹ e wha uwhu se ahwo-akpọ buobu no. Onana o rrọ ere fikinọ Adamu ọ raha uzi ọ tẹ rọ ere wha uzioraha gbe uwhu se uyẹ ahwo-akpọ. (Ahwo Rom 5:12) U te no ere no, idibo Setan nọ e rrọ otọakpọ a rehọ ukpokpoma te idibo Jihova no, ẹsejọ tube te uwhu dede, nwane wọhọ epanọ o via kẹ Jesu Kristi na.
7 O make rrọ ere na, ma du roro nọ Ukumuomu na ọ rẹ sai kpe ohwo kpobi nọ u je rie he. Ọghẹnẹ ọ be thọ ahwo riẹ yọ ọ te kuvẹ vievie he re Setan o hwere egọ’Ọghẹnẹ uzẹme no otọakpọ na. (Ahwo Rom 14:8) Uzẹme, Jihova ọ rẹ kẹ uvẹ re ukpokpoma u te idibo riẹ kpobi, yọ ọ rẹ kuvẹ re ọwọsuọ Ukumuomu na o wha uwhu se ejọ evaọ usu mai. Ghele na, Ikereakere na i dhesẹ nọ obọdẹ ẹruore ẹkparomatha ọ rrọ kẹ ahwo nọ odẹ rai o rrọ “obe ekareghẹhọ” Ọghẹnẹ—yọ Ukumuomu na ọ rẹ sai ru oware ovuovo rọ whaha ẹkparomatha nana ha!—Malakae 3:16; Jọn 5:28, 29; Iruẹru 24:15.
Fikieme Setan Ọ be rọ Rehọ Ukpokpoma te Omai?
8. Fikieme Ukumuomu na ọ be rọ rehọ ukpokpoma te idibo Ọghẹnẹ?
8 Ma tẹ rrọ idibo omarokpotọ Ọghẹnẹ, kiyọ ugogo ẹjiroro jọ ọ riẹ nọ Ukumuomu na ọ be rọ rehọ ukpokpoma te omai. Ẹjiroro riẹ họ re ọ ruẹsi ru omai si obọ no ẹrọwọ mai. Ma wo usu oghaghae kugbe Ọsẹ obọ odhiwu mai yọ Setan ọ gwọlọ raha obọdẹ usu nana. Onana u re gbe omai unu hu. Jihova ọ jọ Idẹn ta oware jọ nọ o te via inọ egrẹ ọ be te jọ udevie “aye” ẹwoho riẹ avọ “oriọvọ” na gbe udevie “ibi” rai. (Emuhọ 3:14, 15) Ikereakere na i dhesẹ Ukumuomu na via wọhọ “oriọvọ anwae na,” jẹ ta nọ oke nọ u kiọkọ kẹe enẹna o rrọ kpẹkpẹ yọ ofu riẹ ọ rẹ gaga. (Eviavia 12:9, 12) Nọ egrẹ nọ ọ rrọ udevie “ibi” ivẹ na ọ gbẹ rrọ otọ na, ahwo nọ a be rọ ẹrọwọ gọ Jihova a rẹ sai rẹro ukpokpoma. (2 Timoti 3:12) Kọ whọ riẹ ugogo oware nọ o be wha ukpokpoma Setan na ze?
9, 10. Ẹme avro vẹ Ukumuomu na ọ kpare ze, kọ ẹvẹ u ro kpomahọ ahwo-akpọ?
9 Ukumuomu na ọ kpare ẹme avro esuo ehrugbakpọ ze. Ọ tẹ jẹ rehọ ẹme avro ọfa nọ o wobọ kpahe onana ze, avro kpahe ẹgbakiete ahwo-akpọ rọkẹ Ọnọma rai. Setan ọ rehọ ukpokpoma te Job ọzae okiẹrẹe na. Fikieme? Re ọ ruẹse raha ẹgbakiete Job. Aye Job avọ egbẹnyusu esa riẹ nọ i je lele iei weri “uweri ero” a ru ẹjiroro Ukumuomu na gba eva oke yena. Wọhọ epanọ obe Job u dhesẹ, Setan o se Ọghẹnẹ abọ, ta inọ a tẹ kẹe uvẹ re ọ dawo ohwo-akpọ kpobi, ọvuọvo ọ rẹ sae yọrọ ẹrọwọ kẹ Ọghẹnẹ hẹ. Rekọ Job ọ yọrọ ẹgbakiete riẹ jẹ rọ ere dhesẹ Setan fihọ ọtọrue. (Job 1:8–2:9; 16:2; 27:5; 31:6) Ẹdhọ ọ be rehọ ukpokpoma te Isẹri Jihova nẹnẹ re ọ ruẹse raha ẹgbakiete rai je ru ẹme riẹ na họ uzẹme.
