Emamọ Arozaha Eriosehọ Nọ Ọ Rẹ Sasa oma
Emamọ Arozaha Eriosehọ Nọ Ọ Rẹ Sasa oma
“Eva emu ọriọ hayo eva edada hayo eva oware kpobi nọ wha re ruo, wha ru ai kpobi rọ kẹ Ọghẹnẹ oruaro.”—1 AHWO KỌRINT 10:31.
1, 2. Fikieme a sae rọ ta nọ etoke omawere nọ a re wo yọ “okẹ Ọghẹnẹ,” ghele na unuovẹvẹ vẹ Ebaibol na ọ kẹ?
RE A zaharo nọ o rẹ kẹ evawere o rrọ isiuru nọ a ro kugbe ohwo ma. Jihova, Ọghẹnẹ evawere mai na ọ gwọlọ nọ ma reawere uzuazọ, yọ o ru eruẹrẹfihotọ buobu kẹ omai nọ ma sai ro ru onana. (1 Timoti 1:11; 6:17) Solomọn ovie owareghẹ na o kere nọ: “Mẹ riẹ nọ oware ofa nọ uwoma . . . vi oghọghọ . . . o rọhọ. O tẹ jẹ rọ okẹ Ọghẹnẹ kẹ ohwo kpobi nọ ọ rẹ re da, je wo evawere eva iruo riẹ.”—Ọtausiwoma Na 3:12, 13.
2 Oghọghọ utioye nọ ohwo o re wo okenọ o te se oma họ bi roro kpahe eware iwoma nọ ọ sai ru no o rẹ ginẹ kẹ omosasọ, maero nọ ọ tẹ be reawere onana kugbe ahwo uviuwou hayo egbẹnyusu riẹ. A rẹ sai rri oghọghọ utioye na wọhọ “okẹ Ọghẹnẹ.” Uzẹme, dede nọ Ọnọma na ọ kẹ omai eware buobu nọ ma sae rọ wereva, orọnikọ o nwani dhesẹ nọ akpọriọ mai o gbe wo umuo ho ho. Ebaibol na ọ ghọ idi nọ a rẹ da vrẹ oma, okpore, gbe ọfariẹ-ogbe, o kẹ unuovẹvẹ inọ ahwo nọ a re ru eware itieye na a “rẹ sae reuku uvie Ọghẹnẹ hẹ.”—1 Ahwo Kọrint 6:9, 10; Itẹ 23:20, 21; 1 Pita 4:1-4.
3. Eme o ti fi obọ họ kẹ omai jaja aro vi evaọ abọ-ẹzi je wo ẹdẹ ologbo Jihova họ iroro?
3 Vi epaọ anwẹdẹ kpobi, eva edẹ urere nana Ileleikristi a rẹriẹ ovao dhe use-abọ orọ epanọ a re ro yeri uzuazọ avọ areghẹ eva akpọ ogbekuo nana ababọ uvẹ nọ a rẹ kẹ iruẹru akpọ na re e da ruọ ai oma. (Jọn 17:15, 16) Wọhọ epanọ a ruẹaro riẹ, ahwo oge nana a “yowọ enu-awere siọ Ọghẹnẹ ba” ga te epanọ a bi ro ‘vuhu’ imuẹro nọ i dhesẹ nọ “uye obẹbẹ ruaro” na o kẹlino ho. (2 Timoti 3:4, 5; Matiu 24:21, 37-39) Jesu ọ vẹvẹ ilele riẹ unu nọ: “Wha yọrọ oma rai ogbẹrọ ere he emuọriọ obuobu gbe edada ibuobu, gbe iroro akpọ na, i ve ti ru owhai zoruẹ, re ẹdẹ ọyena ọ se owhai ba emu idudhe wọhọ agbefẹ.” (Luk 21:34, 35) Wọhọ idibo Ọghẹnẹ, o rrọ ọtamuo mai inọ ma re yo ẹme kẹ unuovẹvẹ Jesu na. Wo ohẹriẹ no akpọ nọ ọ riẹ Ọghẹnẹ hẹ nọ ọ wariẹ omai họ na, ma be daoma jaja aro vi je si ẹdẹ ologbo Jihova te iroro.—Zefanaya 3:8; Luk 21:36.
