Ẹnyate Oware Nọ O Gwọlọ Re Ohwo Ọ Tẹ Họ-ame Wọhọ Oleleikristi
Ẹnyate Oware Nọ O Gwọlọ Re Ohwo Ọ Tẹ Họ-ame Wọhọ Oleleikristi
“Keme ọ be whaha omẹ ame ọhọ?”—IRUẸRU 8:36.
1, 2. Ẹvẹ Filip o ro mu ẹme họ kugbe okpohwo egọmeti Ẹtiopia jọ, kọ eme o dhesẹ nnọ ọzae na o se egagọ Ọghẹnẹ gboja?
OWARE wọhọ ukpe ovo hayo ivẹ nọ Jesu o whu no, okpohwo egọmeti jọ o je no Jerusalẹm bi kpohọ Gaza. Erẹ na o rẹ whọlọ oma keme ọ te keria akẹkẹ nọ ọ be te dhẹ ugbo oware wọhọ ikilomita 1,500. Ọgba-egagọ nana o no ugbobọ Ẹtiopia ze obọ Jerusalẹm nyae gọ Jihova. Nọ o je zihe kpo no erẹ ugbothabọ nana ze, ọ rehọ oke riẹ ruiruo ziezi je se Ẹme Ọghẹnẹ—onana u dhesẹ epanọ ẹrọwọ ọzae na ọ ga te. Jihova o muẹrohọ uvi ọzae nana, yọ ẹkwoma ẹnjẹle jọ, Ọ kpọ Filip olele na re ọ nyae ta usiuwoma kẹe.—Iruẹru 8:26-28.
2 O lọhọ Filip obọ re o mu ẹme họ kugbe ọzae na, keme ohwo Ẹtiopia na o je se do via, wọhọ epanọ uruemu ahwo oke yena o jọ. Fikinọ Filip o yo eme nọ ọzae na o je se, ọ sae rọ riẹ inọ uko-obe Aizaya o je se. Onọ olọlọhọ jọ nọ Filip ọ nọ o kpare isiuru ọzae na: “Whọ riẹ epanọ who re se na”? Onana u te su kpohọ ẹmeọta kpahe Aizaya 53:7, 8. Ukuhọ riẹ, Filip o te “mu ei usiuwoma Jesu họ ẹta kẹ.”—Iruẹru 8:29-35.
3, 4. (a) Fikieme Filip ọ rọ họ okpohwo Ẹtiopia na ame ababọ okioraha? (b) Didi enọ ma be te ta ẹme kpahe?
3 Evaọ omoke kpẹkpẹe, ohwo Ẹtiopia na o te wo otoriẹ abọ nọ Jesu o wo evaọ ẹjiroro Ọghẹnẹ, je vuhu epanọ u wuzou te re o zihe ruọ olele Jesu jẹ họ-ame. Nọ ọ ruẹ ame obuobu nọ ọ kẹle edhere, ọ tẹ nọ Filip nọ: “Keme ọ be whaha omẹ ame ọhọ?” Ame-ọhọ ọ rẹ vẹrẹ tenẹ vẹre he, oware jọ u ru nọ onana o jẹ via enẹ. Okpohwo Ẹtiopia nana ọ jọ ohwo nọ o wo ẹrọwọ, ọnọ ọ be gọ Jihova no vẹre wọhọ ohwo nọ o kurẹriẹ ruọ egagọ ahwo Ju. Ame-ọhọ nana o tẹ vrẹ riẹ, ẹsejọhọ o te gbẹ lọhọ re ọ họ-ame kẹle he. Maero, ọzae nana ọ riẹ oware nọ Ọghẹnẹ ọ gwọlọ mi ei, yọ ọ gwọlọ ru ere nudu ze. Filip ọ rehọ evawere ru ẹgwọlọ ọzae na gba, yọ nọ okpohwo Ẹtiopia na ọ họ-ame no, ọ tẹ “ruabọhọ erẹ riẹ avọ oghọghọ.” Ababọ avro, nọ o te obọ ẹwhọ riẹ, ọ rehọ ọwhọ gbe evawere whowho emamọ usi na evaọ obei.—Iruẹru 8:36-39.