10 Nọ ma tẹ riẹ inọ Ukumuomu na ọ be rehọ ukpokpoma te omai fikinọ ọ gwọlọ rehọ oghẹrẹ kpobi ruẹ nọ ọ raha ẹgbakiete mai kẹ Ọghẹnẹ, onana o rẹ sai gine fi obọ họ kẹ omai wo ogaga avọ uvi aruọwha. (Iziewariẹ 31:6) Ọghẹnẹ mai họ Osu Ehrugbakpọ na, yọ o ti fi obọ họ kẹ omai yọrọ ẹgbakiete mai. Joma daoma ru Jihova eva were ẹkwoma ẹgbakiete mai nọ ma rẹ yọrọ ẹsikpobi, kẹe uyo nọ ọ rẹ kpahe kẹ Setan Ẹdhọ, oje-ijehwẹ ologbo na.—Itẹ 27:11.
‘Thọ Omai no Obọ Oyoma Na’
11. Eme họ otofa ayare na, “Who su omai ruọ ẹdawọ họ”?
11 Re a sae yọrọ ẹgbakiete o rrọ okolo oware he; o gwọlọ olẹ ogaga. Eme ọ olẹ oriruo olori na i re fi obọ họ gaga. Evaọ abọjọ olẹ na, Jesu ọ ta nọ: “Who su omai ruọ ẹdawọ họ, rekọ thọ omai no obọ oyoma na.” (Matiu 6:13, NW ) Jihova ọ rẹ dawo omai re ma ruẹsi kie ruọ odawọ họ. (Jemis 1:13) Dede na, Ikereakere na e rẹ sai dhesẹ eware nọ Jihova ọ kuvẹ kẹ ẹsejọ wọhọ ẹsenọ ọye o ru rai. (Rut 1:20, 21) Nọ ma tẹ be lẹ wọhọ epanọ Jesu ọ ta na, koyehọ ma be yare Jihova nọ ọ kẹ omai uvẹ re ma kie kẹ odawọ họ. Ọ te kpahe fihọ ayare mai keme Ikereakere na e kẹ omai imuẹro nọ: “Ọghẹnẹ [ọ vọ] avọ ọtẹruo, . . . o re je ẹdawọ nọ ọ ro vi owhẹ o te owhẹ hẹ; rekọ ọ rẹ jọ eva ẹdawọ na ru epanọ owhẹ rẹ rọ va ae abọ, re whọ ruẹse sai thihi-akọ riẹ.”—1 Ahwo Kọrint 10:13.
12. Fikieme ma rẹ rọ lẹ nọ, “Thọ omai no obọ oyoma na”?
12 U fo kẹhẹ, nọ Jesu ọ ta ẹme kpahe odawọ no evaọ olẹ oriruo riẹ na, o te fibae nọ: “Thọ omai no obọ oyoma na.” (NW ) Efafa Ebaibol jọ i se nọ: “Si omai no eyoma” (Ebaibol Ẹri Na; Revised Standard Version) hayo “Thọ omai no eyoma.” (Contemporary English Version) Dede na, evaọ Ikereakere na, ahwo a mae rehọ ẹme na “thọ omai no,” ta ẹme kpahe, yọ Usiuwoma Matiu o nwani dhesẹ Ukumuomu na wọhọ ‘Ọdawo-Ahwo na,’ onọ u dhesẹ ohwo. (Matiu 4:3, 11) Fikiere u wuzou re ma lẹ nọ a thọ omai no obọ Setan Ẹdhọ, “oyoma na.” Ọ rẹ daoma gwọlọ ru omai thọ uzi mukpahe Ọghẹnẹ. (1 Ahwo Tẹsalonika 3:5) Nọ ma tẹ yare nọ, “Thọ omai no obọ oyoma na,” yọ ma be yare Ọsẹ obọ odhiwu mai inọ ọ kpọ omai je fi obọ họ kẹ omai re obọ Ukumuomu na o se omai ba ete.