4. (a) Fikieme o jẹ rrọ bẹbẹ re a ruẹ arozaha eriosehọ nọ o fo? (b) Ohrẹ vẹ nọ o rrọ Ahwo Ẹfẹsọs 5:15, 16 u fo nọ ma re fihọ iruo?
4 Re a si oma no iruemu ogbekuo akpọ na o nwane lọhọ tere he, keme Ẹdhọ o bi ru ai siuru je ru ai vọ oria kpobi. O mae rrọ use-abọ nọ ma tẹ be gwọlọ arozaha eriosehọ. Eware arozaha eriosehọ buobu nọ akpọ na o bi ru, a ruẹrẹ e rai họ kẹ “urusio iwo.” (1 Pita 2:11) Eware ẹkeriotọ omawere nọ e vọ avọ enwoma e vọ ẹgbede, yọ ebe, TV, Itanẹte, gbe Ividio e rẹ sae wha ikpehre eware nana ziọ uwou ohwo dede. Fikiere Ẹme Ọghẹnẹ ọ kẹ Ileleikristi ohrẹ nọ u fo inọ: “Wha fiẹrohọ otọ enẹna eva onya rai, o jọ wọhọ igheghẹ hẹ rekọ iwoareghẹ, wha raha oke he, keme edẹ na i re yoyoma.” (Ahwo Ẹfẹsọs 5:15, 16) Nọ ma tẹ nya lele ohrẹ nana kpekpekpe ọvo ma jẹ sai ru nọ erozaha enwoma i gbe si omai uru, rehọ oke mai kpobi no ho, ẹhẹ, tubẹ raha usu mai kugbe Jihova, nọ u re su omai kpohọ ọraha!—Jemis 1:14, 15.
5. Eme ọ rẹ mae kẹ omai omosasọ?
5 Nọ Ileleikristi a wo eware buobu nọ a re ru na, u gine fo inọ a rẹ gwọlọ oke nọ a rẹ rọ reawere arozaha oke eriosehọ jọ. Eva uzẹme, obe Ọtausiwoma Na 3:4 o ta inọ u wo “oke jọ nọ a rọ hwẹ” gbe “oke jọ nọ a re ro gbe ile.” Fikiere Ebaibol na o rri arozaha wọhọ oke oraha kufiẹ hẹ. O make rrọ ere na, u fo nọ arozaha eriosehọ nọ ma rẹ salọ kpobi ọ jọ onọ ọ rẹ kẹ omosasọ, orọnikọ onọ u re fi edikihẹ abọ-ẹzi mai họ ọza ha hayo rehọ oke iruẹru abọ-ẹzi mai hi. Ileleikristi nọ e kpako evaọ abọ-ẹzi a riẹ rono eware nọ a rẹro ruẹ ze inọ ẹkẹ evawere e rẹ mai no ze. Ileleikristi nana a rehọ oreva Jihova uruo karo eva uzuazọ rai, a tẹ jẹ be ruẹ “udhedhẹ kẹ izi rai” ẹkwoma ẹjẹrehọ owhowha Jesu.—Matiu 11:29, 30; Iruẹru 20:35.
Ẹsalọ Arozaha nọ O Fo
6, 7. Eme ọ rẹ sai fi obọ họ kẹ owhẹ riẹ aruọzaha omawere nọ o fo gbe ọnọ o fo ho?