4 Dede nọ ohwo o re rri ẹme ọ omaromudhe gbe ame-ọhọ vovori hayo rehọ okpakpa ru ei hi, oriruo okpohwo Ẹtiopia na o dhesẹ inọ ahwo jọ a riẹ nọ a họ-ame nọ a nwani yo uzẹme Ẹme Ọghẹnẹ no. * Fikiere, u fo re ma roro kpahe enọ nana: Omaruẹrẹhọ vẹ o roja kẹ ame-ọhọ? Ẹvẹ ohwo ọ rẹ kpako te re ọ tẹ họ-ame? Ẹvẹ ẹnyaharo abọ-ẹzi ohwo o re te re ọ te họ-ame? Maero, fikieme Jihova ọ jẹ gwọlọ nnọ idibo riẹ a j’owọ nana?
Ọtamuo nọ A re Segboja
5, 6. (a) Didi owọ ahwo Ọghẹnẹ evaọ oke anwae a jẹ kpahe uyoyou Jihova? (b) Didi usu okpekpe kugbe Ọghẹnẹ ma rẹ sae reawere riẹ nọ ma tẹ họ-ame no?
5 Nọ o siwi emọ Izrẹl no Ijipti ze no, u no Jihova eva ze re o dede ai rehọ wọhọ “efe-agheghọ” riẹ, re o you rai jẹ thọ ae re o je ru ai zihe ruọ “orẹwho Ọrẹri.” Rekọ re a te wo eghale yena, o gwọlọ nọ ahwo na a re dhesẹ via evaọ edhere nọ o muẹro nnọ uyoyou Ọghẹnẹ o da rai ẹro. A ru onana ẹkwoma ẹrọwo nọ a rọwo inọ a re ru “onọ ỌNOWO na ọ ta kpobi,” a tẹ jẹ re ọvọ kugbei. (Ọnyano 19:4-9) Evaọ ikpe-udhusoi ọsosuọ, Jesu o juzi kẹ ilele riẹ inọ a ru ilele ahwo erẹwho kpobi, enọ i dede iwuhrẹ riẹ rehọ e vẹ họ-ame. Emamọ usu kugbe Ọghẹnẹ o rehọ oma hwa ẹrọwọ nọ a re fihọ Jesu Kristi jẹ họ-ame.—Matiu 28:19, 20; Iruẹru 2:38, 41.
6 Iriruo Ikereakere nana i dhesẹ inọ Jihova ọ rẹ ghale enọ e yeyaa je koko eyaa na inọ a rẹ gọe. Rọkẹ Ileleikristi, omaromudhe gbe ame-ọhọ yọ owojẹ nọ e roja nọ e rẹ wha oghale Jihova ze. Ma gba riẹ mu inọ ma re lele idhere riẹ jẹ gwọlọ ọkpọvio riẹ. (Olezi 48:14) Jihova omariẹ o ve kru omai obọ, evaọ odẹme, o ve su omai evaọ edhere nọ o fo ẹnya.—Olezi 73:23; Aizaya 30:21; 41:10, 13.
7. Fikieme omaromudhe gbe ame-ọhọ e rẹ rọ jọ ẹme omobọ ohwo?
7 Oware nọ o rẹ wọ omai j’owọ nana họ, uyoyou kẹ Jihova gbe ẹgwọlọ mai inọ ma rẹ gọe. U fo ho re ohwo ọ rehọ fikinọ ohwo jọ ọ ta kẹe nnọ obe nọ o wuhrẹ u te no, ọ vẹ rọ fiki ere họ-ame hayo fikinọ egbẹnyusu riẹ e be họ-ame. Esẹgbini avọ Ileleikristi efa nọ e kpako ziezi a rẹ sae tudu họ ohwo awọ re o roro kpahe omaromudhe gbe ame-ọhọ. Pita ukọ na ọ tudu họ enọ e gaviezọ kẹ ẹme riẹ eva ẹdẹ Pẹntikọst na awọ inọ a ‘họ-ame.’ (Iruẹru 2:38) Dede na, omaromudhe yọ ẹme omobọ mai, uvumọ ohwo ọ rẹ jiroro na kẹ omai hi. Mai ọvo ma rẹ jiroro eruo oreva Ọghẹnẹ.—Olezi 40:8.
Emamọ Omaruẹrẹhọ kẹ Ame-Ọhọ
8, 9. (a) Wọhọ epanọ Ikereakere na i dhesẹ, fikieme ame nọ a rẹ họ emọfofa o rọ thọ? (b) Didi ẹnyaharo abọ-ẹzi emaha a re ru re a tẹ te họ-ame?