Whọ Jọ Obọ Ukumuomu na U Te Owhẹ Hẹ
13, 14. Fikieme u je fo nọ ukoko obọ Kọrint na a rẹ kpọ uruemu rai vi evaọ oghẹrẹ nọ a ru ọzae nọ ọ jọ obrẹnwae evaọ ukoko na?
13 Okenọ Pọl ọ jẹ ta udu họ Ileleikristi obọ Kọrint awọ inọ a hae rọ vrẹ ohwohwo, o kere nọ: “Ọnọ owha rehọ koware koware vrẹ, mẹ rehọ vrẹ e re; keme onọ omẹ rehọ vrẹ, otẹrọnọ mẹ rehọ oware jọ vrẹ, fiki rai mẹ jẹ rehọ iẹ vrẹ eva obaro Kristi; re Setan ọ siọ erere ba ewo eva oma mai: keme ma rọ ogbori ereghẹ riẹ hẹ.” (2 Ahwo Kọrint 2:10, 11) Idhere sa-sa e riẹ nọ obọ Ukumuomu o sai ro te omai, rekọ fikieme Pọl ọ rọ ta eme nana nọ ma se na?
14 Pọl ọ whọku ahwo ukoko obọ Kọrint na fikinọ a kuvẹ kẹ ọzae jọ nọ ọ rrọ ogbọfariẹ re ọ gbẹ jọ evaọ ukoko na. Ababọ avro, onana o were Setan keme o wha ekela se ukoko na fikinọ a kuvẹ kẹ “oghẹrẹ ẹnwae-obro nọ a sae ruẹ eva udevie egedhọ dede he.” Kẹsena a te si obrẹnwae na no ukoko. (1 Ahwo Kọrint 5:1-5, 11-13) Uwhremu na o te kurẹriẹ. Otẹrọnọ ahwo ukoko obọ Kọrint na a gbẹ rọ vrẹ je zihe ọzae na ze he, obọ Ukumuomu o rẹ sai je te ai evaọ edhere ọfa. Edhere vẹ? Koyehọ a bi dhesẹ evega, ababọ ohrọ wọhọ Setan omariẹ. Nọ ‘uweri’ ọzae nọ o kurẹriẹ na o ‘tẹ dae oma fia’ ga te epanọ ọ rọ siọ Ọghẹnẹ ba ẹgọ, Jihova, Ọghẹnẹ ohrọ na ọ te mae jọ obọ ekpako na nekpẹ oware nọ o soriẹ. (2 Ahwo Kọrint 2:7; Jemis 2:13; 3:1) Uzẹme, Oleleikristi uzẹme ọvuọvo ọ gwọlọ raro kele Setan he ẹkwoma evega idhesẹ, dhuaro, jẹ kare ohrọ.
Ẹgọ-Ẹmo Ọghẹnẹ Ọ be Thọ Omai
15. Oghẹrẹ ẹmo vẹ ma bi fi, kọ eme obokparọ o roma hwa?
15 Re a ruẹse thọ omai no obọ Ukumuomu na, o gwọlọ nọ ma rẹ dadamu evaọ ohọre abọ-ẹzi wọso egaga izi imuomu na. Re ma sai fi kparobọ evaọ ohọre na o roma hwa ‘ẹgọ-ẹmo Ọghẹnẹ ọsoso nọ ma re fihọ oma.’ (Ahwo Ẹfẹsọs 6:11-18) Ẹgọ-ẹmo nana ọ kẹre te ‘ẹrẹreokie nọ a rẹ whẹ họ igbama.’ (Ahwo Ẹfẹsọs 6:14) Sọl ovie Izrẹl anwae na ọ ghẹmeeyo kẹ Ọghẹnẹ, ẹzi Ọghẹnẹ o te noi oma. (1 Samuẹle 15:22, 23) Rekọ nọ ma te bi ru oware nọ u kiẹrẹe je ku ẹgọ-ẹmo abọ-ẹzi ọsoso na h’oma, ma ti wo ẹzi Ọghẹnẹ gbe uketha nọ ma gwọlọ nọ ma be wọso Setan gbe ijẹle imuomu riẹ, idhivẹri na.—Itẹ 18:10.