6 Ẹvẹ ma sae rọ riẹ nọ oghẹrẹ arozaha eriosehọ jọ o fo kẹ Oleleikristi? Esẹgbini a rẹ kẹ emọ rai ọkpọvio, yọ ekpako na a rẹ kẹ obufihọ wọhọ epanọ o gwọlọ. Dede na, o nwane rọnọ amọfa a rẹ vuẹ omai hi inọ ugogo obe jọ, isinima jọ, erozaha jọ, ile-igbe jọ, hayo ole jọ o fo ho. Pọl ọ ta nọ ‘enọ e rro te no, a wo areghẹ te epanọ a sae rọ hẹriẹ uwoma no uyoma.’ (Ahwo Hibru 5:14; 1 Ahwo Kọrint 14:20) Ebaibol na e kẹ ehri-izi nọ e rẹ kpọ omai. Obruoziẹ-iroro ra nọ Ẹme Ọghẹnẹ o wuhrẹ no o ti fi obọ họ kẹ owhẹ nọ whọ tẹ be nya lele ekpakpọ riẹ.—1 Timoti 1:19.
7 Jesu ọ ta nọ “ibi ure a re ro vuhu ure.” (Matiu 12:33) Otẹrọnọ oghẹrẹ arozaha hayo iruẹru eriosehọ jọ e be lẹliẹ ohwo wo isiuru ozighi, ọfariẹ-ogbe, hayo uruemu-imizi, u fo nọ a rẹ siọ arozaha otiọye na. O fo gbe he otẹrọnọ o re fi uzuazọ ohwo họ ọza, o rẹ wha ọbẹwẹ hayo elọhoma ze, hayo otẹrọnọ o re ru amọfa zoruẹ. Pọl ukọ na ọ vẹvẹ omai unu inọ otẹrọnọ ma bi ru oware jọ nọ u re kpokpo obruoziẹ-iroro inievo mai kiyọ uzi ma be thọ na. Pọl o kere nọ: ‘Wha te bi ru inievo rai thọ jẹ raha idu elọlọhọ rai yọ Kristi wha bi ru thọ na. Fikiere, otẹrọnọ emu-ore ọ rẹ wha ezoruẹ se oniọvo mẹ, mẹ rẹ siọ emu ọriọ ba, re mẹ se oniọvo mẹ ba eru zoruẹ.’—1 Ahwo Kọrint 8:12, 13.
8. Enwoma vẹ erozaha kọmputa gbe erọ ividio e rẹ wha ze?
8 Whọ rẹ jọ iwou-eki ruẹ ekwakwa erozaha kọmputa gbe erọ ividio buobu. Ejọ e rẹ sae kẹ eriosehọ avọ omosasọ nọ a jẹ sa akiehwẹ, rekọ erozaha itieye na buobu i bi dhesẹ eware nọ Ebaibol na e ghọ. Evaọ uzẹme, o rrọ oware ijehwẹ gheghe he nọ arozaha kọmputa hayo erọ ividio ọ tẹ rrọ ọnọ a re jo kpe ohwo, nwa ohwo oma hayo dhesẹ iruemu ọfariẹ! Jihova o mukpahe ahwo nọ a “you igbruku” hayo ozighi. (Olezi 11:5; Itẹ 3:31; Ahwo Kọlọsi 3:5, 6) Yọ otẹrọnọ arozaha jọ ọ be lẹliẹ owhẹ wo ẹzi uvo-uthe hayo ẹzi evedha, lẹliẹ owhẹ jọ ọkora, hayo raha oke mi owhẹ gaga, kiyọ who re vuhu enwoma abọ-ẹzi nọ o be wha ze who ve je ru inwene nọ o gwọlọ ababọ oke oraha.—Matiu 18:8, 9.
Ẹruorote Ẹgwọlọ Arozaha Evaọ Emamọ Edhere
9, 10. Eme ahwo nọ a wo orimuo a rẹ sai ru rọ rẹrote ẹgwọlọ eriosehọ rai?