8 Kọ emaha a sai jiroro egbagba ọrọ omaromudhe? Ikereakere na e fodẹ unuikpe nọ ohwo o re te re ọ tẹ họ-ame he. Ghele na, emọfofa a sai zihe ruọ enọ e rọwo ho, a sai fi ẹrọwọ họ Ọghẹnẹ, hayo roma mudhe kẹ Ọghẹnẹ hẹ. (Iruẹru 8:12) Kpahe Ileleikristi ikpe-udhusoi ọsosuọ, enẹ Augustus Neander, ogbiku na, ọ ta evaọ obe riẹ General History of the Christian Religion and Church: “Oke ọsosuọ, ahwo nọ a kpako no ọvo a jẹ họ-ame, keme ahwo nọ a kpako no ọvo a rẹ sai wo otoriẹ inọ ame-ọhọ gbe ẹrọwọ e jẹhọ ohwohwo.”
9 Emọ jọ a rẹ jọ oke emaha riẹ oware nọ u je fo re a gọ Ọghẹnẹ, rekọ efa e rẹ dina kpako no re a te vuhu onana mu. Rekọ, re ọ tẹ họ-ame, o gwọlọ nọ ọmaha o re wo usu okpekpe kugbe Jihova, uvi eriariẹ ugogo iwuhrẹ Ikereakere na, ọ vẹ jẹ riẹ oware nọ omaromudhe o rrọ, wọhọ epanọ o rrọ kẹ enọ e kpako no na.
10. Owojẹ sa-sa vẹ e rẹ karo kẹ omaromudhe gbe ame-ọhọ?
10 Jesu ọ ta kẹ ilele riẹ inọ a wuhrẹ ahwo ọkpokpọ eware kpobi nọ o juzi rai. (Matiu 28:20) Fikiere, orọ ọsosuọ, u fo nnọ ahwo ọkpokpọ na a re wo otoriẹ ogbagba orọ uzẹme na, onọ u re fi obọ họ kẹ ae fi ẹrọwọ họ Jihova gbe Ebaibol na. (Ahwo Rom 10:17; 1 Timoti 2:4; Ahwo Hibru 11:6) Kẹsena, nọ uzẹme Ikereakere na u te duobọte ohwo udu no, o vẹ wọe kurẹriẹ no uzuazọ nọ o je yeri vẹre. (Iruẹru 3:19) Ukuhọ riẹ, ohwo na o ve te epanọ ọ rẹ rọ gwọlọ rehọ oma riẹ mudhe kẹ Jihova jẹ họ-ame, wọhọ epanọ Jesu o juzi riẹ na.
11. Fikieme u je wuzou re ma wo obọ ẹsikpobi evaọ iruo usiuwoma ota na re ma tẹ te họ-ame?
11 Obọdẹ owojẹ ofa nọ u wuzou re ohwo ọ tẹ te họ-ame họ obọ nọ a re wo evaọ iruo usiuwoma ota Uvie na. Onana họ ugogo iruo nọ Jihova ọ rọ kẹ ahwo riẹ evaọ etoke edẹ urere nana. (Matiu 24:14) Fikiere iwhowho-uvie nọ e re họ-ame he e rẹ sae ta ẹrọwọ rai via kẹ amọfa. Obọ nọ a re wo evaọ iruo nana o rẹ jẹ ruẹrẹ ai họ kẹ obọ nọ a re wo ẹsikpobi avọ ọwhọ evaọ iruo odibọgba na nọ a tẹ họ-ame no.—Ahwo Rom 10:9, 10, 14, 15.
Kọ Oware Jọ O be Whaha Owhẹ Ame-Ọhọ?
12. Eme o re ru otujọ nọ a gbẹ rọwo họ-ame he?
12 Ahwo jọ a rẹ rọwo họ-ame he keme a gwọlọ wọ owha-iruo nọ u re noi ze he. A riẹ inọ re a sae nyate itee Jihova, o rẹ gwọlọ nọ a ru inwene ilogbo evaọ uzuazọ rai. Hayo ozọ o sai mu ai inọ o te jọ bẹbẹ kẹ ae re a nya te itee Ọghẹnẹ nọ a tẹ họ-ame no. Otujọ a sai tube roro nọ, “Ẹsejọhọ me ti ru oware uyoma jọ ẹdẹjọ, a ve ti si omẹ no ukoko.”