16. Ẹvẹ ma sai gbe ro wo uketha nọ ma be wọso egaga izi imuomu na?
16 Re ma gbe wo uketha nọ ma re ro mugba kẹ egaga izi imuomu na, usu eware nọ ma gwọlọ họ Ebaibol na nọ ma re se je ro wuhrẹ oma mai ẹsikpobi, avọ eroruiruo ebe nọ “odibo oruọzewọ avọ areghẹ” na o kere. (Luk 12:42) Ma vẹ te rọ enẹ rehọ obọdẹ eware abọ-ẹzi vọ iroro mai rọwo kugbe uthubro Pọl na: “Imoni, oware kpobi nọ o rọ uzẹme, oware kpobi nọ u wo adhẹẹ, oware kpobi nọ u kiẹrẹe, oware kpobi nọ orọ ẹfuọ, oware kpobi nọ orọ aruoriwo, otẹrọnọ ọ riẹruo jọ o rọ, otẹrọnọ oware jọ o rọ nọ ufo ajiri, wha [hai roro] eware nana.”—Ahwo Filipai 4:8.
17. Eme o re fi obọ họ kẹ omai ta usiuwoma na ziezi?
17 Jihova o re fi obọ họ kẹ omai “wha eviẹ ọruẹrẹ kpahọ usiuwoma udhedhẹ họ awọ.” (Ahwo Ẹfẹsọs 6:15) Abọ nọ ma re wo ẹsikpobi evaọ iwuhrẹ Ileleikristi o rẹ thọ omai kpahe kẹ ewhowho emamọ usi Uvie Ọghẹnẹ na. Oghọghọ nọ ma re wo noi ze u wo umuo ho nọ ma bi wuhrẹ amọfa uzẹme orọ Ẹme Ọghẹnẹ je fi obọ họ kẹ ai wo ufuoma abọ-ẹzi na! (Jọn 8:32) “Ọgbọdọ Ẹzi na, ọnọ ọrọ ẹme Ọghẹnẹ” yọ ọthọwẹ ologbo kẹ omai nọ ma re ro mugba kẹ iwuhrẹ erue jẹ “raha eria [orọwọ erue] nọ egae.” (Ahwo Ẹfẹsọs 6:17; 2 Ahwo Kọrint 10:4, 5) Ebaibol na nọ ma re ro ruiruo avọ ona u re fi obọ họ kẹ omai wuhrẹ amọfa uzẹme na jẹ thọ omai nọ ma gbe ro kie kẹ eghẹ Ukumuomu na ha.
18. Ẹvẹ ma sai ro “dikihẹ kẹ ereghẹ ukumuomu” na?
18 Pọl o mu ẹme ẹgọ-ẹmo abọ-ẹzi mai na họ ta inọ: “Wha kru oma ga eva Ọnowo na gbe eva ogaga eri riẹ. Wha fi ẹgọ-ẹmo Ọghẹnẹ ọsoso họ oma, re wha sai dikihẹ kẹ ereghẹ ukumuomu.” (Ahwo Ẹfẹsọs 6:10, 11) Ubiẹme Griki nọ a fa “dikihẹ” na u kiekpahe epanọ alakpa-ẹmo o re dikihẹ ẹta riẹ evaọ etoke ẹmo-ofio. Dede nọ Setan ọ be rehọ edhere ẹghẹ daoma raha okugbe mai, gwọlọ gbe iwuhrẹ mai ku, hayo raha ẹgbakiete mai kẹ Ọghẹnẹ, ma dikihẹ ẹta mai evaọ ẹmo-ofio nana. Rekọ Ukumuomu na ọ re sai fi kparobọ evaọ ohọre riẹ hẹ—dazigbe, ọ te kparobọ họ! *