9 Ẹsejọ Ileleikristi a rẹ nọ inọ: “Arozaha eriosehọ vẹ o fo? Eware eriosehọ akpọ na buobu e wọso ehri-izi Ebaibol na.” Jọ u mu owhẹ ẹro inọ a rẹ sae ruẹ arozaha eriosehọ nọ o fo, rekọ o gwọlọ omodawọ. O gwọlọ nọ a re roro kpahe iẹe ziezi, maero kọ esẹgbini na. Ahwo buobu a rẹ jọ uviuwou gbe ukoko na duku emamọ omakugbe eriosehọ. Nọ a tẹ be reawere emu nọ a bi dhuoma re he je bi gbiku iruẹru okpẹdẹ na hayo ta kpahe uzoẹme Ebaibol jọ, u re siuru jẹ kẹ ọbọga. A rẹ sai ru ọruẹrẹfihotọ kẹ arozaha nọ o fo, ekpohọ otafe kẹ arozaha omawere hayo emuore, a jẹ sai ru ọruẹrẹfihotọ kẹ onya ọrọ oma uru-sasa. Emamọ erozaha eriosehọ itieye na e rẹ sae sasa oma jẹ kẹ erri.
10 Ọkpako ukoko jọ avọ aye riẹ nọ a wo emọ esa a ta nọ: “No emaha ze, ma jẹ hae kẹ emọ mai uvẹ re a salọ oria nọ ma re ro kpohọ erẹ-eriosehọ. Ẹsejọ, ma jẹ hae kẹ emọ na ọvuọvo uvẹ zizie ọvuọ emamọ ogbẹnyusu rai jọ re a lele omai, yọ onana o jẹ hai fiba evawere etoke na. Ma jẹ hae keria kugbe rọ omaweromẹ kareghẹhọ obọdẹ eware jọ nọ emọ mai a ru. Noke toke ma jẹ hai zizie ahwo uviuwou gbe egbẹnyusu mai evaọ ukoko na ziọ uwou mai. Ma jẹ hai kpohọ eria jọ jo there emu re kugbe jẹ zaharo kugbe. Ma jẹ hae dhẹ kpohọ eria nọ igbehru e rrọ jẹ nya ae wariẹ, rehọ uvẹ yena wuhrẹ kpahe emama Jihova.”
11, 12. (a) Eme whọ rẹ sai ru ro fi amọfa ba omaa ra kẹ arozaha eriosehọ otiẹsejọ? (b) Oghẹrẹ omakugbe vẹ o rẹ thọrọ ahwo buobu ẹro ho?
11 Kọ wha sai ru usu rai kẹre wọhọ omomọvo hayo uviuwou re wha ku amọfa gboma nọ wha tẹ be momaa arozaha eriosehọ otiẹsejọ? Otujọ, wọhọ aye-uku, ohwo nọ ọ re rọo ho, hayo uviuwou ọyewọ-ọvo a rẹ sae gwọlọ uduotahawọ. (Luk 14:12-14) Whọ sai je se umutho ahwo jọ nọ a bi kuomagbe ukoko na obọ gboma, dede na, whọ rẹ yọrọ oma re whọ se amọfa ba esifihọ oghẹrẹ omakugbe nọ o rẹ wha enwoma ze. (2 Timoti 2:20, 21) Otẹrọnọ ahwo jọ nọ oma o ga te he a be sai kpohọ otafe he, a rẹ sai ru ọruẹrẹfihotọ nọ a rẹ rọ wọ emu bru ai nọ a re lele ai re evaọ obọ iwou rai.—Ahwo Hibru 13:1, 2.
12 Omakugbe nọ a rẹ jọ re emu ovovori kugbe, yo iku epanọ amọfa evaọ ẹkeriotọ na a ro zihe ruọ Ileleikristi, jẹ riẹ oware nọ u fi obọ họ kẹ ai yọrọ ẹrọwọ rai no o rrọ oware nọ o rẹ thọrọ ibuobu ẹro ho. A rẹ sae rehọ eme jọ no Ebaibol ze nọ a rẹ ta ẹme kpahe, onọ te emaha te ekpako a sai jo wo obọ. Ababọ ohwo jọ nọ a re rri vo hayo ru oma vo evaọ oghẹrẹ ẹmeọta-kugbe otiọye na, o rẹ sae jọ uduotahawọ kẹ ohwohwo.