13. Evaọ edẹ Jesu, eme ọ lẹliẹ ahwo jọ siuke kpemu no ẹjọ ilele Jesu?
13 Evaọ edẹ Jesu, ahwo jọ a kuvẹ kẹ isiuru omobọ rai gbe ọgbakugbe uviuwou re o whaha ae ẹjọ ilele riẹ. Okere-obe jọ ọ ta nnọ o re lele Jesu kpohọ oria kpobi nọ Ọ nya. Rekọ Jesu ọ ta kẹe inọ evaọ ẹsibuobu ọye omariẹ o wo oria nọ ọ rẹ rọ uzou kpahe nọ oke u te kpo no ho. Nọ Jesu o zizie omọfa jọ re ọ jọ olele riẹ, ọzae nana ọ kuyo inọ ọ gwọlọ “ki” ọsẹ riẹ tao. Ẹsejọhọ, ọ gwọlọ hẹrẹ bẹsenọ ọsẹ riẹ o re whu viukpenọ o re lele Jesu re nọ oke yena u je te ọ vẹ rẹrote owha-iruo uviuwou yena. Ọrọ urere, ohwo avesa ọ ta nnọ taure o te ti lele Jesu, ọ rẹ kake ta kẹ ahwo uviuwou riẹ nọ “kodẹ.” Jesu o dhesẹ oke oraha otiọye na wọhọ nnọ a bi “ri emu.” Fikiere, o wọhọ nnọ enọ e gwọlọ rri emu a rẹ ruẹ unoma jọ gu nọ a rẹ rọ dhẹ siọ owha-iruo Oleleikristi rai ba.—Luk 9:57-62.
14. (a) Didi owọ Pita, Andru, Jemis, gbe Jọn a jẹ nọ Jesu o zizie ai re a zihe ruọ ikuori ahwo? (b) Fikieme ma gbe ro si uke kpemu hu evaọ ẹjẹrehọ owhowha Jesu?
14 Oriruo Pita, Andru, Jemis, gbe Jọn u wo ohẹriẹ no enana gaga. Nọ Jesu o zizie ai re a lele iei re a jọ ikuori ahwo, ikuigbe Ebaibol na e ta nọ: “A tẹ nwane se iwe na ba a te lele iei.” (Matiu 4:19-22) Fikinọ a jiroro yena ababọ okioraha, a rọ ẹro ruẹ oware nọ Jesu ọ ta kẹ ae uwhremu na: “Rehọ owhowha mẹ wha, wha wuhrẹ mi omẹ, keme me re wowolẹ jegbọ eva i ro kpotọ, wha rẹ te ruẹ udhedhẹ kẹ izi rai. Keme owhowha mẹ o rẹ lọlọhọ, owha mẹ u re vovovo.” (Matiu 11:29, 30) Dede nọ ame-ọhọ ọ rẹ wha owha-iruo ze, Jesu ọ kẹ omai imuẹro inọ o te jọ owha olọlọhọ nọ o rrọ vovovo nọ o te sasa omai oma ziezi.
15. Ẹvẹ oriruo Mosis gbe Jerimaya o ro dhesẹ nnọ ma rẹ sai fi eva họ uketha Ọghẹnẹ?
15 O rrọ ẹkoma ahwo-akpọ re a wo iroro ọ me te ha ẹsejọ. Mosis avọ Jerimaya a kaki roro nnọ a te kẹ iruo nọ Jihova ọ kẹ rai hi. (Ọnyano 3:11; Jerimaya 1:6) Ẹvẹ Ọghẹnẹ ọ rọ kẹ ai imuẹro? Ọ ta kẹ Mosis nọ: “Me re lele owhẹ jọ.” Ọ yeyaa kẹ Jerimaya nọ: “Mẹ rọ kugbe owhẹ nọ mẹ rẹ te thọ owhẹ.” (Ọnyano 3:12; Jerimaya 1:8) Ma rẹ sai wo imuẹro re inọ Ọghẹnẹ ọ te thọ omai. Uyoyou kẹ Ọghẹnẹ gbe eva nọ ma re fihọ iẹe u ti fi obọ họ kẹ omai fi avro nọ ọ rrọ omai udu kparobọ, avro sọ ma te sae rria te omaromudhe mai. Jọn ukọ na o kere nọ: “Ozodhẹ o rọ eva uyoyou hu, rekọ uyoyou nọ o gba-unu u re le ozọ no.” (1 Jọn 4:18) Ozọ o rẹ sai mu ọmaha nọ ọye ọvo ọ tẹ rrọ usu, rekọ udu o rẹ jariẹ awọ nọ ọsẹ riẹ o te kru rie obọ be gbẹ nya. Epọvo na re, ma tẹ rehọ ẹruọrọsuọ mai kpobi kpahe Jihova, ọ yeyaa inọ o ti ‘ru idhere mai kpọvi’ nọ ma bi lele iei nya na.—Itẹ 3:5, 6.
