Ewo Otoriẹ Ebaibol na Eme O Ti Fi Obọ họ kẹ Owhẹ?

“WHO ku eware enana dhere iwoareghẹ gbe erieriariẹ, whọ tẹ rehọ ae via kẹ emọ-efofa.” (Luk 10:21) Eme nana nọ Jesu ọ ta kẹ Ọsẹ obọ odhiwu riẹ na i dhesẹ inọ re ma wo otoriẹ Ebaibol na, ma re wo eriwo nọ o kiehọ. Areghẹ Jihova o dhesẹ oma via ẹkwoma obe nana nọ ọ rọ kẹ ahwo-akpọ na, keme ahwo omarokpotọ ọvo a rẹ sai gine wo otoriẹ riẹ.

O re bẹbẹ kẹ ibuobu mai re ma roma kpotọ. Ma riuku ẹzi omoya no eva ze. Fibae, ma be rria “edẹ urere” na, evaọ udevie ahwo nọ i “you oma-obọrai, . . . avọ uzou-uveghe, otu okpiro.” (2 Timoti 3:1-4) Iruemu nana i re ru ei bẹbẹ re ma wo otoriẹ Ebaibol na. U yoma gaga inọ okegbe nọ ma be rria o re kpomahọ omai evaọ oghẹrẹ jọ. Kọ ẹvẹ ma sai ro wo uvi eriwo nọ o re fi obọ họ kẹ omai wo otoriẹ Ebaibol na?

Ẹruẹrẹhọ Udu gbe Iroro Na

Ẹzra, osu ahwo Ọghẹnẹ jọ evaọ oke anwae, ọ ruẹrẹ “udu riẹ kpobi rọ kẹ ewuhrẹ uzi ỌNOWO na.” (Ẹzra 7:10) Kọ edhere jọ ọ riẹ nọ ma rẹ rọ ruẹrẹ udu mai họ? Ee. Orọ ọsosuọ họ emamọ eriwo nọ ma re wo kpahe Ikereakere na. Pọl o kere se ibe Ileleikristi nọ: “Anhwọ okenọ wha rọ rehọ ẹme Ọghẹnẹ nọ owha jọ unu mai yo na; wha rehọ e riẹ wọhọ ẹme ahwo ho, rekọ wọhọ epanọ o ghinẹ rọ, ẹme Ọghẹnẹ.” (1 Ahwo Tẹsalonika 2:13) Dede nọ ahwo-akpọ a ro kere Ebaibol na, obọ Jihova eware nọ a kere i no ze. Ma te vuhu oyena mu u re fi obọ họ kẹ omai jẹ oware nọ ma se rehọ.—2 Timoti 3:16.

Edhere ọfa nọ ma rẹ rọ ruẹrẹ udu mai họ họ ẹkwoma olẹ. Nọ orọnọ ẹgba ẹzi ọfuafo a ro kere Ebaibol na, ẹzi na ọ rẹ sai fi obọ họ kẹ omai wo otoriẹ ovuẹ nọ o riẹ eva. Ma rẹ lẹ kẹ obufihọ utioye na hrọ. Muẹrohọ epanọ onana o rọ jọ ọdawẹ kẹ ọso-ilezi na ọnọ o kere nọ: “Kẹ omẹ orimuo, re me koko izi ra, mẹ vẹ jẹ rehọ eva mẹ kpobi koko ie.” (Olezi 119:34) Orọnikọ eriariẹ uzou nọ ma re ro wo otoriẹ Ebaibol na ọvo ma rẹ lẹ kẹ hẹ, ma rẹ jẹ lẹ kpahe emamọ udu nọ ma rẹ rọ jẹ ovuẹ na rehọ. Re ma sai wo otoriẹ Ebaibol na, o gwọlọ nọ ma re rovie udu mai re ma jẹ uzẹme nọ ọ rrọ Ebaibol na rehọ.

Nọ who bi roro didi re who wo emamọ eriwo kpahe Ebaibol na, roro kpahe epanọ ewuhrẹ Ebaibol na o sai ro fi obọ họ kẹ owhẹ. Ma wo emamọ ẹjiroro buobu nọ ma re ro se Ebaibol na, rekọ ẹjiroro nọ ọ mae rro họ u re fi obọ họ si omai kẹle Ọghẹnẹ. (Jemis 4:8) Nọ ma bi se kpahe owọ nọ Jihova ọ  rẹ jẹ kpahe iyero sa-sa na, epanọ o re rri enọ i you rie ghaghae, gbe epanọ o re yeri kugbe enọ e nya siẹe ba, ma rẹ riẹ oghẹrẹ ohwo nọ ọ rrọ. Ugogo ẹjiroro nọ ma re ro se Ebaibol o rẹ jọ re ma riẹ Ọghẹnẹ ziezi, ma vẹ rọ ere bọ usu mai kugbei ga.