13. Ẹvẹ Jesu avọ Pọl a ro fi oriruo hotọ evaọ edhesẹ ọghoruo gbe edederehọ ọghọ nọ amọfa a ru?
13 Jesu o fi emamọ oriruo hotọ evaọ edhesẹ ọghoruo gbe edederehọ ọghọ nọ amọfa a ru. Ẹsikpobi ọ rehọ uvẹ utioye na ta ẹme kpahe eware nọ e rẹ kẹ erere evaọ abọ-ẹzi. (Luk 5:27-39; 10:42; 19:1-10; 24:28-32) Ilele riẹ erọ oke ọsosuọ a raro kele oriruo riẹ. (Iruẹru 2:46, 47) Pọl ukọ na o kere nọ: “Uru ẹruẹ rai u bi siomẹ, re mẹ ruẹse ghale okẹ Ẹzi Ẹri na kẹ owhai, o ruẹse ru owhai ga rite urere; koyehọ, ma wo oma osasọ kugbe eva orọwọ ovo, onọ o rọ orai gbe omẹ.” (Ahwo Rom 1:11, 12) Epọvo na re, u fo nọ omakugbe mai o jọ onọ ma rẹ jọ ta je ru eware nọ ma rẹ rọ kẹ ohwohwo uduotahawọ.—Ahwo Rom 12:13; 15:1, 2.
Eware Jọ nọ Ma rẹ Kareghẹhọ gbe Enọ Ma rẹ Yọroma Kẹ
14. Fikieme omakugbe otu nọ ahwo a rẹ jọ buobu u gbe ro fo tere he?
14 Omakugbe otu nọ ahwo buobu a rẹ jọ o nwani fo tere he keme o rẹ mae jọ bẹbẹ re a rẹrote eware ziezi evaọ omakugbe ahwo buobu otiọye na. O gbẹ rrọ oke nọ u kpomahọ iruẹru abọ-ẹzi hi, umutho iviuwou jọ a sai kpohọ oria jọ kẹ omakugbe omawere hayo arozaha jọ nọ a rẹ jọ hroma tere he. Nọ ekpako ukoko hayo idibo iruiruo jọ hayo amọfa nọ a kpako na a tẹ rrọ oghẹrẹ omakugbe otu utioye na, a re ru nọ ọruẹrẹfihotọ na ọ jẹ kẹ erere, nọ omakugbe na o jẹ wha evawere ze.
15. Fikieme ohwo nọ o zizie ahwo omakugbe o je muẹrohọ ẹruorote oware kpobi nọ a bi ru?
15 U fo nọ ahwo nọ a bi zizie hayo ru ọruẹrẹfihotọ omakugbe otu a muẹrohọ inọ a wo owha-iruo ẹruorote oware kpobi nọ a bi ru evaọ omakugbe na. Dede nọ ahwo ozizie ziọ uwou ra o rẹ were owhẹ na, kọ o gbẹ te kẹ owhẹ idhọvẹ nọ who te yọ inọ fiki oware jọ nọ who gbabọkẹ u ru ohwo jọ nọ ọ ziọ uwou ra zoruẹ? Kareghẹhọ ehri-uzi nọ a ta ẹme te eva Iziewariẹ 22:8 na. Nọ ohwo Izrẹl ọ tẹ bọ uwou okpokpọ, o gba riẹ họ nọ o re ru ogbẹ wariẹ ehru uwou nọ ọ rrọ praprarapra na họ, oria nọ a jẹ hẹ jọ ghọ erara. Fikieme? “Re whọ siọ abeọriọ azẹ ba ẹwha ze uwou ra, otẹrọnọ ohwo o kie no i ze.” Epọvo na re—ababọ izi nọ whọ rẹ rọ gba amọfa—whọ rẹ ruẹ nọ who ru ọruẹrẹfihotọ nọ whọ rẹ rọ thọ edikihẹ abọ-ẹzi ahwo nọ a ziọ uwou ra je ru nọ a jẹ jọ oma ọkọkọ.