Etoke Adhẹẹ
16. Fikieme ame-ọhọ o jẹ gwọlọ nọ a re du ohwo họ ame leno?
16 Re a tẹ te họ-ame, a rẹ kake kẹ ovuẹ Ikereakere jọ nọ u re dhesẹ otofa ame-ọhọ Ileleikristi. Eva ekuhọ ẹme nana, a rẹ ta kẹ enọ e gwọlọ họ-ame na re a jọ ẹgbede dhesẹ ẹrọwọ rai via ẹkwoma ẹza enọ ivẹ erọ ame-ọhọ. (Ahwo Rom 10:10; rri ẹkpẹti nọ ọ rrọ ẹwẹ-obe avọ 23.) Kẹsena a vẹ họ ahwo na ame ẹkwoma ame nọ a re du rai họ leno, nya lele oriruo nọ Jesu omariẹ o fihọ. Ebaibol i dhesẹ nnọ ọ họ-ame no, Jesu ọ tẹ “va no ame ze.” (Matiu 3:16; Mak 1:10) U re vevẹ, Jọn Ọhọahwo-Ame na o du Jesu họ ame leno. * Ame nọ a re du omai họ leno u gine dhesẹ enwene ologbo nọ ma ru no evaọ uzuazọ mai—ma rehọ edhere ẹwoho whu kẹ edhere uzuazọ mai vẹre, ma tẹ wariẹ mu uzuazọ họ evaọ ẹgọ Ọghẹnẹ.
17. Ẹvẹ enọ e be họ-ame gbe enọ e rrọ ogbotu na a re ro mu ọghọ kẹ etoke ame-ọhọ na?
17 Ame-ọhọ ọ rrọ etoke osegboja, o tẹ jẹ rrọ oke oghọghọ. Ebaibol na i dhesẹ nọ Jesu ọ jẹ lẹ okenọ Jọn o du rie họ ame evaọ Ethẹ Jọdan. (Luk 3:21, 22) Rọwokugbe oriruo nana, enọ e be họ-ame a rẹ rehọ uruemu rai mu ọghọ kẹ ame-ọhọ na. Ofariẹ, nọ o rọnọ Ebaibol na e tudu họ omai awọ nnọ ma gẹgọ nọ ọ rrọ kpatiẹ evaọ uzuazọ ikẹdẹ kẹdẹ na, o gwọlọ nọ ma re tube yoẹme kẹ ohrẹ nana viere evaọ ẹdẹ ame-ọhọ mai. (1 Timoti 2:9) Enọ e rrọ ogbotu na a re je dhesẹ uvi adhẹẹ ẹkwoma ezọ nọ a rẹ gaviẹ ziezi kẹ ẹme ame-ọhọ na, a vẹ jẹ roma kpotọ rri enọ e be họ-ame na.—1 Ahwo Kọrint 14:40.
Eghale nọ I re Te Enọ E Họ-Ame No
18, 19. Uvẹ-ọghọ gbe eghale vẹ ame-ọhọ ọ rẹ wha ze?
18 Ma tẹ rehọ oma mai mudhe kẹ Ọghẹnẹ jẹ họ-ame no, yọ ma zihe ruọ abọjọ uviuwou obọdẹ jọ no. Orọ ọsosuọ, Jihova o re zihe ruọ Ọsẹ gbe Ogbẹnyusu mai. Ma hẹriẹ oma no Ọghẹnẹ vẹre taure ma tẹ te họ-ame; enẹna ma ruẹrẹ họ kugbei no. (2 Ahwo Kọrint 5:19; Ahwo Kọlọsi 1:20) Ẹkwoma idheidhe Kristi, ma si kẹle Ọghẹnẹ no, o te je si kẹle omai no. (Jemis 4:8) Malakae ọruẹaro na o dhesẹ epanọ Jihova ọ rẹ kezọ kẹ enọ a rehọ odẹ riẹ se jẹ be rehọ odẹ na ruiruo, yọ o bi fi odẹ rai họ obe ekareghẹhọ riẹ. Ọghẹnẹ ọ ta nọ: “A rẹ te jọ emẹ, . . . mẹ rẹ te thọ ae wọhọ epanọ ohwo ọ rẹ thọ ọmọ riẹ nọ ọ be gba odibo kẹe.”—Malakae 3:16-18.
