“Gbẹ Ta kẹ Omai!”

EVAỌ Nezlobnaya, Russia, emọ eklase jọ evaọ isukulu esekọndri a je wuhrẹ kpahe ebe ọ Mikhail Bulgakov, okere-ebe Russia na. Obe riẹ jọ u dhesẹ Jesu Kristi eva edhere orivo, u te dhesẹ Setan wọhọ ọgba. Nọ a ku uwuhrẹ na họ no, iticha na ọ tẹ kẹ ai ẹdawọ inọ a kere kpahe obe nana. Rekọ Andrey, ọmọ-eklase na jọ nọ ọ rrọ ikpe 16, ọnọ ọ rrọ omọvo Isẹri Jihova, ọ tẹ rehọ unu kpotọ mi uvẹ re ọ siọ ikuigbe obe yena ba ekere kpahe inọ obroziẹ-iroro riẹ ọ kẹ riẹ uvẹ re o wuhrẹ kpahe obe utiona ha. Ọ tẹ ta nọ ukpoye jọ a kẹe uvẹ re o kere kpahe epanọ o rri Jesu Kristi. Iticha na ọ tẹ rọwo.

Andrey o te kere inọ dede nọ o wo adhẹẹ kẹ eriwo amọfa, o vuhumu inọ edhere nọ ọ mai woma kpaobọ nọ a sai ro wuhrẹ kpahe Jesu họ, ẹkwoma ese ovojọ evaọ usu ikuigbe Usiuwoma ene nọ e rrọ Ikereakere na. Ere oruo “wha te rọ riẹ kpahe uzuazọ nọ Jesu o yeri gbe eware nọ o wuhrẹ wọhọ epanọ ahwo nọ a jọ kugbei a gbiku rai.” O te je fibae nọ: “Oware ofa họ, oghẹrẹ nọ a dhesẹ Setan. O rẹ sae jọ oware akiehwẹ kẹ otujọ nọ a te bi se obe nọ a jọ dhesẹ Setan wọhọ ọgba, rekọ o rrọ ere kẹ omẹ hẹ.” Ọ ta nọ Setan ginọ omama ẹzi omuomu avọ ẹgba nọ ọ wọso Ọghẹnẹ, jẹ be wha emuemu, olahiẹ gbe uye-oruẹ se ahwo-akpọ. Enẹ Andrey o ro ku oware nọ o kere na họ: “Me te se enọvẹle nana u ti fi obọ họ kẹ omẹ hẹ. Uzẹme, me mukpahe Bulgakov nọ o kere obe na ha. Rekọ ukpenọ me se obe na, me re se Ebaibol na ro wuhrẹ ikuigbe uzẹme kpahe Jesu Kristi.”

Oware nọ Andrey o kere na u si iticha na urru ga te epanọ ọ rọ ta nọ jọ Andrey ọ ruẹrẹ ẹme họ nọ ọ te ta kẹ eklase na kpahe Jesu Kristi. Andrey ọ tẹ nwane rọwo nọ o ti ru ere. Nọ eklase na e wariẹ keria kẹ ọkpọ uwuhrẹ ovona, Andrey ọ tẹ runu kotọ se eme nọ ọ ruẹrẹ họ kẹ eklase na soso. O dhesẹ oware nọ o lẹle riẹ ta nọ Jesu họ ọzae nọ ọ mae rro nọ ọ rria no. Kẹsena o te se uzou jọ evaọ obe Matiu nọ o ta kpahe uwhu Jesu no Ebaibol na ze. Nọ oke nọ a kẹ riẹ u muhọ ere no, Andrey ọ tẹ gwọlọ nọ o re no etẹ kuhọ, rekọ ibe emọ-eklase riẹ a tẹ ta kẹe nọ: “Gbẹ ta kẹ omai! Eme ọfa ọ via?” Fikiere ọ tẹ ruabọhọ se ikuigbe obe Matiu kpahe ẹkparomatha Jesu.

Nọ Andrey o ku ẹme riẹ họ no, ibe emọ-eklase riẹ a tẹ nọe enọ buobu kpahe Jesu gbe Jihova. Andrey ọ ta nọ: “Mẹ lẹ se Jihova kẹ areghẹ yọ o gine yo olẹ mẹ.” O te je fibae nọ: “Mẹ sae kuyo enọ rai kpobi!” Nọ uwuhrẹ na u kuhọ, Andrey ọ tẹ kẹ iticha riẹ obe na Ọzae nọ Ọ Mae Rro nọ Ọ Rria No, * onọ iticha na o mi avọ evawere. Andrey ọ ta nọ: “Ọ kẹ omẹ emake buobu fiki eme nọ me se kẹ eklase na, o te je jiri omẹ kẹ edikihẹ mẹ nọ me dhesẹ via ababọ omovuọ. Ọ tẹ jẹ vuẹ omẹ nọ ọ rọwokugbe omẹ eva eme jọ nọ mẹ ta na.”

Eva e were Andrey inọ o lele obruoziẹ-iroro riẹ nọ Ebaibol na o wuhrẹ ẹkwoma ẹsiọ ese ebe nọ i re si ọghọ no Jihova avọ Ọmọ riẹ, Jesu Kristi. Orọnikọ edikihẹ otiọye na ọ thọe no eriwo nọ ọ wọso Ikereakere na ọvo ho rekọ u rovie uvẹ fihọ kẹe nọ ọ rọ vuẹ amọfa uzẹme Ebaibol na.

[Oruvẹ-obotọ]