Ezadhe kẹ Ewo Udu nọ U Fo

Eme ọ rẹ sae whaha omai ewo otoriẹ Ebaibol na? Ọzadhe jọ họ ẹtalamu eriwo ahwo nọ ma rri ghaghae. Wọhọ oriruo, whọ rẹ sai wo adhẹẹ kẹ eriwo gbe uruemu ahwo jọ. Rekọ, ẹvẹ otẹrọnọ ahwo nana a se uzẹme Ebaibol na gboja tere he? O tẹ rrọ ere, o sae jọ bẹbẹ re ma wo otoriẹ oware nọ Ebaibol na i gine wuhrẹ. Fikiere, Ebaibol na e tudu họ omai awọ inọ ma roma totọ kiẹ oware nọ a bi wuhrẹ omai ziezi.—1 Ahwo Tẹsalonika 5:21.

Meri, oni Jesu, ọ rẹriẹ ovao ku use-abọ utioye na. Edhere egagọ ahwo Ju a rọ yọrọ iẹe. Ọ jẹ roma totọ koko Uzi Mosis na, yọ ababọ avro ọ jẹ hai kpohọ uwou-egagọ na. Uwhremu na o te ti vuhumu nnọ oghẹrẹ nọ ọsẹgboni riẹ a wuhrẹ i rie no otọ ze inọ a rẹ rọ gọ Ọghẹnẹ na o gbẹ were Ọghẹnẹ hẹ. Fikiere, Meri ọ tẹ jẹ iwuhrẹ Jesu rehọ, ọ tẹ jọ usu ahwo ọsosuọ nọ e jọ ukoko Ileleikristi na. (Iruẹru 1:13, 14) Onana orọnikọ orivo kẹ ọsẹgboni riẹ hayo iruemu anwae rai hi; rekọ o je dhesẹ epanọ o you Ọghẹnẹ te. Re ma ruẹsi wo erere no Ebaibol na ze, wọhọ Meri, ma rẹ roma kpotọ lele ẹme nọ Ọghẹnẹ ọ ta vi eriwo amọfa kpobi.

U yoma gaga, ahwo buobu a se uzẹme Ebaibol na gboja ha. O rẹ vọ ahwo jọ eva re a lele iruemu egagọ nọ i wo otọhotọ no erue ze. Amọfa a rẹ daezọ uzẹme evaọ ẹmeunu gbe edhere uzuazọ rai ha. Fikiere, re whọ jẹ uzẹme Ebaibol rehọ, o rẹ nya ababọ họ: O rẹ sae whae ze nọ egbẹnyusu ra, erivẹ, ibe-oruiruo, gbe makọ uviuwou ra dede a re ro se owhẹ ẹkoko. (Jọn 17:14) Ghele na, ọzae owareghẹ na o kere nọ: “Dẹ uzẹme, whọ zẹ e he.” (Itẹ 23:23) Uzẹme o tẹ rrọ owhẹ obọ ghaghae, Jihova o ti fi obọ họ kẹ owhẹ wo otoriẹ Ebaibol na.

Ọzadhe ọfa nọ ọ rẹ whaha ohwo ewo otoriẹ ovuẹ Ebaibol na họ ehoo nọ a re ro fi oware nọ o ta họ iruo. Jesu ọ ta kẹ ilele riẹ nọ: “A kẹ owhai ẹriẹ kpahọ eware ididi uvie odhiwu, rekọ a kẹ rae he. Keme evaọ ahwo ọnana e vọe avọ ogbori, ezọ rai i di no kẹ ẹme oyo.” (Matiu 13:11, 15) Ibuobu nọ Jesu ọ ta usiuwoma kẹ a j’owọ họ, a gwọlọ nwene he. A wo ohẹriẹ gaga no ọhreki nọ Jesu ọ ta kpahe evaọ ọtadhesẹ jọ. Nọ ọ ruẹ uzuu oghaghae jọ, ọhreki na ọ tẹ zẹ eware nọ o wo kpobi vẹrẹ vẹrẹ ọ tẹ dẹe. U fo nọ ewo otoriẹ uzẹme Ebaibol na o rẹ ghare omai obọ epọvo na re.—Matiu 13:45, 46.