16. Eme u fo nọ a rẹ yọrọ oma kẹ otẹrọnọ udi nọ u re mu o te jọ evaọ omakugbe otu?
16 Otẹrọnọ udi nọ u re mu o te jariẹ evaọ omakugbe otu, a re ru onana avọ oma oyọrọ gaga. Ileleikristi buobu nọ a re zizie ahwo kẹ omakugbe otu a rẹ jiroro nọ a re fi idi nọ i re mu hotọ, otẹrọnọ ae ọvo a sai muẹrohọ umuo nọ a rẹ rọ kẹ omomọvo ahwo nọ a zizie na. U fo re a kuvẹ kẹ oware nọ o rẹ sai ru amọfa zoruẹ hẹ hayo nọ o rẹ lẹlẹ ohwo da vrẹ oma. (Ahwo Ẹfẹsọs 5:18, 19) Fiki ẹjiroro sa-sa, ahwo jọ nọ a zizie a sae ta nọ a gwọlọ da udi nọ u re mu hu. Evaọ eria buobu, egọmeti o fi uzi họ nọ o fodẹ unuikpe nọ ohwo o re te re ọ tẹ da udi nọ u re mu, yọ u fo nọ Ileleikristi a re yo ẹme kẹ uzi Siza o tẹ make wọhọ nọ izi nana e ga hrọ.—Ahwo Rom 13:5.
17. (a) Otẹrọnọ a ti kporo ile eva omakugbe otu, fikieme u ro wuzou re ohwo nọ o zizie omakugbe na ọ riẹ salọ ziezi? (b) Otẹrọnọ a ti gbile evaọ omakugbe na, fikieme u je fo re a riẹ ọnyaba ohwo?
17 Ọnọ o zizie omakugbe na ọ rẹ ruẹ nọ ikporakporo, ile-igbe hayo aruọzaha omawere efa kpobi e rẹ rọwokugbe ehri-izi Ebaibol. U wo ọvuọ oghẹrẹ ile nọ e rẹ were ohwo, yọ oghẹrẹ ile buobu e riẹ. Dede na, ile oke mai na buobu e be wha ẹzi ọkparesuọ, ọfariẹ-ogbe, gbe ozighi haro. U fo nọ a rẹ salọ onọ u fo. Re a ta nọ ile i fo hayo i kiehọ, orọnikọ e rẹ nwane jọ enọ i re fo ohwo họ owezẹ hẹ, yọ e rẹ jọ erọ ugidi hayo ọfariẹ gbe he nọ i re do ruarua. U fo ho re whọ rehọ ẹsalọ ile nọ a ti kporo kẹ ohwo nọ ọ riẹ epanọ u ro fo re a si edo ile kpotọ họ. O rrọ vevẹ inọ ile-igbe nọ a rẹ jọ riẹ ọnyaba ha, nọ a re jo vi-eku je nyuhu ivie evaọ edhere nọ e rẹ rọ kpare isiuru ẹnwae-obro i fo kẹ Ileleikristi hi.—1 Timoti 2:8-10.
18. Ẹvẹ esẹgbini a sae rọ thọ emọ rai ẹkwoma ẹromuhọ usu rai gbe omakugbe otu nọ emọ na a re kpohọ?