Mudhe kẹ Ukumuomu na, Ọ te Dhẹ se Owhẹ Ba
19. Edhere jọ vẹ ma rẹ rọ jowọ ogaga wọso Ukumuomu na?
19 Ma rẹ sai fi kparobọ evaọ ohọre abọ-ẹzi mai na mukpahe Ukumuomu na avọ izi imuomu nọ e rrọ otọ riẹ. Ẹjiroro ọvuọvo ọ riẹ nọ ma rẹ rọ dhozọ Setan he keme Jemis olele na o kere nọ: “Wha rọ omarai kẹ Ọghẹnẹ. Mudhe kẹ ẹzi ukumuomu ọ rẹ te dhẹ se owhẹ ba.” (Jemis 4:7) Edhere ọvo jọ nọ ma rẹ rọ jowọ ogaga wọso Setan avọ ogba izi imuomu riẹ họ, oma nọ ma re si no iruẹru imizi gbe ahwo nọ a re ru iruẹru-imizi kpobi. Ikereakere na i dhesẹ vevẹ nọ idibo Jihova a rẹ kẹnoma kẹ uruemu isi-erọgbẹva, ẹvagba gbe iruẹru-imizi. Nọ ma tẹ rrọ jajaja evaọ iruẹru abọ-ẹzi jẹ rrọ gaga evaọ ẹrọwọ, ma re du dhozọ nọ ohwo jọ ọ te nua omai hi.—Ikelakele 23:23; Iziewariẹ 18:10-12; Aizaya 47:12-15; Iruẹru 19:18-20.
20. Ẹvẹ ma sae rọ wọso Ukumuomu na?
20 Ma re ‘mudhe kẹ Ukumuomu’ na ẹkwoma itee Ebaibol na gbe uzẹme na nọ ma rẹ yọrọ ziezi, je dikihẹ ga wọ so iẹe. Ohẹriẹ o rrọ akpọ na avọ Setan he keme ọye họ ọghẹnẹ akpọ na. (2 Ahwo Kọrint 4:4) Fikiere, ma rẹ siọ eware nọ i dhesẹ oka akpọ na, wọhọ ẹzi omoya, oriobọ, ọfariẹ-ogbe, ozighi, gbe efe-ole. Ma riẹ inọ Ukumuomu na ọ nya se Jesu ba okenọ Jesu ọ rehọ ẹkwoma Ikereakere na zae dhe evaọ etoke odawọ obọ udhude na. (Matiu 4:4, 7, 10, 11) Epọvo na re, Setan ọ te ‘dhẹ se omai ba’ avọ omovuọ otẹrọnọ ma rehọ oma mai kpobi kẹ Jihova jẹ rẹro suo iẹe ẹkwoma olẹ ẹsikpobi. (Ahwo Ẹfẹsọs 6:18) Avọ obufihọ Jihova Ọghẹnẹ gbe Ọmọ riẹ nọ o you gaga na, ohwo ọvuọvo ọ rẹ sae wha enwoma ebẹdẹ bẹdẹ se omai hi—vievie, makọ Ukumuomu na dede!—Olezi 91:9-11.
[Oruvẹ-obotọ]
^ edhe-ẹme 18 Rọkẹ evuẹ efa kpahe ẹgọ-ẹmo abọ-ẹzi nọ Ọghẹnẹ ọ rẹ kẹ na, rri Uwou-Eroro ọ May 15, 1992 (ọrọ Oyibo), ẹwẹ-obe avọ 21-23.
Eme Họ Uyo Ra?
• Kọ u fo re ma dhozọ Setan Ukumuomu na?
• Fikieme Setan ọ be rọ rehọ ukpokpoma te Ileleikristi?
• Fikieme ma jẹ lẹ nọ a thọ omai no obọ “oyoma na”?
• Ẹvẹ ma sai ro fi kparobọ evaọ ohọre abọ-ẹzi?
[Enọ Uwuhrẹ]
[Uwoho nọ o rrọ ẹwẹ-obe avọ 8]
Ilele ọ Kristi erọ oke ọsosuọ a yọrọ ẹrọwọ rai te uwhu
[Uwoho nọ o rrọ ẹwẹ-obe avọ 9]
Ukumuomu na ọ rẹ sae whaha ẹkparomatha ahwo nọ a rrọ ekareghẹhọ Jihova ha
[Uwoho nọ o rrọ ẹwẹ-obe avọ 10]
Kọ whọ be hae lẹ nọ a thọ owhẹ no obọ “oyoma na”?
[Uwoho nọ o rrọ ẹwẹ-obe avọ 11]
Kọ who fi “ẹgọ-ẹmo Ọghẹnẹ ọsoso” na họ oma?