Ru Eroro-Didi Re O Jọ Oware Omawere

AHWO jọ a rẹ dhozọ eroro-didi. A rẹ sai rri eroro-didi wọhọ iruo egaga, onọ o rẹ gwọlọ nnọ ohwo ọ jọ oria ovo kpoko. Ahwo otiọye na a rẹ sae jẹ fo oma rai inọ a bi roro didi hi, maero nọ a te se kpahe epanọ u wuzou te. (Ahwo Filipai 4:8) Dede na, re ma roma totọ roro-didi kpahe uzẹme nọ ma wuhrẹ no kpahe Jihova, ekwakwa iwoma riẹ, eware igbunu nọ o ru no, itee riẹ, gbe ẹjiroro oruaro riẹ o rẹ sae jọ edhere omaweromẹ nọ ma rẹ rọ rehọ oke mai ruiruo, yọ ere u fo nọ o rẹ jọ. Fikieme?

Jihova Ọghẹnẹ họ Osu Oride ọrọ ehrugbakpọ na, yọ o bi ruiruo gaga re ọ ruẹsi ru ẹjiroro okpehru riẹ gba. (Jọn 5:17) Ghele na, o wo ọdawẹ kpahe iroro nọ e rrọ udu enọ e be gọe kpobi. Devidi ọso-ilezi na ọ riẹ onana o te kere evaọ otọ ẹgba ẹzi Ọghẹnẹ nọ: “O ỌNOWO, whẹ ọnọ ọ gwọlọ omẹ whọ tẹ riẹ omẹ! Whọ riẹ oke ẹkeria mẹ gbe oke etovrẹ mẹ; whọ riẹ ẹjiroro eva mẹ no anwọ abae ze.”—Olezi 139:1, 2.

Ohwo ọ tẹ kaki rri eme ọso-ilezi na, udu o rẹ sai whrehe iei. Ọ sai roro nnọ, ‘Dede nọ Ọghẹnẹ o thabọ no omai gaga, o bi muẹrohọ iroro iyoma kpobi nọ e ruọ udu mẹ.’ Ẹhẹ, o rrọ erere kẹ omai inọ Ọghẹnẹ ọ riẹ iroro iyoma mai. Onana o rẹ sai fi obọ họ kẹ omai họre iroro ethọthọ yọ u re ru nọ, ma te wo iroro itieye na, ma jẹ feva kẹ Ọghẹnẹ, avọ udufihọ inọ ọ te rọ vrẹ omai fiki ẹrọwọ nọ ma fihọ idhe ẹtanigbo Jesu. (1 Jọn 1:8, 9; 2:1, 2) Rekọ, eva oke ovona, ma rẹ kareghẹhọ inọ Jihova ọ be rehọ emamọ ubiẹro rri enọ e be gọe. O re muẹrohọ okenọ ma te bi roro kpahe iruo iwoma riẹ.

Ẹsejọhọ, whọ rẹ sae nọ inọ: “Kọ uzẹme o ginẹ rrọ inọ Jihova o bi muẹrohọ iroro iwoma erọ ima ahwo buobu nọ e be gọe na?” Ee. Jesu o fiẹgba họ isiuru nọ Jihova o wo kpahe omai nọ ọ ta nnọ Jihova o bi muẹrohọ imuedi esese dede, o te fibae nọ: “Wha ghare vi emevra buobu.” (Luk 12:6, 7) Imuedi e rẹ sai roro kpahe Jihova ha. Fikiere otẹrọnọ ọ rẹ daezọ rai, ẹvẹ ọ rẹ daezọ mai te jẹ wereva kpahe iroro iwoma nọ e rrọ omai udu! Ẹhẹ, wọhọ Devidi, ma rẹ sae lẹ ududu nọ: “Ru re ẹme unu mẹ gbe iroro eva mẹ e hẹ were owhẹ, O ỌNOWO, eri mẹ gbe ọta [mẹ].”—Olezi 19:14.

Ma rẹ sae jọ eme ọ Malakae ọruẹaro na ruẹ imuẹro efa inọ Jihova o wo ọdawẹ kpahe iroro enọ e be rehọ omarokpotọ gọe. Nọ ọ jẹ ta kpahe edẹ mai na, ọ ruẹaro nọ: ‘Kẹsena enọ e be dhẹ-ozọ ỌNOWO na ohwo ọ tẹ be ta ẹme kẹ ohwo; ỌNOWO na ọ tẹ gaviezọ je yo ẹme kẹ ae, a te kere obe ekareghẹhọ rọ kẹe kpahọ enọ e be dhẹ-ozọ ỌNOWO na, je bi roro odẹ riẹ.’ (Malakae 3:16) Ma tẹ kareghẹhọ oma mai inọ Jihova ọ be “gaviezọ” nọ ma te bi roro kpahe iẹe o rẹ sai ru eroro kpahe Ọghẹnẹ jọ oware omawere kẹ omai. Fikiere, joma wariẹ eme ọ ọso-ilezi na ọnọ o kere nọ: “Mẹ rẹ kareghẹhọ iruo ra kpobi, me ve je roro iruo ogaga ra.”—Olezi 77:12.