Use-Abọ ọrọ Ewo Udu Omarokpotọ

Use-abọ ulogbo orọ ewo otoriẹ Ebaibol na họ ewo udu nọ ohwo ọ rẹ rọ roma kpotọ nnọ a wuhrẹ iẹe. O rẹ sae jọ bẹbẹ kẹ ohwo re ọ jẹ eriwo ọkpokpọ rehọ mi ohwo nọ o kpotọ vi ei. Dede na, ikọ Jesu Kristi a jọ ahwo “nọ a wuhrẹ hẹ.” (Iruẹru 4:13) Bi dhesẹ oware nọ o soriẹ nọ o rọ rrọ ere, Pọl o kere nọ: “Rekọ imoni, wha roro use rai na; keme orọnọ ibuobu i wo areghẹ wọhọ epanọ uruemu akpọ na o rọ họ, orọnọ ibuobu i wo ogaga ha, hayo a no emamọ uyẹ ze he; rekọ Ọghẹnẹ ọ sanọ igheghẹ akpọ na re o jọ omaovuọ kẹ iwareghẹ.” (1 Ahwo Kọrint 1:26, 27) Whọ tẹ ruẹ nnọ o re bẹbẹ re whọ roma kpotọ rọwo inọ ohwo nọ o kpotọ vi owhẹ o wuhrẹ owhẹ, kareghẹhọ inọ orọnikọ ọye o bi gine wuhrẹ owhẹ na ha, rekọ Ọghẹnẹ ọ be rehọ iẹe ruiruo ọvo. A re gbiku ọghọ riẹ hẹ re Jihova, “Owuhrẹ” mai nọ ọ mae rro na, o wuhrẹ ohwo.—Aizaya 30:20; 54:13.

O jọ bẹbẹ kẹ Neaman oletu ọgbaẹmo Siria na re ọ rehọ uthubro mi ohwo nọ o kpotọ vi ei. Nọ ọ jẹ gwọlọ usiwo kẹ oti riẹ, ọ tẹ nya bru Elaesha ọruẹaro Jihova. Rekọ odibo jọ gheghe ọye ọ vuẹ Neaman oware nọ Ọghẹnẹ  ọ gwọlọ nọ o ru re ẹyao riẹ ọ ruẹsi kpo. Ovuẹ na gbe oghẹrẹ nọ a rọ whae ze u ru rie bẹbẹ kẹ Neaman re ọ rehọ uthubro na, fikiere ọ tẹ kake se inọ o re yo ẹme ọruẹaro Ọghẹnẹ na ha. Uwhremu na, Neaman o nwene udu riẹ, ẹyao riẹ o te kpo. (2 Ivie 5:9-14) Ma rẹ rẹriẹ ovao ku oghẹrẹ use-abọ ovona nọ ma te bi se Ebaibol na. Ma sae ruẹ nnọ re a siwi omai evaọ abọ-ẹzi, o gwọlọ nnọ ma re nwene oghẹrẹ uzuazọ uyero mai. Kọ ma te roma kpotọ re ma kẹ ohwo jọ uvẹ wuhrẹ omai oware nọ u fo nọ ma re ru? Enọ i wo udu olọlọhọ nọ a rẹ roma kpotọ inọ omọfa o wuhrẹ ae ọvo a rẹ sae reawere ewo otoriẹ Ebaibol na.

Ohwo jọ nọ o dhesẹ emamọ uruemu họ ọzae jọ nọ ọ jọ ọkwa okpehru nọ o je ruiruo kẹ Kandase, ovie-aye Ẹtiopia. Ọ jọ evaọ akẹkẹ riẹ je zihe ziọ Africa nọ Filip olele na ọ dhẹ mu ei je bigbae. Filip ọ nọ ọzae na sọ o wo otoriẹ oware nọ o je se na. Ọzae na ọ roma kpotọ te epanọ ọ rọ kuyo nọ: “Ẹvẹ mẹ rẹ sae rọ riẹ, ogbẹrọnọ ohwo jọ o re dhesẹ otọ riẹ kẹ omẹ hẹ?” Nọ o wo otoriẹ Ẹme Ọghẹnẹ no, ọzae na ọ tẹ họ-ame. Kẹsena, “ọ tẹ ze ruabọhọ erẹ riẹ avọ oghọghọ.”—Iruẹru 8:27-39.

Ibuobu Isẹri Jihova a kparo te ahwo ho. Koka koka a bi ru ebe-iwuhrẹ Ebaibol nọ i bu vi ima ezeza kugbe ahwo evaọ iwou rai. Nọ Ebaibol na i re wuhrẹ omai edhere nọ o fo ẹrria na, dhesẹ ẹruore ọvo nọ o muẹro kẹ ahwo-akpọ na, je dhesẹ epanọ ma rẹ rọ riẹ Ọghẹnẹ na, ima ahwo buobu a ruẹ no inọ ewuhrẹ Ebaibol na gbe ewo otoriẹ oware nọ o ta o rrọ oware omawere gaga. O rrọ uvẹ omawere nọ u rovie fihọ kẹ owhẹ.

[Uwoho nọ o rrọ ẹwẹ-obe avọ 7]

O jọ bẹbẹ kẹ Neaman re ọ rehọ eme ọ odibo gheghe

[Uwoho nọ o rrọ ẹwẹ-obe avọ 7]

Otoriẹ Ebaibol na nọ ma re wo o rẹ sasa omai udu