19 Ame-ọhọ o re je ru omai zihe ruọ abọjọ okugbe-inievo akpọ-soso. Okenọ Pita ukọ na ọ nọ kpahe eghale nọ i ti te ilele Jesu fiki eware nọ a si obọ no re a ruẹse jọ ilele riẹ, Jesu ọ yeyaa nọ: “Kohwo kohwo nọ ọ se uwou hayo inievo emezae hayo inievo emetẹ hayo ọsẹ hayo oni hayo emọ hayo etọ, fiki odẹ mẹ, o re ti wo ekpahọ udhe-usoi, ọ vẹ jẹ reuku uzuazọ ebẹdẹ bẹdẹ.” (Matiu 19:29) Ikpe buobu e vrẹ no, Pita o te kere kpahe ‘okugbe-imoni’ nọ o dhẹ “akpọ na soso” duwu no. Pita ọ rọ ẹro ruẹ uketha gbe eghale nọ a re wo evaọ okugbe-inievo ọrọ uyoyou na, yọ ma rẹ sae ruẹ uketha gbe eghale itieye na re.—1 Pita 2:17; 5:9.
20. Ẹruore igbunu vẹ ame-ọhọ o fihọ kẹ omai?
20 Ofariẹ, Jesu ọ ta nnọ enọ i lele i rie a te “reuku uzuazọ ebẹdẹ bẹdẹ.” Ẹhẹ, omarọkẹ gbe ame-ọhọ o rẹ kẹ ẹruore ewo “uzuazọ nọ o [ginẹ] rọ uvi uzuazọ”—uzuazọ ebẹdẹ bẹdẹ evaọ akpọ ọkpokpọ Ọghẹnẹ. (1 Timoti 6:19) Otọhotọ uzuazọ obaro nọ u woma vi onana nọ ma rẹ bọ kẹ oma mai gbe uviuwou mai o riẹ hẹ. Ẹruore igbunu nana ọ te lẹliẹ omai “nya evaọ odẹ Jihova, Ọghẹnẹ mai ribri, makọ bẹdẹ bẹdẹ.”—Maeka 4:5, NW.
[Oruvẹ-obotọ]
^ edhe-ẹme 4 Ahwo Ju gbe enọ i kurẹriẹ ruọ egagọ ahwo Ju nọ i bu te idu esa nọ e gaviezọ kẹ ovuẹ Pita eva ẹdẹ Pẹntikọst na a họ-ame re ababọ okioraha. Wọhọ ọwharọ Ẹtiopia na, a riẹ ugogo iwuhrẹ gbe ehri-izi Ebaibol na no vẹre.—Iruẹru 2:37-41.
^ edhe-ẹme 16 Ubiẹme Griki na baʹpti·sma (nọ a fa ame-ọhọ na) u dhesẹ “eduhọ gbe ẹvavia,” wọhọ epanọ Expository Dictionary of New Testament onọ Vine o kere o ta.
Kọ Whọ Sae k’Iyo Nana Vevẹ?
• Oghẹrẹ vẹ gbe fikieme ma jẹ j’owọ kẹ uyoyou Jihova?
• Ẹvẹ ohwo ọ rẹ nyaharo te evaọ ukoko na re ọ tẹ họ-ame?
• Fikieme ma gbẹ kuvẹ hẹ re ozọ nnọ ma ti kie gbe ehoo ewha-iruo i si omai kpemu no ame-ọhọ?
• Eghale igbunu vẹ ilele Jesu Kristi nọ e họ-ame no a rẹ sae reawere rai?
[Enọ Uwuhrẹ]
[Uwoho nọ o rrọ ẹwẹ-obe avọ 27]
“Keme ọ be whaha omẹ ame ọhọ?”
[Uwoho nọ o rrọ ẹwẹ-obe avọ 30]
Ame-ọhọ yọ etoke osegboja, o tẹ jẹ rrọ oke oghọghọ