18 U fo re eyewọ Ileleikristi a riẹ oware nọ a bi ti ru evaọ omakugbe otu nọ a zizie emọ rai kpohọ, yọ o rrọ oware areghẹ re a lele ai kpohọ eria omakugbe itienana ẹsejọ. U yoma kẹhẹ, esẹgbini jọ a kuvẹ no re emọ rai a kpohọ ehaa nọ a jọ rehọ uvumọ ohwo mu nọ o re fi ẹro họ eware nọ a bi ru hu, onọ a jọ lẹliẹ ibuobu evaọ omakugbe itieye na ruọ ofariẹ-ogbe hayo iruemu efa nọ i fo ho no. (Ahwo Ẹfẹsọs 6:1-4) O tẹ make rọnọ emọ e joma kpako te ikpe udhe no yọ uruemu rai u dhesẹ nọ a riẹ oware nọ u fo eruo no, o gbẹ gwọlọ nọ a re fi obọ họ kẹ ai “si omano urusio ogena.”—2 Timoti 2:22.
19. Evuhumu eme o rẹ sai fi obọ họ kẹ omai tẹrovi oware nọ u fo nọ ma rẹ “kake guọlọ”?
19 Emamọ arozaha eriosehọ gbe ẹkeriotọ omawere nọ a re kpohọ otiẹse o rẹ sai fiba evawere nọ ohwo o re wo eva uzuazọ. Jihova ọ gbọ omai evawere nana ha, rekọ ma riẹ vevẹ inọ eware itieye na ọvo i re fi obọ họ kẹ omai koko uvumọ efe abọ-ẹzi họ obọ idhiwu hu. (Matiu 6:19-21) Jesu o fi obọ họ kẹ ilele riẹ vuhumu inọ ‘ẹkake guọlọ uvie na gbe ẹrẹreokie Ọghẹnẹ’ họ oware nọ o roja evaọ uzuazọ, orọnikọ oware nọ ma rẹ re hayo da hayo nọ ma re fihọ oma ha, ‘eware nọ ahwo erẹwho na erẹ guọlọ kitikiti na.’—Matiu 6:31-34.
20. Eware iwoma vẹ idibo Jihova nọ i wo ẹrọwọ a rẹ sai rẹro rai mi Ọkokẹ Ologbo na?
20 Ẹhẹ, makọ “eva emu ọriọ hayo eva edada hayo eva oware kpobi,” ma rẹ sai ru ‘eware kpobi rọ kẹ Ọghẹnẹ oruaro,’ rehọ uyere kẹ Ọkokẹ Ologbo na fiki eware iwoma nọ ọ kẹ omai nọ ma be reawere rai te epanọ u fo. (1 Ahwo Kọrint 10:31) Evaọ otọakpọ aparadase riẹ nọ o be tha kẹlena, uvẹ buobu o te jariẹ nọ ma te rọ reawere eware nọ Jihova ọ ruẹrẹ họ kẹ omai vọvọ, nọ o kẹre te emamọ omakugbe evawere orọ ahwo kpobi nọ a nyate itee ẹrẹreokie riẹ.—Olezi 145:16; Aizaya 25:6; 2 Ahwo Kọrint 7:1.
Kọ Whọ Kareghẹhọ?
• Fikieme o jẹ rrọ bẹbẹ kẹ Ileleikristi nẹnẹ re a duku arozaha eriosehọ nọ o fo?
• Eghẹrẹ arozaha eriosehọ vẹ e wha evawere se iviuwou Ileleikristi no?
• Nọ a tẹ be reawere arozaha eriosehọ nọ o fo, eme u fo nọ a rẹ kareghẹhọ, kọ eme a rẹ yọrọ oma kẹ?
[Enọ Uwuhrẹ]
[Uwoho nọ o rrọ ẹwẹ-obe avọ 20]
Salọ arozaha eriosehọ nọ ọ rẹ wha uvi erere ze
[Iwoho nọ e rrọ ẹwẹ-obe avọ 21]
Oghẹrẹ arozaha eriosehọ vẹ Ileleikristi a rẹ whaha?